John 11 - Chishemanituu Utayimuwin: Kaa Uskaach Testament

Lazarus kaa puunipimaatisit

¹ Chii ihtaau naapeu Lazarus e ishinihkaasut, e chii mista aahkusit. Anite Bethany kaa ishinihkaateyich ihtaawiniyuu chii wiichuu. Uwiichisaaniskwem Mary ekw maak Martha chii wiichimikuu.

² Eukuu Mary kaa kutapinamuwaat wiihchimaakuhuuniyuu Utipeyihchikeu usitiihch kaye ustikwaaniyaapiih kaa aapachihtaat e kaasiihamuwaat usitiyuuh. Eukuu iskweu wiichishaanh Lazarus kaa aahkusiyich.

³ Lazarus maak wiichishaaniskwem chii nituweyihtamiyuuh chechii nituu wiihtamwaakanuyich Jesus e aahkusiyich aniyuu uwiichewaakan kaa saachihaat.

⁴ Iskutak maak Jesus piyehtahk uyuu chii iteu, “Aat aniyuu naashch e aahkusit namui kata uhchi puunipimaatisiyuu. Ispayuu uu chechii nuukuniyich Chishemanituu uchisteyihtaakusuwin, kaye maak ekut che uhchi chisteyihtaakuhaakanuyich Chishemanituu Ukusisa.”

⁵ Jesus chii saachiheu aniyuu Martha kaye aniyuu wiichishaaniskwemiyuu kaye aniyuuh wiichishaaniyuu Lazarus.

⁶ Iskutak maak kaa wiihtamuwaakanuut e aahkusiyich Lazarus yaapach miin niishu chiishikaau chii ihtaau anit aniyuu ihtaawiniyuu kaa ihtaat.

⁷ Ekw kaa itaat uchischinuhamuwaakanh, “Ituhtetaau miin nete Judea aschiihch.”

⁸ Chii itikuu maak aniyuuh uchischinuhamuwaakanh, “Chiskutamaachesuu, namui weskach kaa wii nipahiiskwaau e paahpimusinaatahuuskwaau anichii Jewa iinuuch yaapach maak miin kaau chii wii ituhten anite.”

⁹ Ekw Jesus kaa nishkweushihaat e itaat, “Niishushaap tipahiikanh ihtakun peyakwaau e chiishikaach. Awen pimuhtete e chiishikaayich namui chika uhchi pahchishinuu wesh waapahtam aniyuu waashtewiniyuu utah aschiihch kaa ihtakuniyich.

¹⁰ Pimuhtete awen e tipiskaayich chika pahchishinuu wesh namui ihtakuniyuu waashtewiniyuu anit e ihtaat.”

¹¹ Eukw uyuu kaa itwet Jesus ekw miin kaa ati itwet, “Shaash nipaau chiwiichewaakanuu Lazarus. Nika nituu pekunaau.”

¹² Chii itikuu maak uchischinuhamuwaakanh, “Utipeyihchikeu, nepaakwe, miin wesin chika miyu pimaatisiyuu.”

¹³ Jesus maak shaash chii chischeyihtam Lazarus e chii puunipimaatisiyich mikw maak uchischinuhamuwaakanh namui uhchi chischeyihtamiyuuh uyuu ekw kaa iteyimaatwaau Jesus nipaau e iteyimaayich aniyuu Lazarus.

¹⁴ Ekw Jesus kuiskw kaa wiihtamwaat e itaat, “Shaash namui pimaatisiyuu Lazarus.

¹⁵ Nimiyeyihten ekaa uhchi ihtaayaan mekwaach ekaa kaa miyupayit Lazarus ekw maak che nihiipayihch chechii taapweyimiyekw. Maachiitaau nituwaapamaataau.”

¹⁶ Thomas, peyakw an kaa niishitwaau wiichishaanh kaa ishinihkaataakanuut, chii iteu aniyuu wiich chischinuhamuwaakanh, “Misiwe ekush e tashiihkw wiichewaataau Jesus kaye chiyaanuu chechii nipahiikuyihkw nipahaakanuute.”

Jesus eukw wanishkaanuweu nipuwinihch uhchi kaye wiya eukw upimaachihiiweu

¹⁷ Iskutak maak Jesus tekushinit anite chii wiihtamuwaakanuu shaash neu chiishikaau e chii ishpish chiskahaakanuyich Lazarus.

¹⁸ An maak ihtaawin Bethany kaa ishinihkaatech peshuch Jerusalemihch chii ihtakun, wiyesh niishu aschiiyuu tipahiikan chii ishpishinaakun anite Jerusalemihch uhchi.

¹⁹ Mihchetu maak Jewa iinuuch chii pechi nituwaapameuch Martha ekw maak Mary e pechi nituu kaachiichihaatwaau aniyuu wiichishaaniyuu e chii puunipimaatisiyich.

