Ephesians 1 - Chishemanituu Utayimuwin: Kaa Uskaach Testament

¹ Apastal Paul niya, Chishemanituu nichii wiyaapamukw chechii tipaachimach Christ Jesus. Chimasinahamaatinaawaau chiyawaau kaa taapwehtamekw anite Ephesus kaa ihtaayekw, chiyawaau muush kaa taapweucheyihtaakusiyekw e wiichewekw Christ Jesus.

² Chitayimiheshtamaatinaawaau chechii shaweyimitaakuch Chishemanituu Kuuhtaawiinuu ekw maak Utipeyihchikeu Jesus Christ kaye chechii miitaakuch chiyaameyihtamuwiniyuu.

E ishi shaweyimikuyihkw Christ uhchi

³ Nanaaskumaataau Chishemanituu, Chitipeyihchikeminuu Jesus Christ Uhtaawii. Aniyuu e wiicheumihkw Christ, Chishemanituu chichii shaweyimikunuu e chii miitahkw misiwe ahchaahkw shaweyihchichewinh taan e ishi ihtakuhkwaauh kihchikiishikuhch.

⁴ Eshkw ekaa mechim uhchi ushihtaakanuuhch uu aschii, shaash chichii wiyaapamikunuu Chishemanituu wiya che ayaautihkw aniyuu uhchi Christ e wiicheumuhkw. Chichii wiyaapamikunuu chechii payehchisiyuuhkw kaye ekaa mitun chekwaan chechii ihtakuhch che ishi ataameyihtaakusiihkw Chishemanituu ishi e ihtaat.

⁵ E saachihiitahkw Chishemanituu eukw uyuu wehchii wiyeyimitahkw wiya chechii utawaashiimituutaatahkw Jesus Christ e ihtaayich uhchi. Eukw uyuu kaa ishi naheyihtamihiikut chechii ihtit kaye eukw uyuu kaa wii ihtit.

⁶ Iteyihtaakuniyuu maak chechii maamihchimaakanuut e chisteyihtaakuniyich taan e ishpish shaweyimitahkw. Maamihchimaataau sehchei e chii miitahkw Ukusisa naashch kaa saachihaat.

⁷ Wesh Christ kaa nipistamaatahkw aashiteyaahtikuhch, ekut kaa uhchi aapihkunikuyihkw, chimachihtwaawinuuh chichii wepeyihtamaakunaanuu. Taapwe mishaayuu Chishemanituu ushaweyihchichewin.

⁸ Nuwach taapwe mistahii chichii shaweyimikunuu.

⁹ Chii ihtuutam Chishemanituu aniyuu kaa wii ihtuutahk, chichii miikunuu chechii chischeyihtamuhkw aniyuu taan shaash kaa ishi wiyeyihtahk ekaa uhchi chischeyihtamiyich aweyuuh. Kata ihtuutam maak aniyuu taan waa ihtuutahk Christ e ihtaayich uhchi.

¹⁰ Iskutak maak utihchipayiniyiche anit che tipipayiniyich aniyuu kaa wii ihtuutahk Chishemanituu kata maamuunam misiwe chekwaayuu Christ che niikaanishkamiyich, misiwe taan e ishi ihtakuniyich kihchikiishikuhch ekw maak utah aschiihch.

¹¹ Muush ihtuutam Chishemanituu taan kaa ishi wiyeyihtahk che ihtuutahk. Christ maak e wiicheumuhkw ekut kaa uhchi wiyaapamitahkw Chishemanituu wesh eukw uyuu kaa ishi wiyeyihtahk shaash anite weskach.

¹² Chiyaanuu maak niishtam kaa aspeyimutuuhkw Christ, maamihchimaataau Chishemanituu e chisteyihtaakusit.

