John 19 - Chishemanituu Utayimuwin: Kaa Uskaach Testament

¹ Ekw Pilate kaa itashuwaataat Jesus chechii chistuhtahaakanuyich chechii nituu pishishtehwaakanuyich.

² Anichii maak shimaakanishach chii ushihtaauch uchimaau astutiniyuu kaa kaasutewaayikwaau niipisiyaahtikw e aapachihtaatwaau. Kaa pushchishkamutiyaatwaau Jesus aniyuu astutiniyuu. Kaye e chinwekaniyich akuhpiyuu e mihkwekaniyich chii pushchishkamutiyeuch.

³ Chii maayeyimeuch mwehch e maamihchimaatwaau e itaatwaau, “Eukw chiya Jewa iinuuch uchisheuchimaamuwaauh.” Kaye chii utaamihkwehweuch utihchiiwaau e aapachihtaatwaau.

⁴ Miin kaa wiiwiit Pilate kaa itaat aniyuu Jewa iinuuh, “Miin chika pechi wiiwiihtahaakanuu uu naapeu chechii waapahtamekw ekaa miskamuch taan chechii ishi nishuuwanaachimak niya wii.”

⁵ Ekw Jesus kaa pechi wiiwiit anit aniyuu chisheuchimaaukuuhpaaneu wiichiyuu e chichishkahk aniyuu uchimaau astutiniyuu kaa kaasutewaayikwaau niipisiyaahtikuhch kaa uhchi ushihtaakanuyich kaye maak aniyuu kaa chinwekaniyich akuhpiyuu kaa mihkwekaniyich e chichishkahk. Ekw Pilate kaa itaat aniyuuh Jewa iinuuh, “Kanawaapamaahkw maa uu naapeu.”

⁶ Anichii maak kaa niikaanapitwaau ayimiheuchimaauch ekw maak anichii Jewa iinuuh kaa niikaanishkuwaatwaau iskutak wiyaapamaatwaau Jesus, chii tepweuch e itwetwaau, “Chiistaaskuhwaahkw, chiistaaskuhwaahkw.” Pilate chii iteu, “Chiyawaau nituu chiistaaskuhwaahkw. Namui nimiskamuwaan taan kaa ishi machituutamukwe.”

⁷ Ekw anichii Jewa iinuuch kaa nishkweushihaatwaau Pilate e itaatwaau, “Nitayaanaan wiishuwewin, itashteu anit niwiishuwewinaahch chechii itashuwaanuyich chechii nipahaakanuut aniyuu e chii itwet wiya e aawit Chishemanituuh Ukusisa.”

⁸ Pilate maak kaa pehtahk uyuu e iinaanuyich, etituu chii sechisuu.

⁹ Ekw miin kaau kaa piihchet anite chisheuchimaaukamikuhch ekw kaa kakwechimaat Jesus, “Taanite wehchiyin.” Namui uhchi chistuu Jesus.

¹⁰ Ekw Pilate kaa itaat aniyuu Jesus, “Namui aa chiwii ayimihiyin. Namui aa chichischeyihten e ayaayaan tipeyihchichewin chechii itashuweyaan chechii pachishtinikuyin maak chechii chiistaaskuhukuyin.”

¹¹ Ekw Jesus kaa nishkweushihaat e itaat, “Mikw chesuwaat Chishemanituu e chii miisk aniyuu chechii ihtuut eukun wehchi ihtakuhch an chechii ihtiyin. An maak awen chiya e ihtaayin kaa ishi pachischisuwaasit eukw etituu mechi ihtuutahk.”

¹² Uyuu maak kaa itweyich Jesus Pilate, chii wii pachishteneu. Ekw mikw anichii Jewa iinuuch kaa tepwetwaau e itwetwaau, “Paachishtinekwe Jesus namui chiwiichewaakanitutawaawaau chisheuchimaau siisar. Wesh awen kaa chisheuchimaauhiisut namui nahiihtaweu Caesar.”

¹³ Iskutak maak Pilate piyehtahk aniyuu kaa ishi tepuweyich aniyuu Jewa iinuuh wiiyawiitimihch chii ituhtaheu aniyuu Jesus ekw kaa waweyapit anit wiyaaskunichesuu tehtapuwinihch, anite e asiniihkaanuuniyich e chii asteyich. Hebrew e ishi ayiminaanuuhch Gabbatha ishinihkaataakanuu anit aniyuu kaa asiniihkaanuuniyich.

¹⁴ Mekwaach maak an e chiishikaach miyaaskachewin makushewin e ayeskuushtaakanuuhch chiishi chiishikaau. Chekaat maak chii aapihtaachiishikaayuu Pilate kaa itaat aniyuu Jewa iinuuh, “Kanawaapamaahkw maak uu chichisheuchimaamuwaau.”

