John 12 - Chishemanituu Utayimuwin: Kaa Uskaach Testament

Jesus kaa tuumisitenaakanuut anite Bethanyihch

¹ Kutwaashch chiishikaau chii ishpishinaakuniyuu miyaaskaacheu makushewiniyuu, Jesus kaa takushinit anite Bethanyihch anite Lazarus wiichiihch. Ekute uyuu kaa wanishkaanaat nipuwinihch uhchi.

² Chii makushehaakanuu maak Jesus anite, Martha chii wiichihiiweu e maatinuwaanuyich, ekw Lazarus kaa wiitapimaat Jesus anite miichisunaahtikuhch.

³ Mary chii uhchi utinam puutaayuu, e piihchishtiniyich anit kaa wiihchimaakusiyich tuuminikaniyuu naashch e shuuliyaaniyich. Kaa kutapinamuwaat anite Jesus usitiihch, ekw kaa paahkusitenaat ustikwaaniyaapii e aapachihtaat. Misiwe maak anite piihtakamihch aniyuu waaskaahiikaniyuu chii miyaakuniyuu aniyuu kaa wiihchimaakusiyich.

⁴ Judas Iscariot maak, peyakw aniyuu Jesus uchischinuhamuwaakan, aniyuu che wiyeshipachishtinikut, chii itweu,

⁵ “Nishtwaau mitaahtumitunuu chipaa itachihtaakanuu chii ataawaanuukupane an kaa wiihchimaakushich. Ekw an shuuliyaau kaa chistimaatisiitwaau chipaa miyaakanuuch.”

⁶ Namui wii e chistimaacheyimaat aniyuu kaa chistimaatisiyich aniyuu wehchi itwet, wiya chii wii utinimaasuu aniyuu shuuliyaayuu wesh ekun kaa chii ihtit maan aat wiya e chii naanaakachihtaat aniyuu shuuliyaayuu kaa chii miyaakanuyich Jesus ekw maak uchischinuhamuwaakanh.

⁷ Mikw maak Jesus chii itikuu Judas, “Ekaawii piskaas, wesh aniyuu kaa ihtuutahk muyaam e ayeskuwiihkuut che chiskahiikuuch ekun e ishinaakuniyich.

⁸ Muush chika ihtaauch kaa chistimaatisiitwaau utah e ihtaayekw, niya maak namui muush nika uhchi ihtaan utah e ihtaayekw.”

Anichii kaa niikaanishkuwaatwaau Jewa Iinuuh kaa ayimitutahkwaau chechii nipahaatwaau Lazarus

⁹ Mihchetu maak anichii Jewa iinuuch chii pehtamuch anite Bethanyihch e chii ihtaayich Jesus ekw kaa ituhtetwaau anite chechii nituwaapamaatwaau kaye aniyuu Lazarus chii wii waapameuch, aniyuu kaa wanishkaanaayich Jesus nipuwinihch uhchi.

¹⁰ Chii wiyeyihtamuch maak anichii kaa niikaanapitwaau ayimiheuchimaauch kaye aniyuu Lazarus chechii nipahaatwaau.

¹¹ Wesh aniyuuh Lazarus uhchi eukw wehchii nakatikutwaau mihchetu Jewa iinuuh kaye maak Jesus eukw kaa taapweyimaatwaau.

Iinuuch Jerusalemihch kaa ihtaatwaau kaa maamihchimaatwaau Jesus kaa takushiniyich

¹² Miin wiyaapaniyich mihchetu anichii kaa takushihkwaau anite e makushaanuyich chii pehtamuch Jesus che takushiniyich Jerusalemihch.

¹³ Ekw kaa naatwaanihkwaau niipisiyaahtikw kaa ati wiiwiitwaau anit Jerusalemihch che nituu nachihaatwaau, uyuu e itwetwaau e chishewetwaau, “Maamihchimaataau Chishemanituu, shaweyihtaakusuu an Chishemanituu kaa pechi itishahukut, Israel iinuuch uchisheuchimaamuwaau.”

¹⁴ Jesus maak chii tehtapuu uhkaan muyaam kaapalakaskweu kaa apishiishiyich e ishinaakusiyich e chii miskuwaakupane. Eukw uyuu kaa ihtit mwehch taan kaa itashteyich Chishemanituu utayimuwiniihch che ihtikupane. Chii Itashteyuu,

¹⁵ Ekaawii kushtaachikw chiyawaau Zion kaa uhchiyekw wesh chichisheuchimaamuwaau takushinuu e tehtapit uhkaanh uspiskuniihch muyaam kaapalakaskweu kaa apishiishiyich kaa ishinaakusiyich ukusiyuu.

¹⁶ Anit maak aniyuu mekwaach namui uhchi nisituhtamiyuu uchischinuhamuwaakan aniyuu taan kaa e ispayiyich shaash anite niikaan e chii wiihtaakanuwiikupane che tipipayiyich uyuu. Paatimaa maak iskutak kaa wanishkaanaakanuyich nipuwinihch uhchi kaye kihchikiishikuhch kaa ishi utinaakanuyich ekw kaa chischisitwaau taan kaa ishi niikaan aayimuumaakanuyich anite Chishemanituu utayimuwinihch che ispayikupanen.