¹³ Chiyawaau maak kaye anite Ephesus kaa ihtaayekw, Chishemanituu chichii utiiniimitutaakuwaau uskach kaa pehtamekw an kaa taapwemakahch ayimuwin, eukuu miywaachimuwin kaa pimaachihiikuyekw. Christ chichii taapweyimaawaau, ekw maak kaa chiishaawaachihiitaakw Chishemanituu wiya e ayaautaakw, Kaa payehchisiyich Ahchaahkwa e chii miitaakw aniyuu kaa itwet cheshtinaash che miiwet.

¹⁴ Uu maak Kaa payehchisiit Ahchaahkw e chii miikuyihkw ekut wehchi cheshtinaahuyihkw Chishemanituu taapwe che miyaat utiiniim aniyuu taan kaa itaat che miyaat. Chicheshtinaahunaanuu tekash che aapihkunaat Chishemanituu misiwe aniyuu kaa utiiniimit. Eukw uyuu che ishi ihtuutamuwaat chechii uhchi maamihchimaakanuut e chisteyihtaakusit.

Paul kaa ishi ayimiheshtamuwaat aniyuu iinuuh anite Ephesus kaa ihtaayich

¹⁵ Nichii pehten e taapweyimekw Jesus chitipeyihchikeminuu kaye e saachihekuch misiwe awenich kaa taapwehtahkwaau.

¹⁶ Eukw maak uu wehchi ekaa puuniyaan e nanaaskumuyaan e chischisiitutaatakuch tahtwaau e ayimihaayaan.

¹⁷ Ninitutamuwaau Chishemanituu Chitipeyihchikeminuu Jesus Christ Uhtaawii an maauch kaa chisteyihtaakusit chechii miitaakw Utahchaahkwa aniyuuh che kachehtaaweyihtamihiitaakw kaye che chischeyihtamihiitaakw taanite chechii uhchi chischeyimekw Chishemanituu.

¹⁸ Ninitutamaan kaye chechii chischeyihtamuwekw chekwaayuu aniyuu kaa miitahkw Chishemanituu chechii aspeyimututamuhkw iskutak kaa wiyaapamitahkw. Kaye maak chechii chischeyihtamekw taan e ishpish weyuutaniyikwaauh e chisteyihtaakuniyikwaauh miyu miiwewinh taan e ishi ayeskuushtamuwaat kaa taapwehtamiyich che miyaat.

¹⁹ Nitutamuwaau kaye chechii nisituhtamekw e ishpish suuhcheyihtaakuniyich aniyuu umaskuusiiwin Chishemanituu kaa aapatisiimakaniyich piihch e ihtaauhkw, chiyaanuu kaa taapwehtamukw.

²⁰ Eukw uyuu e peyakuniyich e suuhcheyihtaakuniyich maskuusiiwiniyuu kaa aapachihtaat Chishemanituu kaa wanishkaanaat Christ nipuwinihch uhchi kaye kaa apihaat anite unihiiwinihch itehche anite kihchikiishikuhch.

²¹ Wiya Christ uste iteyihtaakuniyuu utipeyichichewin ishpishaat aniyuuh kaa uchimaawiyich, kaa tipeyihchicheyich, kaa suuhkaatisiyich, kaye kaa niikaanipiyich. Wiya uste iteyihtaakuniyuu utishinihkaasuwin e iteyihtaakuniyich kutak awen utishinihkaasuwin anuhchiish kaye anite niishtamihch.

²² Chishemanituu chii miyeu Christ misiwe chekwaayuu chechii uchimaahkahtamiyich kaye anite chii ishi pachishtineu umaamuuayimihaauh e ihtaayitwaauh wiya misiwe chekwaayuu chechii niikaanishkamiyich.

²³ Uyuuh maak umaamuuayimihaauh, eukw aniyuu Christ wiiyuu. Anite maak upimaatisiiwiniwaahch namui chekwaayuu nuuhtepayuuch wesh Christ miikuuch misiwe chekwaayuu taan e ishi nuuhtepayitwaau.