John 18 - Chishemanituu Utayimuwin: Kaa Uskaach Testament

Jesus kaa maakunaakanuut

¹ Iskutak Jesus kaa chiishi ayimihaat ekw kaa chistuhtetwaau aniyuu uchischinahamuwaakanh e wiicheukut. Ekw kaa aashuuhtetwaau aniyuu siipiisiyuu Kidron kaa ishinihkaateyich. Chii ihtakuniyuu maak anit nihtaauchihchikan aschiiyuu ekute kaa ituhtetwaau.

² Judas maak an che wiyeshipachishtinaat Jesus chii chischeyihtam taanite kaa ihtakuniyich aniyeyuu wesh mihchetwaau chii nishtawiyuuch anit Jesus ekw maak aniyuu uchischinuhamuwaakanh.

³ Judas maak chii ituhteu anite e wiicheukut Rome shimaakanisha kaye aniyuuh kaa maakunawesiyich anite chisheayimiheukamikuhch kaa aapatisiitwaau. Aniyuu kaa niikaanapitwaau ayimiheuchimaauh kaye aniyuu Phariseeh chii itishahukuuch chechii nituu naanituwaapamaatwaau Jesus. Chii pechi tahkunamuch maak waashtenamaakanh kaye ishkuteu waashtenamaakan kaye nitupayuuhkumaanh.

⁴ Chii chischeyihtam maak Jesus misiwe taan che ispayit ekw kaa pechi nimitaasikaapuut kaa itaat, “Awen kaa naanituwaapamekw.”

⁵ Chii iteuch, “Jesus Nazareth kaa uhchiit ninaanituwaapamaanaan.” “Eukw niya,” kaa itaat Jesus. Judas maak, an che wiyeshipachishtinaat Jesus ekut kaa niipuut e wiichikaapuushtawaat aniyuuh kaa pechi wiicheukut.

⁶ Iskutak maak Jesus kaa itikutwaau, “Eukw niya,” chii ashaakaapuuch kaa ati pahchishihkwaau anite ishi aschiihch.

⁷ Jesus miin kaa kakwechimaat, “Awen kaa naanituweyimekw.” “Jesus, Nazareth kaa uhchiit,” chii iteuch.

⁸ Jesus kaa itaat, “Shaash chichii wiihtamaatinaawaau eukw an niya. Niya niyaanituwaapamuwekwe pachishtinaahkuch uchii kutakach.”

⁹ Eukw uyuu kaa itwet chechii tipipayiyich aniyuu shaash anite kaa itwekupane, “Nuuhtaawii, namui nuuhchi wanihaauch waachi peyakw anichii kaa pechi miyin.”

¹⁰ Simon Peter maak chii kuikunam unitapuyuuhkumaan kaa manishamuwaat unihiiwin uhtaukaayuu aniyeyuu peyakw chisheayimiheuchimaau utaapachihaakaniyuuh, Malchus kaa ishinihkaasuyich.

¹¹ Ekw Jesus kaa itaat aniyuuh Peter, “Chiskashtaah an chinitupayuuhkumaan. Chititeyihtenaa ekaa che uhchi shaapushkamaan uu wiisacheyihtemuwin Nuuhtaawii kaa pechi miit.”

Jesus kaa ituhtahaakanuut Annas e ihtaayich

¹² Anichii maak shimaakanishach ekw maak aniyuu uchimaamuwaauh kaye maak anichii Jewa kaa itiskaanesitwaau kaa maakunawesuutwaau chisheayimiheukamikuhch, chii maakuneuch aniyuuh Jesus kaye chii maahkupiteuch.

¹³ Anite niishtam Annas e ihtaayich chii ituhtaheuch, Caiaphas maak uyuu ushaa. Uu Caiaphas wii chii chisheayimiheuchimaaukupane aniyuu kaa pipuniyich.

¹⁴ Eukuu Caiaphas kaa itaakupane aniyuuh Jewa iinuuh uste chipaa miyupayihkupane peyakw naapeu chechii nipistamuwaat misiwe aweyuu.

Peter kaa nanatayit kaa itwet ekaa chischeyimaat aniyuuh Jesus

¹⁵ Simon Peter ekw maak miin kutak chischinuhamuwaakan chii nuushuushkuweuch Jesus. An maak kutak chischinuhamuwaakan naashch chii miyu chischeyimikuu chisheayimiheuchimaau. Ekw kaa wiichewaat Jesus anite aniyuu chisheayimiheuchimaau wiichiihch e piihcheyich.

