Ephesians 6 - Chishemanituu Utayimuwin: Kaa Uskaach Testament

Awaashach ekw maak uniichihiikumaauch

¹ Chiyawaau awaashitikw e taapweyimekw Utipeyihchikeu chipaa naanahiihtuwaawaauch chiniichihiikuwaauch wesh kuiskunaakun uu chechii ihtiyekw.

² “Chisteyim kuuhtaawii kaye chikaawii.” Eukw uyuu niishtam kacheskwewiniyuu kaa pachishtinahk Chishemanituu nanaakataweyihtamiyichen aweyuuh cheshtinaash che miyutuutamuwaat.

³ Uu ihtuutamekwe “Chika miyupayinaawaau kaye chineush chika pimaatisiinaawaau utah aschiihch.”

⁴ Chiyawaau uhtaawiimaautikw, ekaawii naanituu chishuwaahaahkuch chitawaashiimuwaauch, teyakuch kuiskw ishi uhpinihtaauchinaahkuch chechii chischeyihtahkwaau taan chipaa ishi pimaatisiyuuch kaye chechii naanahiihtuwaatwaau Utipeyihchikeu.

Taan chipaa ihtuuch aapachihaakanich kaye maak uchimaamuwaauh

⁵ Chiyawaau kaa atushkuwekw awen chipaa nanihiihtuwaawaauch anichii kuuchimaamuwaauch. Yaakwaau iteyimaahkuch kaye yaakwaamiishtuwaahkuch kaye kuiskw ishi atushkuwaahkuch muyaam taan chipaa ishi atushkuwaawaau Christ.

⁶ Ekaawii mikw e kanawaapamisk kuuchimaam suuhk wii aapatisih muyaam mikw naapeuh kaa wii nanihiiwehaat chechii ishinaakusiyin wesh Christ utaapachihaakanh nituweyihtaakusiyuu mitun utehiihch chechii uhchi ihtuutamiyich Chishemanituuh utiteyihtamuwiniyuu.

⁷ Wesh chipaa miyeyihten kaye suuhk chipaa wii ihtuuten chitaapatisuwin, taapaa mikw kuuchimaam chitatushkuwaau Utipeyihchikeu eukw chihchiwe e atushkuwat.

⁸ Wii chischeyihtamukw taapaa aahchiiuh kata uhchi ishi tipahamuweu Utipeyihchikeu aweyuu aat aniyuu kaa uchimaawiyich maak aniyuu kaa kuuhpaanewiyich. Mikw taan e ishi nuukuhtaayich e chii ishi miywaapatisiyich aweyuuh ekun che ishi tipahamuwaat.

⁹ Chiyawaau kaye kaa uchimaawiyekw, miyutuutawaahkuch chitaapachihaakanuwaauch. Ekaawii sechihaahkuch. Wesh chichischeyihtenaawaau e peyakut kuuchimaamuwaau. Eukw uu Utipeyihchikeu kihchikiishikuhch kaa ihtaat. Misiwe maak aweyuuh taapituu iteyimeu, namui uste miyutuutaweu aweyuu kaa uchimaawiyich.

Che ishi ayeskuwiit awen ahchaahkuwinihch chechii ishi maasihchet

¹⁰ Eukw maahchishtai che ititakuch chekwaan, niichishaanitikw. Anite Utipeyihchikeu usuuhkaatisiiwinihch kaye umaskuusiiwinihch ekute wii ishi yaaichikaapuukw.

¹¹ Misiwe maak aapachihtaataau taan kaa ishi miitahkw Chishemanituu chechii ishi maasihchewaacheuhkw eukw maak chechii naanikaahamaasuyihkw taan e ishi kakwechihiikuyihkw machimanituu.