²⁰ Iskutak maak Martha piyeyihtahk Jesus e takushiniyich chii wiiwiyuu che nituu nachishkawaat, ekw wii Mary ekut anit e ihtaatwaau kaa ihtaat.

²¹ Ekw Martha kaa itaat aniyuu Jesus, “Utipeyihchikeu, shaash utah chii ihtaauhpane namui chipaa uhchi puunipimaatisiyuu niichishaan.

²² Mikw maak nichischeyihten Chishemanituu che ihtuutamaask mikw taan che ishi nitutamuwaaute.”

²³ Jesus maak chii iteu aniyuu Martha, “Miin chika pimaatisiyuu chiichishaan.”

²⁴ “Nichischeyihten taapwe miin che wanishkaat maahchishtai chiishikaayiche,” chii iteu Martha.

²⁵ Jesus kaa itaat, “Eukw niya kaa wanishkaanaat aweyuu e chii nipiyich kaye kaa miiwet pimaatisiiwiniyuu. Awen che pechi taapweyimukwe chika pimaatisiyuu aat e chii nipit.

²⁶ An awen kaa pimaatisiit e pechi taapweyimit namui wiiskaat chika puunipimaatisiyuu. Chitaapwehten aa uu kaa ititaan.”

²⁷ “Ehe, Utipeyihchikeu,” chii iteu Martha. “Nitaapwehten chiya e aawiyin aniyuu Chishemanituu kaa pechi itishahwaat, kaye chiya e aawiyin Chishemanituu Ukusisa, aniyuu kaa itwet cheshtinaash che takushiniyich utah aschiihch.”

Jesus kaa maatut

²⁸ Iskutak Martha kaa itwet uyuu chii nituwaapameu wiichishaaniskwem Mary ekw kaa itaat pehkaach e ayimit, “Chischinuhamaacheu ihtaau utah. Chiwiishaamukw”

²⁹ Iskutak piyehtahk Mary uyuu chii pisikushipihtaau ekw kaa wiiwiit che nituu nachishkawaat Jesus.

³⁰ Mikw maak eshkw namui uhchi takushinuu Jesus anit aniyuu ihtaawiniyuu, anit kaa nachihiikut Martha eshkw ekut kaa pechi ihtaat Jesus.

³¹ Anichii maak Jewa iinuuch kaa wiitapimaatwaau Mary e wii kaachiichihaatwaau chii nuusuupaistuweuch iskutak wiyaapamaatwaau naashch e yaaschipayihuyich e ati wiiwiiyich wesh chii iteyihtamuch anite aniyuu kaa chiskahaakanuyich wiichishaaniyuuh ekute e ituhteyich chechii nituu maatuyich.

³² Iskutak maak Mary tekushihk anit Jesus kaa ihtaayich wiyaapamaat maak chii uchihchiihkunapayihuu anite usitiihch, e itaat, “Utipeyihchikeu, shaash chii ihtaauhpane namui chipaa uhchi puunipimaatisiyuu niichishaan.”

³³ Iskutak Jesus wiyaapamaat Mary e maatuyich kaye aniyuu Jewa iinuuh kaa pechi wiicheukuyich e maatuuyitwaau naashch chii taahtinikuu eyuu maak naashch chii misimiteheu.

³⁴ Ekw kaa itwet, “Taanite kaa chiskahaakanuut.” “Aashtam Utipeyihchikeu pechi waapahtaa,” chii itikuu.

³⁵ Chii maatuu Jesus.

³⁶ Ekw anichii Jewa iinuuch kaa itwetwaau, “Taapwe chii saachihekupane aniyuu Lazarus.”

³⁷ Chii ihtaauch maak paashch e itwetwaau, “Chii ihtuutuweu aniyuu ekaa kaa waapahtamiyich naapeu chechii waapahtamiyich. Taanite wehchi ekaa uhchii ihtuutuwaat Lazarus ekaa chechii nipiyich.”

Jesus kaa wanishkaanaat Lazarus nipuwinihch uhchi

³⁸ Jesus maak miin chii muushihtaau naashch e misimitehet. Ekw kaa ituhtet anite aniyuu kaa waatakwaapiskahiikanuyich anite kaa chiskahaakanuyich Lazarus, chii chipikaapuuhaakanuyikupanenh e misichihtiyich asinii anite e uhchi piihchaanuyich.

³⁹ Chii itweu Jesus, “Iichetihtipinaahkw an asinii.” Ekw kaa itwet Martha aniyaa Lazarus wiichishaaniskwem, “Utipeyihchikeu, shaash chika miyaakun, wesh shaash neu chiishikaau kaa ishpish nipit.”

⁴⁰ Ekw Jesus kaa itaat aniyuu Martha, “Namui aa shaash chuuhchii wiihtamaatin, taapwehtamane che waapahtamuwat Chishemanituu uchisteyihtaakusuwin.”

⁴¹ Ekw kaa iichehtahaatwaau aniyuu asinii. Jesus maak e tastasaapit chii iteu, “Nuuhtaawii chinanaaskumitin e pechi nituhtuyin.

