John 20 - Chishemanituu Utayimuwin: Kaa Uskaach Testament

Kaa pisikwaach chiipaikamikw

¹ An kaa chisheayimiheuchiishikaach wiipach maak miin e ati waapahch, eshkw e ukaach anite chiipaikamikuhch chii ituhteu Mary Magdalene kaa waapamaat aniyuu asiniih e chii iichehtahaakanuyikupanen anit e uhchi piihchaanuyich.

² Kaa chihchipahtaat kaa nituwaapamaat Simon Peter ekw maak aniyuu kutak chischinuhamuwaakan Jesus kaa saachihaayich ekw kaa itaat uyuuh, “Chii utinamuweuch Utipeyihchikeu wiiyuuyuu namui maak nichischeyihtamuwaan taanite kaa chiskashtaawaatwaau.”

³ Ekw Peter kaa wiiwiit iskutak kaa itweyich uyuu e wiicheukut aniyuu kutak chischinuhamuwaakan. Anite chiipaikamikuhch ekute kaa ishi chistuhtetwaau.

⁴ Taapishkun chii chihchipahtaauch mikw maak chii aakuschipayistaakuu Peter aniyuu kutak chischinuhamuwaakan ekw wiya niishtam kaa paapahtaayich anit.

⁵ Iskutak maak piyaapahtaat anite an kutak chischinuhamuwaakan chii nuwewiyuu anite e piihtaapahtahk aniyuu chiipaikamikuyuu. Mikw machunishiyuu chii waapatam e ashteyich anite. Namui uhchi piihcheu.

⁶ Chek kaa uhchi paapahtaat Simon Peter ekw kaa piihchet wiya anite. Chii waapahtam aniyuu machunishiyuu anit e ashteyich.

⁷ Ekw aniyuu kutachiyuu machunishiyuu kaa aapataniyich Jesus kaa piskweyetinikanuyich ustikwaan tipaan anite chii ashteyuu e chii nuutamechinikanuyikupane.

⁸ An kutak chischinuhamuwaakan, an niishtam kaa paapahtaat anit, kaye wiya chii piihcheu anite, kaa waapahtahk kaye kaa ati taapwehtahk e chii uhpiskaayikupanen.

⁹ Uyuu maak mekwaach eshkw namui uhchi nisituhtamuch anit aniyuu Chishemanituu utayimuwinihch kaa itashteyich miin che wanishkaayich.

¹⁰ Ekw kaa chiiwetwaau wiichiwaawaahch uchii chischinuhamuwaakanich.

Jesus kaa nuukushiishtawaat Mary Magdalene

¹¹ Ekut anit wiiwiitamihch aniyuu chiipaikamikuyuu kaa niipuut Mary e maatut. Aniyuu maak e maatuut chii nuwewiyuu e piihtaapahtahk aniyuu chiipaikamikuyuu.

¹² Ekut kaa waapamaat niishu enchil e waapaaspisuyich e apiyich anit Jesus kaa chiskashtaakanuyich wiiyuu. Peyakw anite e chii ishi ustikwaanuyich chii apuu ekw an kutak anite itehche e chii ishi usitiihch ekute kaa apit.

¹³ Ekw kaa itikut aniyuu enchil, “Iskweu, Chekwaan wehchi maatuuyin.” Ekw Mary kaa itaat, “Chii utineuch Nitipeyihchikem namui maak nichischeyimaauch taanite kaa chiskahaatwaau.”

¹⁴ Uyuu maak kaa itwet chii iicheskweyuu kaa waapamaat aweyuu e niipuyich anite uspiskunihch, Jesus maak aniyuu mikw namui uhchi nisituunaweu.

¹⁵ Chii itikuu maak, “Iskweu, chekwaan wehchi maatuuyin. Awen kaa nanituwaapamat.” Kaa kanawaapamaat Mary aniyuu nihtaauchihchikanh kaa naanaakachihtaayich e iteyimaat, ekw kaa itaat, “Pechi wiihtamuu maa taanite kaa ahiit ekw maak che nituwaapamak.”

¹⁶ “Mary,” chii iteu Jesus. Chii kweschikaapuu Mary ekw kaa itaat aniyuu Jesus Hebrew e ishi ayimit, “Rabboni,” chii iteu. Uu maak Rabboni kaa iinaanuuhch e itweshtamuwaataakanuuhch Utipeyihchikeu iinaanuu.

