Galatians 1 - Chishemanituu Utayimuwin: Kaa Uskaach Testament

Paul waachiyemeu aniyuuh kaa masinahamuwaat

¹ Niya Paul kaa masinahamaatakuch. Wiya Jesus Christ wechiihch nichii wiyaapamukw apastal chechii itaapachihiit. Kaye maak Chishemanituu Kuuhtaawiinuu nichii wiyaapamukw, an kaa wanishkaanaat Jesus nipuwinihch uhchi. Namayeu wii naapeu kaa wiyaapamit kaye namayeu naapeu kaa miit uyuu chechii itapaatisuuch.

² Chiyawaau wiichishaanimaauch Galatia kaa ishinihkaatech aschii kaa ihtaayekw chiwaachiyemitinaan. Niya ekw maak misiwe anichii umaamuuayimihaauch utah kaa ihtaatwaau chiwaachiyemitinaan.

³ Nipukuseyimaau Chishemanituu Kuuhtaawinuu ekw maak Jesus Christ Chitipeyihchikeminuu chechii chishewaatutaataakuch kaye chechii miitaakuch chiyaameyihtamuwiniyuu.

⁴ Jesus tekash chii pachishteyimisuu chechii nipahaakanuut chechii wiihkuchihiitahkw taan e ishi tipeyimikuuhkw machaatisiiwiniyuu anuhchiish taan e ishi ihtakuniyich utah aschiihch. Eukw uyuu kaa ishi nituweyihtamiyich Kuuhtaawinuuh Chishemanituuh chechii ihtit.

⁵ Tepicheyihtaakusuu maak Chishemanituu kaachiche chechii maamihchimaakanuut. Amen.

Peyakun mikw miywaachimuwin

⁶ Taapwe chimiskaateyimitinaawaau kaa ishpish wiipach chii ati nakatekw Chishemanituu an kaa tepwaatitaakw Christ uchishewaatisiiwiniihch uhchi. Kutach tipaachimuwin miywaachimuwin e ishinihkaataakanuuhch chinituhtenaawaau ekw.

⁷ Taapaa ihtakun kutach miywaachimuwin. Mikw maak ihtaauch awenichii anite e ihtaayekw e mukushkaateyihtamihiitaakuch, e wii kwestinahkwaau aniyuu miywaachimuwiniyuu anit yaayimuumaakanuyich Christ.

⁸ Ekush Chishemanituu kata waweshihiikuu an awen aahchiiuh che ishi chiskutamaachekwe aniyuu miywaachimuwiniyuu kaa waawiihtamaataahch. Mechim niyaan maak enchil kihchikiishikuhch e uhtuhtet aahchiiuh ishi waawiihtamaataache miywaachimuwin ekush nika waweshihiikunaan.

⁹ Shaash chichii wiihtamaatinaawaau uu che ititakuch, mikw maak miin chika wiihtamaatinaawaau. Chiishpin kacheschimitaakwe awen kutachiyuu miywaachimuwiniyuu aahchiiuh e itihtaakuniyich taan e itihtaakuniyich aniyuu shaash kaa taapwehtamuwekw ekush chika waweshihaakanuu.

¹⁰ Mikw wii ihtuutaweu aweyuu chechii mamiywaachimikut chititeyiminaawaau aa. Namui, Chishemanituu eukw waa chischeyihtamuch taan e ishi miywaachimit. Mikw wii naheyihtamiheu aweyuuh chititeyiminaawaau aa. Wesh mikw iinuuch wii naheyihtamahiikwaau namui nipaa uhchi atushkuwaau Christ.

Paul kaa wiyaapamaakanuut chechii atushkuwaat Jesus

¹¹ Niichishaanitikw, chinituweyimitinaawaau chechii chischeyihtamekw uu miywaachimuwin kaa waawiihtamaan namui naapeu e ihtaat uhchiimakan.

¹² Namui wii naapeu e ihtaat nuuhchi uhtinen. Namui kaye naapeu nuuhchi chiskutamaakw. Wiya Jesus Christ wechiihch nichii chischeyihtamihiikw uyuu miywaachimuwiniyuu.

¹³ Cheshtinaash chichii pehtenaawaache taan kaa itaatisiyaan utaahch eshkw Jewa iinuuch e ishi ayimihaatwaau e chii ishi nuushunehamaan. Nuwach nichii nanehkaateyimuhaayuuh Chishemanituu utiiniimh Jesus kaa taapweyimaayich. Kwaast chechii ihtuuch nichii ihtuwaan e wii wanaachihiimach.

¹⁴ Uste niya kwaast nichii ihtin chechii miyutuutamaan taan kaa itashumikuyaahch Jewa iinuuch utayimihewinawaau ishpishaat mihchetu niich Jewa iinuuch e wiich ispihtaatisiimakwaau. Kwaast e ishpish chii ihtuutamaan nichii wii nanihiihtamuwaan uchiskutamaachewinawaau aniyehkaanaanich chiwaahkumaakanuuch.

¹⁵ Yaapach maak nichii wiyaapamukuhtaakupane Chishemanituu eshkw ekaa uhchi pimaatisiyuuch. Naashch taapwe nichii chishewaatutaakw kaa wiyaapamit chechii atushkuukw. Iskutak maak wetihchipayiyich anit kaa iteyihtahk che chischeyimach ukusisa

¹⁶ ekut kaa ihtuutuut chechii chischeyimach, ati chechii uhchi ati waawiihtamaamach miywaachimuwiniyuu aniyuu ekaa Jewa kaa itiskaanesiitwaauh iinuuh. Mekwaach maak an kaa ispayihch namui awen nuuhchi kakwechimaau taan che ihtuuch.

¹⁷ Namui kaye nuuhchi ituhten Jerusalemihch chechii nituwaapamakwaau anichii kutakach apastalach, anichii shaash kaa wiyeyimikutwaau Jesus. Teyakuch tiiwehch Arabia kaa ishinihkaatech aschii nichii ituhten. Chek paatimaa Damascus kaa ishinihkaatech ihtaawin kaau kaa ituhteyaan.

¹⁸ Nishtu pipunh miin paatimaa ekw Jerusalemihch kaa ituhteyaan chechii nituu nachahiik Peter, etituu chechii ati chischeyimak. Niishu tuushteuh maak nichii wiichimaau.

¹⁹ Namui mikw nuuhchi waapamaayuuh aniyuuh kutak utapastalamh Jesus. Mikw James chitipeyihchikeminuu wiichishaan eukun an kaa waapamak.

²⁰ Chishemanituu chischeyihtam e taapweuch uyuu kaa itasinahiicheuch. Namui ninanatayin.

²¹ Ekw maak miin anite Syria ekw maak Cilicia kaa ishinihkaatekwaauh aschiih nichii ituhten.

²² An mekwaach eshkw namui nihtaa nuuhchi waapamikuch anichii umaamuuayimihaauch Judea kaa ishinihkaateyich aschiiyuu kaa ihtaatwaau.

²³ Mikw taan kaa ishi aayimuumiyich kutak aweyuuh ekun mikw kaa ishi chischeyimitwaau. Chii itweyuuh maak, “An kaa chii nanehkaachihiitahkw eukw pepaa waawiihtahk aniyuu e ishi taapwehtaakanuyich aniyuu kaa chii wii wanaachihtaat.”

²⁴ Ekw maak kaa nanaaskumaatwaau Chishemanituuh taan kaa ihtuutamuyich nipimaatisiiwiniihch.