Hebrews 11 - Chishemanituu Utayimuwin: Kaa Uskaach Testament

Taapwehtamuwin e aayimuutech

¹ E taapweyimahkw Chishemanituu chicheshtinaahunaanuu che ispayihch taan e ishi aspeyimuyihkw, chicheshtinaahunaanuu e ihtakuhkwaauh aniyuu chekwaayuu ekaa kaa waapahtamuhkw.

² Aniyuu maak kaa ishpish chii taapwehtahkwaau aniyehkaanaanich weskach awenichii eukw uyuu naashch kaa naheyihtamiyich Chishemanituu.

³ An taan e ishi taapwehtamukw ekut wehchi nisituhtamuhkw Chishemanituu e chii ushihtaat uyuu aschiiyuu, mikw chii ayimuu kaa uhchi ihtakuniyich. Aniyuuh chekwaayuuh ekaa nuukuhkwaau, ekut kaa uhchi ushihtaat Chishemanituu aniyuu chekwaayuu kaa waapahtamuhkw.

⁴ Weskach anite, naapeu Abel e chii ishinihkaasut chii taapweyimeu Chishemanituu aniyuu maak uhchi chii machishtawehamaau Chishemanituu ishi e ihtaayich. Naashch maak chii naheyihtamiheu Chishemanituu. Aniyuu ustesa Cain kaye wiya chii machishtawehamaayuu Chishemanituu ishi e ihtaayich. Mikw maak aniyuu Abel taan kaa ishi taapweyimaat Chishemanituu ekun aniyuu kaa nihiiwehiikut Chishemanituu. Eukw maak uyuu wehchii itaakanuut Abel e chii kuiskutaatisiit. Chichischeyihtenaanuu Chishemanituu naashch e chii naheyimikut wesh chii utinamuweu taan kaa ishi machishtawehamaayich. Ekw maak anuhchiish, aat shaash e chii nipit Abel, chichiskutamaakunaanuu chechii taapweyimahkw Chishemanituu e maamituneyihtamihkw taan kaa ishi taapwehtahk wiya Abel.

⁵ Miin kutak naapeu Enoch chii ishinihkaasuu, kaye wiya chii taapweyimeu Chishemanituu. Chii itaakanuu e chii nihiiwehaat Chishemanituu, wesh chii taapweyimeu Chishemanituu kaa ishpish pimaatisiit. Eukw maak uyuu wehchii utinikut Chishemanituu kihchikiishikuhch ishi. Namui uhchi nipuu Enoch. Sischikuuch namui uhchi ihtaau anite mekwesiinuu kaye namui uhchii miskaakuu aweyuu wesh Chishemanituu chii pechi utinikuu kihchikiishikuhch ishi.

⁶ Namui awen chika chii naheyihtamiheu Chishemanituu paatish taapweyimaate. Wesh an awen kaa wii pechi naataat Chishemanituu chipaa taapwehtam e ihtaayich Chishemanituu kaye e miyutuutawaayich aniyuu suuhk kaa wii chischeyimikut.

⁷ Noah chii ishinihkaasuu miin kutak naapeu e chii taapweyimaat Chishemanituu. Iskutak Chishemanituu kaa wiihtamaakut taan che ispayiyich aschiputeyiche aschiiyuu, aat ekaa uhchi waapahtahk aniyuu chechii ispayiyich iskutak kaa wiihtamuwaakanuut, yaapach chii taapwehtaweu Chishemanituu ekw kaa chihchi ushihtaat e mishaayich chiimaaniyuu anite che ihtaat e peyakuteusiit ekaa chechii nistaapaawetwaau. Aniyuu e chii taapweyimaat Chishemanituuh Noah kaye e chii nanihiihtuwaat, chii waapahtiiweu Chishemanituu che wiyaaskunaayich kaye che waweshihaayich misiwe aniyuu kutak aweyuuh wesh namui uhchi wii taapwehtamiyuuh. Noah maak e chii taapweyimaat Chishemanituu ukuiskutaatisiiu chii ishi kanawaapamikuu.

