John 13 - Chishemanituu Utayimuwin: Kaa Uskaach Testament

Jesus kaa chishtaapautaawaat uchischinuhamuwaakan usitiyuuh

¹ Eshkw ekaa uhchi utihchipayiyich Miyaaskaacheu Makushewin, shaash chii chischeyihtam Jesus e utihchipayiyich che nakatahk uyuu aschiiyuu kaye che nituwaapamaat Uhtaawiimaau. Muush chii saachiheu misiwe aniyuu kaa taapweyimikut utah aschiihch kaa ihtaayich ekw maak che utihchipayihch chechii waapahtiyaat taan e ishpish saachihaat.

² Mekwaach maak chii utaakushuu miichisuuch Jesus ekw maak uchischinuhamuwaakanh. Peyakw maak an chischinuhamuwaakan Judas kaa ishinihkaasut, Simon Iscariot ukusisa, shaash anite chii ihtuutaakuukupane machimanituu chechii iteyihtahk chechii wiyeshipachishtinaat Jesus aniyuu che tipiskaayich.

³ Jesus chii chischeyihtam Uhtaawiimaau e chii miikut suuhkaatisiiwiniyuu misiwe chekwaayuu chechii ihtuutahk, kaye chii chischeyihtam Chishemanituu e ihtaayich e uhchiit kaye miin kaau anite Chishemanituu e ihtaayich che ituhtet.

⁴ Ekw kaa pisikuut anit miichisunaahtikuhch uhchi, kaa manahk aniyuu utahkuhp uschich kaa chichishkahk kaa utinahk kaasiihkwaaniyuu kaa chikaayaapihkaasuwaachet.

⁵ Kaa kutapinahk nipiiyuu kaasiihkwaaniyaakanihch ekw kaa chishtaapauchisitenaat uchischinuhamuwaakanh ekw maak kaa paahkuhamuwaat usitiyuuh aniyuu kaasiihkwaaniyuu kaa chikaayaapihkaasuwaachet e aapachihtaat.

⁶ Chii naateu Simon Peter ekw kaa itikut, “Utipeyihchikeu, chika chishtaapauchisitenin aa.”

⁷ Jesus kaa itaat, “Namui chinisituhten anuhchiish taan e ihtiyaan, mikw maak eshkw chika nisituhten.”

⁸ Ekw Peter kaa ishi nishkweushihaat e itaat, “Namui wiiskaat chika uhchi chishtaapautaan nisit.” Chii itikuu maak Jesus, “Ekaa chishtaapautaayaane chisith namui chika uhchi uchischinuhamuwaakanitutaatin.”

⁹ Simon Peter kaa itaat, “Utipeyihchikeu, ekaawii maataan mikw nisith chishtaapautaah, chishtaapautaah kaye nistikwaan ekw maak nitihchiih.”

¹⁰ Jesus kaa itaat, “Awen shaash e chii pakaashimut namui nituweyihtam miin chechii pakaashimut mikw usith chipaa chishtaapautaakanuuyuuh. Misiwe maak e tashiyekw shaash chipayehchisiinaawaau, mikw peyakw anit e tashiyekw namui payehchisiyuu.”

¹¹ Shaash chii chischeyihtam Jesus taan aniyuuh aniyuu che wiyeshipachishtinikut wehchii itwet uyuu. Shaash misiwe chipayehchisiinaawaau “mikw peyakw anit e tashiyekw namui payehchisiyuu.”

¹² Iskutak maak kaa chishtaapauchisitenaat, ekw miin kaa pushchishkahk aniyuu utakuhp kaa manahk ekw miin kaa waweyapit. Kaa kakwechimaat e itaat, “Chichischeyihtenaawaau aa chekwaan wehchi ihtuutaatakuch uu.

¹³ Chischinuhamaachesuu kaye Utipeyihchikeu chitishinihkaasinaawaau, ekun maak taapwe nipaa ishinihkaatikuun wesh taapwe eukw niya e awiyaan.

¹⁴ Niya eukw Chitipeyihchikemuwaau kaye Chichischinuhamaachesiimuwaau, yaapach maak niya chichii chishtaapauchisitenitinaawaau. Kaye chiyawaau maak chipaa chishtaapauchisitenitunaawaau.

¹⁵ Chichii waapahtiitinaawaau taan chechii ishi chischinuwaapamiyekw an taan kaa ihtuutaatakuch.

¹⁶ Kuiskw chiwiihtamaatinaawaau, aapachihaakan namui wii uste iteyihtaakusuu e iteyihtaakusiyich uchimaam kaye awen kaa chihchitishahwaakanuut chechii nituu waawiihtahk chekwaayuu namui wiya uste iteyihtaakusuu e iteyihtaakusiyich aniyuu kaa chihchitishahukut.

¹⁷ Nisituhtamekwe maak uyuu chekwaayuu kaye maak ihtuutamekwe chika shaweyimikunaawaau.”

¹⁸ “Namui maak misiwe chitaayimuumitinaawaau, nimiyuu chischeyimaauch anichii niya kaa wiyaapamakwaau. Itashteu Chishemanituu utayimuwinihch, An naapeu kaa wiich miichisuumit nika wiyeshipachishtinikw. Ekun maak uu shaash wiipach chipaa ispayuu.

