Hebrews 5 - Chishemanituu Utayimuwin: Kaa Uskaach Testament

¹ Misiwe chisheayimiheuchimaau mekwesiinuu utiiniimh e ihtaayich chii uhchi wiyaapamaakanuu chechii atushkuwaat Chishemanituu wiyawaau uhchi. Chii pachishtinichestamuweu aniyuuh iinuuh kaye chii machishtwehamaau chechii wepeyihtamuwaakanuyich aniyuuh iinuuh umachihtwaawaniyuuh.

² An awen kaa chisheayimiheuchimaaut chischeyihtam kaye wiya taan e iteyihtaakuniyich e nachishkaakanuyich kakwechihiiwewiniyuu. Ekw maak chescheyimaat yaakwaau chechii ihtuutawaat aniyuu utiiniim ekaa kaa iipwaahkaayich ekaa kuiskw ihtiyich.

³ An chisheayimiheuchimaau machishtawehamaau chechii wepeyihtamuwaakanuut umachihtwaawinh kaye maak aniyuu iinuu chechii wepeyihtamuwaakanuyich umachihtwaawiniyuuh.

⁴ Namui awen chika chii wiyeyihtam chechii chisteyihtaakuhiisut e chisheayimiheuchimaaut. Chishemanituu eukw weyaapamaat aweyuu che chisheayimiheuchimaawiyich, muyaam kaa ishi wiyaapimaat Aaron chechii chisheayimiheuchimaawiyich.

⁵ Ekun maak mwehch kaye wiya Christ. Namui wiya uhchi wiyeyihtam chechii chisteyihtaakuhiisut e chisheayimiheuchimaaut. Chishemanituuh chii itikuu, Chiya Nikus, niya Chuuhtaawiimaaututaun anuhchiish uu kaa chiishikaach.

⁶ Miin ihtakuniyuu anite utayimuwinihch Chishemanituu e chii itwet, Kaachiche chichisheayimiheuchimaaun, mwehch Melchizedek.

⁷ Mekwaach utah aschiihch kaa papaamuhtet Jesus mihchetwaau chii ishinaakusuu suuhk e nitutamuwaat aniyuuh kaa chischeyimaat chechii wiichihiikut ekaa chechii nipahaakanuut. Chii pehtaakuu maak wesh chii nanihchiishtuweu.

⁸ Aat e chii Ukusiitutaakut Chishemanituuh Jesus, yaapach chii nituweyihtaakuniyuu chechii chischeyihtamihaakanuut tekash chechii nanihiihtuwaat e pachishteyimitisuustamuwaat utiteyihtamuwiniyuu chechii nanehkaachihaakanuut. Ekut kaa uhchi chischeyihtamihaakanuut chechii nanihiihtuwaat Chishemanituuh.

⁹ Aniyuu maak tekash e chii nanihiihtahk Jesus chechii nanehkaachihaakanuut ekut kaa uhchi miyaakanuut kaachiche chechii pimaachihaat misiwe aniyuuh kaa nanihiihtaakut.

¹⁰ Ekw maak Chishemanituuh kaa wiyaapamikut chechii chisheayimiheuchimaaut mwehch Melchizedek e ishi chisheayimiheuchimaawiyich.

Suuhk wii ihtuutahtaau chechii ishi nihtaauchiihkw Utipeyihchikeu e ihtaat

¹¹ Eshkw mistahii ihtakun taan chechii ishi wiihtamaatakuch mikw maak naashch nitaayimihiikuun miin etituu chechii wiihtamaatakuch, wesh naashch taapwe namui chichii nisituhtenaawaau.

¹² Shaash chipaa chiskutamuwaawaauch awenichii taan e ishi taapwemakaniyich Chishemanituu utayimuwin wesh shaash weskach kaa uhchi taapwehtamekw chiyawaau miywaachimuwin. Mikw maak netuweyihtaakunikwe miin chechii chiskutamaakuyekw taan kaa ishi chiskutamaakuyekw uskach kaa chihchi taapwehtamekw muyaam apistawaashach mikw chuuchuusinaapuih kaa minihaakanuutwaau chititeyihtaakusinaawaau. Wesh namui chii miichuuch wiyaasiyuu apistawaashach.

¹³ Anichii awenichii muush kaa wii pehtahkwaau aniyuu taapwewiniyuu uskach kaa chiskutamuwaakanuutwaau, ekaa maak kaa aapateyihtahkwaau chechii chischeyihtahkwaau taan chechii ishi kuiskutaatisiitwaau, namui nisituhtamuch taan nihaau e iteyihtaakuniyich e kweskaatisiinaanuyich. Uchii maak awenichii kaa iteyihtaakusitwaau muyaam apistawaashach iteyihtaakusuuch mikw chuuchuusinaapui e minihaakanuutwaau.

¹⁴ Ekw anichii kaa chisheinuweyihtahkwaau shaash wiyaasiyuu miichuuch. Chii chiskutamaasuuch kuiskutaatisiiwinihch chechii ishi pimaatisitwaau eshikum chiishikaau e kuchihtaatwaau kuiskw chechii ishi pimaatisiitwaau. Eukw maak wehchii nisituunahkwaau kuiskutaatisiwiniyuu kaye machaatisiiwiniyuu.