⁸ Abraham kaye chii taapweyimeu Chishemanituu. Eukw aniyuu wehchii nanihiihtuwaat iskutak kaa tepwaatikut kaye kaa itikut chechii nakatahk aniyuu aschiiyuu anit kaa uhchiit anite chechii ituhtet aniyuu aschiiyuu kaa itikut Chishemanituu che miikut wiya chechii ayaat. Abraham maak chii nanihiihtam, tiiwehch chii chistuhteu aat ekaa eshkw uhchi chischeyihtahk taanite nihaau chipaa ituhteu.

⁹ Chek maak chii utihtam aniyuu aschiiyuu Chishemanituu kaa ashutamaakut. ekute kaa ihtaat e maaniteut kaye e taapweyimaat Chishemanituu. Chii papaamaahtucheu mikw maahkiihch e ihtaat. Aniyuu ukusisa Isaac kaye aniyuu ushim Jacob chii papaa ihtaayuuh taanite kaa aihtaat. Chii itweyikupanenh Chishemanituuh kaye wiyawaau che ashutamuwaakanuutaau aniyuu aschiiyuu che miyaakanuyich Abraham.

¹⁰ Abraham maak chii pakweyihtam e ashuwaapahtahk che ishpish piihtakahiikut Chishemanituu anite aniyuu kaa yaaichikaapuuniyich ihtaawiniyuu, wiya Chishemanituu wechiihch e chii wiyeyihtahk che ishinaakuniyich kaye wiya e chii ushihtaat.

¹¹ Kaye Sarah nitaayimuumaau. Abraham chii wiichiskweu aniyuu Sarah. Kaye wiya maak Sarah chii taapweyimeu Chishemanituu. Namui wiishkaat uhchii ayaaweu awaasha kaye shaash chii miyaaskam aniyuu e ispihtisiinaanuyich chechii ayaawaakanuyich awaasha. Mikw maak yaapach chii ayaaweu awaasha aniyuu uhchi e chii taapwehtawaat Chishemanituu chechii ihtuutamaakut taan kaa itweyich cheshtinaash che ihtuutamaakut.

¹² ekute maak kaa uhchi ishinaakuniyich Abraham chechii uhtaawiimaaut aat shaash kaye wiya naashch e chii chisheinuut. Ekw maak Abraham mehchetiyich utaanische utawaashiim ekaa mechim misiwe chii achimaakanuyich. Muyaam taan e ishpish mihchetitwaau achahkushach anite chiishikuhch ekun e ispihchetiyich utawaashiim, muyaam taan e ishpish ekaa chii achihtaakanuuhch yaayeu kaa ihtakuhch yekaau wesaa e piisaauhkaasich ekun e ispihchetiyich.

¹³ Uchii maak misiwe awenichii kaa aayimuumakwaau, misiwe chii taapweyimeuch Chishemanituu piihiim kaa ati puunipimaatisiitwaau. Ekun kaa ishi puunipimaatisiitwaau eshkw e taapwehtahkwaau aniyuu taan kaa itweyich Chishemanituu taapwe che utihchipayich. Aat ekaa wiyawaau niyaanitam uhchi waapahtahkwaau chechii utihchipayich yaapach chii cheshtinaateyihtamihiikuuch che utihchipayich anite niishtamihch. Kaye chii chischeyihtamuch ekaa sehchei ishinaakuniyich aniyuu taan kaa ishi taapweyimaatwaau Chishemanituu. Kaye chii chischeyihtamuch ekaa utah aschiihch chihchiwe uhchi uhchiitwaau ekw maak wiyawaau niyaanitam chii itweuch mikw maaniteu e chii ishi kanawaapamisutwaau.

¹⁴ Uyuu maak e itwetwaau awenichii, nisituhtaakusuuch e naanituweyihtahkwaau aschiiyuu taanite chihchiwe chechii ihtaatwaau.

¹⁵ Chipaachii ituhtewaakupanenich miin kaau anite aniyuu aschiiyuu kaa uhchiitwaau chii wii ituhtetwaakupanenich.

