James 5 - Chishemanituu Utayimuwin: Kaa Uskaach Testament

Kaa miisitisiitwaau kaa yaakwaamaakanuutwaau

¹ Nituhtuukw chiyawaau kaa miisitisiyekw. Maatukw kaye nanehkaateumukw wesh chika ihtakun taan che ishi machipayekw.

² Akwaakuhtinh chimiisitisiiwinawaauh, manichuushach miichuuch chichekwaanimuwaauh.

³ Kuushaaushuuliyaaunaapiskuwaauch kaye chiwaashishuuliyaaunaapiskuwaauch akwaakwaapischipayuuch. Aniyuu maak e kwaakwaapischipayihtwaau eukun an che mamishimikuyin iskutak wiyaaskunikuyine. Chika muukunaawaau chiyaasiwaahch mwehch ishkuteu e ishi wanaachihiiwemakahch. Weyuutisiiwin chichii maauchihtamaasunaawaau uyuuh maahchishtai e chiishikaakwaauh.

⁴ Namui chuuhchi chiishiihkawaawaauch anichii awenichii kaa aapatisitwaau chinihtaauchihchikan aschiiwaahch. Nituhtawaahkuch maa e wiihtamaataakuch ekaa miyeyihtahkwaau. Chishemanituu an tekash kaa suuhkaatisiit chii pehtaweu taan e ishi tepweyich uyuuh kaa maamuushtinamiitwaauh chinihtaauchihchikanawaauh.

⁵ Chiyawaau kaa miisitisiyekw, misiwe chekwaan chechii ayaayekw ekun pisikw e ishi pimaatisiyekw utah aschiihch kaye mikw chiyawaau chiwii naniheyihtamihiisunaawaau. Ekw maak mwehch awesiishach e taahchiputwaau shaash e ishinaakusitwaau chechii nipahaakanuutwaau ekun e ishinaakusiyekw.

⁶ Chichii nishuuwanaachimaawaauch kaye chichii nipahaawaauch kaa kuiskutaatisiitwaau. Namui maak chinishkuushtaakuwaauch anichii awenichii uyuu kaa ihtuutawekuch.

Siipiiwesiih e ashuwaapamat Utipeyihchikeu che takushihk

⁷ Niichishaanitikw, siipiiwesiikw che ishpish ekaa takushihk Utipeyihchikeu. Chichischeyimaau kaa nihtaauchihchet e ishpish siipiiwesiit e ashuwaapahtahk chechii chiishi nihtaauchiniyikwaauh e miywaashiyikwaauh nihtaauchihchikan anite kaa nihtaauchihchet. Siipiiwesiyuu e ashuwaapahtahk chechii chimuuniyich e miyuuskamiyich kaye e takwaatiniyich.

⁸ Chiyawaau maak kaye chipaawii siipiiwesiinaawaau. Yaayichikaapuukw chitehiiwaahch wesh shaash wiipach kata takushin Utipeyihchikeu.

⁹ Ekaawii memehch ititikw, niichishaanitikw, ekw maak namui chika uhchi wiyaaskunikunaawaau. Shaash peshuch pechi ihtaau wiyaaskunichesuu, shaash chekaat nuukushuu.

¹⁰ Niichishaanitikw maamituneyimaahkuch maa uchischiwehiichesuuch anichii Chishemanituuh kaa pechi itishahukutwaau chechii ayimistamuwaatwaau. Naashch taapwe chii siipiiwesiyuuch e nanehkaachihaakanuutwaau. Eukun maak chipaa ihtinaawaau kaye chiyawaau.

¹¹ Wesh taapwe shaweyihtaakusuuch chititeyimaanuuch anichii ekaa uhchi nuuhtipuuniitwaau. Chichii pehtenaawaau taan kaa ishpish siipiiwesiit Job mekwaach kaa aayimuhut. Chichischeyimaanuu maak taan kaa ishi miyupayihtamaakut Utipeyihchikeu iskutak kaa chiishi aayimuhut. Saakaschineshkaakuu chishewaatisiiwiniyuu Utipeyihchikeu kaye saakaschineshkaakuu e chistimaacheyimaat aweyuu.

¹² Niichishaanitikw, e itat awen cheshtinaash che ihtuutaman chekwaan ekaawii wii naspichitaapwe Chishemanituu utishinihkaasun e aapachihtaawat. Ekaawii itweh, ishpimihch e ishi taapweyin, maak kutach chekwaan chechii itweyin chechii cheshtinaashtaakusiyin taan e itweyin. E wii itweyin “Ehe,” mikw “Ehe” chipaa itwen, maak “Namui” e wii itweyin, mikw “Namui” chipaa itwen, ekw maak namui chika uhchi nishuuwanaachimukw Chishemanituu.

Taan che ishi ayimihchikeshtamuwekuch anichii kaa aahkusitwaau

¹³ E ihtaakwe awen anit e ihtaayekw e aayimihut chipaa ayimihaau. E ihtaakwe awen e miyeyihtahk chipaa nikamuu e maamihchimaat Chishemanituu.

¹⁴ E ihtaakwe awen e aahkusit chipaa wiishaameu aniyuuh kaa niikaanishkuwaayich umaamuuayimihaauh chechii ayimiheshtamaakut. Chipaa tuuminikuu uyuuh Utipeyihchikeuh utishinihkaasuwiniyuu e aapachihtaayich.

¹⁵ Uchii maak kaa ayimihaatwaau aniyuu e taapweyimaatwaau Chishemanituu ekut che uhchi miinuwaatisiyich aniyuu kaa aahkusiyich. Tipeyihchikeuh chika wanishkaanikuu an kaa aahkusit kaye kaa machituutamukwe chika wepeyihtamaakuu.

¹⁶ Waawiihtamaatukw maak chimachituutamuwinawaauh kaye ayimiheshtamaatukw chechii uhchi miinuwaatisiyekw. Aniyuu taan e ishi ayimihaat awen e kuiskutaatisiit, naashch taapwe suuhchipayiniyuu taan e ishi ihtuutaachemakaniyich.

¹⁷ Aniyaanaa Elijah mwehch chiyaanuu kaa iteyihtaakusuuhkw chii iteyihtaakusuu. Iskutak suuhk kaa ayimihaat ekaa chechii chimuuniyich namui uhchi chimuuniyuu nishtu miin aapihtuu pipun ishpish.

¹⁸ Iskutak maak kaa ayimihaat chechii chimuuniyich taapwe chii chimuuniyuu ekw maak miin kaa nihtaauchihuumakaniyich misiwe chekwaayuu.

Saachihaahkuch anichii kaa chiiwekaapuutwaau

¹⁹ Niichishaanitikw, peyakw anit e tashiyekw chiiwekaapuushtahke taapwewiniyuu, wiichihiikute maak aweyuuh miin chechii taapwehtahk,

²⁰ che wii chischisiyekw uu. An awen kaau kaa peshuwaat aweyuu taan e ishi wanipayiyich wiihkuchihiimeu utahchaahkuyuu nipuwinihch uhchi, kaye ihtuutuweu mihchetu umachihtwaawiniyuuh chechii wepeyihtamuwaakanuyich.