¹⁷ Anichii maak awenich kaa ihtaawaakupanenich anit Jesus kaa tepwaataayich Lazarus chechii pechi wiiwiyich anit uhchi kaa chiskahaakanuyich ekw maak kaa wanishkaayich nipuwinihch uhchi, chii wiihtamuch anite Jerusalemihch taan kaa ishi waapahtahkwaau e ispayiyich.

¹⁸ Eukw maak aniyuu wehchi nituu nachihaatwaau Jesus mihchetu awenichii iskutak tekushiniyich anite Jerusalemihch, aniyuu e chii pehtahkwaau taan kaa ishi maamishkaach ihtiyich.

¹⁹ Ekw anichii Phariseech kaa ititutwaau, “Namui chichii ihtuutawaanuu ekaa chechii nuushuushkaakut aweyuu, kanawaapamaahkw maa, misiwe aweyuu wii nuushuushkaakuu.”

Greek e itiskaanesitwaau awenichii kaa wii waapamaatwaau Jesus

²⁰ Chii wiichihiiweuch maak Greek iinuuch e ituhtaanuyich anite Jerusalemihch e nituu nuuchiishtuwaakanuyich Chishemanituu mekwaach aniyuu kaachii ayimiheu makushaanuyich.

²¹ Eukw maak uchii kaa pechi nituwaapamaatwaau Philip, aniyuu anite Bethsaida kaa ishinihkaateyich ihtaawiniyuu kaa uhchiyich anite Galilee aschiihch kaa ihtakuniich, ekw kaa itaatwaau, “Niwii waapamaanaan Jesus.”

²² Philip maak chii nituu wiihtamuweu Andrew ekw taapishkun kaa nituu wiihtamuwaatwaau Jesus e wii waapamikuyich aniyuuh Greek iinuuh.

²³ Ekw Jesus kaa itaat, “Shaash utihchipayuu Chishemanituu chechii waapahtiiwet e chisteyihtaakusiyich Iinuu Ukusisa.

²⁴ Kuiskw chiwiihtamaatinaawaau michihpin ekaa anite aschiihch ashtaakanuuhche peyakumin nihtaauchihchikan namui chika uhchi nihtaauchin mikw maak ashtaakanuuhche anite aschiihch ati nipiimakahche maak ekut che uhchi nihtaauchihkwaau mihchetu nihtaauchihchikan.

²⁵ An awen kaa saachihtaat upimaatisiiwin kata wanihtaau. An awen kaa uhkaatahk upimaatisiiwin utah aschiihch kaachiche pimaatisiiwiniyuu kata ayaau.

²⁶ An maak awen niya kaa atushkuut nika pechi nuushuushkaakw. Ekw maak che ihtaat nitaapachihaakan taanite che ati aihtaauch. Kata chisteyimikuu Nuuhtaawiih an awen che atushkuukwe.”

Jesus niikaan kaa wiihtahk che nipit

²⁷ “Naashch misimeyihtam nitahchaahkw, taan maak chechii itak Nuuhtaawii. Nika itaau aa, nuuhtaawii, ekaawii pechi pachishtin chechii nanehkaateyimuyaan. Namui, namui nika uhchi itaau uyuu wesh ekun wehchi takushiniyaan utah aschiihch chechii nanehkaateyimuyaan.

²⁸ Teyakuch nika itaau, Nuuhtaa, mikw anit chechii uhchi chisteyihtaakusiyin, eukun waa ishi ihtuutamaan.” Ekw kaa uhchi pehtaakuniyich Chishemanituu upehtaakusuwin anite kihchikiishikuhch uhchi e itwet, “Shaash nichii chisteyihtaakuhtaan nitishinihkaasuwin miin maak yaapach ekun che ihtuutamaan.”

²⁹ Anichii maak awenich kaa niipuutwaau anite chii pehtamuch aniyuu pehtaakusuwiniyuu ekw kaa itwetwaau, “Nimischuuch pehtaakusuuch.” Ekw kutakach kaa itwetwaau, “Enchil chii ayimihiikuu.”

³⁰ Jesus maak chii itikuuch, “Chiyawaau wehchi pehtaakuhch uu pehtaakusuwin, namui niya.

³¹ Anuhchiish utihchipayuu chechii wiyaaskunaakanuutwaau awenich utah aschiihch kaa ihtaatwaau kaye anuhchiish ekw wetihchipayiyich chechii ishpishihaakanuut machimanituu, an kaa tipeyihchet utah aschiihch.

³² Iskutak uhpinikuyaane utah aschiihch uhchi, misiwe awen nika ihtuutawaau chechii pechi naasit,” chii iteu Jesus.

³³ Uyuu maak kaa itwet chii wiihtam taan che ishi nipahaakanuut asiteyaahtikuhch che uhpaaskuhwaakanuut.