¹⁶ Teyakuch maak, uchii iinuuch chii naanituuweyihtamuch aschiiyuu etituu e miywaayich ishpish aniyuu kaa nakatahkwaau. Chii muushteneyihtamuch anite kihchikiishikuhch chihchiwe chechii wiichitwaau. Ekw maak Chishemanituu namui shaakweyimuhiikuu nuuhtaawiinaan e ishinihkaatikut wesh shaash chii ayeskushtamuweu ihtaawiniyuu anite chihchiwe che ihtaayich.

¹⁷ Miin maa maamituneyimaahkw Abraham. Aniyuu e chii ishpish taapwehtahk mitun chii wii ihtuutam chechii machishtawehamaat ukusisa Isaac. Eukw uyuu kaa wii ihtit Abraham wesh ekun kaa itashumikut Chishemanituu chechii ihtit e chii wii nituu chischeyimikut taapwe che nanihiihtamukwe. Mitun maak chii ayeskuwiyuu Abraham chechii ihtuutamuwaat taan kaa itashumikut Chishemanituu, aat e chii wiihtamuwaakanuut cheshtinaash che shaweyimaakanuut.

¹⁸ Chichischisinaawaau aa uyuu kaa itikut Chishemanituu, Chika mihchetuuch chitaanische ushimach Isaac e ihtaayich che uhchi aanische pimaatisiitwaau. Eukw maak uyuu Abraham ukusiyuu Chishemanituu kaa aayimuumaat.

¹⁹ Abraham chii chischeyihtam Chishemanituu chechii wanishkaanaayich aweyuu nipuwinihch uhchi. Aniyuu maak kaau e chii miyaakanuut Abraham ukusisa Isaac, muyaam nipuwinihch e chii uhchi wanishkaanaakanuyich chii ishinaakuniyuu.

²⁰ Ekw maak miin kutakach awenichii che aayimuumakwaau taapwe e chii taapweyimaatwaau Chishemanituu. Isaac chii taapwehtam taan kaa itikut Chishemanituu. Ekw maak eshkw ekaa che nipit, chii shaweyimeu ukusisa Jacob ekw maak Esau, ekw kaa wiihtamuwaat taan che ispayitwaau.

²¹ Jacob maak kaye wiya chii taapweyimeu Chishemanituu. Iskutak kaa chischeyihtahk che nipit, chii ashamitapuu, kaa aaspachiit usaskuhunaahtikw ekw kaa maamihchimaat Chishemanituu. Chii shaweyimeu paahpeyakw Joseph ukusiyuuh wesh chii taapwehtam taan kaa itikut Chishemanituu.

²² Kaye wiya maak Joseph chii taapweyimeu Chishemanituu. Iskutak maak kaa utihchipayich anit che iskwaayaayich upimaatisiiwin, chii chischisuumeu Israel iinuu eshkw peyakwaau e chiishikaayich che nakatamiyich aniyuu Egypt aschiiyuu kaye chii iteu chechii chistuhtataayich wiiyuu iskutak chistuhcheyichen.

²³ Kaye maak Moses uniichihiikw chii taapweyimeyuu Chishemanituu. Iskutak Moses kaa pimaatisiit, chii waapamikuu uniichihiikw e ishpish miyu awaashiyuut, ekw kaa kanuweyimikut e kaayikut nishtu piisim ishpish. Namui uhchi kushtaachiyuuh Moses uniichihiikw chechii ekaa nanihiihtuwaatwaau aniyuu chisheuchimaau iskutak kaa itashuweyich chechii nipahaakanuyich misiwe kaa naapeshiiwiyich awaasha, wesh chii taapweyimeuch Chishemanituu.

²⁴ Iskutak maak kaa chiishi nihtaauchit Moses chii taapweyimeu kaye wiya Chishemanituu kaye namui uhchi pachishtinam chechii ishinihkaataakanuut Chisheuchimaaskwesh ukusisa, aat maak e chii nihtaauchinikut aniyuu.

²⁵ Uste chii iteyihtam kaye wiya chechii nanehkaachihaakanuut mwehch e ishi nanehkaachihaakanuyich Chishemanituu utiiniimiyuuh, ishpish wii machaatisiiwinihch chechii ishi pimaatisiit mikw weipishchiish e miyeyihtamihiiweyich.

