John 3 - Chishemanituu Utayimuwin: Kaa Uskaach Testament

Jesus ekw maak Nicodemus

¹ Chii ihtaau naapeu Nicodemus e ishinihkaasut, Pharisee chii itapuu kaye eukun an peyakw kaa niikaanishkuwaat Jewa iinuuh.

² Peyakwaau maak e tipiskaayich chii nituwaapameu Jesus ekw kaa itaat, “Chischinuhamaachesuu, chichischeyimitinaan chiya chischinuhamaachesuu e chii pechi itishahuusk Chishemanituu. Wesh namui awen chika chii ihtuutam aniyuu maamishkaach ihtuwin chiya kaa ihtuutaman ekaa wiichihiikute Chishemanituu.”

E nituweyihtaakuhch miin chechii pimaatisiit awen

³ Jesus kaa itaat, “Kuiskw chiwiihtamaatin, namui awen chika chii waapahtamuweu Chishemanituu uchisheuchimaawiniyuu paatish miin pimaatisiite.”

⁴ Ekw Nicodemus kaa itaat, “Taanite miin chechii uhchi pimaatisiit awen shaash e chiishi nihtaauchit. Namui miin chika chii piihcheweu ukaawiih uspayaayihch miin chechii pimaatisiit.”

⁵ Jesus kaa itaat, “Kuiskw chiwiihtamaatin, namui awen chika chii piihcheu Chishemanituu uchisheuchimaawiniihch paatish nipiihch kaye Ahchaahkuwinihch uhchi pimaatisiite

⁶ Misiwe chiniichihiikunuuch e ihtaatwaau chichii uhchi ayaanaanuu uu wiyaas pimaatisiiwin. Mikw maak kaa payehchisiit ahchaahkw e ihtaat uhchi ekut wehchi ayaayihkw Ahchaahkw pimaatisiiwin.

⁷ Ekaawii maamishkaateyihtamihiikw uu e ititaan e nituweyihtaakusiyin miin chechii pimaatisiyin.

⁸ E yuutihch, mikw anite waa ishiiwech ekute e ishiiwech. Pehtaakun e yuutihch namui mikw chischeyihtaakun taanite nihaau wehchipayihch kaye taanite e ispayihch an e yuutihch. Ekun maak mwehch e ishinaakusit Kaa payehchisiit Ahchaahkw, namui chichischeyimaanuu aweyuu miin che miyaat pimaatisiiwiniyuu.”

⁹ Nicodemus maak chii iteu, “Taanite maak chechii uhchi ispayihch uu.”

¹⁰ Ekw Jesus kaa itaat, “Chiya eukw peyakw kaa chisteyimaakanuut chiskutamaachesuu utah Israelihch, yaapach aa namui chinisituhtuun uu kaa itweyaan.

¹¹ Kuiskw chiwiihtamaatin. Nitaayimuutenaan taan e ishi chischeyihtamaahch kaye taan kaa ishi waapahtamaahch namui maak yaapach waachipeyakw chiwii taapwehtuunaan.

¹² Namui chitaapwehtuunaawaau e wiihtamaatakuch taan e ispayihch utah aschiihch. Taanite maak chechii uhchi taapwehtamekw wiihtamaatakuche taan e iteyihtaakuhch anite kihchikiishikuhch.

¹³ Namui maak awen uhchi uhpiskaau kihchikiishikuhch ishi mikw Iinuu Ukusisa kihchikiishikuhch kaa uhtuhteyich.”

Taanite chechii uhchi ayaat awen kaachiche pimaatisiiwiniyuu

¹⁴ Mwehch aniyuu kaa ihtit aniyaa Moses mekwaach pakwaatiskamikaahch kaa ihtaatwaau kaa chikamuhaat chinepukuhkaan mistikuhch misiwe aweyuu chechii waapamaayich, ekun mwehch che ihtuutuwaakanuyich Iinuu Ukusisa.

¹⁵ Ekw maak misiwe awen kaa taapweyimaat che ayaat kaachiche pimaatisiiwiniyuu.

¹⁶ Wesh Chishemanituu e ishpish chii saachihaat misiwe aweyuu utah aschiihch chii miiweu kaa peyakushiyich Ukusisa, misiwe aweyuuh kaa taapweyimaayich ekaa chechii nishuunaatisiyich maak chechii ayaayich kaachiche pimaatisiiwiniyuu.

¹⁷ Wesh Chishemanituu chii pechi itishahweu Ukusisa utah aschiihch chechii pimaachihaayich aweyuuh namui wii chechii pechi nishuuwanaachimaayich.

¹⁸ An maak awen che taapweyimaakwe Ukusisimaauh namui chika uhchi nishuuwanaachimaakanuu, an maak awen ekaa che taapeyimaakwe shaash nishuuwanaachimaakanuu wesh namui taapweyimeu aniyuu Chishemanituu kaa peyakushiyich Ukusiyuuh.

