James 1 - Chishemanituu Utayimuwin: Kaa Uskaach Testament

¹ James niya, Chishemanituu ekw maak Utipeyihchikeu Jesus Christ utaapachihaakanuwaauh. Misiwe niwaachiyemaayuuh Chishemanituu utiiniim pahpiiwe kaa ihtaayich misiwe e ispichiskamikaayich uyuu aschiiyuu.

Taapwehtamuwin ekw maak aanuwehtamuwin

² Niichishaanitikw, miyeyihtamukw nanaahkuu e ishi kakwechihiikuyekw.

³ Wesh chichischeyihtenaawaau e kakwechihtaakanuuhch chitaapwehtamuwinawaau ekut wehchi ayaayekw siipiiwesiiwin.

⁴ Yaaitei chika wii ihtuutaakunaawaau siipiiwesiiwin mitun chechii shaapushkamekw taan che ishi nanachishkamuwekwe. Ekw maak che mitunesiyekw, e misiwesiyekw chika ishinaakusinaawaau, namui mitun chika uhchi nuuhtaashkenaawaau taan chipaa iteyihtaakusinaawaau.

⁵ E ihtaakwe awen ekaa chischeyihtahk taan nihaau che ishikaapuushtahk chekwaayuu e nachishkahk Chishemanituu chipaa nitutamuweu kachehtaaweyihtamuwiniyuu. Chika miikuu maak. Wesh Chishemanituu weyuuch miyeu misiwe aweyuuh taan e ishi nitaweyihtamaakut chekwaayuu.

⁶ Mikw maak ekaawii chika uhchi aanuwehtam an awen kaa nitutamaat. Wesh an awen kaa aanuwehtahk mwehch kiskan anite saakahiikanihch ekun e ishinaakusit, mikw taanite wehchiweyich ekute e itaahukut.

⁷ Namui chii wiyeyihtam uu awen taan nihaau che ihtit.

⁸ Uu maak e ishinaakusuwane ekaawii pukuseyim Chishemanituu chechii miisk chekwaayuu.

Kaa miisitisiitwaau ekw maak kaa chistimaatisiitwaau

⁹ Chiichishaanuu kaa chistimaatisiit chipaa miyeyihtam Chishemanituu e chisteyihtaakuhiikut.

¹⁰ Ekw an awen kaa weyuutisiit chipaa miyeyihtam e tipihteyihtaakuhiikut Chishemanituu. Wesh kaye wiya kata iskwaapayiniyuu upimaatisiiwin mwehch nihtaauchihchikan e waapikunuuhch e ispayihch.

¹¹ Iskutak chihchiwe e ati saakaashtuwet piisim ekwet ishkwaasahk nihtaauchihchikanh ekw piyaahpahchishtiniyikwaauh aniyuuh waapikunh. Wenaatahch an taan kaa ishi miywaashich. Ekun maak mwehch kaye wiya che ishinaakusit an awen kaa miisitisiit, kata puunipimaatisiyuu kaye wiya, che nakatahk misiwe utaapatisuwin.

Taanite wehchipayihch kakwechihiiwewin

¹² Shaweyihtaakusuu an awen ekaa kaa shaakuuchihiikut taan e ishi kakwechihaakanuut. Wesh shaapushkahke taan e ishi kakwechihaakanuut chika miikuu Chishemanituuh e weyuuch miyeyihtaakuniyich pimaatisiiwiniyuu, aniyuu kaa itweyich cheshtinaash che miyaayich aniyuu kaa saachihiikut.

¹³ An awen kaa kakwechihaakanuut namui chipaa uhchi itweu, “Chishemanituu nipechi kakwechihiikw.” Taapaa kata chii kakwechihiikuu machihtwaawiniyuu Chishemanituu kaye maak namui kakwechiheu aweyuuh chechii machituutamiyich.

¹⁴ Kakwechihaakanuu awen chechii machituutahkw iskutak peschepitikuch wiya tipiiwe umachinituweyihtamuwin kaye e kakweteyihtahk chechii machituutahk.

