Hebrews 1 - Chishemanituu Utayimuwin: Kaa Uskaach Testament

Taan kaa ishi pechi ayimihiitahk Chishemanituu Ukusisa uhchi

¹ Anite weskach Chishemanituu mihchetwaau chii ayimiheu aniyehkaanaan aanische chuuhtaawiinuuh. Chii aapachiheu aniyuu uchischiwehiichesuuh nanaahkuu chechii ishi wiihtamiyich taan kaa pechi itwet.

² Anuhchiish maak, uyuuh maahchishtai e chiishikaakwaauh Ukusisa uhchi ekut wehchi ayimihiitahkw. Eukw uyuu Ukusisa Chishemanituu kaa aapachihaat misiwe chekwaayuu kaa ushihtaat kaye eukw uyuu kaa wiyaapamaat misiwe chekwaayuu che aashuumiyaat.

³ An Ukusisimaau e ihtaat ekut wehchi chischeyihtaakuniyich Chishemanituu uchisteyihtaakusuwin, kaye Ukusisimaau tekash nispituweu taan e iteyihtaakusiyich. Wiya Ukusisimaau uchimaahkahtam aschiiyuu kaye misiwe chekwaayuu ishpimihch kaa ihtakuniyich. Utayimuwin kaa suuhcheyihtaakuniyich uhchi uchimaahkahtam misiwe uyuu. Chii pachishteyimitisuu chechii nipahaakanuut chechii uhchi payehchihaakanuyich aweyuuh e wepeyihtamuwaakanuyich umachihtwaawiniyuuh. Iskutak kaa chiishihtaat uyuu kaa ishi pachishteyimitisut ekw kaa waweyapihaakanuut anite unihiiwiniih Chishemanituu e ihtaayich aniyuu maauch e ispeyihtaakusiyich kihchikiishikuhch.

Chishemanituu Ukusisa etituu chisteyihtaakusiyuu ishpish wii enchilh

⁴ Eukw maak aniyuu wehchi wiya etituu chisteyihtaakusit Ukusisimaau ishpish wii enchilh. Chishemanituuh chii miikuu uyuu chechii ishpish chisteyihtaakusit. Aniyuu maak e ishinihkaataakanuut Chishemanituu Ukusisa ekut wehchi nuukuniyich taapwe wiya etituu e chisteyihtaakusit ishpish wii enchilh.

⁵ Chishemanituu namui nihtaa uhchi iteu enchil e ayimihaat, Chiya Nikus, anuhchiish uu kaa chiishikaach niya Chuuhtaawiitutaun. Kaye namui wiiskaat uhchi iteu enchil e aayimuumaat, Niya nika uhtaawiitutaakw ekw maak wiya che Ukusiyaan.

⁶ Iskutak kaa pechi itishahwaat Chishemanituu Uniishtamuushaan utah aschiihch, chii itweu, Misiwe Chishemanituu utenchilamiyuu chika nuuchiishtaakuu.

⁷ Chishemanituu kaa aayimuumaat enchilh, chii itweu, Nitihtuutuwaauch nitaapachihaakanich enchilich muyaam e yuutihch kaye muyaam ishkutehch chechii iteyihtaakusitwaau.

⁸ Ukusisimaau maak e aayimuumaat chii itweu, Chiya Chishemanituu, chuuchimaawin kaachiche chika ihtakun, kuiskw chitihtin e uchimaawiyin anite chuuchimaawinihch.

⁹ Chichii saachihtaan kuiskutaatisiiwin ekw machaatisiiwin chichii uhkaaten. Eukw maak wehchii wiyaapamitaan niya Chichishemanituum, kaye kaa chisteyihtaakuhiitaan e tuumiskuunitaan chechii ayaayin muuchicheyihtamuwin. Chiya maauch chichisteyihtaakuhiitin ishpish wii chiwiichewaakanich.

¹⁰ Chishemanituu kaye miin chii iteu Ukusisa, Chiya, Utipeyihchikeu, kaa ushihtaayin aschii anite pechi weskach, chichii ushihtaan aschii eshkw ekaa mechim uhchi ihtakuhch chekwaan kaye chiya chitihchiihch chichii uhchi ushihtaan kihchikiishikw.

¹¹ Uyuuh maak kaa ishi ushihtaayin eshkw peyakwaau e chiishikaach chika iskwaapayuuh mikw maak kaachiche chika ihtaan chiya. Kihchikiishikw kaye aschii chika ati weskachuunh muyaam machunisha e mehchiskaakanuuhkwaau.

¹² Eshkw peyakwaau e chiishikaach chika kweschinaakuhtaan kihchikiishikw kaye aschii. Muyaam akuhpischiish e nuutametinikanuuch ekun che ihtuutaman. Mikw maak chiya muush peyakunihch chika iteyihtaakusin, namui nihtaa chika uhchi iskwaapayuu chipimaatisiiwin.

¹³ namui maak nihtaa uhchi iteu Chishemanituu enchil taan kaa itaat Ukusisa. Chii iteu Ukusisa, Aashtam pechi apih ute nihiiwinihch. Nika shaakuuchihaauch anichii kaa uhkaatiskwaau. Nika ihtuutawaauch chechii pachishteyimutisuustaaskwaau. eukw uyuu Chishemanituu kaa itaat Ukusisa.

¹⁴ Ahchaahkuch maak enchilich. Chishemanituu itishahukuuch chechii waawiichihaatwaau aniyuu che pimaachihaakanuyich.