Ephesians 5 - Chishemanituu Utayimuwin: Kaa Uskaach Testament

Waashtewinihch e ishi pimaatisiinaanuuhch

¹ Suuhk wii nispituwaahkw Chishemanituu taan e iteyihtaakusit, wesh eukw chiyawaau utawaashiimh kaa saachihaat.

² Saachihaahkuch awenichii, mwehch taan kaa ishpish saachihiitahkw Christ. Kaa pachishtinahk upimaatisiiwin chiyaanuu uhchi muyaam e wiihchimaasteyich pachishtinichewiniyuu ekw maak machishtawehamaawiniyuu ekun kaa iteyihtamihiikuyich Chishemanituu. Chii naheyihtamihiikuyuuh maak.

³ Chiyawaau e taapwehtamekw namui mitun chipaa uhchi ihtakun wiinisuwin anit e ihtaayekw. Namui kaye chipaa uhchi ihtakun nitamukw ihtuwin kaye mushteneyihtamuwin.

⁴ Namui kuiskunaakuniyuu Chishemanituu utiiniim chechii wawiinihtaakuniyich utayimuwiniyuu maak chechii chiishkwe ayimiyich maak nitamukw chechii ishi wawiitweyich. Teyakuch muush chipaa nanaaskumeuch Utipeyihchikeuh misiwe chekwaayuu.

⁵ Chinitaweyimitinaawaau chechii chischeyihtamekw an awen wiinisuwinihch kaa ishi pimaatisiit kaye nitamukw kaa aihtit kaye muush kaa mushteneyihtahk chekwaayuu chechii ayaat namui chika chii wiichihiiweu Chishemanituu kaye Christ uchimaawiniihch. An awen muush kaa mushteneyihtahk muyaam manituuhkaanh e nuuchiishtuwaat ishinaakuniyuu uyuu e ihtit.

⁶ Yaakwaamiistuwaahkuch maak ekaa chechii wiyeshimitaakuch anichii kaa sasuuskuutaatwaau uyeyuu itaatisiiwiniyuu wesh nitamukw chika ishi chischinuhtahiikuwaauch. Uyuu e itaatisiitwaau anichii ekaa kaa nanihiihtuwaatwaau Chishemanituuh eukw uyuu wehchi utitahukutwaau utaahkuyuwesuwiniyuu.

⁷ Ekaawii waawiichihaahkuch uyuu e itaatisiitwaau anichii awenichii.

⁸ Wesh kaye chiyawaau wanitipiskusiiwinihch chichii ihtaanaawaau anite utaahch, mikw maak anuhchiish ekw waashtewinich e ihtaayekw an uhchi e taapweyimekw Chishemanituu. ekute maak suuhk wiishi pimaatisiikw ekw.

⁹ Taapwe waashtewinihch ishi pimaatisiyekwe chika nuukun miyuhtwaawin kaye kuiskutaatisiiwin kaye taapwewin anite chipimaatisiiwiniwaahch.

¹⁰ Muush wii naanituu chischeyihtamukw taan e ishi nitaweyimitaakw Chishemanituu chechii ishi pimaatisiiwekw. Che chischeyihtamekw maak taanite chechii uhchi nanihiiwehekw.

¹¹ Ekaawii piskaatamukw taan e ishi nanaahkuu nitamukw ihtinaanuuhch, taapaa mitun wiyesh ishi wiichihiiwepayuuh uyuuh. Teyakuch chipaa wii waapatiiwenaawaau taan e ishi ekaa kuiskunaakuhkwaauh utuuh chekwaayuuh.

¹² Shaakweyimuuch awenichii chechii ayimitutahkwaau uyuuh chekwaayuuh kaa ishpish wesaa nitamukw chiimuut aihtinaanuuhch.

¹³ Waashtewinihch maak ekut e nuukuhch misiwe chekwaan taan nihaau e iteyihtaakuhch.

¹⁴ Eukw maak wehch iinaanuuhch maan, “Wanishkaah chiya kaa wiihchihkwaamuyin, wanishkaah anit nipuwinihch uhchi. Ekw maak Christ che miisk waashtewiniyuu.”

¹⁵ Suuhk yaakwaamiikw taan e ishi pimaatisiyekw. Namui chipaa uhchi ishi pimaatisiinaawaau taan e ishi pimaatisiitwaau anichii ekaa kaa ayaatwaau kachehtaaweyihtamuwiniyuu. Awenichii kaa ayaatwaau kachehtaaweyihtamuwiniyuu ekun yaakw chipaa ishi pimaatisiinaawaau.

