Colossians 4 - Chishemanituu Utayimuwin: Kaa Uskaach Testament

¹ Chiyawaau kaa uchimaawiyekw misiwe taapituu ishi kanawaapamaahkuch chitaapachihaakanuwaauch taan e ihtuutawekuch kaye kuiskw ihtuutuwaahkuch. Chischisikw kaye chiyawaau e ihtaat awen kihchikiishikuhch wechimaamiyekw.

Chiskutamaachewinh

² Tasine ayimihaahkw. E ayimihaayekw maak suuhk wii piyekascheyihtamukw kaye nanaaskumaahkw Chishemanituu.

³ Kaye niyaan ayimiheshtamuunaan Chishemanituu chechii taupayihtwaakuyaahch chechii waawiihtamaahch miywaachimuwin anit yaayimuumaakanuut Christ, an ekaa uhchi chischeyimaakanuut anite utaahch. Ekun wehchi chipahukuyaan anuhchiish, uu e chii ishi waawiihtamaan.

⁴ Ayimiheshtamuukw chechii piyekaschihtaakusiyaan e waawiihtamaan miywaachimuwin wesh ekun nipaa ihtin.

⁵ Suuhk wii kachehtaaweyihtamukw taan e ishi pimaatisiyekw mekwesiinuu anite anichii ekaa kaa taapwehtahkwaau e pimaatisiyekw. Muush utinamaasukw taanit teupayihch maanh chechii ayimihekuch anichii ekaa kaa taapwehtahkwaau.

⁶ Muush chipaa miyuuhtaakusinaawaau kaye chipaa iipwaahkaahtaakusinaawaau e ayimiyekw ekw maak che chischeyihtamekw taan che ishi nishkweushihekw awen e wii naanituu kachesteyihtahkw taan e ishi taapwehtamuwekw.

Maahchishtai e itasinahamuwaat Paul aniyuuh kaa masinahamuwaat.

⁷ Chiichishaanuu Tychicus naashch kaa saachihachiht kaye muush kuiskw kaa ihtit ayimiheu aapachihaakan niwiichi aapatisiimakunaan e atushkaamachiht Utipeyihchikeu. Wiya chika tipaachimushtaakuwaau taan e ihtuuchiht.

⁸ Eukw wehchi itishahuukw chechii wiihtamaataakw taan e ihtuuchiht anit ekaa che uhchi niihteyihtamekw e maamituneyimiyaahch.

⁹ Onesimus kaa ishinihkaasuyich chika wiicheukuu. Eukuu chiichishaanuu kuiskw kaa ihtit kaye kaa saachihachiht anite e ihtaawekw kaa uhchiit. Misiwe chika wiihtamaakuwaauch taan e ihtinaanuyich ute.

¹⁰ Aristarchus kaye wiya chipahwaakanuu utah kaa chipahukuch. Chiwaachiyemikuwaau kaye wiya. Kaye maak Mark chiwaachiyemikuwaau. Barnabas uyuuh wiichiiniihkaawin. Shaash chichii wiihtamaakunaawaau che miyuhkuwekw Mark utihtitaakwe.

¹¹ Joshua kaye wiya chiwaachiyemikuwaau. Justus wesin eyuu ishinihkaataakanuu uu. Uchii e nishtitwaau eukunich mikw uchii Jewa iinuuch e taapwehtahkwaau waachaapatisiimitwaau Chishemanituuh e atushkaamach. Mistahiih nichii pechi kaachiichihiikuch.

¹² Miin kutak awen e ihtaayekw e uhchiit chiwaachiyemikuwaau eukw uu Epaphras. Kaye wiya atushkuweu Christ Jesus. Muush suuhk chitayimiheshtamaakuwaau e nitutamuwaat Chishemanituuh chechii yaaichikaapuuhiitaakw tekash e nanihiihtamuwekw utiteyihtamuwiniyuu mwehch e ihtitwaau anichii kaa chiishi nihtaauchitwaau kaye tekash kaa taapweyimaatwaau Jesus.

¹³ Niya tipiiwe nika chii tipaachimuwaan e ishpish mista aapatisit chiyawaau e wii wiichihiitaakw ekw maak aniyuuh aweyuuh Laodicea ekw maak Hierapolis kaa ishinihkaateyikwaauh ihtaawinh kaa ihtaayitwaauh.

¹⁴ Luke naashch kaa saachihiik kaa nituhkuiinaapatisit ekw maak Demas chiwaachiyemikuwaauch kaye wiyawaau.

¹⁵ Wiihtamuwaahkuch e waachiyemakwaau chiichishaanuuch Laodicea kaa ishinihkaateyich ihtaawiniyuu kaa ihtaatwaau. Nympha kaye waachiyemaahkw ekw maak anichii umaamuuayimihaauch Nympha wiichiihch kaa ayimihaatwaau maanh.

¹⁶ Iskutak chii ayimihtaayekwe uu masinahiikan yaaitei che ayimihtuwekuch anichii umaamuuayimihaauch anite Laodicea kaa ishinihkaateyich kaa ihtaatwaau. Yaaitei kaye che ayimihtaayekw an masinahiikan che petwaakuyekw anichii Laodicea kaa ihtaatwaau umaamuuayimihaauch.

¹⁷ Kaye maak che itekw Archipus chechii chiishihtaat aniyuu kaa miyaakanuut che ishi atushkuwaat Utipeyihchikeuh.

¹⁸ Niya tipiiwe Paul ekw masinahiicheyaan uu e waachiyemitakuch. Ekaawii wanichischisikw chipahutuukamikuhch e ihtaayaan. Nitayimihaan Chishemanituu chechii chishewaatutaataakw.