¹⁹ Waashtewin chii pechi pachishtinaakanuu utah aschiihch mikw maak uste chii iteyihtamuch awenichii wanitipiskusiiwinihch chechii ishi pimaatisiitwaau ishpish wii waashtewinihch chechii ishi pimaatisiitwaau wesh chii machaatisiyuuch. Eukw maak uyuu che uhchi wiyaaskunaakanuutwaau.

²⁰ An maak awen kaa machaatisiit uhkaatam aniyuu waashtewiniyuu namui wii naatam wesh namui nituweyihtam chechii nuukuniyich umachaatisiiwin anite e waashteyich.

²¹ Mikw maak an awen taapwewinihch kaa ishi pimaatisiit anite e waashteyich ihtaau ekw maak e nuukuniyich taan e ishi nanihiihtuwaat Chishemanituu.

John siikahaahtaacheu kaa wiihtahk Jesus e aawiyich Christ

²² Anite Judea aschiihch chii ituhteu Jesus uchischinuhamuwaakan e wiicheukut. Ekute anite kaa ihtaatwaau, Jesus maak chii siikahaahtaacheu.

²³ Kaye wiya John chii siikahaahtaacheu anite Aenon, namui waahyuu anit uhchi Salimihch wesh naashch chii mishaayuu nipiiyuu anite. Muush chii nituwaapamikuu aweyuu e nituweyihtamiyich chechii siikahaahtuwaat, chii siikahaahtuweu maak.

²⁴ Eukw uyuu kaa ihtit John eshkw ekaa uhchi maakunaakanuut.

²⁵ Pasch maak aniyuuh John uchischinuhamuwaakanh ekw maak kutakach Jewa iinuuch chii machipayuuch e aayimuutahkwaau ayimihewin payehchihiiwewiniyuu.

²⁶ Chii nituwaapameuch John ekw kaa itaatwaau, “Chischinuhamaachesuu, an naapeu taapishkun kaa ihtaayekw anite waapanuutaahch an Jordan siipiihch, an kaa aayimuumat, anuhchiish kaye wiya siikahaahtaacheu kaye misiwe aweyuuh nituwaapamikuu.”

²⁷ John maak chii nishkweushiheu e itaat, “Namui awen chika chii ayaau chekwaayuu paatish Chishemanituu iteyimikute chechii ayaat.

²⁸ Chiyawaau maak chichii pehtuunaawaau uu kaa itweyaan, ‘Namayeu niya an Christ mikw maak nichii pechi niikaanitishihukuun niya chechii aayimuumak.’

²⁹ Muyaam uschinaapewaan wiya tipeyimeu aniyuu uschiskwewaan. Aniyuu maak uwiichewaakanh an uschinaapewaan, aniyuu kaa wiichihiiweyich ashuwaapamikuu che ishpish takushinit kaye miyeyihtamiyuu iskutak piyehtaakut. Ekun maak mwehch kaye niya e ishpish miyeyihtamaan shaash e ihtaat an kaa pechi itishahukut Chishemanituu.

³⁰ Iteyihtaakuniyuu maak wiya etituu chechii ati chisteyimaakanuut ekw niya wetaach ekaa chechii ishpish chisteyimikuyaan.”

An kihchikiishikuhch kaa uhchiit

³¹ Wesh an ishpimihch kaa uhtuhtet eukw an maauch e ispeyihtaakusit. An aschiihch kaa uhchiit, aschiihch ishi pimaatisiyuu, kaye aschiiyuu aayimuutam. An awen kihchikiishikuhch kaa uhchiit wiya maauch ispeyihtaakusuu.

³² Wiihtam taan kaa ishi waapahtahk kaye taan kaa ishi pehtahk anite kihchikiishikuhch mikw maak namui aweyuuh taapwehtaakuu.

³³ An awen kaa utinamuwaat taan e itweyich ekut e nuukuniyich e taapwehtahk Chishemanituuh e taapweucheyihtaakusiyich.

³⁴ An kaa pechi itishahukut Chishemanituu iteu taan e ishi miikut Chishemanituuh chechii itwet kaye mitun tekash piihchishkaakuu Chishemanituu Utahchaahkuyuuh.

³⁵ Uhtaawiimaau saachiheu Ukusisimaau. Chii miyeu misiwe chekwaayuu chechii wiishuwaatamiyich.

³⁶ An maak awen kaa taapweyimaat Ukusisimaau ayaau kaachiche pimaatisiiwiniyuu, ekw an awen ekaa kaa nanihiihtuwaat Ukusisimaau namui chika uhchi ayaau kaachiche pimaatisiiwiniyuu. Chishemanituu utaahkuyuwesuwiniyuu chika maahtakushkaakuu.