John 17 - Chishemanituu Utayimuwin: Kaa Uskaach Testament

Jesus kaa ayamihestamaasut

¹ Iskutak maak Jesus kaa chiishi ayimit, chii tastasaapuu kihchikiishikuhch ishi ekw kaa itwet, “Nuuhtaawii, ekw wetihchipayihch tipahiikan. Waapahtiiwe taan e ishpish chisteyihtaakusit Chikus ekw maak che waapahtiiwet taan e ishpish chisteyihtaakusuut chiya.

² Wesh chichii miyaau tipeyihchichewiniyuu misiwe aweyuu chechii tipeyimaat. Ekw maak kaachiche pimaatisiiwiniyuu chechii miyaat misiwe aniyuuh aweyuuh kaa miyat.

³ Maaute maak chechii uhchi ayaat awen kaachiche pimaatisiiwiniyuu, chischeyimiske chiya mikw e peyakushiyin e Chishemanituwiyin, kaye maak Jesus Christ chischeyimaate, aniyuu kaa pechi itishahumat.

⁴ Nichii waapahtiiwen utah aschiihch taan e ishpish chisteyihtaakusiyin, e chii chiishihtaayaan an atushchewin kaa pechi miyin che ihtuutamaan.

⁵ Nuuhtaawii, chisteyihtaakuhiih mwehch an kaa ishpish chisteyihtaakusiyaan eshkw e chii ihtaayaan anite e ihtaayin, eshkw ekaa uhchi ushihtaayin uu aschii.”

Uchischinuhamuwaakanh kaa ayimiheshtamuwaat Jesus

⁶ “Nichii ihtuutawaauch uchii naapeuch kaa pechi miyin utah aschiihch uhchi chechii chischeyimiskwaau. Chiya chichii tipiyeusiin ekw maak kaa pechi miyin. Chii nanihiihtamuch maak chitayimuwiniyuu.

⁷ Anuhchiish maak chischeyihtamuch misiwe aniyuuh chekwaayuu kaa miyin taapwe chiya e ihtaayin e uhchipayihkwaauh.

⁸ Nichii wiihtamuwaauch taan kaa ishi miyin chechii wiihtamuukwaau. Chii utinamuch maak taan kaa ishi wiihtamuukwaau. Chischeyihtamuch taapwe chiya e chii pechi itishahuyin taapwehtamuch kaye uyuu.”

⁹ “Nitayimiheshtamuwaauch, namui wii anichii ekaa kaa chischeyimiskwaau upimaatisiiwiniwaahch nitayimiheshtamuwaauch. Uchii eukw kaa pechi miyin nitayimiheshtamuwaauch wesh chiya chitipiyeusiin uchii kaa pechi miyin.

¹⁰ Misiwe uchii kaa tipiyeusiyin kaye niya nitipiyeusiin. Misiwe anichii kaa tipiyeusiyaan kaye chiya chitipiyeusiin. Nichii chisteyihtaakuhiikuun maak wiyawaau uhchi.

¹¹ Ekw maak che nituwaapamitaan. Shaash wiipach namui nika uhchi ihtaan utah aschiihch. Wiyawaau maak eshkw utah aschiihch chika ihtaauch. Nuuhtaawii, chiya kaa payehchisiyin, maamuu kanuweyimach taan e ishi suuhchikanuweyimuumakaniyich chitishinihkaasuwiniyuu uchii kaa pechi miyin anit chechii uhchi peyakutwaau mwehch chiyaanuu e ishi peyakuyihkw.

¹² Mekwaach kaa wiicheukwaau nichii kanuweyimaauch aniyuu ishinihkaasuwiniyuu kaa pechi miyuut uhchi. Nichii kanuweyimaauch, namui maak waachi peyakw uhchi wanishinuuch mikw an kaa iteyihtaakuniyikupane che wanishihk chii wanishinuu. Misiwe uu kaa ispayihch chii ispayuu chechii tipipayihch taan e itashtech chitayimuwinihch.

