Ephesians 3 - Chishemanituu Utayimuwin: Kaa Uskaach Testament

Paul kaa waawiichihaat aniyuuh ekaa Jewa kaa itiskaanesiyich

¹ Niya Paul, e atushkuuk Jesus Christ kaye maak e waawiichihiitakuch chiyawaau ekaa Jewa kaa itiskaanesiyekw eukuu wehchi ihtaayaan chipahutuukamikuhch.

² Cheshtinaash chichii pehtenaawaache taan kaa ishi pechi miyutuutamuut Chishemanituu e chii wiyaapamit taan chechii ishi atushcheuch anit chechii uhchi wiichihiitakuch chiyawaau ekaa Jewa kaa itiskaanesiyekw.

³ Nichii miikw Chishemanituu chechii chischeyihtamuch aniyuu kaa ishi wiyeyihtamukupane che ihtit ekaa aweyuuh uhchi chischeyihtamiyich. Apishiish nitaayimuuten uu utah uu kaa masinahamaatakuch.

⁴ Ayimihtaayekwe maak uu nimasinahiikan ekut che uhchi chischeyihtamekw e miyu nisituhtamuch chekwaayuu aniyuu kaa wii ihtuutahk Chishemanituu Christ uhchi.

⁵ Weskach anite namui uhchi miyaakanuuch awenichii chechii chischeyihtahkwaau uyuu. Anuhchiish maak Chishemanituu chii wiihtamuweu kaa payehchisiyich utapastalimh kaye uchischiwehiichesiimh uyuu Utahchaahkwa uhchi.

⁶ Eukw maak uu ekaa uhchi chischeyihtaakunuuhch anite weskach, An miywaachimuwin uhchi ekut wehchi nihiipayiniyich misiwe anichii ekaa Jewa kaa itiskaanesitwaau kaye wiyawaau che ayaatwaau taan che ishi miyaat Chishemanituu aniyuuh Jewa kaa itiskaanesiitwaauh. Chishemanituuh chii miikuuch Jewa iinuuch e ihtaayich chechii ishi masinaasutwaau kaye maak aniyuu e nuushuushkuwaatwaau Jesus kaye wiyawaau che ayaataau taan kaa ishi ashutamuwaat Chishemanituu Jewa iinuuh.

⁷ Chishemanituu nichii shaweyimikw niya e chii wiyaapamit chechii papaamuhtataauch umiywaachimuwin, nichii miikw umaskuusiiwin kaye maak nichii miikw kaschihuwiniyuu kuiskw chechii ihtuutamuch uyuu aapatisuwiniyuu.

⁸ Aat maak niya maauch nuuhtaash e iteyihtaakusiyaan e iteyihtaakusitwaau kaa taapwehtahkwaau, yaapach niya nichii shaweyimikw Chishemanituu e chii miit chechii waawiihtamuumach aniyuuh ekaa Jewa kaa itiskaanesiitwaauh taan e ishpish naaspich weyuutaniyich kaye e ishpish ekaa nihtaa puunipayiyich taan waa ishi shaweyimitahkw Chishemanituu Christ e ihtaayich uhchi.

⁹ Kaye maak, niya nichii miikw misiwe aweyuuh chechii chischeyihtamihiimach aniyuu chekwaayuu ekaa uhchi chischeyihtaakuniyich kaa ishi wiyeyihtamikupane Chishemanituu che ihtuutahk. Chishemanituu an misiwe chekwaayuu kaa ushihtaat chii kanuweyihtamikupane mikw uyuu taan kaa ishi wiyeyihtamikupane che ihtuutahk anite niishtamihch.

¹⁰ Anuhchiish maak ekw chescheyihtaakuhtaat Chishemanituu taan kaa wii ihtuutahk, eukw uyuu anite umaamuuayimihaauh e ihtaayich chechii uhchi chischeyihtamihaat aniyuu kaa tipeyihchicheyich kaye kaa suuhcheyihtaakusiyich ishpimihch kaa ihtaayich taan e ishi nanaahkuu iteyihtaakuniyich ukachehtaaweyihtamuwin.

¹¹ Chii ihtuutam Chishemanituu uyuu mwehch taan muush kaa pechi iteyihtamikupane che ihtuutahk Chitipeyihchikeminuu Christ Jesus uhchi.

¹² Uu maak Christ e wiicheuhkw kaye e taapweyimahkw chisuuhchitehenaanuu chechii naatahkw Chishemanituu mitun e taapweyimahkw.

¹³ Eukw maak uu wehchi ekaa mitun nituweyimitakuch chechii misimeyihtamihiikuyekw taan e ishi nanehkaateyimuyaan maanh chiyawaau uhchi, wesh chika wiichihiikunaawaau uu misiwe taan e ispayaan.

Christ usaachihiiwewin

¹⁴ Uu maak kaa ishi ayimihiitakuch eukuu wehchi uchihchiihkunipiyaan Kuuhtaawiinuu e ayimihiik,

¹⁵ wiya e ihtaat e chii uhchi wiihaakanuutwaau misiwe kaa peyakuteusiitwaau anite kihchikiishikuhch kaye aschiihch kaa ihtaatwaau.

¹⁶ Aniyuu e weyuuch ayaat Chishemanituu anite kihchikiishikuhch taan chechii ishi shaweyimaat aweyuuh ninitutamuwaau chechii miitaakw maskuusiiwiniyuu Utahchaahkwa e ihtaayich e uhchipayiyich. Wesh Chishemanituu Utahchaahkwa eukw chechii ihtuutaataakw chechii suuhchikaapuwekw.

¹⁷ Kaye maak nitayimihaan, Christ chechii ihtaat chipimaatisiiwiniwaahch an uhchi e taapwehtamekw. Kaye maak an e ati yaaichinihtaauchiyekw kaye e ati yaaichikaapuuyekw saachihiiwewinihch ishi, nitayimihaan

¹⁸ chiyawaau ekw maak anichii kutakach kaa taapwehtahkwaau misiwe chechii ayaayekw maskuusiiwin chechii nisituhtamekw taan e ishpish mista saachihiitahkw Christ.

¹⁹ Nitutamaan chechii chischeyihtamuwekw usaachihiiwewin, aat e ishinaakuniyich ekaa wiiskaat tekash chechii chischeyihtaakuniyich. Chischeyihtamuwekwe Christ usaachihiiwewin ekw che saakaschineshkaakuwekw Chishemanituu utiteyihtaakusuwin.

²⁰ Chishemanituu, an umaskuusiiwin e aapatisiimakaniyich chipimaatisiiwinaahch uste yaapach chika chii ihtuutamaakunuu taan e ishpish nitutamuuhkw kaye uste yaapach chika chii ihtuutamaakunuu taan e iteyimahkw chechii ihtuutamaatahkw.

²¹ Wiya Chishemanituu kaachiche kata chisteyihtaakuhaakanuu mekwesiinuu umaamuuayimihaauh e ihtaayitwaauh Jesus Christ uhchi. Amen.