²⁶ Aniyuu maak Moses e chii taapwehtahk, chii iteyihtam uste e miywaayich chechii maayeyimaakanuut aniyuu uhchi e chischeyimaat aniyuu Christ che takushiniyich ishpish wii chechii ayaat miisitisiiwiniyuu anite Egypt aschiihch. Shaash chii ayeskuweyihtam chechii pachishtinahk misiwe aniyuu wesh anite niikaanihch chii ishi ashuwaapahtam aniyuu chekwaayuu che miikut Chishemanituu e tipahamaakut.

²⁷ Moses maak e chii taapweyimaat Chishemanituu chii wiyeyihtam chechii nakatahk Egypt aschiiyuu ekaa uhchi kushtaachit, aat e chii mista chishuwaasiyich chisheuchimaauh. Moses naashch taapwe chii siipiiwesuu mwehch mitun e waapamaat Chishemanituu, aniyuu ekaa wiiskaat uhchi waapamikuyich naapeuh ekun kaa ishi pimaatisiit Moses.

²⁸ Moses maak e chii taapweyimaat Chishemanituu chii chihchipayihtaau chechii ihtakuniyich miyaaskaachewin makushewiniyu kaa ishinihkaataakaniyich, eshikum pipunh maak chii ihtuutaakanuu uu. Aniyuu maak Moses e taapweyimaat Chishemanituuh chii itashuweu chechii usuwepayihtaakanuyich awesiis mihkuyuu anite chishtuhkanihch ekw maak aniyuu enchil kaa nipahiiweyich ekaa chechii wanaachihaayich aniyuu niishtamushaan kaa naapesiiwiyich Israel iinuu e ihtaayich.

²⁹ Anichii Israel iinuuch kaye wiyawaau chii taapweyimeuch Chishemanituu. Ekun aniyuu wehchii saapuhtuwehtetwaau aniyuu chihchikamiyuu, kaa mihkwaach chihchikamii kaa ishinihkaateyich. Muyaam e ihtit awen e paahkwaayich aschiihch e pimuhtet ekun kaa ihtitwaau anichii Israel iinuuch kaa aashuushkahkwaau aniyuu chihchikamiyuu. Ekw maak anichii Egypt kaa uhchiitwaau iinuuch kaa wii kuchihtaatwaau kaye wiyawaau chechii aashuuhtetwaau aniyuu chihchikamiyuu misiwe chii nistaapaaweuch.

³⁰ Miin maak anite anichii Israel iinuuch chii taapweyimeuch Chishemanituu, eukw aniyuu wehchii chiinikwaanishkahkwaau aniyuu ihtaawiniyuu Jericho kaa ishinihkaateyich niishwaashch chiishikaauh ishpish, iskutak kaa itikutwaau Chishemanituu uyuu chechii ihtitwaau. Ekw maak misiwe aniyuu kaa waaskaa kaapuuniyich anit aniyuu ihtaawinihch kaa pahchihtiniyich.

³¹ Kaye maak aniyaanaa iskweu kaa chii ataawet wiiyuu, Rahab kaa ishinihkaasut, kaye wiya chii taapweyimeu Chishemanituu iskutak kaa piihtakahaat anite wiichihch aniyuu Israel iinuu kaa chiimuusaapahtamiyich aniyuu ihtaawiniyuu kaye kaa wiichihaat ekaa chechii nipahaakanuyich. Aniyuu maak kaa ihtit namui uhchi nipahaakanuu iskutak kaa nipahaakanuyich aniyuu iinuu anite Jericho kaa wiichiyich ekaa kaa nanihiihtuwaayich Chishemanituuh.

³² Namui nitaweyihtaakun etituu chechii aayimuutamaan uu. Kaye maak misuwaach namui nika uhchi ishpishiin chechii masinahiicheyaan chechii aayimuumakwaau Gideon, Barak, Samson, Jephthah, David kaye Samuel ekw maak anichii kutakach uchischiwehiichesuuch.

