Galatians 4 - Chishemanituu Utayimuwin: Kaa Uskaach Testament

¹ Miin chika wiihtamaatinaawaau taan nihaau waa itweyaan. Maamituneyimaahkw maa naapesh che aanische aashuu miyaakanuut uhtaawii uchekwaanimiyuuh, eshkw e awaashiyuut aapachihaakan ishi kanawaapamaakanuu. Namui eshkw wiya chika chii wiyeyihtam taan che ihtit, aat shaash misiwe chekwaayuu e tipiyeusiit e ishinaakusit.

² Eshkw e awaashiyuut ihtaayuuh aniyuuh nehtaautinikut. Eukw aniyuuh kenuweyimikut kaye niyaanaakachihtamaakut aniyuuh chekwaayuuh che ayaat paatish utihchipayiyiche anit che itweyich uhtaawii ekw tipaan chechii wiyeyihtamaasut.

³ Ekun maak mwehch chiyaanuu, eshkw ekaa uhchi chischeyihtamuhkw taapwewin mwehch awaashach chichii iteyihtaakusinaanuu. Wiishuwewinh ekw maak ihtuwinh utah aschiihch naashch chihchiwe kaa iteyihtamihiiwekwaau chichii maahchikwaapihkaatikunaanuu.

⁴ Iskutak maak taapwe wetihchipayiyich anit kaa iteyihtamikupane Chishemanituu chechii pechi itishahwaat Ukusisa, chii pechi itishahweu utah aschiihch. Iskweu e ihtaayich chii uhchi pimaatisiyuu. Jewa chii itiskaanesuu ekw maak kaa nituweyihtaakusit chechii nanihiihtahk Jewa ayimiheu wiishuwewinh.

⁵ Chii pechi itishahwaakanuu utah chechii pimaachihaat aniyuuh aweyuuh Jewa ayimiheu wiishuwewiniyuu kaa maahchikwaapihkaatikuyich anit misiwe Chishemanituu utawaashiimh chechii ishi kanawaapamaakanuyich.

⁶ E utawaashiimitutaatahkw maak Chishemanituu, chii pechi itishahweu Ukusisa Utahchaahkuyuuh chitehiinaahch. An maak Ahchaahkw eukw e ihtuutaatahkw, “Paapaa, Nuuhtaawii” chechii ishi tepwaatahkw Chishemanituu.

⁷ Namui maak ekw aapachihaakan chit ishi kanawaapamikuun. Teyakuch Chishemanituu utawaashiim chit ishi kanawaapamikuun. Ekw maak Chishemanituu utawaashiim e ishi kanawaapamikuyin kiipaa che miisk taan aniyuuh kaa itwet che aashuu miiyaat utawaashiimh.

Paul kaa mukushkaateyihtamihiikut aniyuuh kaa taapwehtamiitwaauh Galatiahch kaa uhchiyich

⁸ Anite pechi utaahch eshkw ekaa uhchi chischeyimekw Chishemanituu chichii maahchikwaapihkaatikuwaauch anichii manituuch kaa iteyimekuch ekaa maak chihchiwe manituuch iteyihtaakusitwaau.

⁹ Ekw maak chescheyimekw ekw Chishemanituu. Aatekaa teyakuch chipaa miywaau itweyihkw wii eukw Chishemanituu e chischeyimitaakw. Taanite wehchii ihtiyekw miin chechii naatekuch anichii ahchaahkuch ekaa kaa saapisiitwaau kaye ekaa wiyesh kaa itaapatisitwaau, miin chechii maahchikwaapihkaatitaakuch.

¹⁰ Ihtakun aniyuu e chiishikaakwaauh kaye e ispihtaayaakwaauh kaye e pipuhkwaauh naashch chihchiwe e iteyihtamihiikuyekw. Ihtaauch kaye piisimuch chihchiwe e iteyimekuch.

¹¹ Chimukushkaateyihtamihiinaawaau e maamituneyimitakuch. Sheshkwaaht kaakaye an kaa ishpish chii mista aapatisiyaan e wii wiichihiitakuch.

¹² Niichishaanitikw, chinututamaatinaawaau kaye chiyawaau chechii ishi pimaatisiyekw mwehch e ishi waapamiyekw niya e ishi pimaatisiyaan. Aat Jewa e itiskaanesiyaan mwehch ekaa Jewa itiskaanesiyaan nichii ihtin mekwaach anite e ihtaayekw kaa ihtaayaan. Taapaa nipiskaaten wiishuwewin wii, chechii pimaachihiikuyaan kiipaa chechii ishi kanawaapahtamaan. Namui wiyesh chuuhchii ishi wanituutuunaawaau mekwaach anit e ihtaayekw kaa ihtaayaan.

¹³ Cheshtinaash chichischisinaawaache kaa aahkusiyaan niishtam kaa nituwaapamitakuch chechii waawiihtamaatakuch miywaachimuwin.

¹⁴ Namui maak chuuhchi aatuweyiminaawaau chechii wiichihiyekw aat e chii aayimaasinaakuhch chechii wiichihiyekw kaa ishpish wesa chii aahkusiyaan. Teyakuch naashch taapwe chichii miyu kanuweyiminaawaau, mwehch taapwe enchil kihchikiishikuhch e chii uhchi chiiutamitaakw maak wiya Jesus Christ e chii chiiutamitaakw ekun kaa ishi miyuhkuuyekw.

¹⁵ An maak mekwaach naashch taapwe chichii miyeyihtenaawaau. Taan maak e ihtiyekw ekw. Nicheshtinaahun chipaa miinaawaau chischiisikuwaauh chii ishinaakunikupane chechii kuikunamekw kaa ishpish suuhk chii wii wiichihiyekw.

