James 2 - Chishemanituu Utayimuwin: Kaa Uskaach Testament

Misiwe awen peyakunihch chechii ishi kanawaapamaakanuut

¹ Niichishaanitikw, e taapweyimekw Utipeyihchikeu Jesus Christ an maauch chesteyihtaakusit, ekaawii aatuweyimaahkw awen, misiwe awen peyakunihch chipaa iteyimaawaau.

² Utihtitaakw aahch e miisitisiit naapeu mekwaach e nishtawiyekw e ayimihaayekw, e ushaaushuuliyaanaapiskuyich maak taapichischehpisunh chichishkawaat, kaye maak naashch miywaashiyikwaau uchekwaanimh, chek maak miin kutak naapeu uhchi piihchet, naashch e chistimaatisiit kaye naashch e chistimaasinaakuniyikwaauh uchekwaanimh,

³ chisteyimat maak an kaa miisitisiit naapeu e itat, “Aashtam maa, ute e miywaach pechi apih.” Ekw maak itat an kaa chistimaatisiit naapeu, “Nete nituu niipuu,” maak itat, “Ute nisitihch pechi apih,”

⁴ kuiskw aa chitihtinaawaau uu e ihtiyekw. Chimiyutuutawaau peyakw ekw an kutak namui muyaam chitihtuutawaau mikw aniyuu e ishinaakusitwaau uschich. Chiwanipayinaawaau aniyuu e ishi kanawaapamekuch.

⁵ Yaakwaau nituhtamukw niichishaanitikw. Namui aa aniyuu kaa chistimaatisiyich utah aschiihch kaa ihtaayich uhchi wiyeyimeu Chishemanituu mistahii chechii ayaayich taapwehtamuwiniyuu kaye chechii ayaayich chisheuchimaawiniyuu aniyuu kaa itwet cheshtinaash che miyaat aniyuu kaa saachihiikut.

⁶ Ekw maak chiyawaau namui chichisteyimaawaauch anichii kaa chistimaatisiitwaau. Mikw maak namayeuch aa anichii kaa miisitisiitwaau naashch kaa wii ihtuutaataakuch, maak wiyaaskunicheukamikuhch kaa ituhtahiitaakuch.

⁷ Eukunich uchii kaa miisitisiitwaau naashch miyaayeyihtahkwaau aniyuu ishinihkaasuwiniyuu kaa chisteyihtaakuniyich. Eukw uyuu ishinihkaasuwiniyuu kaa uhchi wiyeyimitaakw Chishemanituu chechii tipiyeusiitutaakuwekw.

⁸ Taapwe maak chika miyutuutenaawaau nanihiihtamekwe an maauch kaa chisteyihtaakuhch wiishuwewin, an kaa itashtech Chishemanituu utayimuwinihch, “Saachihii kutak awen mwehch chii e ishpish saachihiisuyin.”

⁹ Chiishpin maak aahchiiuh iteyimekwe peyakw awen taan e iteyimekw kutak chimachituutenaawaau. Chitaapwemakunaawaau e machituutamekw wiishuwewin uhchi.

¹⁰ Wesh an awen misiwe aniyuu wiishuwewiniyuu kaa nanihiihtahk mikw maak peyakw chekwaayuu anit taan e itashteyich piikunahke misiwe aniyuu wiishuwewiniyuu e piikunahk ishinaakusuu.

¹¹ An awen kaa itwet, “Ekaawii pisikwaatisiih,” chii itweu kaye, “Ekaawii nipahii awen.” Aat maak ekaa peshikwaatisiiwane kaa nipahaaute maak awen chipiikunen misiwe wiishuwewin.

¹² Chipaa ishi ayiminaawaau maak kaye chipaa ihtinaawaau mwehch awenichii eshkw che wiyaaskunaakanuutwaau aniyuu wiishuwewiniyuu kaa aapihkuniwemakaniyich uhchi.

