Hebrews 9 - Chishemanituu Utayimuwin: Kaa Uskaach Testament

Taan kaa ishi nuuchiishtuwaakanuut Chishemanituu aniyuu niishtam niskumuusinahiikaniyuu uhchi

¹ An niishtam niskumuusinahiikan kaa ushihtaakanuuhch ekut kaa wiihtamuwaakanuutwaau awenichii taan nihaau che ihtitwaau e nuuchiishtuwaatwaau Chishemanituuh. Chii nituweyihtaakun chechii ihtakuhch maahkii utah aschiihch anit che nuuchiishtuwaatwaau Chishemanituuh.

² Uu maak maahkii chii niishin anite e pischisaakwaau. Peyakw an e pischisaach kaa payehchisiimakahch chii ishinihkaateu. Uu maak kaa pischisaach kaa payehchisiimakahch kaa ishinihkaatech chii ihtakun anite waashtenamaakanaahtikw kaye an miichisuunaahtikw anite kaa apit an aaihkunaau Chishemanituu e ihtaat kaa chii ishi pachishtinaakanuut.

³ An maak miin kaa uhchi ihtakuhch e pischisaach aakuyekahiikan chii itekamuu anite chechii pahkaaneyihtaakuhch anite an niishtam kaa pischisaach. Ekw uu kutach kaa pischisaach maauch kaa payehchisiimakahch chii ishinihkaataakanuu.

⁴ ekute anite kaa ihtakuhch kaa ushaaushuuliyaanaapiskuuhch pachishtinicheunaapiskw anit kaa chii ishkwaasiikanuuhkwaau kaa wiihchimaakushikwaau. Kaye chii ihtakun anite mistikuwat pisikw ushaaushuuliyaaunaapiskw e chii ishinaakuhch anite waaskaa kaye anite piihch ekun kaa ishinaakuhch. Ekut kaa piichishtihch kaye an puutai kaa ushaaushuuliyaaunaapiskuuhch anit kaa piihchishihk an aaihkunaau maanaa kaa ishinihkaataakanuut. Kaye aniyaa Aaron usaskuhunaahtikw kaa niipisiyuuniyich ekut kaa piihchishtiniyich kaye anichii niishu kaa napachisitwaau asiniich anit kaa masinahiikanuuhkwaau aniyuu mitaahtu kacheskwewinh ekut kaa piihchishtihkwaauh.

⁵ Tipiskuuch an mistikuwat iituu maak anite e iskwaach an mistikuwat, chii ihtaauch enchilich iiniihkaanich e chii ishihaakanuutwaau, naashch e chii miyunaakuhaakanuwaakupanenich. Utihtuhkunawaau mitun tekash chii aakuukuchiniyuu anite e akunaapwehiikanuuhch an mistikuwat. An maak akunaapwehiikan Apuwin anit wehchi wepeyihtamuwaat Chishemanituu aweyuu umachihtwaawiniyuu chii ishinihkaatakanuu. Etituu chipaa chii aayimuutamaatinaawaau uyuu chekwaayuu mikw maak namui chika uhchi wiichihiiwepayuu aat aayimuutamaane anuhchiish.

⁶ Iskutak kaa chiishi waweshihtaakanuuhkwaau aniyuu niishu kaa pischisaakwaau, eukw uu kaa chii ihtinaanuuhch anite maahkiihch. Anichii ayimiheuchimaauch mikw waa ishpish piihchetwaau aniyuu niishtam kaa pischisaayich chii ishpish piihcheuch iskutak e ihtuutahkwaau utaapatisuwinawaau.

⁷ Ekw an miin kaa ihtakuhch kaa pischisaach mikw an chisheayimiheuchimaau chii piihcheu maan anite peyakwaau peyakw pipunh. Mikw maak wiya e peyakushit chii piihcheu anite kaye anuhchiish e chii nipahaakanuyich awesiisa umihkuyuu chii piihtakataau anite iskutak e piihchet. Eukw maak uyuu mihkuyuu anite Chishemanituu e ihtaayich kaa chii ishi pachishtinamuwaat wesh kaye wiya an ayimiheuchimaau chii machituutam kaye anichii iinuuch chii machituutamuch maan ekaa chischeyihtahkwaau.