⁴² Nichischeyihten muush e pechi nituhtuyin, mikw maak nititwen uu chechii taapwehtahkwaau uchii iinuuch chii e chii pechi itishahuyin.”

⁴³ Iskutak maak uyuu kaa itwet Jesus chii chisheweu e itwet, “Lazarus, pechi wiiwiih.”

⁴⁴ Chii pechi wiiwiyuu an naapeu kaa nipit, utihchi kaye usit e wiishkweyaapahkaateyikwaau machunishiyuu kaye e maahkupiteyich utaashtamuhkw. Ekw Jesus kaa itaat, “Aapihkunaahkw, che pachishtinekw.”

Jewa iinuuh kaa niikaanishkuwaatwaau kaa aayimuutahkwaau chechii nipahaakanuyich Jesus

⁴⁵ Mihchetu maak Jewa iinuuch kaa pechi chiiutamaatwaau Mary chii waapahtamuch taan kaa ihtiyich Jesus kaye chii taapweyimeuch.

⁴⁶ Yaapach maak pasch chii nituwaapameuch aniyuuh Phariseeh e wiihtamuwaatwaau taan kaa ihtiyich Jesus.

⁴⁷ Ekw anichii Phariseech kaye kaa niikaanapitwaau ayimiheuchimaauch chii nishtuuneuch kaa uchimaawiitwaau kaa niikaanishkuwaayich iinuu e itaatwaau, “Taan che ihtiihkw. Naashch mihchetu maamishkaach chekwaayuu e ishi ihtuutahk uu naapeu.

⁴⁸ Pachishtinihkwe chechii ihtit uyuu taan e ihtit misiwe aweyuu chek chika taapweyimikuu kaye maak anichii Rome tipeyihchichesuuch chika wanaachihtaauch anite aniyuu maauch kaa payehkaniyich chichisheayimiheukamikunaanaayuu kaye misiwe chiyaanuu Jewa kaa itiskaanesuuhkw chika wanaachihiikunuuch.”

⁴⁹ Peyakw maak an ayimiheuchimaau Caiaphas kaa ishinihkaasut mekwaach kaa chisheayimiheuchimaaut aniyuu kaa pipuniyich chii iteu, “Taapwe namui chichischeyihtenaawaau chekwaan.

⁵⁰ Namui aa chichii nisituhtenaawaau uste che miyupayekw peyakw naapeu chechii nipistamuwaat iinuuh ishpish wii misiwe chiyaanuu Jewa kaa itiskaanesiihkw chechii wanaachihiikuyihkw.”

⁵¹ Wiya mekwaach Caiaphas e chii chisheayimiheuchimaaut aniyuu kaa pipuniyich eukw uyuu wehchi miikut Chishemanituu uyuu chechii itwet e chischiwehiichet, chii iteu Jesus che nipuushtamuwaayich Jewa kaa itiskaanesiyich iinuuh.

⁵² Mikw maak namui mikw Jewa iinuuh che nipuushtamuwaayich, misiwe kaye aniyuuh Chishemanituu utiiniimiyuuh paahpiiwe kaa ihtaayitwaauh che maamuunaayich, peyakutenuu chechii ishinaakusiyich.

⁵³ Aniyuu maak kaa chiishikaayich ekut kaa uhchi chihchipayihtaatwaau e naanituu chischeyihtahkwaau taan che ihtitwaau chechii nipahaatwaau Jesus.

⁵⁴ Eukw maak uyuu wehchi ekaa uhchi ihtaat Jesus anite e mihchetinaanuyich anite Judea aschiihch, chii chistuhteu ekw anite pakwaatiskamikaahch peschiish kaa ihtakuniyich ihtaawiniyuu Ephraim kaa ishinihkaateyich ekut anit kaa ihtaat kaye uchischinuhamuwaakan ekute kaa ihtaayich.

⁵⁵ Chii peshunaakun maak an Jewa miyaaskaacheu makushewin. Mihchetu awenich chii pechi ituhteuch Jerusalemihch nanaahkuu ihtaawinihch e uhtuhtetwaau e pechi takushihkwaau chechii ihtuutahkwaau taan kaa ishi wiishteyich ayimihewin wiishuwewinihch chipaa ihtuuch chechii payehchisiitwaau.

⁵⁶ Mihchetu maak uchii iinuuch chii naanituwaapameuch Jesus anit chisheayimiheukamikuhch e maausukuutwaau e ishi kakwechimitutwaau, “Taan e iteyihtaman chiya, chika pechi naachi makusheu aa chititeyimaau.”

⁵⁷ Anichii maak kaa niikaanapitwaau ayimiheuchimaauch kaye anichii Phariseech chii itashuweuch yaaitei che wiihtamiyich aweyuuh chischeyimaayichen taanite e ihtaayich Jesus chechii nituu maakunaakanuyich.