Galatians 3 - Chishemanituu Utayimuwin: Kaa Uskaach Testament

Utaapwehtamuwin kuiskunaakuhiikuu awen

¹ Chiyawaau kaa taapwehtamekw Galatia aschiihch kaa ihtaayekw nuwach ekaa kaa iteyihtamekw. Awen wesaa kaa ishi wiyeshimitaakw. Naashch yaakwaau chichii wiihtamaatinaawaau Jesus Christ e chii chiistaaskuhwaakanuut ashiteyaahtikuhch.

² Peyakw chekwaan chika kakwechimitinaawaau. Wiihtamuukw maa. E nanihiihtamekw aa Jewa ayimiheu wiishuwewinh chichii uhchi miikunaawaau Kaa payehchisiit Ahchaahkw. Namui aa e chii pehtamuwekw Jesus umiywaachimuwin kaye e chii taapwehtamuwekw wehchii miikuyekw.

³ Taanite wehchi naashch ekaa iteyihtamekw. Chititeyihtenaawaau aa chiyawaau chechii ihtuutamekw chechii chiishihtaayekw aniyuu taan kaa ishi chihchipayihtaat Kaa payehchisiit Ahchaahkw chipimaatisiiwiniwaahch.

⁴ Chititeyihtenaawaau aa sheshkwaaht e ishinaakuhch misiwe taan kaa ishi nachishkamekw. Naanituu chekwaan chichii iteyihtamihiikunaawaache uyuuh.

⁵ Chichii miikuwaau aa Chishemanituu Kaa payehchisiyich Ahchaahkw kaye maak chii maamishkaach ihtuu aa anit mekwesiinuu e ihtaawekw mikw aniyuu e nanihiihtamuwekw Jewa ayimiheu wiishuwewiniyuu. Namui aa aniyuu e chii pehtamuwekw ekw maak e chii ati taapwehtamuwekw umiywaachimuwin.

⁶ Abraham maa maamituneyimaahkw. Itashteu Chishemanituu umasinahiikanihch, “Abraham chii taapweyimeu Chishemanituuh, eukw maak aniyuu ukuiskutaatisiiu wehchii ishi kanawaapamikut.”

⁷ Maau maak che wii nisituhtamekw. Anichii awenichii kaa taapweyimaatwaau Chishemanituuh eukunich yaakw chihchiwe Abraham e ihtaayich e chii uhchi aanische pimaatisiitwaau e ishi kanawaapamaakanuutwaau.

⁸ Shaash anite weskach Chishemanituu utayimuwinihch chii niikaan wiihtaakanuu anichii ekaa Jewa kaa itiskaanesitwaau ukuiskutaatisiiuch che ishi kanawaapamikutwaau Chishemanituuh e taapwehtahkwaau. Eukw uyuu wehchii niikaan wiihtamuwaakanuut Abraham miywaachimuwiniyuu, chii itikuukupane Chishemanituu, “Chiya e ihtaayin chika uhchi aanischepayuu misiwe e itiskaanesitwaau awenich utah aschiihch chechii shaweyimakwaau.”

⁹ Abraham chii taapweyimeu Chishemanituuh. Chii ihtakuniyuu maak taan kaa ishi shaweyimaakanuut. Misiwe maak awen kaa taapwehtahk taan kaa ishi taapwehtamiyich Abraham kata shaweyimaakanuu kaye wiya.

¹⁰ Nuwach maak aahchiiuh ispayuuch anichii kaa nanihiihtahkwaau Jewa ayimiheu wiishuwewinh e iteyihtahkwaau ekut ukuiskutaatisiiuch chechii uhchi ishi kanawaapamikutwaau Chishemanituuh. Chika nishuuwanaachimaakanuuch uchii. Wesh itashteu Chishemanituu umasinahiikanihch, Nishuuwanaachimaakanuu an awen ekaa muush kaa nanihiihtahk misiwe taan e ishi wiishteyich Jewa ayimiheu wiishuwewinihch.