⁸ Eukw maak uyuu e ishi chiskutamaakuyihkw Kaa payehchisiit Ahchaahkw uyuu uhchi. An eshkw mekwaach e ihtakuhch an niishtam kaa pischisaach namui awen chika chii piihcheu anite aniyuu maauch kaa payehchisiimakaniyich kaa ishinihkaateyich e pischisaayich.

⁹ Ihtakun maak e ishi ayimihiikuyihkw uu anuhchiish kaa chiishikaach. An e chii ishihtaakanuuhch an ayimiheu maahkii piihtakamihch ekut wehchi chischeyihtamuhkw ekaa awen uhchishkuu chechii naataat Chishemanituu. Eshkw maak anuhchiish ekun e ishinaakuhch, aniyuuh machishtawehamaawinh kaye pachishtinichewinh namui chika chii ihtuutaakuu awen mitun chechii iteyihtamihiikut taapwe tekash e chii wepeyihtamuwaakanuut umachihtwaawinh.

¹⁰ Uu e ihtinaanuuhch e miiwaanuuhkwaau miiwewinh kaye machishtawehamaawinh ekun e itashtech niskumuusinahiikanihch chechii ihtinaanuuhch. Mikw wiihtamuwaakanuuch anit awenichii chekwaayuu chechii miichitwaau kaye chekwaayuu chechii minihkwetwaau kaye taan che ishi nanaahkuu ihtitwaau anit chechii uhchi ishinaakusitwaau e payehchisiitwaau. Uyuuh chekwaayuuh namui chiwiichihiikunaanuu chechii chischeyihtamuhkw taapwe chechii wepeyihtamaakuwaauhkwe. Eukw uyuuh pitamaa che wiichihiikuyihkw che ishpish ekaa utihchipayihch anit che ihtuutaatahkw Chishemanituu tekash chechii kuiskunaakuhiitahkw e uskaayich niskumuwiniyuu uhchi.

Jesus kaa pachishtinahk upimaatisiiwin

¹¹ Ekw maak Christ shaash e chii takushihk che uchisheayimiheuchimaamiihkw ekw wiya meyuu shuweyimitahkw. Chii piihcheu wiya aniyuu ayimiheu maahkiiyuu aniyuu ekaa utah aschiihch kaa uhchiimakaniyich. Namui naapeuh uhchi ushihtaayuu uyuu maahkiiyuu. Eukw uyuu maauch kaa chisteyihtaakuniyich ishpishaat aniyuu kaa chii aapataniyich utah aschiihch.

¹² Jesus Christ mikw peyakwaau chii piihcheu aniyuu maauch kaa payehchisiimakaniyich maahkiiyuu anite kihchikiishikuhch kaa ihtakuniyich. Wiya tipiiwe umihkw e chii pachishtinahk ekut kaa uhchi miyupayich chechii piihchet anite, namui wii awesiisa umihkuyuu uhchi aapachihtaaweu. E chii pachishtinisut chechii nipahaakanuut, wiya umihkw e chii siikanikanuyich, ekut tekash kaa uhchi tipahahk misiwe chimachihtwaawinuuh kaachiche chechii wepeyihtamaakuyihkw.

¹³ Anite Moses uwiishuwewinihch chii itashteu ekaa chechii nuuchiishtuwaatwaau Chishemanituuh anichii ekaa kaa payehchisiitwaau ayimihewinihch ishi. E payehchisiitwaau chii ishi kanawaapamaakanuuch iskutak kaa pihchikuunikanuyich maanishchaanish kaye naape mistus mihkuyuu anit e ihtaatwaau. Kaye aniyuu ishkwaaschiseyuu e chii ishkwaashwaakanuyich uschi nuushe mistusa chii usuwepinikanuyuu anite e ihtaatwaau.

