John 21 - Chishemanituu Utayimuwin: Kaa Uskaach Testament

Jesus kaa nuukushiishtawaat niishwaashch uchischinuhamuwaakanh

¹ Paatimaa maak ekw miin Jesus kaa nuukushiishtawaat uchischinuhamuwaakanh anite aniyuu saakahiikaniyuu Tiberias kaa ishinihkaateyich. Maaute maak kaa ishi nuukushiishtawaat.

² Maamuu chii ihtaauch uchii misiwe, Simon Peter, Thomas, an Kaa niishitwaau kaa ishinihkaataakanuut, Nathanael, an Cana kaa uhchiit anite Galilee aschiihch kaa ihtakuniyich, kaye aniyuu niishu Zebedee ukusisa ekw maak niishu kutakach chischinuhamuwaakanich.

³ Ekw Simon Peter kaa itaat aniyuu chischinuhamuwaakanh, “Nika nituu nuutamesen.” Kaa itikut, “Chika wiicheutinaan.” Kaa puusitwaau. Iskan tipiskaau maak chii ihtaauch ekaa uhchi pitahuyaatwaau.

⁴ Iskutak maak e ati petaapaniyich, Jesus chii niipuu anite yaayeu, mikw namui uhchi chischeyimeuch anichii chischinuhamuwaakanich Jesus aniyuuh.

⁵ Chii itikuuch maak, “Eshkw aa namui chipitahuyaanaawaau.” “Namui,” chii iteuch.

⁶ Ekw kaa itaat, “Chika pitahuyaanaawaau anite chinihiiwiniwaahch itehche ishi pakashtawehekwe an chitahiipiiwaau.” Kiipaa kaa pakashtawehwaatwaau aniyuu utahiipiiwaauh. Namui uhchi saupiteuch aniyuuh utahiipiiwaau iskutak wehchipitaatwaau e ishpish chii mihchetiyich unamesimuwaauh.

⁷ Aniyuuh maak chischinuhamuwaakan Jesus kaa saachihaat, chii iteu aniyuu Peter, “Utipeyihchikeu an.” Iskutak maak Simon Peter piyehtahk Utipeyihchikeu e aawiyich aniyuuh chii pushchishkam utakuhp aniyuu kaa manahk che aapatisit, ekw kaa pakashtawekwaashkuhtit.

⁸ Ekw anichii kutakach chischinuhamuwaakanich kaa pechi naatakahahkwaau, e utaapetwaau aniyuu utahiipiiwaauh e saakaschineyich namesa. Namui maak naashch taauch uhchi ihtaauch, wiyesh nishtwaau mitaahtumitanuu misit chii ishpishinaakusiichenich anit uhchi yaayeu.

⁹ Iskutak maak kaa kapaatwaau chii waapahtamuch ishkuteyuu namesa e takashwaakanuyich anit ekw maak aaihkunaauh.

¹⁰ Ekw Jesus kaa itikutwaau, “Peshuwaahkuch anichii pasch namesach kaa pitahuyaayekw.”

¹¹ Ekw Simon Peter kaa akwaasipitaat aniyuu ahiipiih. Wiyesh maak mitaahtumitanuu miin niyaayinumitanuu nishtu chii tashiichen aniyuuh namesa. Aat maak aniyuu e chii ishpish saakaschineyich namesa namui yaapach uhchi piikwepayuuh aniyuu utahiipiiwaauh.

¹² Ekw kaa itikutwaau Jesus, “Aashtamukw, pechi miichisukw.” Namui maak waachipeyakw anichii chischinuhamuwaakanich uhchi wii iteuch, “Awen chiya.” Wesh chii chischeyimeuch Utipeyihchikeu aniyuuh.

¹³ Jesus maak chii naateu, kaa utinaat aniyuu aaihkunaauh ekw kaa maamaatinamuwaat, kaye aniyuu namesa ekun kaa ihtuutawaat.

¹⁴ Eukw maak uyuu nishtwaau kaa nuukushiishtawaat Jesus aniyuuh uchischinuhamuwaakanh kaa ishpish wanishkaat nipuwinhch uhchi.

