John 2 - Chishemanituu Utayimuwin: Kaa Uskaach Testament

Canahch kaa niipuunaanuuhch

¹ Nishtu chiishikaau maak ishpish chii niipuunaanuu anite an ihtaawin Cana kaa ishinihkaatech anite Galilee aschiihch kaa ihtakuhch. Ekute anite kaa ihtaayich Jesus ukaawiih.

² Jesus ekw maak aniyuu uchischinuhamuwaakanh kaye wiyawaau chii wiishaamaakanuuch aniyuu e niipuunaanuyich,

³ Iskutak maak misiwe kaa chistaakanuuhch an shuuminaapuu, Jesus chii itikuu ukaawiih, “Shaash nuuhtepayuuch shuuminaapuuyuu.”

⁴ Jesus maak chii iteu, “Iskweu, chekwaan wehchi wiihtamuyin an, taapaa eshkw utihchipayuu an nitipahiikan anit che chischeyimakuyaan awen e aawiyaan.”

⁵ Ekw Jesus ukaawiih kaa itaat aniyuu aapachihaakanh, “Mikw taan che itashumitaakwe eukw aniyuu ihtuutamuwaahkw.”

⁶ Chii ihtakunh maak anit kutwaashch asiniiyuu puutaih. Paahpeyakw maak uyuuh puutaih wiyesh Niishtunuu maak nishtumitanuu minaakan chechii ispihtaakamihch nipii chii ayaaspishaauh. Jewa iinuuch maak e chishtaapawaachetwaau itaapachihtaauch uyuu nipiiyuu e ihtuutahkwaau taan e itashumikutwaau utayimiheu wiishuwewinawaau.

⁷ Ekw Jesus kaa itaat aniyuu aapachihaakanh, “Saakaschinepitaakw nipii utah uyuuh puutaih.” Tekash maak chii saakaschinepitaayuuh.

⁸ Ekw miin kaa itaat, “Kwaapahamukw apishiish che ituhtutuwekw an makusheuchimaau.” Eukun kiipaa kaa ihtiyich.

⁹ Chii kuchishtam an makusheuchimaau aniyuu nipiiyuu, shaash maak shuuminaapuuhch chii itaakamiyuu. Namui uhchi chischeyihtam taanite kaa uhchipayiyich aniyuu shuuminaapuuyuu. Anichii maak wii aapachihaakanich aniyuu nipiiyuu kaa kwaapahahkwaau chii chischeyihtamuch wiyawaau taanite kaa uhchipayiyich aniyuu shuuminaapuuyuu. Ekw an makusheuchimaau kaa wiishaamaat aniyuu uschinaapewaan,

¹⁰ kaa itaat, “Misiwe awen e makushet, aniyuu maauch e miywaayich shuuminaapuuyuu niishtam pimipayihtaau, ekw iskutak e ati miyuhkasuyich aniyuu kaa wiishaamaat, ekw aniyuu ekaa kaa wiihkaniyich shuuminaapuuyuu pemipayihtaat. Chiya maak chekwaan wehchi maahchishtai pimipayihtaayin an kaa miywaach shuuminaapuu.”

¹¹ Ekut maak anit Canahch anite Galilee aschiihch, niishtam kaa maamishkaach ihtit Jesus, ekut kaa nuukuniyich uchisteyihtaakusuwin. Ekut maak kaa uhchi taapweyimikut uchischinuhamuwaakanh.

¹² Ekw Jesus kaye maak ukaawiih ekw maak wiichishaanh kaye aniyuu uchischinuhamuwaakanh chii ituhteuch anite ihtaawiniyuu Capernaum kaa ishinihkaateyich, ekute anite kaa ihtaatwaau. Namui mikw naashch mihchetu chiishikaau uhchi ihtaauch anite.