¹⁶ Peter maak wiiwiitimiskwaahch anit chii ihtaau wiya. Ekw an kutak chischinuhamuwaakan an kaa miyu chischeyimikut aniyuu chisheayimiheuchimaau kaau chii wiiwiyuu, kaa ayimihaat aniyuu ishkwesha anit ishkwaahtemihch kaa ihtaayihch kaa kakwechimaat chechii piihcheyich Peter. Ekw kaa piihtakahaat aniyuu Peter.

¹⁷ An maak ishkwesh anit ishkwaahtemihch kaa ihtaat chii iteu aniyuu Peter, “Namayeu aa chiya peyakw Jesus uchischinuhamuwaakan.” Peter maak kaa itaat. “Namui. Namayeu niya.”

¹⁸ Chii tahkaayaayuu maak. Ekw anichii aapachihaakanich eyuu kaa maakunawesitwaau kaa kutuwetwaau ekw kaa waaskaapuushtahkwaau aniyuu ishkuteyuu anite e uhchi apisutwaau. Peter maak kaye wiya chii pechi wiichikaapuushtaweu e pechi aushut.

Jesus kaa naanituu chischeyimakut chisheayimiheuchimaauh awen nihaau e aawiyit

¹⁹ Ekw an chisheayimiheuchimaau nanaahkuu kaa ishi kakwechimaat Jesus e wii nituu chischeyimaat aniyuu uchischinuhamuwaakaniyuuh kaye taan nahaau e ishi chiskutamaacheyich Jesus.

²⁰ Ekw Jesus kaa itaat, “Misiwe taan kaa itweyaan chii pehtamuch awenich. An maak taan kaa ishi chiskutamaacheyaan anite ayimiheukamikuhch kaye chisheayimiheukamikuhch anite misiwe Jewa iinuuch kaa chii pechi nishtuwiitwaau, namui nihtaa nuhchi kaataan chekwaan e itweyaan.

²¹ Chekwaan maak wehch pechi kakwechimiin. Kakwechimach maa anichii iinuuch kaa chii pehtuutwaau. Kakwechimach taan kaa itakwaau, wesh chischeyihtamuch taan kaa iteuch.”

²² Iskutak maak Jesus kaa itwet uyuu, peyakw aniyuu kaa maakunawesiyich chii utaamuhkwehukuu e itikut, “Namui chika chii ishi ayimihaau chisheayimiheuchimaau.”

²³ Ekw Jesus kaa itaat, “Ekaa muyaam wehchi itwewaane chekwaan, wiihtamuuch misiwe awenich utah kaa ihtaatwaau. Mikw maak kaa taapwewaane misiwe kaa itweyaan, chekwaan wehchi pechi utaamuhuyin.”

²⁴ Ekw Annas kaa itishahwaat aniyuu Jesus anite Caiaphas chisheayimiheuchimaau e ihtaayich eshkw e maahkupisuyich.

Peter kaa itwet ekaa chischeyimaat Jesus

²⁵ Peter maak eshkw mekwaach chii niipuu anit e aushut ekw kaa itikut aniyuu anit kaa ihtaayich, “Namayeu aa chiya peyakw aniyuu uchischinuhamuwaakan an naapeu.” Peter maak chii nanatayuu, “Namui. Namayeu niya,” chii iteu.

²⁶ Peyakw maak aniyuu chisheayimiheuchimaau utaapachihaakanh chii waahkumeyikupanen aniyuu naapeu Peter kaa manihtaukaayeswaayich. Chii iteu maak aniyuu Peter, “Namui aa kuuhchi waapamitan kaye chiya anite nihtaauchihchikan aschiihch e paapaawiicheut Jesus.”

²⁷ Miin maak yaapach Peter chii nanatayuu, “Namayeu niya,” chii iteu. Tiiwehch kaa uhchi pehtaakusiyich naapepakahaahkwaan.

