James 3 - Chishemanituu Utayimuwin: Kaa Uskaach Testament

Mituun taan e ishi wanituutaachemakahch

¹ Niichishaanitikw, ekaawii chika uhchi mihchetinaawaau e chiskutamaacheyekw. Chichischeyihtenaawaau chiyaanuu kaa chiskutamaacheyihkw uste che aahkwaateyihtaakuhch taan che ishi wiyaaskunikuyihkw.

² Misiwe awen mihchetwaau wanipayuu. An awen ekaa wiiskaat kaa wanipayit taan e itwet namui ihtakuniyuu machaatisiiwiniyuu chechii ishi ataameyihtaakusit, kaye chii ihtuu chechii nanaakaataweyihtahk misiwe taan e ihtit.

³ Maamituneyim maa kaapalakaskweu, piywaapiskuyuu tahkuhtamutiyaakanuu chechii nanihiihtahk, ituhteu mikw taanite netuweyimaakanuut che ituhtet.

⁴ Maamituneyihtah maa kaye chiimaanh, aat aniyuu e ayaaspishaakwaau kaye e suuhchiiwech e uhchi pimaashtihkwaauh, naashch apishaashuu an niyuuhiikan yaapach maak chii mamiinuhiikanuu. Chii ihtuutam an kaa pimipayihtaat aniyuu chiimaaniyuu chechii kweschakuhtataat aniyuu chiimaaniyuu, taanite waa itakuhtataat chechii itakuhtaniyich.

⁵ Eukun maak mwehch e iteyihtaakuhch miteinii. Naashch apishaashuu, yaapach maak mistahii chika chii wanituutaachemakan. Maamituneyihta maak kaye ishkuteu. Mistahii wanaatan chekwaan nuuhchimiihch e pishitech, chii apishaashuu maak niishtam an ishkuteu.

⁶ Mwehch ishkuteu kaa iteyihtaakuhch ekun e iteyihtaakuhch miteinii. Misiwe taan e ishi ihtakuhch machaatisiiwin utah aschiihch ekut miteiniihch e ihtakuhch, chiiyuunaahch maak ekute e ihtakuhch. Tekash wiinihiiwemakan taan e ishpishaach miiyuu. Uskach pemaatisiit awen tasine ishkuteu ishinaakuniyuu uteinii piihiim nepit, machishkutehch maak ekute wehchi saskahiikanuyich.

⁷ Kaschihuu naapeu misiwe e iteyihtaakusiyich awesiisa chechii yuuspahaat. Kutak shaash chii yuuspaheu, muyaam piyeshiisha, nanaahkuu manichuusha, ekw maak namesa.

⁸ Mikw maak namui eshkw ihtaau awen chechii naanaakachihtaat taan e ishi ayimit. Namui chii yuuspihtaakanuu e ishpish maayaatahch miteinii. Mitun saakaschineu anite pihchipuwin kaa nipahiiwech.

⁹ Chituunuu chitaapachihtaanaanuu e maamihchimukw Chitipeyihchikeminuu kaye Kuuhtaawiinuu, ekun kaye yaapachihtaayihkw e machaayimuumahkwaau awenichii, aniyuuh Chishemanituu kaa ushihaat muyaam wiya kaa ishinaakusit chechii ishinaakusiyich.

¹⁰ Peyakun an mituun anite wehchi maamihchimaakanuut Chishemanituu kaye e uhchi machaayimuumaakanuutwaau awenichii. Niichishaanitikw, namui chipaa uhchi ishinaakun uu.

¹¹ E muuschichuuhch nipii namui taapishkun e payehkaakamihch maak e machaakamihch chika chii uhchichuun anit.

¹² Niichishaanitikw, namui wiisachiminaanh nihtaauchihtaau waapaminaahtikw kaye maak anite miinishaahtikuhch namui waapaminich chika uhchi nihtaauchuuch. Kaye anite e muuschichuuhch namui chika chii uhchipayuu e miywaakamihch nipii ekw maak siiuhtaakanaapuuh.

Kachehtaaweyihtamuwin Chishemanituu e ihtaat kaa uhchipayihch

¹³ Ihtaau aa awen anit e tashiyekw e kachehtaaweyihtahk kaye e ayaat nisituhtamuwiniyuu. Ekush kata waapahtiiweu uyuu kuiskw e ishi pimaatisiit kaye maak e atushchet chipaa nuukuniyuu e kachehtaaweyihtahk aniyuu uhchi e tipihteyimisut.

¹⁴ Machi uhteyihtamuwin maak e ayaawekwe chitehiiwaahch, maak mikw muush chiyawaau niikaan wii ishi pachishtinisuyekwe ekaawii maamihchimukw kaye ekaawii chika uhchi nanatayinaawaau e wii kaataayekw taapwewin.

¹⁵ Namui Chishemanituu e ihtaat uhchipayuu uu kaa iteyihtaakuhch kachehtaaweyihtamuwin, utah aschiihch uhchiimakan, naapeu uyuu ukachehtaaweyihtamuwin, machimanituu e ihtaat uhchipayuu.

¹⁶ Wesh taanite e ihtakuhch uhteyihtamuwin kaye muush niikaan e wii ishi pachishtinisunaanuuhch ekut e ihtakuhch wawaaneyihtamuwin kaye nanaahkuu machi ihtuwin.

¹⁷ An maak kachehtaaweyihtamuwin ishpimihch kaa uhchipayihch niishtam tekash payehkan, ekw miin e chiyaameyihtaakuhiiwemakahch, yuuspeyihtaakuhiiwemakahch, kaye ihtuutaakuu awen yaakwaau chechii nituhtawaat aweyuuh. Awen e ayaat uyuu kachehtaaweyihtamuwiniyuu naashch kata weyuuch chishewaatutaweu aweyuuh kaye mistahii chika miyutuutamaacheu, peyakunihch chika ishi kanawaapameu misiwe aweyuuh kaye namui mitun chika uhchi wii kakaataau taan nihaau e iteyihtaakusit.

¹⁸ Uyuu e ishi pimaatisiit awen ayaaweu Chishemanituu uchiyaameyihtamuwiniyuu. Wiichiheu kaye kutak aweyuu chechii kuiskutaatisiyich chechii ayaayich Chishemanituu uchiyaameyihtamuwiniyuu.