Hebrews 12 - Chishemanituu Utayimuwin: Kaa Uskaach Testament

Taanite wehchi kuiskunitahkw Chishemanituu

¹ Maamituneyimaataauch maa anichii kaa mihchetitwaau awenichii naashch kaa waapahtiiwetwaau e taapweyimaatwaau Chishemanituu. Uyuu e chii ihtitwaau kaye chiyaanuu ekun chipaa ihtinaanuu. Ekw maak an uhchi kaye chiyaanuu puunihtaataau misiwe aniyuu chekwaayuu e wanaahiikuyihkw chechii itaatisiihkw aniyuu taan e ishi nituweyimitahkw Chishemanituu chechii itaatisiihkw. Kaye misiwe wepinihtaau aniyuu machihtwaawinh kaa wii tipeyimikuyihkw, ekw maak che pimipahtaayihkw anite e kakwechiskatuhutunaanuuhch anite ahchaahkuwinihch ishi paatish chii utihtamuhkwe anite netaweyimitahkw Chishemanituu chechii ispahtaauhkw.

² Kaye kanawaapamaataau Jesus, an kaa ihtuutaatahkw chechii taapwehtamuhkw. Wiya chiwiichihiikunuu wetaach chechii suuhchikaapuuyihkw chitaapwehtamuwinaahch paatish tekash chii nanihiiwehiihkwe Chishemanituu. Chii shaapushkam nipuwiniyuu asiteyaahtikuhch kaye namui mechim uhchi aapateyihtamihiikuu aat e chii maayeyimaakanuut kaye e chii nenehkaateyimuhaakanuut wesh mikw aniyuu taan che ishpish muuchicheyihtahk iskutak miyaaupayiche anit e nanehkaateyimut ekun aniyuu kaa maamituneyihtamihiikut. Ekw maak anuhchiish, wiya chuuchisheuchimaaminaanuu anite maak apuu Chishemanituu unihiiwiniihch iitehche.

³ Maamituneyimaahkw maa Jesus taan kaa ishpish chii nanehkaateyimut. Chii uhkaatikuu aniyuu kaa machaatisiyich. Maamituneyimaahkw Jesus ekw maak che suuhchikaapuuyekw, namui chika uhchi wii nuuhtipuuniinaawaau e taapwehtamekw.

⁴ Ehe, chichii nishkuushten ekaa chechii machituutaman. Mikw maak namui eshkw chuuhchi ishpish nachishken e nanehkaateyimuyin chechii ishinaakuhch mitun chechii wii nipahiikuyin chitaapwehtamuwin uhchi.

⁵ Chichii wanichischisin aa taan kaa itisk Chishemanituu. Chichii wii kaachiichimikw, chiyawaau tipiiwe utawaashiim. Chii itweu, Nikus, iskutak Utipeyihchikeu e kuiskunisk suuhk yaakwaau ishi utinh. Ekaawii niihteyihta iskutak e wii kuiskunisk.

⁶ Wesh Chishemanituu kuiskuneu aniyuu misiwe kaa saachihaat, kaye kuiskuneu aniyuu misiwe utawaashiim kaa ishi kanawaapamaat.

⁷ Siipiiwesikw maak. Utinamuwaahk taan e ishi kuiskunitaakw che ishpish kuiskunitaakwe. Wesh namui chishuwaasuwinihch ishi ihtuutam uyuu. Anite kaa saachihiitaakw chuuhtaawiiwaau e ihtaat uhchipayuu uu. Muyaam wiya tipiiwe utawaashiim chit ishi nihtaauchinikunaawaau Chishemanituu. Chekw awaash maak ekaa kuiskunikut uhtaawii.

⁸ Misiwe utawaashiim Chishemanituu wiya niyaanitam kuiskuneu. Awen ekaa kaa kuiskunaakanuut namui taapwe Chishemanituu utawaashiimitutaakuu. Wesh awen ekaa nihtaa kuiskunaakanuut namui wiichihiiweu anite e peyakuteusiinaanuyich Chishemanituu e ihtaayich.

⁹ Kaye maak, eshkw e chii awaashiiwiihkw, Chuuhtaawiinuuch chichii kuiskunikunuuch yaapach maak chichii chisteyimaanuuch. Ishinaakun maak Chishemanituu etituu chechii chisteyimahkw ishpish wii Kuuhtaawiinuuch. Ekw maak chihchiwe pimaatisiiwin che ayaayihkw.