¹⁵ Chii ishi taachikweuch maak anichii Jewa iinuuch, “Nipahaahkw, nipahaahkw, chiistaaskuhwaahkw,” e itwetwaau. Ekw Pilate kaa itaat, “Chinituweyiminaawaau aa chechii pachishtinak chichisheuchimaamuwaau chechii chiistaaskuhwaakanuut.” Ekw aniyuuh kaa niikaanapitwaau ayimiheuchimaauh chii nishkweushihiikuu Pilate e itikut, “Mikw Caesar nuuchisheuchimaaminaan namui kutak awen.”

¹⁶ Ekw Pilate kaa pachishtinaat Jesus anite aniyuu shimaakanisha e ihtaayich chechii chiistaaskuhwaatwaau aashiteyaahtikuhch. Ekw kaa chistuhtahaatwaau.

Jesus kaa chiistaaskuhwaakanuut aashiteyaahtikuhch

¹⁷ Kaa chistuhtahaatwaau aniyuu Jesus e pimuhtahaayich utaashiteyaahtikumiyuu anite kaa ituhtahaatwaau “Chiipaistikwaan kaa ihtakuhch” kaa ishinihkaateyich. Uu maak “Chiipaistikwaan kaa takuhch” kaa ishinihkaatech, Hebrew e ishi ayiminaanuuhch “Golgotha” iinaanuu.

¹⁸ Ekute maak anite kaa chiistaaskuhwaatwaau kaye maak niishu naapeu chii chiistaaskuhwaakanuuyuu kaa chimayaakanuyich iituu anit e ihtaat.

¹⁹ Ekw Pilate kaa masinahahk masinahiikaniyuu chechii chikamuhtaakanuyich anit ishpimihch Jesus utaashiteyaahtikumiihch e itashteyich, “Jesus Nazareth kaa uhchiit eukw uyuu Jewa iinuuch uchisheuchimaamuwaau.”

²⁰ Mihchetu Jewa iinuuch chii pechi ayimihtaauch aniyuu masinahiikaniyuu wesh namui uhchi waahyuunaakuniyuu aniyuu ihtaawiniyuu anit kaa ihtaatwaau. Nishtuyich maak ayimuwinh chii ishi masinahiikanuyikupane aniyuu masinahiikaniyuu Hebrew e ishi ayiminaanuuhch, Latin ekw maak Greek.

²¹ Ekw anichii Jewa iinuuch aniyuuh kaa niikaanapitwaau utayimiheuchimaamuwaauh chii iteuch aniyuu Pilate, “Namui chipaa uhchi itashtaan an Jewa Uchisheuchimaamuwaau kaa itashtaayin.” Aahchisinahah an teyakuch chechii itashtech, “Chii iteu, Niya Jewa iinuuch uchisheuchimaamuwaau.”

²² Pilate chii iteu, “Taan kaa itashtaayaan ekun che itashtech.”

²³ Iskutak kaa chiistaaskuhwaatwaau aashiteyaahtikuhch anichii shimaakanishach aniyuu Jesus ekw aniyuu uchekwaanimiyuu kaa maamaatinamaatutwaau e neutwaau paahpeyakw chii ayaauch peyakw chekwaayuu. Aniyuu maak akuhpiyuu uschich kaa chii chichishkamiyich e seyekaniyich chii ishinaakuniyuu namui uhchi ihtakuniyuu anit chechii pimikwaataakanuyich.

²⁴ Chii itituuch maak anichii shimaakanishach, “Ekush ekaa uhchi piikushamuwaataau uyuu utakuhp. Kuchishihiitutaau e chaahkahiicheyihkw awen che taauhiichekwe aniyuu akuhpiyuu.” Uyuu maak kaa ihtitwaau ekut kaa tipipayiyich taan kaa itasinahiikanuyikupane Chishemanituu utayimuwinihch, Chii maamaatinamaatuuch nichekwaanimh kaye chii taauhiikaanuu nitakuhp.

²⁵ Jesus maak ukaawii peshuch chii niipuuyuu anit Jesus utaashiteyaahtikumiihch kaye ukaawii wiichishaaniskwemiyuu ekut kaa niipuyich ekw maak Mary, Clopas wiichiskweu ekw maak Mary Magdalene.

²⁶ Jesus chii waapameu aniyuu ukaawii kaye aniyuu uchischinuhamuwaakan kaa saachihaat e niipuyich anit ekw kaa itaat aniyuu ukaawii, “Eukuu chikus.”

²⁷ Ekw kaa itaat aniyuu uchischinuhamuwaakan kaa saachihaat, “Eukuu chikaawii.” An maak chischinuhamuwaakan ekut kaa uhchi chihchi kanuweyimaat Jesus ukaawiyuu anite wiichihch.

