Hebrews 2 - Chishemanituu Utayimuwin: Kaa Uskaach Testament

Chishemanituu kaa wiihtahk taanite chechii uhchi pimaachihunaanuyich

¹ Eukw maak an wehchi iteyihtaakuhch etituu chechii mamechiminamuhkw an taapwewin kaa ishi pehtamuhkw ekaa chechii chiiwekaapuyihkw.

² Anite weskach aniyuuh tipaachimuwin kaa chii pechi wiihtahkwaau enchilich chii taapwemakaniyuuh. Anichii maak awenichii ekaa uhchi aapatihtahkwaau maak ekaa uhchi nahiihtahkwaau, chii waweshihaakanuuch taan kaa ishi tepicheyihtaakuniyich chechii ihtuutawaakanuwaakupanenich.

³ Chiyaanuu maak chiishpin ekaa aapateyihtamuhkwe an pimaachihiiwewin waa ishi miiwet Chishemanituu chiyaanuu kaye chika waweshihiikunaanuu. Taapaa chika chii usimunaanuu iskutak wii waweshihiikuyihkwe. Wiya niishtam Utipeyihchikeu Jesus chichii wiihtamaakunuu taanite chechii uhchi pimaachihuyihkw, namui mikw enchilich chuuhchi wiihtamaakunuuch. Naanaache maak kutakach awenichii chichii waapahtiikunuuch e taapwemakaniyich aniyuu miywaachimuwiniyuu, wesh wiyawaau wechiihch chii pehtaweuch taan kaa itweyich Jesus.

⁴ Chishemanituu maak kaye wiya chichii waapahtiikunuu e taapwemakaniyich aniyuu miywaachimuwiniyuu e maamishkaach ihtit kaye maamishkaach waapahtiiwewin e waapahtiiwet kaye nanaahkuu e ishi maamishkaach ihtuutamaachet. Kaye chii ihtuutaweu Kaa payehchisiyich Ahchaahkwa chechii miyaayich aweyuu nanaahkuu kaschihuwinh, taan aniyuuh wiya Chishemanituu e iteyihtamihiikut che ishi miiwet.

Christ eukw chechii pimaachihiitahkw namui wii enchilich

⁵ Misiwe chekwaayuuh kaa aayimuutamaan che utihchipayihkwaau namui wii enchilich chika uhchi uchimaahkahtamuch.

⁶ Chichii miikunaanuu chechii cheshtinaateyihtamihkw uu wesh itashteu anite Chishemanituu utayimuwinihch, Taan e ishinaakusit naapeu wehchi naashch chihchiwe iteyimat, mikw naapeu an, yaapach maak naashch chimiyukanuweyimaau.

⁷ Weipishchiish chichii ihtuutuwaau etituu chechii tipihteyihtaakusit e iteyihtaakusiitwaau enchilh. Kaye yaapach chichii ihtuutuwaau chechii chisteyihtaakusit.

⁸ Chichii miyaau chechii uchimaahkahtahk misiwe chekwaayuu. Euk uu e itashtech Chishemanituu utayimuwinihch. Chichii wiihtamaakunuu maak Chishemanituu utayimuwinihch misiwe chekwaayuu e chii miitahkw chechii uchimaahkahtamuhkw. Namui ihtakun chekwaan ekaa chechii uchimaahkahtamuhkw. Anuhchiish maak eshkw namui chiwaapahtenaanuu misiwe chekwaan chechii uchimaahkahtamuhkw chiyaanuu kaa iiniiwiihkw utah aschiihch.

⁹ Mikw maak chichischeyimaanuu wii Jesus e ayaat tipeyihchichewiniyuu misiwe chekwaayuu chechii uchimaahkahtahk. Chii ihtuutawaakanuu weipishchiish etituu chechii tipihteyihtaakusit e iteyihtaakusiyich enchilh. Uyuu maak chii ihtuutawaakanuu chechii nachishkahk nipuwiniyuu. Eukw uyuu wehchii miyaakanuut chechii chisteyihtaakusit kaye chechii ispeyihtaakusit aniyuu e chii nachishkahk nanehkaateyimuwiniyuu iskutak kaa nipahaakanuut. Aniyuu maak Chishemanituu naashch e chii saachihaat aweyuu utah aschiihch eukw aniyuu wehchii nipistamuwaat Jesus misiwe aweyuu.