¹⁰ Chuuhtaawiinuuch utah aschiihch chichii kuiskunikunuuch e chii iteyihtahkwaau aniyuu taan kaa iteyihtamihiikutwaau uste e ishi miywaayich. Mikw maak Chishemanituu chuuhtaawiinuu, chikuiiskunikunuu wesh chischeyihtam eukw aniyuu uste e miywaayich chechii ihtuutaakuyihkw. Chikuiskunikunuu ekw maak chechii payehchisiihkw mwehch wiya e ishi payehchisiit.

¹¹ Mikw maak namui naashch miyeyihtaakun e kuiskunaakanuut awen. Chitaahkuhiikunaanuu mekwaach e kuiskunikuyihkw. Mikw maak paatimaa chiwaapahtenaanuu taan e ishpish miyu wiichihiikuyihkw an e chii kuiskunikuyihkw. Ekw maak e ayaayihkw chiyaameyihtamuwin kaye kuiskutaatisiiwinihch chii wii ishi pimaatisiinaanuu.

Yaakwaamuwewin e chiiwekaapuushtawaakanuut Chishemanituu

¹² Ekw maak suuhk wii suuhcheyihtaakuhtaakw kaa ayeskusiimakahkwaau chitihchiiwaau kaye suuhk wii suuhcheyihtaakuhtaakw kaa ayeskusiimakahkwaau chiskaatuwaau chechii suuhchikaapuuyekw.

¹³ E kuiskumuhkwaauh meskanuuh pimuhtekw ekw maak anichii kaa maaschipayitwaau che miinuwaachihaakanuutwaau ekaa etituu chechii maaschipayitwaau.

¹⁴ Suuhk kuchihtaakw chechii ishi pimaatisiyekw chechii miyu wiichewekuch kutakach awenich. Suuhk kuchihtaakw kuiskw chechii ishi pimaatisiyekw. Wesh taapaa kata chii naateu awen Chishemanituu ekaa kuiskutaatisiite.

¹⁵ Nanaakataweyimitikw ekaa waachi peyakw anit e tashiyekw chechii nuuhtaashkahk Chishemanituu umiiwewiniyuu kaa pimaachihiiwemakaniyich. Kaye yaakwaamiikw ekaa awen anit e tashiyekw muyaam machi watipii chechii ishi nihtaauchit. Wesh ihtaatwaawenich uyuu e ishinaakusitwaau mihchetu aweyuu kata machipayiheuch.

¹⁶ Kaye yaakwaamiikw ekaa waachipeyakw wiinisuwinihch chechii ishi pimaatisiyekw maak chechii ishinaakusiyekw ekaa aapateyimekw Chishemanituu mwehch aniyaa Esau kaa ihtit. Chii pachishtinam aniyuu taan eshkw chipaa aashuu miyaakanuu wiya e ustesimaaut, ekw peyakw wiyaakan miichimiyuu teyakuch kaa utinahk.

¹⁷ Chichischeyihtenaawaau maak, paatimaa anite kaau chii nituweyihtam aniyuu taan chipaa ishi aanische shaweyimaakanuu, mikw maak namui uhchi niskumikuu uhtaawii. Namui mitun uhchii wiyesh ihtuu chechii kwestinahk aniyuu taan kaa ihtit aat kaye naashch e chii maatutawaat uhtaawii. Yaakwaamiikw ekaa chechii ispayekw chiyawaau.

¹⁸ Naatekwe Chishemanituu namui kata uhchi iteyihtaakun chiyawaau taan kaa iteyihtaakuniyich Israel iinuuch iskutak kaa naataatwaau Chishemanituu. Peshuch aniyuu wachiyuu Sinai kaa ishinihkaateyich chii naatamuch. An maak wachii chii ishkwaateu kaye chii ukaashteyaau anite kaye chii ihtakun sechisuwin kaye chii mistachiishtin anit.

¹⁹ Kaye iskutak kaa pehtahkwaau e chishewemakaniyich puutaachikaniyuu anit kaye kaa pehtawaatwaau Chishemanituu e ayimiyich naashch chii kushtaachuuch ekw kaa nitutamaatwaau ekaa etituu chechii ayimiyich.

