Hebrews 4 - Chishemanituu Utayimuwin: Kaa Uskaach Testament

Taanite chechii uhchi utihtamuhkw Chishemanituu utayiwepuwin

¹ Chishemanituu maak chii itweu cheshtinaash che ayeskuushtamuwaat utiiniim taanite che ayiwepiyich. Eshkw maak uu anuhchiish kaa chiishikaach chika chii piihchenaanuu kaye chiyaanuu anite chechii ayiwepiihkw. Ekw maak ayaakwaamiitaau ekaa chechii ishi pimaatisiihkw chechii uhchi iteyimitahkw Chishemanituu ekaa tepicheyihtaakusuuhkw anite chechii piihcheuhkw.

² Ekw maak chichii pehtenaanuu an miywaachimuwin anit kaa aayimuutech taanite che ayiwepiyich Chishemanituu utiiniimh. Eukw uyuu miywaachimuwiniyuu kaa ishi pehtahkwaau aniyehkaanaanich chiwaahkumaakanuuch. Mikw maak namui uhchi piihcheuch anite wesh namui uhchi taapwehtamuch taan kaa ishi wiihtamuwaakanuutwaau.

³ Chiyaanuu maak chichii taapwehtenaanuu eukw maak uu wehchi piihcheyihkw anite che ayiwepiihkw. Mwehch kaa itashteyich Chishemanituu utayimuwinihch, Mekwaach kaa chishuwaasiyaan, nichii cheshtinaach itwen ekaa wiiskaat che uhchi piihchetwaau taanite kaa ayeskuushtamuukwaau che ayiwepitwaau. eukw uyuu kaa itwet aat shaash e chii chiishihtaat utaapatisuwin iskunaak kaa ushihtaat uyuu aschiiyuu.

⁴ Chichischeyihtenaanuu uu wesh itashteu Chishemanituu utayimuwinihch, Chishemanituu chii ayiwepuu iskutak kaa chiishihtaat utaapatisuwin, iskutak kaa niishwaashch chiishikaayich.

⁵ Miin yaapach aayimuuteu anit kaa itashtech, “Namui nihtaa nika uhchi pachishtinaauch chechii piihchetwaau anite kaa ayeskuushtamuukwaau chechii ayiwepitwaau.”

⁶ Aat e chii ishinaakusitwaau anichii niishtam kaa wiihtamuwaakanuutwaau miywaachimuwiniyuu ekaa uhchi wii taapwehtahkwaau kaye ekaa uhchi aapatihtahkwaau ekw maak kiipaa namui mechim uhchi utisaapahtamuch. Eshkw maak nihiipayuu chechii piihchaanuuhch anite chechii ayiwepinaanuuhch.

⁷ Chicheshtinaateyihtamihiikunaanuu maak uu wesh Chishemanituu miin chii miiweu e chiishikaayich chechii piihchaanuyich anite, eukuu anuhchiish kaa chiishikaach. Eukw uyuu kaa ishi wiihtamuwaakupane Chishemanituu aniyehkaanaanh chiwaahkumaakanuuh mekwaach pakwaatiskamikaahch kaa ihtaayich. Mihchetu pipun maak anite ishi niishtamihch David chii aapachihihikuu Chishemanituu uyuu chechii itaayich utiiniimiyuuh, Anuhchiish kaa chiishikaach pehtawekwe Chishemanituu e ayimihiitaakw ekaawii suuhcheyimukw. Ekaawii ihtikw ekaa chechii nituhtuwekw.

⁸ Aniyuu aschiiyuu taanite kaa ituhtahiimaat Chishemanituuh utiiniimiyuuh aniyaa Joshua, namayeut anit kaa ihtakuniyich chihchiwe che ayiwepiyich. Ekw maak paatimaa anite Chishemanituu chii iteu eshkw che utihchipayihch aniyuu e chiishikaayich che piihcheyich utiiniim taanite chihchiwe che ayiwepiyich.

⁹ Yaapach maak chika utihchipayuu chechii ayiwepiyich Chishemanituu utiiniim mwehch kaa ishi ayiwepiyich Chishemanituuh iskutak kaa niishwaashch chiishikaayich.

¹⁰ An maak awen kaa miskahk Chishemanituu utayiwepuwiniyuu kata aasteyeskuhiisuu taan kaa itaapatisit muyaam Chishemanituuh kaa ihtiyich.

¹¹ Ekw maak suuhk kuchihtaataau chechii piihcheyihkw taanite e ihtakuhch ayiwepuwin. Suuhk ayaakwaamiitaau ekaa chechii nuuhtaashkamuhkw chechii piihcheyihkw anite e ihtakuhch ayiwepuwin. Ekaa nanihiihtauhkwe Chishemanituu chika nuuhtaashkenaanuu anite chechii piihcheyihkw muyaam aniyehkaanaanich Israel iinuuch anite pechi utaahch kaa ishi nuuhtaashkahkwaau.

Taan e iteyihtaakuniyich Chishemanituu utayimuwin

¹² Chishemanituu utayimuwin pimaataniyuu. Suuhk aapatisiimakaniyuu. Uste kaashaayuu ishpishaat nitupayuuhkumaaniyuu itau e ishi kaashaayich. Mitun chitahchaahkunaahch kaye chimituneyihchikanaahch ishi aapatisiimakaniyuu. Mitun kaye e saapusichemakaniyich aaniskuukanaanihch kaye uskan pimiihch ekun e iteyihtaakuniyich. Chishemanituu utayimuwinihch ekut mitun wiyaapahtiikuyihkw taan nihaau e iteyihtamuhkw kaye taan nihaau e ishi pukuseyimuyihkw chitehiinaahch.

¹³ Misiwe chekwaayuu mushe waapahtam Chishemanituu. Misiwe aweyuuh tekash waapameu kaye misiwe chekwaayuu tekash waapahtam. Wiya maak chika wiihtamuwaanuu chekwaan wehchii ishi pimaatisiihkw taan kaa ishi pimaatisiihkw.

Jesus eukw waachikaapuushtaatahk

¹⁴ Suuhk maak mamechiminihtaau an kaa ishi waawiihtamuhkw e ishi taapwehtamuhkw wesh chitayaawaanuu e chisteyihtaakusit chisheayimiheuchimaau shaash anite Chishemanituu e ihtaayich e ihtaat, eukuu Jesus, Chishemanituu Ukusisa.

¹⁵ Wesh an chichisheayimiheuchimaaminuu chichistimaacheyimikunuu. Tekash chichischeyimikunuu ekaa mitun suuhchikaapuuhkw iskutak e kakwechihiikuuhkw chechii machituutamuhkw. Wesh kaye wiya chii kakwechihaakanuu chechii machituutahkw muyaam chiyaanuu e ihtuutaakuyihkw, mikw maak namui uhchi machituutam wiya.

¹⁶ E ayaauhkw maak chisheayimiheuchimaau uyuu e iteyihtaakusit namui wiiskaat chipaa uhchi sechisinaanuu chechii naatahkw Chishemanituu, an muush waa miyutuutamaatahkw. Naatahkwe chika miyutuutamaakunuu kaye chika wiichihiikunuu iskutak nitaweyihtamuhkwe chechii wiichihiikuyihkw mekwaach nachishkamuhkwe e aayimihch.