³⁴ Ekw anichii awenich kaa ihtaatwaau anit chii nishkweushiheuch e itaatwaau, “Niwiihtamaakunaan anite niwiishuwewinaahch Christ kaachiche che pimaatisiit. Chekwaan maak wehchi itweyin, Iinuu Ukusisa che nipahaakanuut. Awen an Iinuu Ukusisa kaa ishinihkaataakanuut.”

³⁵ Jesus kaa itaat, “Weipishchiish miin chika ihtakun waashtewin utah e ihtaayekw. Suuhk maak pimuhtekw eshkw e ayaayekw waashtewin ekw maak namui wanitipiskusiiwinihch chika uhchi ihtaanaawaau. Awen e pimuhtet anite wanitipiskusiiwinihch namui chischeyihtam taanite e ituhtet.

³⁶ Taapweyimaahkw an awen kaa miiwet waashtewiniyuu eshkw e ihtaat utah e ihtaayekw, ekw maak anite waashtewinihch che ihtaayekw.” Uyuu maak kaa itwet Jesus ekw kaa nakataat, anite ekaa che uhchi miskaakut ekute kaa nituu ihtaat.

Jewa iinuuch ekaa kaa wii taapweyimaatwaau Jesus

³⁷ Aat maak mihchetwaau naashch e maamishkaateyihtaakuniyikwaau chekwaayuuh e chii ihtuutahk anit Jewa e ihtaayich yaapach namui uhchi wii taapweyimikuu wiya e aawit Christ.

³⁸ Eukun taapwe kaa ispayihch taan kaa ishi niikaan wiihtamukupane aniyaa uchischiwehiichesuu Isaiah e chii itwekupane, Utipeyihchikeu, awen tiyaapwehtaakuyaahch taan kaa ishi wiihtamaahch. Aweyuu kaa waapahtiyaat Utipeyihchikeu usuuhkaatisiiwin.

³⁹ Aniyaa maak Isaiah chii niikaan wiihtamukupane chekwaayuu che uhchi ekaa taapwehtamiyich e chii itwekupane,

⁴⁰ Chishemanituu chii ihtuutaakuuch ekaa chechii waapahtahkwaau kaye ekaa chechii nisituhtahkwaau, ekw maak namui waapahtamuch kaye namui nisituhtamuch. Namui maak niwii pechi nituwaapamikuch chechii miinuwaachihiikwaau, iteu Chishemanituu.

⁴¹ Isaiah chii iteu uyuu wesh chii waapahtamuweu Jesus uchisteyihtaakusuwiniyuu, ekw maak kaa aayimuumaat.

⁴² Mihchetu maak yaapach anichii Jewa iinuuh kaa niikaanishkuwaatwaau chii taapweyimeuch Jesus mikw maak namui uhchi aayimuutamuch anite e pehtawaakanuutwaau wesh chii kushteuch aniyuu Phariseeh kaye namui uhchi nituweyihtamuch chihchiwe chechii wiiwiitishihwaakanuutwaau anit utayimiheukamikuwaahch.

⁴³ Wesh uste chii iteyimeuch iinuuh chechii nahiiwehaatwaau ishpish wii Chishemanituu chechii nahiiwehaatwaau.

Taan e ishi wiyaaskunikut awen Jesus utayimuwiniyuu

⁴⁴ Jesus maak chii itweu e chishewet, “Awen tiyaapweyimikwe namui mikw niya nipechi taapweyimikw kaye taapweyimeu aniyuu kaa pechi itishahuyich.

⁴⁵ An awen kaa pechi waapamit, waapameu kaye aniyuu kaa pechi itishahuyich.

⁴⁶ Nichii takushin utah aschiihch chechii miiweyaan waashtewin. Ekw maak an awen che pechi taapweyimikwe namui chika uhchi ihtaau anite wanitipiskusiiwinihch.

⁴⁷ An awen piyehtamukwe taan kaa ishi wiihtamaan ekaa maak nanihiihtamukwe, namui niwiyaaskunaau. Nichii takushin utah aschiihch namui wii chechii wiyaaskunicheyaan maak nichii takushin chechii pimaachihiiweyaan.

⁴⁸ An awen yaatuweyimikwe, kaye ekaa nenahiihtamukwe nimiywaachimuwiniyuu, chika wiyaaskunaakanuu. Aniyuu uhchi taan kaa itweyaan eukw aniyuu che uhchi wiyaaskunaakanuut maahchishtai chiishikaayiche.

⁴⁹ Namui mikw niya e iteyihtamaan nuuhchi ishi ayimin. An Uhtaawiimaau kaa pechi itishahuut wiya nichii wiihtamaakw taan che iteuch ekun maak mikw kaa ishi wiihtamaan.

⁵⁰ Nichischeyihtamuwaan maak wiya utitishuwewin chika ihtuutaakuwaanaawaau chechii ayaayekw kaachiche pimaatisiiwin. Taan e ishi miit chechii ititakuch ekun e ishi wiihtamaan.”