¹¹ Ekut maak wehchi miyu chischeyihtaakuhch ekaa ihtaat awen ukuiskutaatisiiu che uhchi ishi kanawaapamikut Chishemanituu mikw aniyuu e nanihiihtahk Jewa ayimiheu wiishuwewinh. Wesh itashteyuu Chishemanituu utayimuwinihch, Mikw an awen kaa kuiskunaakuhiikut Chishemanituuh aniyuu uhchi e taapwehtahk eukun an kaachiche che pimaatisiit.

¹² Anite maak wii Jewa ayimiheu wiishuwewinihch namui mitun aayimuuteu taapwehtamuwin. Maau e itashtech, An awen tekash kaa nanihiihtahk taan e itashuwemakaniyich Jewa ayimiheu wiishuwewiniyuu eukun an kaachiche che pimaatisiit.

¹³ Christ chichii naatamaakunuu taan kaa ishi nishuuwanaachimikuyihkw wiishuwewinihch uhchi ekw wii miiskuch kaa nishuuwanaachimaakanuut. Wesh itashteu Chishemanituu utayimuwinihch, Misiwe awen mistikuhch kaa akuyaakanuut nishuuwanaachimikuu Chishemanituu.

¹⁴ Christ chii pachishtinisuu uyuu chechii ihtuutawaakanuut anichii ekaa Jewa kaa itiskaanesitwaau kaye wiyawaau chechii miskahkwaau aniyuu shaweyihchichewiniyuu Abraham kaa itaakanuyich cheshtinaash che miyaakanuyich. Eukuu kaa ispayihch chechii ayaauhkw Payehchi Ahchaahkw taapwehtamuhkwe.

Wiishuwewin ekw maak aniyuu kaa itwet Chishemanituu cheshtinaash che ihtuutahk

¹⁵ Niichishaanitikw, chiwii aayimuutamaatinaawaau chekwaan e ihtinaanuuhch utah aschiihch chechii nisituhtamekw taan waa ishi wiihtamaatakuch. Niishu awenichii e ihtakuniyich e ishi niskumutwaau chekwaayuu taapishkun masinahusuuch. Namui maak chika chii piikunamuch aniyuu. Namui kaye chika chii ayihchistaauch taan kaa itashtaatwaau anit.

¹⁶ Ekun maak mwehch kaa ishinaakuniyich Chishemanituu ekw maak aniyaanaa Abraham kaa ushihtamaasutwaau taan taapishkun che ishi niskumutwaau. Chishemanituu chii itwekupane cheshtinaash che shaweyimaat Abrahamh ekw maak peyakw aniyuuh aweyuuh anit e ihtaayich che uhchi aanische pimaatisiyich. Namui itashteu Chishemanituu umasinahiikanihch, Chiya ekw maak anichii anit e ihtaayin che uhchi aanische pimaatisiitwaau chika miyutuutamaatinaawaau. Maau e itashtech, Chiya chika miyutuutamaatin ekw maak peyakw an anit e ihtaayin che uhchi aanische pimaatisiit. Christ maak uu kaa aayimuumaakanuut.

¹⁷ Maau waa itweyaan. Chishemanituu chii wiihtamuweu Abraham taan eshkw che ishi ashutamuwaat, newaau mitaahtumitanuu miin Nishtumitanuu pipunh maak paatimaa ekw kaa ihtakuhch Jewa ayimiheu wiishuwewin. Uu maak wiishuwewin namui kata chii miiskuchishkaachemakan aniyuu taan kaa ishi niskumaakanuut Abraham, namui kata chii ishinaakuniyuu ekaa chechii aapataniyich aniyuu taan kaa ishi ashutamuwaakanuut.

¹⁸ Wesh aniyuu uhchi e nanihiihtamiyich wiishuwewiniyuu wehchi shaweyimaakwe Chishemanituu aweyuuh ekw kiipaa namui chipaa uhchi shaweyimikunuu aniyuu uhchi taan kaa itwet cheshtinaash che ihtuutamaatahkw. Mikw maak, aniyuu e chii itaat Abrahamh cheshtinaash che shaweyimaat chii miyeu aniyuu taan kaa itaat che miyaat.