Jesus ekw maak Peter

¹⁵ Iskutak maak kaa chiishi miichisutwaau, Jesus chii iteu Simon Peter, “Simon, chii kaa ukusiitutaask John, uste aa niya chisaachihiin ishpishaat uchii.” Ekw Simon Peter kaa ishi nishkweushihaat, “Ehe, Utipeyihchikeu, chichischeyihten e saachihiitaan.” Jesus maak chii iteu, “Nanaakachihiich nimaanishchaanishimach.”

¹⁶ Niishwaau maak miin Jesus chii iteu aniyuu Simon Peter, “Simon, John kaa ukusiitutaask, chisaachihiin aa.” Ekw kaa ishi nishkweushihaat, “Ehe, Utipeyihchikeu, chichischeyihten e saachihiitan.” Jesus maak chii iteu, “Nanaakachihiich nimaanishchaanishimach.”

¹⁷ Nishtwaau maak miin Jesus chii iteu, “Simon, John kaa ukusiitutaask, chisaachihiin aa.” Ekw Peter naashch kaa macheyihtahk wesh ekw nishtwaau kaa kakwechimikut Jesus e itikut, “Chisaachihiin aa.” Ekw kaa itaat, “Utipeyihchikeu, misiwe chekwaan chichischeyihten, chichischeyihten e saachihiitaan.” Jesus maak chii itikuu, “Nanaakachihiich nimaanishchaanishimach.

¹⁸ Kuiskw chiwiihtamaatin, eshkw e chii uschiniichiiwiin mikw taan waa aihtiin chichii ihtin kaye mikw taanite waa ituhteyin ekute kaa ituhteyin. Iskutak maak chisheinuuyine, suwanischeyine maak chika maahkupitaakanuu chitihchii ekw che ituhtahiikuyin anite ekaa wii ituhteyin.”

¹⁹ Uyuu maak Jesus kaa itwet chii nituweyimeu chechii chischeyihtamiyich taanite che ishi nipiyich chechii uhchi chisteyimaakanuyich Chishemanituu. Ekw Jesus kaa itaat, “Pechi papaawiicheuh.”

Jesus ekw maak an kutak chischinuhamuwaakan

²⁰ Peter chii kweschikaapuu kaa waapamaat aniyuu kutak chischinuhamuwaakan, aniyuu Jesus kaa saachihaayich. Eukun aniyuu kaa aaspichisimuyich Jesus e ihtaat mekwaach kaa miichisutwaau kaye kaa ishi kakwechimaat, “Utipeyihchikeu, awen che wiyeshipachishtinisk.”

²¹ Iskutak wiyaapamaat Peter uyuu naapeu chii kakwechimeu Jesus, “Utipeyihchikeu, uu maak wii naapeu.”

²² Jesus chii itikuu, “Nituweyimike chechii pimaatisiit paatish miin takushinuuche, taan maak chechii ihtiyin chiya. Pechi nuushuushkuu chiya.”

²³ Ekw kaa mishihtepayihch tipaachimuwin anit mekwesiin wiichishaanimaauch e ihtaatwaau aniyuu ekaa che uhchi nipit uu chischinuhamuwaakan. Mikw maak namui uhchi itwekupane Jesus ekaa che uhchi nipiyich. Chii iteu, “Netuweyimaauche eshkw chechii pimaatisiit takushinuuche, taan maak chechii ihtiyin chiya.”

²⁴ Eukun uu chischinuhamuwaakan kaa tipaatutahk uyuuh chekwaayuuh, kaye kaa masinahahk uyuuh chekwaayuuh. Chichischeyimaanuu maak e taapwemakaniyich misiwe taan kaa ishi wiihtahk.

E ati chiishipayihch uu miywaachimuwin

²⁵ Mihcheniyuu maak yaapach kutak chekwaayuu Jesus e chii ihtuutahk. Misiwe paahpeyakw waawiihtaakanuyikwaau chekwaayuuh taan kaa ihtit, namui chipaa uhchii tepashteuh utah aschiihch ushihtaakanuuhkwaau masinahiikanh.