¹⁵ Iskutak maak siyaakuuchihiikut ekaa nishkuushtahk ekw taapwe e ati ihtuutahk aniyuu. Iskutak maak e ihtit aniyuu taan kaa ishi machinituweyihtahk, nipuwinihch ituhtahiikuu.

¹⁶ Niichishaanitikw kaa saachihiitakuch suuhk kuiskw wii ishi nisituhtamukw uu.

¹⁷ Misiwe miiwewin kaa miywaashich kaye kaa mitunesiimakahch anite ishpimihch uhchipayuu, anite Chishemanituu e ihtaat. Eukuu Chishemanituu kaa ushihtaat misiwe waashtewiniyuu anite chiishikuhch. Muush peyakunihch iteyihtaakusuu, namui ishinaakusuu mwehch e takaashtehtihch chekwaan weipishchiish mikw kaachii nuukuhch.

¹⁸ Chichii miikunuu pimaatisiiwiniyuu anit uhchi aniyuu utayimuwin kaa taapwemakaniyich chiyaanuu niishtam chechii wiihkuchihiitahkw utah uyuu aschiiyuu.

E pehtaakanuyich ekw maak e ihtuutaakanuyich Chishemanituu utayimuwin

¹⁹ Ekaawii wanichischisikw uu niichishaanitikw kaa saachihiitakuch. Misiwe awen suuhk muush yaakwaau chipaawii nituhtam, chipaa maamituneyihtam kaye taan waa itwet kaye namui tiiwehch chipaa uhchi chishuwaasuu.

²⁰ E chishuwaasit awen namui kuiskw chii ihtuutam aniyuu kaa ishi nitaweyimikut Chishemanituu chechii ihtuutahk.

²¹ Wepinamukw misiwe wiinisuwin kaye misiwe machaatisiiwin. Pachishteyimisukw Chishemanituu e ihtaat, ihtuutamuwaahkw utayimuwin chitehiiwaahch kaa piihtahahk aniyuu chechii pimaachihiikuwekw.

²² Mikw nituhtamute Chishemanituu utayimuwin ekaa maak ihtuutamute, chiwiyeshihiisun. Ihtuutam taan e itashteyich.

²³ An awen mikw kaa nituhtamuwaat Chishemanituu utayimuwiniyuu ekaa maak kaa ihtuutahk taan e itashteyich mwehch an awen kaa kanawaapamisut waapamisunihch ishinaakusuu.

²⁴ Iskutak kaa kanawaapamisut, chistuhteu ekw tiiwehch wenichischisit taan e ishinaakusit.

²⁵ Chishemanituu uwiishuwewin naashch taapwe miyeyihtaakuniyuu kaye aapihkunikuuch awenichii. An maak awen yaakwaau kaa nituu chischeyihtahk uyuu wiishuwewiniyuu ekaa maak puuniit uyuu e ihtit, ekaa wanichischisit taan kaa ishi pehtahk, ihtuutahke taan e itashteyich anit, eukuu che shaweyimikut Chishemanituu misiwe taan e ihtit.

²⁶ Awen e iteyimisut e kuiskutaatisiit mikw maak ekaa chii naanaakachihtaat taan e itwet, wiyeshihiisuu an awen. Namui wiyesh itaapataniyuu utayimihewin.

²⁷ An ayimihewin kaa iteyihtahk Chishemanituu kaa Uhtaawiimaaut e kuiskunaakuniyich kaye e payehchinaakuniyich maau e ishinaakuhch, ihtuutaakuu awen chechii miyu wiichihaat chiiyuusaanisha ekw maak kaa peyakuyitwaauh iskweuh mekwaach e aayimuhuyich kaye maak ihtuutaakuu awen ekaa mitun chechii wiinihiikuyich machaatisiiwiniyuu taan e ishi ihtakuniyich utah aschiihch.