Jesus kaa ituhtahaakanuut Pilate e ihtaayich

²⁸ Wiipach aniyuu kaa chechishepaayaayich anit Caiaphas e ihtaayich chii uhchi chistuhtahaakanuu Jesus, anite chisheuchimaaukuuhpaaneu wiichihch kaa ituhtahaakanuut. Pilate chii ishinihkaasuu an chisheuchimaaukuuhpaaneu. Anichii maak Jewa iinuuch namui uhchi wii piihcheuch wiyawaau anite wesh chii itashteyuu uchuuwa wiishuwewiniwaahch ekaa chechii piihchetwaau wiichiihch aweyuu ekaa Jewa itiskaanesiyich. Kaye namui chipaa uhchi miichuuch miyaaskacheu makushaaniyuu chii piicheuwaakupanenich anite chisheuchimaaukuuhpaaneu wiichiihch.

²⁹ Eukw maak uyuu wehchii wiiwiit Pilate, kaa nituwaapamaat ekw kaa kakwechimaat, taan e ishi ataameyihtaakusit uu naapeu.

³⁰ Kaa nishkweushihiikut e itikut, “Namui nipaa uhchi peshuwaanaan utah e ihtaayin ekaa uhchi machituutamukupane.”

³¹ Ekw Pilate kaa itaat, “Chiyawaau utinaakw uu naapeu chiyawaau chiwiishuwewinawaau che aapachihtaayekw e wiyaaskunekw.” Ekw anichii Jewa iinuuch kaa itwetwaau, “Namui nipachishtinikunaan niwiishuwewinaanh chechii itweyaahch chechii nipahaakanuut awen.”

³² Eukw maak uu wehchi ispayihch uu chechii tipipayiyich taan nihaau kaa ishi niikaan wiihtahk Jesus che ishi nipikupane.

³³ Miin kaau kaa piihchet Pilate aniyuu chisheuchimaaukamikuyuu e wiishaamaat Jesus ekw kaa kakwechimaat, “Ewaa chiya Jewa iinuuch uchisheuchimaamuwaau.”

³⁴ Jesus kaa nishkweushihaat e itaat, “Chichii wiihtamaakuch aa awenich niya eukw uchisheuchimaamuwaau Jewa iinuuch. Maak chiya uu chititeyihtamuwin kaa itweyin.”

³⁵ Ekw Pilate kaa itaat, “Jewa aa niya chititeyimin. Chii tipiyeu chitiiniimach ekw maak anichii kaa niikaanapitwaau ayimiheuchimaauch chichii pechi itishahukuch. Taan maak kaa ishi wanituutamin.”

³⁶ Ekw Jesus kaa itwet, “Namui utah aschiihch uhchipayuu nuuchimaawin. Utah chii uchiimakanikupane nuuchimaawin anichii nitaapachihaakanich suuhk chipaa maasihtaauch ekaa chechii pachishtinikuyaan anite Jewa iinuuch e ihtaatwaau. Namui utah aschiihch uhchipayuu nuuchimaawin.”

³⁷ Ekw Pilate kaa itaat, “Taapwe kiipaa chichisheuchimaaunaache.” Jesus maak chii iteu, “Chititwen e chisheuchimaawiyaan. Ekun wehchi pimaatisiyaan kaye ekun wehchi pechi takushiniyaan utah aschiihch chechii tipaatutamaan an taapwewin Chishemanituu e ihtaat kaa uhchipayihch. Tahtu awen taapwewinihch kaa ihtaat eukw an piyechi nituhtuut.”

³⁸ Pilate kaa kakwechimaat e itaat, “Chekwaan an taapwewin.” Ekw miin kaau kaa wiiwiit kaa nituu itaat aniyuuh Jewa iinuuh, “Namui nichischeyihtamuwaan chekwaayuu kaa wanituutamukwe ati chechii uhchi wiyaaskunaakanuut.

Jesus che nipahaakanuut

³⁹ Ihtakun maak Jewa ihtuwin peyakw awen chechii pachishtinamaakuyekw mekwaach e miyaaskacheu makushaanuuhch. Chinituweyimaawaau aa chechii pachishtinamaakuyekw uu Jewa iinuuch uchisheuchimaamuwaau.”

⁴⁰ Ekw kaa taachikwetwaau e itwetwaau, “Namui wii an. Barabbas eukw netuweyimachiht chechii pachishtinamaakuyaahch.” Uyuuh maak Barabbas chii chimutiskuuyuu.