¹⁹ Chekwaayuu maak wehchii miyaakanuutwaau awenichii aniyuu wiishuwewiniyuu. Chii miyaakanuuch anit uhchi chechii uhchi nisituunahkwaau machaatisiiwiniyuu. Kaye maak eukw uyuu wiishuwewiniyuu chipaa aapataniyuu che ishpish ekaa takushiniyich aniyuuh Chishemanituu kaa itwet Abrahamh e ihtaayich che uhchi aanische pimaatisiyich, an kaa miyaakanuut aniyuu ashutamaachewiniyuu. Enchilich chii petaauch uyuu wiishuwewiniyuu utah aschiihch. Moses maak eukunh kaa aapachihaatwaau anichii enchilich chechii waawiihtamuwaakanuyich aniyuuh iinuuh aniyuuh wiishuwewiniyuu.

²⁰ E peyakushit maak awen chekwaayuu e ishi niskumut namui nituweyimeu ayimishtamaachesuu. Chishemanituu maak mikw peyakushuu wii.

Chekwaayuu wehchii pachishtinahk Chishemanituu aniyuuh wiishuwewinh

²¹ Aahchiiuh aa maak itwemakanh aniyuu Jewa ayimiheu wiishuwewinh taan kaa itwet Chishemanituu che ihtit iskutak kaa wiihtahk che ishi niskumut. Namui mitun aahchiiuh itwemakanh. Chiishpin e ihtakunuwaakupanenh wiishuwewinh anit chechii uhchi pimaachihutwaau awenichii kiipaa ukuiskutaatisiiu chipaa ishi kanawaapameu Chishemanituu aniyuuh aweyuuh kaa nanihiihtamiyich aniyuuh wiishuwewinh.

²² Namui maak ihtakun wiishuwewin an e iteyihtaakuhch. Itashteu Chishemanituu utayimuwinihch misiwe awen utah aschiihch kaa pimaatisiit tekash tipeyimikuu machaatisiiwiniyuu. Ekw maak Jesus Christ uhchi ekut che uhchi miiwet Chishemanituu taan aniyuuh cheshtinaash kaa itwet che miiwet. Misiwe maak anichii che taapweyimaatwaau Jesus eukunich che miikutwaau Chishemanituuh aniyuu kaa itweyich che miiweyich.

²³ Eshkw ekaa uhchi takushihk Jesus utah aschiihch chichii maahchikwaapihkaatikunaanuu wiishuwewin paatish kaa utihchipayihch chechii taapwehtamukw.

²⁴ Eukuu wiishuwewin tekash kaa chischinupayihiikuyihkw eshkw ekaa uhchi takushihk Jesus. Eukuu wiishuwewin kaa ihtuutaakuyihkw chechii taapwehtamukw ekw maak Chishemanituu chechii naheyimitahkw.

²⁵ Ekw maak iskutak tiyaapwehtahk awen ekw kiipaa namui ekw nituweyihtaakuniyuu wiishuwewiniyuu chechii chischinupayihiikut.

Chishemanituu Ukusisa

²⁶ Misiwe chiyaanuu kaa taapweyimahkw Jesus Christ ekut wehchi utawaashiimitutaatahkw Chishemanituu.

²⁷ Kaa siikahaahtaakuyihkw wiya Christ e ihtaat chichii ishi siikahaahtaakunaanuu. Ekw maak wiya e ihtaat e ishi tipeyihtaakusiihkw kaye chit ati nispituwaanuu.

²⁸ Misiwe peyakunihch chit ishi kanawaapamikunuu Chishemanituu, namui wiyeshin Jewa maak ekaa Jewa e itiskaanesiwaauhkwe, kaye maak e aapachihaakaniwaauhkwe maak ekaa e aapachihaakaniwaauhkwe, e naapewaauhkwe maak e iskwewaauhkwe.

²⁹ Christ e ihtaat e ishi tipeyihtaakusuwane mwehch Abraham e ihtaat e chii uhchi aanische pimaatisiyin chitishinaakusin. Ekw maak che miskamut aniyuu taan kaa itwet Chishemanituu cheshtinaash che miiwet.