Chisheayimiheukamikuhch kaa ituhtet Jesus

¹³ Shaash maak chii peshunaakuniyuu Jewa iinuuch kaa chii makushetwaau, miyaaskaacheu makushewin kaa ishinihkaateyich, ekw anite Jerusalemihch kaa ituhtet Jesus.

¹⁴ Anite maak chisheayimiheukamikuhch che ati piihchet, chii waapameu naapeuh e ataaweyitwaauh mistusa kaye maanishchaanisha kaye piyeshiisha, kaye aniyuu kaa miishkutuunaayich shuuliyaau e apiyich anite.

¹⁵ Ekw kaa ushihtaat pishishtehiikaniyuu apisiyuu e aapachihtaat, ekw kaa wiiwiitishihwaat aniyuuh kaa ataaweyitwaau kaye aniyuu awesiisa anit chisheayimiheukamikuhch, taapishkun aniyuu maanishchaanisha kaye aniyuu mistusa. Chii kwetipuwepinamuweu kaye umiichisuunaahtikuyuuh aniyuu kaa miishkutuunamiyich shuuliyaayuu, kaa aschewepinamuwaat aniyuu ushuuliyaamiyuu.

¹⁶ Chii iteu maak aniyuu piyeshiisha kaa ataawaacheyitaauh, “Maachiikw wiiwiihtahaahkuch nete anichii. Nuuhtaawii uyuu wiichi, namayeu uu ataawaaukamikw. Ekun ekw ishpish ataawekw chekwaan utah.”

¹⁷ Uchischinuhamuwaakanh maak chii uhchi chischisiyuuh anite masinahiikanihch kaa itashteyich, Mitun nika shaakuuchihiikuun naashch e saachihtaayaan chiwaaskaahiikanim.

¹⁸ Ekw aniyuuh kaa niikaanishkuwaayitwaauh Jewa iinuuh kaa pechi nituwaapamikut, kaa itikut, “Awen kaa itashumisk an kaa ihtuutaman, chekw maamishkaach ihtuwin chechii waapahtiyaahch taapwe Chishemanituu e chii itashumisk chechii ihtuutaman an kaa ihtuutaman.”

¹⁹ Ekw Jesus kaa ishi nishkuushihaat, “Wanaachihtaakw uu Chisheayimiheukamikw, nishtu chiishikaauh maak ishpish miin kutach nika wiikaapuuhtaan.”

²⁰ Ekw kaa itaatwaau, “Nishtu chiishikaauh aa ishpish shaash miin chika chii wiikaapuuhtaan. Nemitanuu kutwaashch pipun chii tashiihkaakanuu uu chisheayimiheukamikw kaa wiikaapuuhtaakanuuhch.”

²¹ Wiiyuu aniyuu kaa ayimitutahk Jesus aniyuu kaa itwet chechii wiikaapuuhtaat ayimiheukamikuyuu nishtu chiishikaauh ishpish.

²² Iskutak maak kaa wanishkaanaakanuut nipuwinihch uhchi, ekw kaa chischisiyich aniyuu uchischinuhamuwaakanh uyuu kaa itwet. Chii taapwehtamuch maak taan e itashteyich Chishemanituu utayimuwinihch kaye taan kaa itweyich Jesus.

Jesus tekash chischeyimeu taan e iteyihtaakusiyich aweyuuh

²³ Mekwaach maak Jesus kaa ihtaat anite Jerusalemihch aniyuu mekwaach kaa makushaanuyich miyaaskaacheu makushaaniyuu, mihchetu aweyuu chii taapweyimikuu wiya taapwe e aawiyit Christ iskutak kaa waapamikut e maamishkaach ihtit.

²⁴ Jesus maak namui uhchi taapweucheyimeu wesh misiwe aweyuu chii chischeyimeu taan nihaau e iteyihtaakusiyich.

²⁵ Namui kaye uhchi nituweyihtam chechii wiihtamaakut aweyuu taan e iteyihtaakusiyich aweyuu wesh chii chischeyimeu taan nihaau e iteyihtaakusiyich.