¹⁹ Ekun maak uu e ititakuch eshkw ekaa ispayihch, ekw maak iskutak taapwe ispayihche, ekw che taapwehtamekw niya eukw taapwe e awiyaan.

²⁰ Kuiskw chiwiihtamaatinaawaau, an awen che pishichihaakwe aniyuu aweyuu che itishahumach nipishichihiikw kaye niya. An maak awen kaa pishichihiit pishichiheu aniyuu aweyuu kaa pechi itishahuyich.”

Jesus kaa niikaan wiihtahk che wiyesipachishtinaakanuut

²¹ Iskutak Jesus kaa itwet uyuu, naashch chii misimiteheu ekw kuiskw kaa wiihtamuwaat e itaat, “Chihchiwe chititinaawaau, peyakw utah e tashiyekw nika wiyeshipachishtinikw.”

²² Ekw anichii chischinuhamuwaakanich kaa kanawaapamitutwaau naashch e kushkupayitwaau kaye e wawaaneyihtahkwaau, ekaa chischeyihtahkwaau aweyuu aniyuu kaa aayimuumaakanuyich.

²³ An maak peyakw chischinuhamuwaakan, aniyuu Jesus naashch kaa saachihaat, uhpime anit e ihtaat chii apiyuu.

²⁴ Simon Peter kaa naamiskuweyistuwaat aniyuu chischinuhamuwaakan kaa itaat chechii kakwechimaayich aweyuu aniyuu kaa aayimuumaayich.

²⁵ Ekw an chischinuhamuwaakan Jesus e ihtaayich kaa ispayihut ekw kaa itaat, “Utipeyihchikeu awen an kaa aayimuumat.”

²⁶ Jesus kaa nishkweushihaat e itaat, “Nika akuhchimaau uu aaihkunaau anit minihkwaakanihch ekw che miyak an awen.” Kaa akuhchimaat aniyuu aaihkunaau ekw kaa miyaat aniyuu Judas, Simon Iscariot ukusiyuu.

²⁷ Judas kaa utinaat aniyuu aaihkunaau kaa miikut Jesus, ekw tiiwehch kaa ati piihchishkaakut machimanituu. Ekw Jesus kaa itikut, “Chiipiih ihtuut an taan chipaa ihtuuten.”

²⁸ Namui maak waachipeyakw uhchi nisituhtamuch anichii chischinuhamuwaakanich chekwaayuu aniyuu wehchi itaakanuyich.

²⁹ Chii iteyihtamuch e itaakanuyich chechii nituu utinamiyich makushaaniyuu maak chechii nituu utinamuwaayich chekwaayuu aniyuu kaa chistimaatisiyich, wesh wiya Judas chii naanaakachihtaau aniyuu shuuliyaawatiyuu.

³⁰ Iskutak maak Judas kaa utinaat aniyuu aaihkunaau tiiwehch chii ati wiiwiyuu, chii tipiskaayuu maak.

Kaa uskaach itashuwewin

³¹ Iskutak maak kaa wiiwiit Judas, Jesus chii iteu, “Ekw maak Iinuu Ukusisa chesteyihtaakuhaakanuyich ekw maak kaye Chishemanituu chesteyihtaakuhaakanuut Iinuu Ukusisa uhchi.

³² Ekw maak Chishemanituu uchisteyihtaakusuwin e nuukuhtaakanuyich Ukusisimaau e ihtaayich uhchi, ekw wiya Chishemanituu che waapahtiyaat iinuu taan e ishpish chisteyihtaakusiyich Ukusisimaau.

³³ Nitawaashiimitikw, shaash namui chineush nika uhchi ihtaan utah e ihtaayekw. Chika pechi naanituwaapaminaawaau, mikw maak chika wiihtamaatinaawaau taan kaa ishi wiihtamuukwaau anichii Jewa iinuuh kaa niikaanishkuwaatwaau, namui chika chii ituhtenaawaau anite che ituhteyaan.

³⁴ E uskaach kacheskwewin chimiitinaawaau eukw uu chechii saachihiituyekw. Muyaam taan e ishpish saachihiitakuch ekun chipaa ishpish saachihiitunaawaau.

³⁵ Saachihiituyekwe maak ekut che uhchi chischeyimakuyekw e uchischinuhamuwaakanitutaatakuch.”

Jesus niikaan kaa wiihtahk Peter che itweyich ekaa chischeyimakut

³⁶ Simon Peter chii kakwechimeu e itaat, “Utipeyihchikeu, taanite che ituhteyin.” Jesus kaa itaat, “Namui chika chii wiicheun taanite che ituhteyaan, eshkw anite paatimaa ekw chechii wiichewiyin.”

³⁷ Peter miin kaa kakwechimaat e itaat, “Utipeyihchikeu, chekwaan che uhchi ekaa chii wiicheutaan anuhchiish. Namui nika uhchi puuniin e nuushuushkaatan aat wii nipahiikuyaane.”

³⁸ Jesus kaa itaat, “Taapwe aa shaash chitayeskuwiin chechii pachishtinamin chipimaatisiiwin niya uhchi. Chihchiwe chititin, eshkw ekaa mechim chistute naapepakahaahkwaan, shaash nishtwaau chika nanatayin e itweyin ekaa chischeyimiin.”