¹⁷ Jesus kaa itwet, “Ekaawii taahtin wesh eshkw namui Nuuhtaawii e ihtaat nuuhchii ishi uhpiskaan. Nituwaapamach niichishaanich che wiihtamuutwaau che uhpiskaauch Nuuhtaawii kaye chiyawaau Kuuhtaawiiwaau e ihtaat ishi, Nichishemanituum kaye chiyawaau Chichishemanituumiwaau.”

¹⁸ Mary Magdalene kaa chistuhtet e naanituwaapamaat aniyuu chischinuhamuwaakan ekw kaa wiihtamuwaat e itaat, Utipeyihchikeu nichii waapamaau. Chii wiihtamuweu kaye aniyuu taan kaa itikut che itaat.

Jesus kaa nuukushiishtawaat uchischinuhamuwaakanh

¹⁹ Aniyuu maak e ati utaakushiyich aniyuu e chiishikaayich chii nishtawiyuuch anichii chischinuhamuwaakanich. Chii aataapishkahuusuuch mekwaach aniyuu e nistuuwiitwaau wesh chii kushteuch aniyuu Jewa uchimaau. Sischikuuch maak chii uhchi waapameuch Jesus e niipuyich anit e ihtaatwaau. Chii itikuuch maak, “Chiyaameyihtamukw.”

²⁰ Iskutak maak kaa chiishi waachiyemaat aniyuu uchischinuhamuwaakanh ekw kaa waapahtiyaat utihchii kaye uhpimeyuu. Nuwach maak chii sichiyeyihtamuch e chii waapamaatwaau utipeyihchikemuwaau.

²¹ Miin kaa ayimihaat aniyuu uchischinuhamuwaakanh e itaat, “Chiyaameyihtamukw. Mwehch Nuuhtaawii kaa pechi itishahuut chiyaameyihtamuwinihch ishi kaye niya chititishahutinaawaau chiyaameyihtamuwinihch ishi.”

²² Ekw anite e ihtaayich kaa ishi ayehet kaa itaat, “Utinaahkw Kaa payehchisit Ahchaahkw.

²³ Wepeyihtamuwekwe awen chika wepeyihtamuwaakanuu, ekaa wepeyihtamuwekwe namui chika uhchi wepeyihtamuwaakanuu.”

Jesus ekw maak Thomas

²⁴ An maak peyakw chischinuhamuwaakan Thomas kaa ishinihkaasut aayaahch e ishinihkaataakanuut peyakw an kaa niishitwaau chii ishinihkaataakanuu, namui uhchi ihtaau wiya Jesus kaa takushiniyich.

²⁵ Aniyuu maak e wiihtamaakut aniyuuh kutak chischinuhamuwaakanh e chii waapamaayich Jesus, namui uhchi taapwehtaweu. Chii iteu, “Namui nika uhchi taapwehten paatish chii taahtinamuche utihchiih anit kaa chiistaaskuhwaakanuut kaye paatish chii taahtinake anit uspakaahch.”

²⁶ Yaanaaneu chiishikaau maak ishpish ekw miin kaa nishtuwiitwaau anichii chischinuhamuwaakanich. Thomas maak kaye wiya ekut kaa ihtaat. Chii aataapishkahwaakanuuch chishtuhkanihch yaapach maak Jesus chii pechi piihcheu kaa pechi uhchishkuukaapuushtawaat.

²⁷ Kaa itaat aniyuu Thomas, “Taahtinh nitihchii kaye ute uhpimeyuu pechi taahtinh, ekun ekw ishpish aanuwehta, taapwehta ekw.”

²⁸ Ekw Thomas kaa nishkweushihaat e itaat, “Nitipeyihchikem kaye Nichishemanituum.”

²⁹ Jesus kaa itaat, “Chitaapwehten aa mikw e pechi waapamiin. Shaweyihtaakusuuch anichii kaa taapwehtahkwaau aat ekaa uhchi waapamitwaau.”

Taan e itaapatahch uu masinahiikan

³⁰ Jesus uchischinuhamuwaakan mihchetu chii waapamikuu maamishkaach chekwaayuu e ihtuutahk ekaa uhchi masinahiikanuyikwaau utah masinahiikanihch.

³¹ Eukw uyuuh kaa masinahiikanuukwaau chechii taapwehtamekw eukw uyuuh Jesus Chishemanituu Ukusisa ekw maak taapweyimekwen che ayaayekw pimaatisiiwin.