Jesus kaa nipit

²⁸ Paatimaa maak Jesus chii chischeyihtam shaash misiwe chekwaayuu e chii chiishipayiniyich ekw kaa itwet, “Niwii minihkwen.” Eukw uyuu kaa itwet chechii tipipayiyich taan kaa ishi niikaan wiihtaakuniyich anite Chishemanituu utayimuwinihch che itwekupane.

²⁹ Chii ihtakun maak anit wiyaakan e saakaschinepech e wiisakaakamihch shuuminaapuu, ekut anit kaa akuhtataatwaau uhpanishiyuu kaa akwaapahkaatahkwaau mistikuhch ekw anite utuuniihch kaa ishi itaaskunamuwaatwaau.

³⁰ Iskutak Jesus kaa minihkwet ekw kaa itwet, “Shaash chiishipayuu.” Ekw kaa chistaawaniskweyit kaa ati puunipimaatisiit.

Uspakaahch kaa tahkamaakanuut Jesus

³¹ Anichii Jewa iinuuh kaa niikaanishkuwaatwaau namui uhchi nituweyimeuch aniyuuh e nishtiyich kaa chiistaaskuhwaakanuyich naapeu eshkw chechii itakuchiniyich waapaniyiche wesh eukw aniyuu che chisheayimiheu chiishikaayich, ekw kaa itaatwaau Pilate chechii itashuweyich chechii naatwaakaatehwaakanuyich aniyuuh naapeuh, ekw maak chechii niihtinikaanuyikwaau wiiyuwaauh chechii chiskashtaakanuyikwaauh.

³² Ekw anichii shimaakanishach kaa naatwaakaatehwaatwaau aniyuu niishu naapeuh kaa chiistaaskuhwaakanuyitwaau Jesus kaa chiistaaskuhwaakanuyich.

³³ Jesus maak shaash chii puunipimaatisiyuu wiya iskutak wetihtaatwaau anichii shimaakanishach namui maak uhchi naatwaakaatehweuch.

³⁴ Peyakw maak an shimaakanish chii tahkameu aniyuu Jesus anite uhpimeyuu. Tiiwehch kaa uhchi kuikwaasikuuniyich umihkuyuu kaye nipiiyuu anit uhchi.

³⁵ An awen tipiiwe uschiishikuhch e chii uhchi waapahtahk uyuu kuiskw wiihtam taan kaa ispayiyich chechii taapwehtamekw kaye chiyawaau ayimihtaayekwe. Chischeyihtam e taapwet taan e ishi wiihtahk.

³⁶ Chii ispayuu uu chechii tipipayihch taan kaa ishi niikaan wiihtaakanuukupane Chishemanituu utayimuwinihch che ispayikupane, itashteu, Namui waachipeyakw uhchi naatwaahiikanuuyuu wiya uskanh.

³⁷ Kaye itashteu Chishemanituu utayimuwinihch, Chika kanawaapameuch aniyuu kaa tahkamaatwaau.

Jesus wiiyuu kaa nahiikaakanuyich

³⁸ Patimaa maak Joseph, Arimatheahch kaa uhchiit naapeu chii nituweyihtamuweu Pilate Jesus wiiyuuyuu chechii chiskashtaawaat. Joseph maak chiimuut chii taapweyimeu Jesus wesh chii kushteu aniyuu Jewa iinuuh kaa niikaanishkuwaayich. Chii niskumuu maak Pilate taan kaa ishi nituweyihtamiyich Joseph. Ekw maak Joseph kaa utinamuwaat Jesus wiiyuuyuu kaa chistuhtataawaat.

³⁹ Nicodemus maak chii wiicheukuu. Eukuu Nicodemus e tipiskaayich maauch niishtam kaa pechi naataat Jesus. Chii ayaau maak tuuminikaniyuu niipisiih myrrh ekw maak aloe kaa ishinihkaateyikwaauh e chii uhchi ushihtaakanuyich. Wiyesh mitaahtumitanuu tipaapekahiikan chii ispihtinikuniyuu uyuu tuuminikaniyuu.

⁴⁰ Ekw uchii niishu naapeuch Nicodemus ekw maak Joseph kaa utinamuwaatwaau Jesus wiiyuuyuu kaa tihtipayechinamuwaatwaau machunishihch kaye chii wiihchimaakutaaweuch wesh ekun kaa chii ihtitwaau Jewa iinuuch.

⁴¹ Anit kaa chiistaaskuhwaakanuut Jesus chii ihtakun nihtaauchihchikan aschii kaye chii ihtakun anit ekaa nihtaa uhchi aapatahch chiipaikamikw.

⁴² Aniyuu maak e chii ishi chiishikaayich, e ayeskuwiihkaakanuyich miyaaskaacheu makushewiniyuu, kaye maak e peshunaakuniyich aniyuu chiipaikamikuyuu, ekute anite kaa ashtaawaatwaau Jesus wiiyuuyuu.