¹⁰ Chii ishinaakuniikupane taapwe chechii nanehkaachihaakanuut Jesus, wesh aniyuu e chii nanehkaateyimut ekut kaa uhchi ihtuutaakut Chishemanituu tekash chechii tepicheyihtaakusit chechii wepeyihtamaachet. Chishemanituu, an misiwe chekwaayuuh kaa ushihtaat kaye kaa ihtuutahk muush chechii ihtakuniyikwaauh, chii pachishtineu Jesus chechii nanehkaachihaakanuyich wesh chii nituweyimeu ukusisa kaa mihchetiyich chechii chischeyihtamiyich taan e iteyihtaakuniyich uchisteyihtaakusuwin. Jesus eukw wiyaapahtiyaat aweyuu taanite chechii uhchi pimaachihuyich.

¹¹ Jesus wepeyihtamuweu aweyuu misiwe umachihtwaawiniyuuh. Pahkaaniheu maak anite Chishemanituu e ihtaayich chechii ishi pimaatisiyich. Anichii maak Chishemanituu kaa pimaatisiistawaatwaau peyakuheuch Uhtaawaauh. Eukw maak aniyuu wehchi ekaa pimaameyimut Jesus uwiichishaan chechii ishinihkaataat aniyuuh kaa wepeyihtamuwaakanuwiitwaau.

¹² Chichischeyihtenaanuu uu wesh wiya Jesus chii iteu Chishemanituuh, Chishemanituu, chika aayimuumitin anite niichishaanich e ihtaatwaau. Nika wiihten anite umaamuuayimihaauch e ihtaatwaau taan kaa ihtiyin kaye chika maamihchimitin.

¹³ Kaye chii iteu, “Tekash nika cheshtinaateyimaau Chishemanituu.” Ekw miin kaa itwet, “Maaut e ihtaayaan, ekut kaye utah e ihtaatwaau nitawaashiimach aniyuuh Chishemanituu kaa pechi miit.”

¹⁴ Aniyuu kaa itwet nitawaashimach iinuuh aniyuuh kaa itaat. Jesus kaye wiya chihchiwe tekash iinuu chii ishinaakusuu kaye mitun tekash iinuu chii iteyihtaakusuu. Eukw uyuu iinuu wehchi ihtaat chechii nipikupane, chechii uhchii aspashihaat machimanituu, aniyuu kaa tipeyihtamiyich nipuwiniyuu.

¹⁵ Jesus chii nipuu chechii aapihkunaat mihchetu aniyuu aweyuu kaa maahchikwaapihkaatikuyich e kushtamiyich nipuwiniyuu ispin kaa pimaatisiyich.

¹⁶ Wesh chichischeyihtenaanuu Jesus ekaa uhchi takushihk enchilh chechii pechi wiichihaat. Chii takushinuu chechii wiichihaat aweyuu, aniyuu aanische kaa pechi pimaatisiyich Abraham uhchi e ihtaayich.

¹⁷ Eukw aniyuu wehchi tekash iiniihch chii ishihaakanuut. Chii nituweyihtaakusuu wiichishaan chechii nispituwaat anit chechii uhchi chisheayimiheuchimaaut Chishemanituu e atushkuwaat, ekw maak chechii wepeyihtamuwaakanuyich aweyuuh umachihtwaawiniyuuh.

¹⁸ Jesus chika chii wiichihiikunuu chiyaanuu kaa kakwechihiikuuhkw, wesh kaye wiya chii nanehkaateyimuhaakanuu kaye chii kakwechihaakanuu.