¹⁴ Chiishpin maak awesiis umihkw e payehchtaachemakaniyich maamituneyihtamukw taan e ishpish etituu chechii ishi wiichihiikuuhkw Christ umihkw. Chii pimaatisiyuu utah aschiihch ekaa mechim uhchi machituutahk. Kaa payehchisiyich Ahchaahkwa kaachiche kaa ihtaayich chii wiichihiikuu iskutak kaa pachishteyimitisut Chishemanituu ishi e ihtaayich. Umihkw eukw che payehchihiikuuhkw. Namui wii aniyuuh ekaa wiyesh itaapatahkwaau chekwaayuu kaa chii ihtuutamuhkw chika uhchi pimaachihiikunaanuu. Ekw maak kaachiche chechii atushkuuhkw Chishemanituu.

¹⁵ Ekw maak wiya tipiiwe umihkuhch uhchi Jesus chii ushihtaau e uskaayich niskumuwiniyuu. Ekw maak anichii Chishemanituuh kaa tepwaatikutwaau chechii utiiniimitutaakutwaau kaachiche che ayaatwaau aniyuu taan kaa itweyich Chishemanituu cheshtinaash che miikutwaau. Jesus unipuwinihch uhchi ekut e ihtakuhch chechii wepeyihtamuwaakanuutwaau awenichii umachihtwaawinawaau aniyuu taan kaa ishi machituutahkwaau eshkw e chii aapataniyich weskach niskumuwiniyuu.

¹⁶ An maak niskumuwin muyaam taan e ishinaakuhch masinahiikaniyuu awen e chii ushihtaat e wiihtahk taan che ishi nakatamuwaat aweyuu iskutak nipite ekun taapishkuuch e ishinaakuhch an niskumuwin. Chichischeyihtenaawaache aniyuu masinahiikaniyuu e ushihtaat awen paatish ekaa pemaatisiit ekut yaakw e aapataniyich aniyuu taan kaa itashtaat.

¹⁷ Eshkw maak mekwaach e pimaatisiit an awen namui chii aapataniyuu aniyuu taan kaa itashtaat anit masinahiikanihch. Mikw iskutak ekaa pimaatisiit ekw yaakw e ihtuutaakanuyich aniyuu taan kaa itashtaat e ishi nituweyihtahk chechii ihtuutaakanuyikwaau uchekwaanim.

¹⁸ Ekun taapishkuuch an weshkach niskumuwin aniyuu Chishemanituu kaa ushihtamuwaat utiiniim, paatish mihkw e chii pihchikuunikanuuhch ekw yaakw kaa ishinaakuhch e aapatahch.

¹⁹ Chichischisiitutawaawaau aa aniyaa Moses, iskutak misiwe aniyuu wiishuwewin kaa ayimihtuwaat utiiniim, ekw kaa utinamuwaat e uschipimaatisiyich mistususha umihkuyuu, kaa chiikuunahk nipiiyuu anit mihkuhch ekw maak kaa akwaapihkaatahk niipisiiyaahtikuhch e mihkwaashiyich maanishchaanish upiiweyuu, kaa akuhtataat anit mihkuhch ekw kaa pachishtepayihtaat anite ishi aniyuuh wiishuweusinahiikanh e ihtakuniyikwaauh kaye anite iinuu e ihtaayich.

²⁰ Uyuu maak e chii ihtit, chii iteu aniyuu iinuu, “Ekut utah mihkuhch wehchi nuukuhch e aapataniyich Chishemanituu uniskumuwin kaa ushihtamuwaat utiiniim. Chititikuwaau chechii nanihiihtamuwekw.”