¹³ Anuhchiish maak chipechi naatitin, uyuuh maak chekwaayuuh niwiihten utah aschiihch chechii saakaschineshkaakutwaau nimuuchicheyihtamuwiniyuu.

¹⁴ Nichii wiihtamuwaauch taan kaa ishi miyin chechii wiihtamuukwaau. Chii uhkaatikuch maak aweyuu utah aschiihch kaa ihtaayich wesh taapaa utah aschiihch ishi tipeyihtaakusuuch mwehch niya e ishi ekaa tipeyihtaakusiyaan utah aschiihch.

¹⁵ Namui wii chinitutamaatin chechii utinatwaau utah aschihch uhchi, chinitutamaatin chechii kanuweyimatwaau ekaa chechii pischeyimikutwaau machimanituuh.

¹⁶ Mwehch e ishi ekaa tipeyihtaakusuuch utah aschiihch ekun mwehch kaye wiyawaau e ishinaakusitwaau. Namui kaye wiyawaau utah aschiihch tipeyihtaakusuuch.

¹⁷ Payehchihiich chitaapwewinihch ishi. Chitayimuwin eukw taapwewin.

¹⁸ Niya ekw e itishahukwaau utah aschiihch mwehch chii kaa ishi pechi itishahuyin utah aschiihch.

¹⁹ Chiya e ihtaayin nit ishi pachishteyimisun chechii uhchi tekash pachishteyimisuustaaskwaau kaye wiyawaau.”

Jesus kaa ayimiheshtamuwaat misiwe aniyuuh kaa nuushuushkaakut

²⁰ “Namui mikw uchii utah kaa ihtaatwaau nitayimiheshtamuwaauch. Nitayimiheshtamuwaauch kaye anichii kaa taapweyimatwaau aniyuu uhchi taan kaa ishi pechi aayimuumiyich uyuuh.

²¹ Kamaa ishinaakusiwaakupanenich uchii chechii peyakutwaau. Nuuhtaawii, chinitutamaatin chechii piihchishkaatahkwaau mwehch chiya e ishi piihchishkuwiyin kaye maak chechii uhchi taapwehtahkwaau awenich utah aschiihch kaa ihtaatwaau taapwe chiya e chii pechi itishahuyin.

²² Nichii ihtuutawaauch chechii chisteyihtaakusitwaau mwehch chiya kaa ishi ihtuutawiyin chechii chisteyihtaakusiyaan ati chechii uhchi peyakutwaau mwehch chiyaanuu e ishi peyakuyihkw.

²³ Niya e piihchishkuukwaau ekw maak chiya e pechi piihchishkuwiyin ekut chechii uhchi tekash peyakutwaau. Ekut maak chechii uhchi taapwehtahkwaau awenichii utah aschiihch kaa ihtaatwaau chiya taapwe e chii pechi itishahuyin kaye maak taapwe e saachihiitwaau mwehch niya e ishpish saachihiyin.”

²⁴ “Nuuhtaawii, chiya chichii pechi miyin uchii, chinitutamaatin maak kaye wiyawaau eshkw chechii ihtaatwaau taanite che ihtaauch. Ekw maak che waapahtahkwaau nichisteyihtaakusuwiniyuu, aniyuu chisteyihtaakusuwiniyuu kaa pechi miyin wesh chichii saachihiin eshkw ekaa uhchi ushihtaayin uu aschii.

²⁵ Nuuhtaawii, chiya muush kaa kuiskw ihtiyin, namui chichischeyimakuch anichii awenich ekaa kaa aapateyimiskwaau utah aschiihch, niya maak wii chichischeyimitin. Uchii maak kaye kaa pechi miyin chischeyihtamuch taapwe chiya e chii pechi itishahuyin.

²⁶ Nichii ihtuutawaauch chechii chischeyimiskwaau kaye maak namui nika uhchi puuniiwaan aniyuu e ihtuutuukwaau. Ekw maak an taan e ishpish saachihiyin kaye wiyawaau chechii piihchishkaakutwaau. Ekw maak kaye niya che piihchishkuukwaau.”