Hebrews 3 - Chishemanituu Utayimuwin: Kaa Uskaach Testament

Jesus uste iteyihtaakusuu ishpishaat Moses

¹ Niichishaanitikw kaa payehchisiyekw, kaye chiyawaau Chishemanituu kaa tepwaatitaakw. Maamituneyimaahkw maa Jesus, eukw uuyuu Chishemanituu utitishihwaakanh. Kaye eukw uu wechisheayimiheuchimaamiihkw. Chiwiichihiikunuu tekash chechii taapwehtamukw kaye chechii wiihtamuhkw taan e ishi taapwehtamukw.

² Kuiskw chii ihtuutaweu Chishemanituu Jesus aniyuuh kaa wiyaapamikut uyuu chechii itaapatisit. Kuiskw chii ihtuu kaye wiya mwehch Moses taan kaa ishi kuiskw chii atushkuwaayich Chishemanituuh mwehch e wiikaapuuhtaayich Chishemanituu uwaaskaahiikanimiyuu e chii ishinaakusiyich.

³ Uste maak iteyihtaakusuu Jesus taan kaa iteyihtaakusiyich Moses wesh wiya ihtuutaweu aweyuu Chishemanituu chechii utiiniimitutaakuyich. Mwehch awen kaa waaskaahiikanihchet uste wiya iteyihtaakusuu ishpishaat aniyuu waaskaahiikaniyuu kaa wiikaapuuhtaat.

⁴ Wesh misiwe waaskaahiikan ihtaau an awen kaa ushihtaat aniyuu, mikw maak Chishemanituu misiwe chekwaayuu chii ushihtaau. Taapwe kiipaa taapwemakan e peyakushiyich aweyuuh e niikaanishkaakutwaau tahtuutenuu awenichii. Eukw maak uyuu e ihtit Jesus, wiya niikaanishkuweu Chishemanituu utiiniimiyuu. Mikw maak Chishemanituu miikuu tipeyihchichewiniyuu uyuu chechii ihtit wesh wiya Chishemanituu misiwe chekwaayuu chii ushihtaau.

⁵ Moses maak chii utaapachihaakanitutaakuu Chishemanituuh, muush kuiskw chii ishi atushkuumeu utiiniimiyuu. Chii niikaan aayimuutamuweu taan che ishi wiihtamiyich Chishemanituu anite niishtamihch.

⁶ Aniyuu maak Chishemanituuh e Ukusitutaakut Jesus, kuiskw ishi atushkuweu Chishemanituu e niikaanishkuumaat utiiniimiyuuh. Christ eukw Chishemanituu Uukusisa. Chiyaanuu maak chika utiiniimitutaakanuu Chishemanituu, chiishpin suuhchiteheyihkwe taapwehtamuwinihch kaye suuhk mamechiminamuhkwe taan e ishi aspeyimuyihkw.

Aanuwehtamuwin yaakwaamuwewin

⁷ Ekw maak maamituneyihtamukw taan e itwet Kaa payehchisiit Ahchaahkw, iteu, Suuhk nituhtawaahkw Chishemanituu taan e ititaakw e ayimihiitaakw anuhchiish kaa chiishikaayich.

⁸ Ekaawii miskauhtaakw chitehiiwaauh mwehch kaa ihtitwaau aniyehkaanaanich chiwaahkumaakanuuch ekaa mitun uhchi wii nanihiihtawaatwaau Chishemanituu. Mekwaach kaa pimuhtetwaau anite pakwaatiskamikaahch kaa kakwechihaakanuutwaau maak, nichii wii naanituu chishuwaahiikuuch kaye chii kakwechihtaauch nisiipiiwesiiwiniyuu.

⁹ Ekut maak anit nuwach nichii kakwechihiikuch aniyehkaanaanich chiwaahkumaakanuwaauch chechii nituu chischeyihtahkwaau taan chechii ishpish ihtuutumuwaakwenich ekaa pisichitahkwaau, aat maak e chii waapahtahkwaau taan kaa ishipish maamishkaach ihtuuch anit e ihtaatwaau nemitanuu pipun ishpish.

¹⁰ Ekun maak wehchii chishuwaahiitwaau anichii iinuuch ekw kaa iteuch e aayimuumakwaau, utehiiwaauh muush wanihtahiikuuch kaye namui niwii nanihiihtaakuch taan e itakwaau.

¹¹ E chii chishuwaahiitwaau nichii nispich itwen an kaa itweyaan namui wiiskaat chika uhchi piihcheuch anite kaa ishi ayeskuushtamuukwaau chechii ayiwepitwaau.

¹² Niichishaanitikw, yaakwaamiikw ekaa chechii ihtaat awen anit e tashiyekw e machitehet e ayaat aanuwehtamuwiniyuu wesh chek chika chii ishinaakuniyuu chechii ati nakataat Chishemanituuh aniyuuh pemaatisiyich.

¹³ Eshikum chiishikaau maak kaachiichimitukw eshkw mekwaach e tawaach uu chechii ihtiyekw. Ekw maak namui waachi peyakw e tashiyekw chika uhchi wiyeshimikunaawaau chechii taapwehtamekw ekaa wiyesh ishinaakuhch machaatisiiwin. Wesh ekut che uhchipayihch e suuhchistikwaaneyekw.

¹⁴ Chipaa suuhchikaapuunaanuu chitaapwehtamuwinaahch che ishpish pimaatisiiwaauhkwe, mwehch taan kaa ishpish suuhchikaapuuyihkw uskach kaa taapweyimahkw. Uu maak ihtiihkwe Christ misiwe taan e ishi ayaat chika miikunuu kaye chiyaanuu chechii ayaauhk taan e ishi ayaat.

¹⁵ Itashteu Chishemanituu utayimuwinich, Anuhchiish kaa chiishikaach e pehtawekw Chishemanituu e ayimihiitaakw ekaawii maskuuhtaakw chitehiiwaauh mwehch kaa ihtitwaau aniyehkaanaanich aanische chiwaahkumaakanuwaauch e chii nishkuushtuwaatwaau Chishemanituu. eukw uyuu kaa itwet Chishemanituu.

¹⁶ Awenich maak anichii kaa chiiwekaapuushtawaatwaau kaye kaa kakwechichisuwaahaatwaau Chishemanituu aat wechiihch e chii pehtawaatwaau e ayimihiikutwaau. Namayeuch aa eukunich anichii kaa chistunihiihtahiikutwaau Moses Egypt kaa uhchi wiiwiihtahiikutwaau.

¹⁷ Chishemanituu chii chishuwaahiikuu aniyuuh iinuuh mekwaach aniyuu nemitanuu pipun kaa ishpish ihtaayich anite pakwaatiskamikaahch. Chii machaatisiyuuch uchii iinuuch ekute maak anite niyaanitam pakwaatiskamikaahch kaa nipitwaau.

¹⁸ Chii itikuwaakupanenich Chishemanituu, Namui chika uhchii piihcheuch anichii iinuuch kaa machaatisiitwaau aniyuu aschiiyuu taanite kaa ayeskuushtamuukwaau che ayiwepitwaau. eukw uyuu kaa itaat Chishemanituu aniyuu aweyuu ekaa mitun uhchi wii nanihiihtaakut.

¹⁹ Ekw maak chescheyihtamuhkw utaanuwehtamuwinawaau e chii ihtuutaakutwaau anichii iinuuch wehchi ekaa uhchi piihchewaatwaau aniyuu aschiiyuu Chishemanituu kaa ayeskuushtamaakutwaau anit che ayiwepitwaau.