²⁰ Chishemanituu chii ayimihiikuuch e itikutwaau, “Taahtinikanuuhche an wachii, awesiis maak iinuu taahtinahke, chika nipahaakanuu e paahpimusinaatihwaakanuut.” Iskutak anichii iinuuch kaa pehtahkwaau uyuu namui uhchii itihtamuch uyuu.

²¹ Aniyuu taan kaa ishi waapahtahkwaau naashch chii sechiihiikuuch. Waawaach Moses chii iteu, “Ninamipayin e ishpish sechisiyaan.”

²² Chiyawaau maak wii namui peyakunihch ishinaakun. Iskutak e uhchishkuukaapuushtawekw Chishemanituu mwehch anite e ituhteyekw an wachii Zion kaa ishinihkaatech anite kihchikiishikuhch kaa ihtakuhch ekun e ishinaakuhch. Kaye mwehch anit e takushiniyekw an ihtaawin anit wachiihch kaa ihtakuhch Jerusalem kaa ishinihkaatech ishinaakun, anite e wiichit an kaachiche kaa ihtaat Chishemanituu kaye anite e ihtaatwaau e mista mihchetitwaau enchilich e muuchicheyihtahkwaau.

²³ ekute maak e ihtaayich misiwe Chishemanituu uniishtamuushaan aniyuu mesinaasuyich anite kihchikiishikuhch. Chipechi naataawaau Chishemanituu an misiwe aweyuu kaa wiyaaskunaat. Ekut kaye utah e ihtaayich utahchaahkuwaau anichii ukuiskutaatisiiuch mitun kaa tepi kuiskunaakuhaakanuutwaau.

²⁴ Kaye Jesus ihtaau anit, an kaa uschihtaawaat Chishemanituu uniskumuwiniyuu. Aniyuu Christ e chii wanihtaat umihkw chiyaanuu uhchi, ekut wehchi ihtakuhch wepeyihtamaachewin. Aniyuu maak wii Abel e chii wanihtaat umihkw kaa nipahaakanuut ekut kaa uhchi chischeyihtamuhkw chechii taapishtaakanuuch chekwaayuu e ihtuutawaakanuut awen.

²⁵ Ekw maak yaakwaamiikw chechii nituhtawekw Chishemanituu e ayimihiitaakw. Anichii Israel iinuuch namui uhchi wii nanihiihtaweuch aniyuu utah aschiihch kaa ihtaayich Chishemanituu utayimuwiniyuu kaa waawiihtamiyich, ekw maak namui uhchi pimaachihaakanuuch. Chititeyihtenaawaau aa maak che pimaachihiikuyihkw chiyaanuu ekaa nituhtuuhkwe Chishemanituu kihchikiishikuhch e uhchi ayimihiitahkw. Namui kaye chiyaanuu chika chii ushimutenaanuu waweshihiikusiiwin.

²⁶ Iskutak kaa ayimihaat Chishemanituu aniyuu iinuu anite aniyuu wachiyuu Sinai kaa ishinihkaateyich, mitun chii nanamipayiniyuu aschiiyuu iskutak kaa pehtaakuniyich upehtaakusuwin. Ekw maak anuhchiish e itwet uyuu cheshtinaash che ispayich, “Miin uu ihtuutamaane namui mikw aschii nika uhchi ihtuuten chechii nanamipayihch eyuu kihchikiishikw nika ihtuuten chechii nanamipayihch.”

²⁷ Aniyuu kaa itwet “Miin” uu ihtuutamaane, chiwiihtamaakunaanuu misiwe chekwaayuu kaa ushihtaakanuyich, misiwe e ispichiskamikaayich aschiiyuu che nanamipayiniyich kaye che wanaataniyich. Mikw an chekwaan ekaa chii ahtinikanuuhch ekun mikw an namui chika uhchi nanamipayuu.

²⁸ Eukw maak uyuu chipaa uhchi nanaaskumaanuu Chishemanituu e miitahkw chisheuchimaawiniyuu an ekaa nihtaa chechii ihtuutaakanuuhch chechii aahchipayihch. Ekw maak nuuchiishtuwaataau aniyuu wii e ishi nituweyimitahkw chechii ishi nuuchiishtuuhkw kaye chechii miyu atushkuuhk naashch e chisteyimahkw.

²⁹ Wesh Chichishemanituuminuu mwehch ishkuteu iteyihtaakusuu. Ishkuteu misiwe chekwaan kaa wanaachihtaachemakahch e ishkwaasuwech ekun e iteyihtaakusit.