¹² Wesh namui muhch iinuuch chimaasihaanuuch. Machiahchaahkuch kaa tipeyihchichetwaau chimaasihaanuuch kaye anichii naashch kaa suuhcheyihtaakusitwaau kaye anichii kaa niikaanishkahkwaau wanitipiskusiiwiniyuu utah aschiihch kaa ihtakuniyich. Chimaasihaanuuch kaye anichii mihchetu machiahchaahkuch anite ishpimihch kaa ihtaatwaau.

¹³ Ekw maak misiwe aapachihtaawaataau taan kaa ishi miitahkw Chishemanituu chechii maasihchewaacheuhkw. Ekw maak namui chika uhchi shaakuuchihiikunaanuu kaye yaapach eshkw chechii yaaichikaapuyihkw iskutak suuhk kakwechihiitahkwe machimanituu.

¹⁴ Yaaichikaapuutaau maak, e upahkuhtehuniskamuhk taapwewin kaye kuiskutaatisiiwin muyaam miskaaschikanaapiskw e chichishkamuhkw chechii ishinaakusiihkw.

¹⁵ Kaye wii ayeskuwiitaau chechii wiihtamaacheyihkw an kaa chiyaameyihtamihiiwech miywaachimuwin muyaam chisitinaahch e pushchishkamuhkw chechii ishinaakusiihkw.

¹⁶ Kaye maak muush chipaa kanuweyihtenaanuu taapwehtamuwin nakaahamaasuwin chechii ishi aapachihtaayihkw wesh ekut che uhchi aashtuwehumuhkw aniyuuh kaa ishkutewiyich akuskwah machimanituu kaa pimukuyihkw.

¹⁷ Utinihtaau chinitupayuu astutinuu eukuu pimaachihiiwewin, utinamuwaataau kaye aniyuu muuhkumaaniyuu Kaa payehchisiit Ahchaahkw kaa miitahkw eukw uyuu Chishemanituu utayimuwin.

¹⁸ Ahchaahkuwinihch muush ishi ayimihaataau nanaahkuu e ishi ayimihchikeyihkw kaye nanaahkuu e ishi nitutamaayihkw. Uu maak e ishi chischisiihkw ayeskuwiitaau kaye ekaawii puuniitaau e ayimihaayihkw, muush kaye ayimiheshtamuwaataawenich anichii kaa taapwehtahkwaau.

¹⁹ Pechi ayimiheshtamuukw kaye niya chechii pechi miit Chishemanituu taan che itweuch e waawiihtamuch miywaachimuwiniyuu aniyuu taan e ishi ekaa uhchi chischeyihtaakuniyich anite utaahch kaye maak ayimiheshtamuukw ekaa chechii kushtaachiyaan.

²⁰ Chishemanituu nichii pechi itishahuukw chechii waawiihtamuch umiywaachimuwin aat mekwaach utah chipahutuukamikuhch e ihtaayaan. Pechi ayimiheshtamuukw maak chechii suuhchiteheyaan kaye chechii itweyaan taan e ishi nituweyimit Chishemanituu.

Taan maahchishtai kaa itasinahamuwaat Paul aniyuuh iinuuh anite Ephesus kaa ihtaayich

²¹ Tychicus chika takushinuu nete e ihtaawekw chechii wiihtamaataakw taan e ihtuuch kaye taan e ispayuuch. Eukw uu kaa saachihiik chiichishaanuu kaye kuiskw kaa ishi aapatatisit Utipeyihchikeu e atushkuwaat.

²² Eukw uu wehchi itishahuuk nete e ihtaawekw chechii chischeyihtamekw taan e ispayaahch ekw maak chechii uhpinikuyekw chipimaatisiiwiniwaahch e atushkuwekw Christ.

²³ Nichishaanitikw nitayimihaan Chishemanituu Kuuhtaawiinuu kaye Utipeyihchikeu Jesus Christ chechii miitaakuch chiyaameyihtamuwiniyuu kaye saachihiiwewiniyuu chechii nuukuhch chitaapwehtamuwinawaau.

²⁴ Chiyawaau kaachiche che saachihekw Chitipeyihchikeminuu Jesus Christ chika wii shaweyimikuwaau.