¹⁶ Chuuhkaasinaawaau aa ekw taapwewin e wiihtamaatakuch.

¹⁷ Naashch taapwe chiwii naheyihtamihiikuwaauch anichii aahchiiuh kaa ishi chiskutamaachetwaau. Mikw maak ihtakuniyuu taan e ishi ekaa muyaam iteyihtaakuniyich taan waa ihtitwaau. Chiwii ihtuutaakuwaauch ekaa chechii aapateyimiyekw niya, wiyawaau teyakuch chechii nituhtawekuch.

¹⁸ Taapwe kiipaa miywaayuu suuhk e kuchihtaat awen chechii wiichihaat aweyuuh, taapwe maamuyaam waa ishi wiichihaakwe. Miywaau taan e ishi muush miyu wiichihekw awen aat ekaa ihtaayaan anit e ihtaayekw.

¹⁹ Chiyawaau nitawaashiimach kaa iteyimitakuch, mwehch iskweu e ishpish aahkusit e wii waapamaausut ekun miin e itamahchihuyaan e maamituneyimitakuch, ekun che itamahchihuyaan paatish nispituwekwe Jesus e iteyihtaakusit.

²⁰ Taapwe nipaa miyeyihten nituwaapamitakuch aahchiiuh chechii itihtaakusiyaan e ayimihiitakuch. Wesh nimukushkaateyihten e maamituneyimitakuch.

Hagar ekw maak Sarah

²¹ Uu maak pechi wiihtamuukw chiyawaau Jewa ayimiheu wiishuwewinh kaa iteyihtamekw chechii tipeyimikuyekw, namui aa chicheshtinaahunaawaau taan e itwemakahkwaau aniyuuh wiishuwewinh.

²² Itashteu Chishemanituu umasinahiikanihch Abraham e chii niishiyich ukusisa. Chii niishiyuuh iskweuh e chii utawaashiimihaat. Kuuhpaaneskweuh aniyuuh peyakw, Hagar chii ishinihkaasuyuuh. Ekw aniyuuh kutak eukunh wiichishkweuh, Sarah chii ishinihkaasuyuuh.

²³ Iskutak kaa pimaatisiyich utawaashiim an kuuhpaaneskweu Hagar, namui chekwaan uhchi iteyihtaakanuuyuu. Ekw iskutak Sarah ukusisa pemaatisiyich naashch taapwe chihchiwe chii iteyihtaakanuuyuu wesh chii itikuu Chishemanituuh taapwe che utawaashiimit aat e chii chisheishkweshiyuut kaye ekaa uhchi nihtaaushet.

²⁴ Maau maak cheskutamaakuyihkw an tipaachimuwin chechii ishi nisituhtamuhkw. Uchii niishu iskweuch eukunich mwehch aniyuuh niskumuwinh e niishihkwaau Chishemanituu kaa pechi pachishtinahk. Uu kuuhpaaneskweu Hagar aapachihaakan awaasha chii pimaatisiyuuh e ihtaat uhchi. Ekw maak mwehch an niskumuwin Chishemanituuh kaa ushihtaat anite Sinai kaa ishinihkaatech wachiihch eukw e ishinaakusit uu iskweu. Anite Arabia kaa ishinihkaatech aschii ekute e ihtakuhch an wachii.

²⁵ Mwehch uu ihtaawin utah aschiihch anuhchiish kaa ihtakuhch Jerusalem kaa ishinihkaatech eukuu Hagar. Aniyuuh Jewa ayimiheu wiishuwewinh maahchikwaapihkaatikuuch anichii anit Jerusalemihch kaa ihtaatwaau.

²⁶ An Jerusalem kihchikiishikuhch kaa ihtakuhch eukuu chikaawiinuu.

²⁷ Wesh itashteu Chishemanituu umasinahiikanihch, Miyeyihta, chiya ekaa nihtaa uhchi ayaawat awaash. Chiya ekaa wiiskaat uhchi waapamaausuyin, tepwe e ishpish miyeyihtaman. Namui kuuhchi ayaawaauch awaashach, anuhchiish maak chiya uste chika mihchetuuch Chitawaashiimach ishpishaat an iskweu shaash weskach kaa unaapemit.

²⁸ Kaye chiyawaau maak niichishaanitikw, Chishemanituu kuutawaashiimitutaakuwaau wesh ekun kaa ititaakw Chishemanituu che ishinaakusuwekw. Mwehch Sarah ukusisa Isaac kaa ishinihkaasuyich chitishinaakusinaanuu, aniyuuh Chishemanituu kaa itwet cheshtinaash che pimaatisiyich.

²⁹ An ukusisimaau kuuhpaaneskweuh kaa ukaawiit chii nanehkaachiheu aniyuuh wiichiinuu, aniyuuh Chishemanituuh Utahchaahkuyuuh kaa uhchi wiihtaakanuyich che pimaatisiyich. Ekun maak mwehch e ispayihch eshkw anuhchiish kaa chiishikaach.

³⁰ Mikw maak maau e itashtech Chishemanituu utayimuwinihch, Wiiwepinaahkw an kuuhpaaneskweu kaye aniyuuh ukusisa. Wesh aniyuu ukusisa uu kuuhpaaneskweu ekw maak aniyuuh Abraham wiichiskweu ukusiyuu taapaa wiiskaat taapishkun chika uhchi tipeyihtamuch taan chipaa ishi ashutamaakuuch uhtaawaauh.

³¹ Ekw maak niichishaanitikw, namui an kuuhpaaneskweu kuutawaashiimitutaakunuu. An iskweu ekaa kaa kuuhpaaneskweut eukun wetawaashiimitutaatahkw.