Hebrews 6 - Chishemanituu Utayimuwin: Kaa Uskaach Testament

¹ Niikaanihch ekw ishi aahchiitaau. Chiskutamaasutaau aniyuuh etituu e ati aayimihkwaauh chekwaayuuh wesh eukunh che wiichihiikuyihkw etituu chechii nihtaauchiihkw chitaapwehtamuwinaahch. Namui tasine chipaa uhchi ihtinaanuu mikw an uskach kaa ishi pehtamuhkw Christ e ishi aayimuumaakanuut chechii chiskutamaakuyihkw, wesh shaash chichischeyihtenaanuu an. Namui nitaweyihtaakun miin chechii chiskutamaakuyihkw ekaa chechii pimaachihaakanuut awen mikw aniyuu e miyutuutahk. Namui kaye nituweyihtaakun miin chechii aayimuutamaakuyihkw chechii taapweyimahkw Chishemanituu,

² maak chechii chiskutamaakuyihkw siikahaahtaachewinh, maak e saaminaakanuutwaau awenichii, maak nipuwinihch e uhchi wanishkaanaakanuut awen maak maahchishtai wiyaaskunichewin.

³ Suuhk etituu wii chischeyihtahtaau taan e ishi nitaweyimitahk Chishemanituu chechii ishi chischeyihtamuhkw.

⁴ Ihtaauch awenichii e nisituhtahkwaau taan kaa ishi chiskutamuwaakanuutwaau Jesus e aayimuumaakanuyich. Chii miikuuch Chishemanituu aniyuuh maauch kaa chisteyihtaakuniyikwaauh miiwewinh kaye Kaa payehchisiyich Ahchaahkwa chii miikuuch. Yaapach maak chihchiwe chii ati chiiwekaashpuutaweuch Chishemanituuh. Namui maak kata chii wiichihaakanuuch uchii miin chechii kweskaatisiitwaau.

⁵ Chii pehtamuweuch e ishpish miyuuhtaakuniyich Chishemanituuh umiywaachimuwiniyuu. Kaye chii muushihtaaweuch taan e ishpish suuhcheyihtaakuniyich usuuhkaatisiiwiniyuu anuhchiish kaye taan che ishpish suuhcheyihtaakuniyich anite ishi niishtamihch.

⁶ Che chiiwekaapuushtamuwaakwenich maak uchii iinuuch misiwe kaa ishi chischeyihtamihaakanuutwaau chipaa ishi taapwehtamuch namui miin chikachii ihtuutawaakanuuch chechii mihchiiweyihtahkwaau umachihtwaawinawaau. Aatuweyimeuch Chishemanituu Ukusiyuu. Kanawaach mushe maayeyimeuch Jesus ekw maak muyaam miin e chiistaaskuhwaatwaau aashiteyaahtikuhch ishinaakuniyuu aniyuu e itaatisiitwaau.

⁷ Maamituneyihtamukw uu. Ihtakuhch yaahch aschii e miyu minihkwemakahch chimuunaapuuh kaye maak nakayaa chimuuhch anit. Kaye maak miyu naanaakachihtaakanuuhch an aschii chechii miyu nihtaauchihtaachemakahch chekwaan e miichinaanuuhch. Miywaapatan an aschii. Chishemanituu shaweyihtam aniyuu aschiiyuu.

⁸ Ihtakuhch maak aschii taanit nehtaauchihch chekwaan ekaa wiyesh itaapatahch, namui wiyesh katachii itaapatan an aschii. Namui chika uhchi shaweyihtam Chishemanituu aniyuu aschiiyuu. Chika chii ishinaakuniyuu chechii ishkwaasahk aniyuu aschiiyuu.

⁹ E saachihiitakuch wehchi uu ishi ayimihiitakuch. Chitaapweucheyimitinaawaau wesh nishituunaakun taan e itaatisiyekw taapwe e chii pimaachihuyekw.

¹⁰ Ehe, chitaapweucheyimitinaawaau e chii pimaachihuyekw. Nichischeyimaau Chishemanituu kuiskw e ihtuutawaat misiwe aweyuuh. Chichischeyimikuwaau taan kaa ishi miyutuutamuwekw kaye taan kaa ishi nuukuhtawekw e saachihekw e chii wiichihiimekw kaa taapwehtamiitwaauh kaye eshkw e wiichihiimekw. Namui maak chika uhchi wanichischisuu uyuu.