¹⁶ Kaye maak ekaawii nanaayuuhtaakw chichiishikaamiwaauh wesh naashch mishaau machaatisiiwin uyuuh anuhchiish kaa chiishikaakwaauh.

¹⁷ Ekaawii maak chiishkwepimaatisiikw. Teyakuch suuhk wii nisituhtamuwaahkw Chishemanituu utiteyihtamuwin.

¹⁸ Ekaawii chiishkwepekw e minihkweyekw shuuminaapuu, wesh eukuu che wanaachihiikuyekw. Teyakuch pachishtinaahkw Payehchi Ahchaahkw chechii saakaschineshkaataakw.

¹⁹ Waawiichihiitukw e nikamuyekw nanaahkuu ayimiheu nikamuwinh, kaye aniyuuh David unikamuwinh kaye e uskaakwaau ahchaahkw nikamuwin nikamukw. Maamihchimaahkw Utipeyihchikeu kwaast chechii ishpish maamihchimekw chitehiiwaahch uhchi.

²⁰ Muush nanaaskumaahkw Chishemanituu Kuuhtaawiinuu misiwe chekwaayuu taan e ati ispayiyich Jesus Christ Chitipeyihchikeminuu uhchi.

Naapeu ekw maak wiichiskweu taan chipaa ihtuuch

²¹ Pachishteyimitisuustaatikw Christ e chisteyimekw uhchi.

²² Chiyawaau iskweutikw pachishteyimitisuustawaahkuch chinaapemuwaauch mwehch e ishi pachishteyimitisuustawekw Utipeyihchikeu.

²³ Wesh naapeu chii miyaakanuu chechii niikaanishkuwaat wiichiskweu mwehch Christ e ishi niikaanishkuwaat umaamuuayimihaauh. Wiya Christ upimaachihiiwemitutaakuu umaamuuayimihaauh, eukw maak uyuu wiiyuu aniyuuh umaamuuayimihaauh.

²⁴ Mwehch maak e ishi pachishteyimitisutwaau Christ e ihtaayich umaamuuayimihaauch ekun mwehch kaye chiyawaau iskweutikw chipaa ishi pachishteyimitisuustawaawaauch chinaapemuwaauch.

²⁵ Chiyawaau naapeutikw, chipaa saachihaawaauch chiichiskweuwaauch mwehch Christ kaa ishpish saachihaat umaamuuayimihaauh, mitun e chii pachishtinahk upimaatisiiwin kaa ishpish chii saachihaat.

²⁶ Eukw uyuu kaa ihtit Christ Chishemanituu e ihtaayich chechii ishi pachishtinaat umaamuuayimihaauh iskutak kaa payehchihaat, nipiihch e chii chishtaapawiyaat aniyuu taan kaa ishi aayimuuteyich Chishemanituu utayimuwiniihch.

²⁷ Eukw uyuu kaa ihtuutahk Christ wiya chechii utinamaasut aniyuu umaamuuayimihaauh naashch e miyunaakusiyich, e payehchisiyich kaye ekaa mitun chekwaayuu ihtakuniyich e ishi ataameyihtaakusiyich, ekaa mitun paahpaahteusiyich, naashch e miyushishiyich.

²⁸ Mwehch maak uyuu Christ kaa ishi saachihiiwet kaye wiya naapeu chipaa saachiheu wiichiskweu mwehch e ishpish saachihtaat wiiyuu. Naapeu kaa saachihaat wiichishkweu nuukuniyuu e saachihiisut.

²⁹ Namui wiiskaat macheyimisuu awen. Ashamisuu waa miichisuch kaye mamiyuuhkaatisuu. Ekun maak mwehch e ihtuutawaat Christ umaamuuayimihaauh.

³⁰ Chiyaanuu kaa taapweyimahkw Chishemanituu misiwe Christ e ihtaat chit ishi maamuusinaasunaanuu.

³¹ Eukw kaye wehchi itashtech masinahiikanihch, “Naapeu chika nakateu uniichihiikw ekw maak che wiichimaat wiichiskweu. Ekw maak wiichiskweu peyakw miyu che ishinaakusitwaau.”

³² An maak kaa ishi masinahiikanuuhch etituu ihtakun e ishi wiihtamaachemakahch. Niya kiipaa e ishi nisituhtamaan, Christ ekw maak anichii umaamuuayimihaauch aayimuumaakanuuch anit.

³³ Mikw maak kaye chiyawaau naapeutikw kaye iskweutikw chitaayimuumikunaawaau. Misiwe naapeu chipaa saachiheu wiichiskweu mwehch wiya e ishpish saachihiisut. Kaye maak iskweu chipaa chisteyimeu unaapem.