²¹ Moses kaye ekun nihaau kaa ihtit. Chii pichishtepayihtaau mihkuyuu anite ishi ayimiheu maahkiihch, kaye misiwe taan kaa ishi ihtakuniyich piihtakamihch e nuuchiishtuwaakanuyich Chishemanituu e itaapataniyich.

²² An wiishuwewin kaa aapatahch e nuuchiishtuwaakanuut Chishemanituu itashteu misiwe chekwaan chechii payehchihtaakanuuhch mihkw e aapatahch ekun maak kaa ihtuutaakanuuhkwaau misiwe chekwaayuu piihtakamihch anit maahkiihch kaa ihtakuhkwaauh, chii pichishtepayihtaakanuu mihkw taanit e ati ihtakuhkwaauh aniyuu chekwaayuu Chishemanituu e ihtaat e ishi aapatihkwaau. Wesh paatish mihkw kaa uhchikuuhch ekw yaakw che ihtakuhch wepeyihtamaachewin.

Jesus eukw e iichenahk machihtwaawiniyuu

²³ Chii nituweyihtaakun uu chechii ihtinaanuuhch chechii payehkahkwaau misiwe uyuuh chekwaayuuh. Uu e ihtinaanuuhch mikw wii nuukuhtaakanuu taan e iteyihtaakuhkwaauh aniyuu chihchiwe chekwaayuu anite kihchikiishikuhch kaa ihtakuhkwaauh. Cheshtinaash maak uste e miywaakwaauh machishtawehamaawinh nituweyihtaakunh wesh etituu chihchiwe iteyihtaakunh aniyuuh chekwaayuu anite kihchikiishikuhch kaa ihtakuhkwaauh.

²⁴ Wesh Christ chii piihcheu aniyuu maauch kaa chisteyihtaakuniyich ayimiheu maahkiiyuu anite kihchikiishikuhch kaa ihtakuniyich, aniyuu ekaa naapeu uhchi ushihtaayich. Uu maahkii utah aschiihch kaa ihtakuhch nispitaachemakan e ishinaakuhch an maahkii kihchikiishikuhch kaa ihtakuhch. Jesus maak anite kihchikiishikuhch wechiihch chii piihcheu, anite muush e ayimiheshtamaatahkw Chishemanituu e ihtaayich.

²⁵ An chisheayimiheuchimaau kaa chii piihchet anite peyehkaniyich peyakwaau peyakw pipun muush chii machishtawehamaau awesiisa eshikum pipun, eukw uyuu kaa chii ihtit chechii uhchi wepeyihtamuwaakanuut umachihtwaawin. Mikw maak peyakwaau Christ wiya tipiiwe upimaatisiiwin chii pachishtinam.

²⁶ Michihpin maak peyakwaau e chii pachishteyimitisut namui uhchi nituweyihtaakuniyuu tasine chechii pachishtinisut chechii nanehkaachihaakanuut. Chii nitaweyihtaakuniikupane maak uyuu chechii ihtit tasine ekun chipaa pechi ihtuu kaa ishpish ihtakuhch uu aschii. Iskutak maak wetihchipayikwaau uyuu e maahchichiishikaakwaauh peyakwaau mikw chii pachishtinam upimaatisiiwin chechii uhchi wepeyihtamuwaakanuyich aweyuu umachihtwaawiniyuuh.

²⁷ Nitaweyihtaakun misiwe awen peyakwaau chechii nipit ekw maak che wiyaaskunaakanuut.

²⁸ Kaye wiya maak Christ mikw peyakwaa chii pachishtinam upimaatisiiwin anit chechii uhchi ihtakuniyich misiwe awen chechii wepeyihtamuwaakanuut umachihtwaawinh. Mikw maak miin chika takushinuu, namui wii chechii nihiipayihtaat anit chechii uhchi wepeyihtamaachaanuyich machihtwaawinh, chika takushinuu mikw chechii pimaachihaat aniyuuh aweyuu kaa ashuwaapamikut che ishpish takushihk.