¹¹ Chipukuseyimitinaan misiwe kanawaach chechii miyutuutamekw piihiim ati iskwaayaakwaawenh chipimaatisiiwinuwaauh. Ekw maak che cheshtinaahuyekw taapwe che miitaakw Chishemanituu misiwe taa waa ishi miitaakw.

¹² Namui chinituweyimitinaan chechii chihtimiyekw, teyakuch nispituwaahkuch anichii kaa taapwehtahkwaau ekaa kaa chiiwekaapuushtawaatwaau Chishemanituu, wesh eukw uchii che miikuutwaau Chishemanituuh taan aniyuuh kaa itweyich cheshtinaash che miikutwaau.

Taan e ishi cheshtinaateyihtaakuniyich taan aniyuuh Chishemanituu kaa itwet cheshtinaash che ihtuutahk

¹³ Maamituneyimaahkw maa Chishemanituu e ishpish chisteyihtaakusit. Wiya tipiiwe utishinihkaasuwin chii aapachihtaau e itwet cheshtinaash ekaa nihtaa che uhchi aahchistaawaat taan kaa ishi cheshtinaach itaat Abraham che ihtuutamuwaat. Namui kutak aweyuuh uhchi wiiheu chechii waapahtiyaat Abraham e taapwet taan kaa itwet, wesh taapaa ihtaau kutak awen e ishpish chisteyihtaakusit e ishpish chisteyihtaakusit wiya Chishemanituu.

¹⁴ Chii itweu, “Cheshtinaash chika shaweyimitin e miitaan mihchetu awenichii anit e ihtaayin chechii uhchi aanische pimaatisiitwaau.”

¹⁵ Chii siipiiwesiyuu maak Abraham e ashuwaapit che ishpish ihtuutamuwaakanuut aniyuu kaa itaakanuut cheshtinaash che ihtuutamuwaakanuut. Chek mihchetu pipunh kaa ashuwaapit. Ekw kaa miikut Chishemanituu aniyuu kaa itweyich cheshtinaash che miikut.

¹⁶ Iskutak awen niyaspich taapech chekwaayuu e itwet kutak aweyuu wiiheu uste e chisteyihtaakusiyich ishpishaat wiya. Ekw maak namui aweyuuh chii anuwehtaakuu aniyuu kaa ishi naaspich taapwet.

¹⁷ Chishemanituu chii iteu cheshtinaash che shaweyimaat utiiniimh. Eukw uyuu kaa itaat chechii chischeyihtamiyich ekaa wiiskaat che uhchi aahchihtaat taan kaa wii ihtuutamuwaat. Ekw maak eyuu kaa naspich taapwet e itaat cheshtinaash muush che shaweyimaat.

¹⁸ Wesh namui chika chii nanatayuu Chishemanituu. Wesh taan e ishi cheshtinaach itwet chekwaayuu ekun che ispayihch. Chii itweu maak uyuu chechii cheshtinaateyihtamuhkw ekaa wiiskaat aahchiiuh che uhchi iteyihtahk. Ekw maak iskutak naataashimututuuhkwe chechii pimaachihiitahkw, che yaayitihch chitaspeyimuwinuu e cheshtinaateyihtamuhkw taan kaa ishi naspich taapwet.

¹⁹ E cheshtinaateyihtamuhkw maak uyuu kaa ishi naspich taapwet Chishemanituu che ishi ihtuutamaatahkw muyaam e itaapachisit puunasinaapaachikan chechii kayeutakuhtihch uut ishinaakun. An maak awen kaa cheshtinaateyimahkw eukw an paahchet anite aniyuu kaa aakuuyekahiikanuyich maauch kaa payehchisiimakahk kaa ishinihkaateyich anite kihchikiishikuhch kaa ihtakuniyich ayimiheukamikuyuu.

²⁰ Jesus maak uu kaa cheshtinaateyimahkw. Anite aniyuu kaa piihchet ekute e ayimiheshtamaatahkw. Wiya kaachiche chisheayimiheuchimaau Jesus mwehch Melchizedek.