³³ Wesh kaye wiyawaau, muyaam aniyuuh kutak kaa ihtiyich, chii taapweyimeuch kaye wiyawaau Chishemanituu ekw maak kaa shaakuuchistaatwaau uchimaawinh utah aschiihch, kaye kuiskw chii ihtuuch e niikaanishkuwaatwaau iinuu, kaye mihchetu chii waapahtamuch chekwaayuuh e ispayikwaauh taan aniyuuh Chishemanituu kaa itweyich cheshtinaash che ispayiyikwaauh. Chii chipahamuweuch mistatimuh utuuniyuuh ekaa chechii nipahiikutwaau.

³⁴ Namui uhchii wanaachihiikuuch ishkuteyuu, kaye chii ushimututamuch chechii nipahaakanuutwaau nitupayuuhkumaaniyuu e aapataniyich. Chii miinuwaachihaakanuuch aahkusuwinihch uhchi, kaye chii shaakuuchiheuch kutak shimaakanisha e chii nitupayihkahtaakutwaau.

³⁵ Chii ihtaauch kaye iskweuch e taapweyimaatwaau Chishemanituu ekw maak aniyuu uhchi chii waapameuch aniyuu utiiniimuwaau kaa nipiyich kaau e wanishkaanaakanuyich nipuwinihch uhchi. Kaye kutakach chii ihtaauch e chii taapweyimaatwaau Chishemanituu aat maak e chii ishpish taapweyimaatwaau yaapach chii nanehkaachihaakanuuch piihiim kaa ati nipahaakanuutwaau, wesh namui uhchi wii itweuch ekaa chischeyimaatwaau Chishemanituu chechii uhchi pachishtinaakanuutwaau. Niikaan chii ishi pukuseyihtamuch uste e miywaayich pimaatisiiwiniyuu chechii ayaatwaau iskutak wanishkaanaakanuutwaawenich nipuwinihch uhchi.

³⁶ Kutakach chii wausinuwaakanuuch e maayeyimaakanuutwaau anite e mihchetinaanuyich, kaye chii kusiihkuwaakanuuch kaye wawaach chii mamechimaapiskuhwaakanuuch anite chipahuutuukamikuhch.

³⁷ Pasch chii nipahaakanuuch e paahpimusinaatahwaakanuutwaau, pasch aapihtuwiyuu chii ishi chimupuyaakanuuch, pasch chii nipahaakanuuch nitupayuuhkumaan e aapataniyikwaau. Pasch anichii iinuuch chii ihtuutawaakanuuch chechii papaamitisumutwaau. Maanishchaanish ekw maak kaauteshkanishit kaa apisiisit awesiis usakai chii uhchi ushihtaauch uchekwaanimuwaau e chichishkahkwaau, namui uhchi ihtakuniyuu taanite chechii wiichitwaau, misiwe chekwaayuu chii ishi nuuhtepayuuch. Kaye chii mista waawiisacheyihtamihaakanuuch kaye naashch chii nanehkaachihaakanuuch.

³⁸ Yaapach maak anichii kaa machaatisiitwaau awenichii utah aschiihch namui uhchi tepicheyihtaakusuuch chechii wiichimikutwaau uyuu iinuuh. Ekw anite pakwaatiskamikaahch kaye wachiihch ekute kaa kaasutwaau kaye anite awesiisa uwaatikumiihch kaye anite e waatikwaapiskaayich ekute kaa ihtaatwaau.

³⁹ Aat maak e miywaashiyich taan kaa ishi taapweyimaatwaau Chishemanituuh misiwe uchii iinuuch, kaye aat e chii itaakanuutwaau e chii nanihiiwehaatwaau Chishemanituuh, yaapach namui uhchi utisaapahtamuch mekwaach kaa pimaatisiitwaau aniyuu taan kaa itikutwaau Chishemanituuh cheshtinaash che miikutwaau.

⁴⁰ Wesh chii ihtakuniyuu taan kaa ishi wiyeyihtamaatahkw Chishemanituu etituu e miywaayich. Namui uhchi wii miikuuch pitamaa Chishemanituu aniyuu taan kaa itikutwaau che ishi miikutwaau wesh maamuu chichii wii mitunaakuhiikunuu.