¹³ Awen ekaa kaa chistimaacheyimaat kutak aweyuu namui kaye wiya kata uhchi chistimaacheyimaakanuu iskutak wiyaaskunaakanuute. Mikw maak an awen kaa chistimaacheyimaat kutak aweyuuh namui kata uhchi kushtaachuu chechii wiyaaskunaakanuut.

Taapwehtamuwin ekw maak saachihiiwewin

¹⁴ Niichishaanitikw, taan ishi wiyaahpach awen e itwet, nitaapweyimaau Chishemanituu, ekaa maak miyutuutamuwaat aweyuu. Katachii pimaachihiikuu aa mikw e itwet, nitaapwehten.

¹⁵ Ihtaat aahch chiichishaanuu maak chiichishaaniskweminuu e nitaweyihtahk chekwaayuu che chichishkahk, maak miichimiyuu e nuuhtepayit,

¹⁶ taan ishi wiyaahpach mikw e itaat, “Chishemanituu chika shaweyimukw. Chiishuwaaspisuu kaye chiishpuhiisuh,” ekaa maak miyate aniyuuh chekwaayuu taan e ishi nitaweyihtahk.

¹⁷ Ekun maak mwehch e ishinaakuhch awen e itwet, nitaapweyimaau Chishemanituu ekaa maak nuukuniyich taan e ishi miyutuutahk. Namui aapataniyuu utaapwehtamuwin.

¹⁸ Kata chii ishinaakun pasch awenichii chechii itwetwaau, “Chitayaan taapwehtamuwin chiya, ekw niya nimiyu atushchen.” Nipaa itaau uu awen, “Pechi waapahtiih aahch chitaapwehtamuwin ekaa asitinaman chimiyuu atushchewin ekw maak che waapahtiitaan niya nimiyu atushchewin e asitinamaan anit nitaapwehtamuwin.”

¹⁹ Chitaapwehten aa mikw e peyakushit Chishemanituu. Miywaashuu uu e taapwehtaman. Kaye wiyawaau machiahchaahkuch taapwehtamuch uyuu, nanamipayuuch maak e ishpish sechisitwaau.

²⁰ Chinitaweyihten aa chechii waapahtiikuyin, chiya chiishkwehkaan, ekaa wiyesh ishinaakuniyich awen utaapwehtamuwin ekaa nuukuniyiche utatushchewin.

²¹ Taanite kaa uhchi kuiskunaakuhaakanuut wii aniyaanaa kuuhtaawiinuu Abraham Chishemanituu ishi e ihtaayich. Namui aa aniyuu e chii pachishteyimaat ukusisa Isaac Chishemanituu ishi e ihtaayich wehchii kuiskunaakuhaakanuut, pachishtinichenaapiskuhch kaa pachishtinaat.

²² Chiwaapahtamuwaan aa taan kaa ishi maamuu aapatisiimakaniyich utaapwehtamuwin ekw maak utatuschewin. Aniyuu utaapwehtamuwin chii mitunaakuniyuu utatuschewinihch uhchi.

²³ Chii tipipayuu maak an kaa itashtech Chishemanituu utayimuwinihch, Abraham chii taapweyimeu Chishemanituu eukw maak wehchii iteyimikut e kuiskutaatisiit. Abraham maak Chishemanituu uwiichewaakan chii ishinihkaataakanuu.

²⁴ Chiwaapahten maak, kuiskunaakuhaakanuu awen atushchewinihch uhchi namui mikw taapwehtamuwinihch uhchi.

²⁵ Mwehch an pisikwaatisiiskweu Rahab namui aa uhchi kuiskunaakuhaakanuu aniyuu uhchi taan kaa ihtit. Chii wiichiheu Jewa shimaakanisha e chii piihtakahaat wiichihch kaye maak e chii chihchitishahwaat kutachiyuu meskanaayuu e chii waapahtiyaat che aapachihtaayich.

²⁶ Wesh ekaa ihtaat ahchaahkw miiyuuhch nipiimakan an miiyuu. Ekun mwehch e ishinaakuhch taapwehtamuwin ekaa e asich ihtakuhch miyu atushchewin nipiimakan an taapwehtamuwin.