Colossians 2 - Chishemanituu Utayimuwin: Kaa Uskaach Testament

¹ Chinituweyimitinaawaau chechii chischeyihtamekw taan e ishpish suuhk aapatisiyaan aat e aayimihuyaan chiyawaau e wii wiichihiitakuch ekw maak anichii aniyuu ihtaawiniyuu Laodicea kaa ishinihkaateyich kaa ihtaatwaau ekw maak misiwe anichii kutakach eshkw ekaa kaa chischeyimitwaau.

² Eukuu e ihtiyaan e pukuseyimuyaan chechii suuhchiteheyekw kaye maak chechii maamuupayihuyekw e saachihiituyekw. Chinitaweyimitinaawaau tekash chechii nisituhtamekw miywaachimuwin chechii shaweyimikuyekw e chischeyihtamekw e taapwemakahch. Tekash nisituhtamekwe ekut che uhchi chischeyimekw Jesus Christ, an ekaa wiiskaat uhchi chischeyimaakanuut anite utaahch. Chii ihtuutam maak ekw Chishemanituu chechii chischeyimahkw Christ.

³ Mikw Christ chimiikunuu taapwe chechii nisituhtamuhkw Chishemanituu uweyuuch kachehtaaweyihtamuwin kaye uweyuuch chischeyihtamuwin.

⁴ Chiwiihtamaatinaawaau uu ekaa awen chechii wiyeshimitaakw aat naashch e kaschihuutaakusit nitamukw e ishi waawiihtahk.

⁵ Muush chichischisiitutaatinaawaau aat ekaa ihtaayaan anit e ihtaayekw. Nisichiyesin kaye e waapahtamaan taan e ishpish suuhk iteyihtamekw maamuu e taapweyimekw Christ.

Yaakwaamuwewin ekaa chechii maahchikwaapihkaatikut awen naapeu itashuwewinh

⁶ Shaash e chii pachishteyimitisuuyekw Utipeyihchikeu Christ chechii tipeyimitaakw suuhk kata wii nisituunaakun taapwe e wiichewekw.

⁷ Pachishtinaahkw chechii ihtuutaataakw kuiskw chechii ishi pimaatisiiwekw kaye chechii miitaakw maskuusiiwiniyuu, muyaam mistikw nitaamihch aschiihch e ishi kutaaupayiyich utapiih chechii suuhchikaapuut ekun chipaa ishinaakusinaawaau. Ekun chipaa wii ishi suuhchikaapuunaawaau taan e ishi taapwehtamekw. Ekw maak wetaach muush che taapweyimekw mwehch kaa ishi chiskutamaakuyekw chechii ihtiyekw. Kaye maak muush chipaa nanaaskumaawaau.

⁸ Ekaawii maak awen chika uhchi wiyeshimikuwaau aniyuu uhchi taan e ishi nitamukw chiskutamaachet, wesh aniyuu taan e ishi taapwehtahk naapeuh chii aashuu chiskutamaacheyuu. Anichii ahchaahkuch kaa waawiishuwetwaau taan che ishi pimaatisiinaanuyich utah aschiihch wiyawaau e ihtaatwaau uhchipayiniyuu. Namui Christ e ihtaayich uhchipayiniyuu.

⁹ Chishemanituu tekash chii nuukuhtaau Christ upimaatisiiwiniihch taan nihaau e iteyihtaakusit wiya Chishemanituu.

¹⁰ Chiyawaau maak chichii ihtuutaakunaawaau chechii mitunesiyekw Christ e wiichewekw. Wiya Christ misiwe tipeyihchewiniyuu kaye e niikaaneyihtaakuniyich suuhcheyihtaakusuwiniyuu utah aschiihch kaye chiishikuhch tipeyihtam.

¹¹ Ihtakuniyuu e ishi chischinuwaachishuutaakw Chishemanituu e nuushuushkuumekw Christ, namui wii aniyuu taan e ishi chischinuwaachishushutwaau Jewa iinuuch iteyihtaakuniyuu uyuu. Aniyuu Christ e chii aapihkunitaakw taan e ishi suuhchimaahchikwaapihkaatikuyekw e wii machituutamekw e chischinuwaachishukuyekw ishinaakuniyuu taan kaa ishi chischinuwaachishuutaakw Chishemanituu.

¹² Kaye maak kaa siikahaahtaakuyekw mwehch e chii asich nahiihkaakuyekw Christ kaa nahiihkuwaakanuut ishinaakun. Ekw maak an e taapwehtamuwekw Chishemanituu umaskuusiiwin mwehch kaye chiyawaau e chii wanishkaanikuyekw kaa wanishkaanaakanuut nipuwinihch ishinaakun. Eukw aniyuu maskuusiiwiniyuu Chishemanituu kaa aapachihtaat kaa wanishkaanaat Christ nipuwinihch uhchi.

¹³ Chimachihtwaawinawaauh chichii ihtuutaakunaawaau muyaam e nipiyekw chechii ishinaakusiyekw Chishemanituu ishi e ihtaat, kaye maak eshkw namui kuuhchi ihtuutaakuwaau Chishemanituu chechii utawaashiimitutaataakw taan kaa ihtuutamaataakw Christ uhchi. Anuhchiish maak chichii miikuwaau Chishemanituu e uskaayich pimaatisiiwiniyuu mwehch kaa ishi wanishkaanaat Christ nipuwinihch uhchi. Tekash chichii wepeyihtamaakunuu Chishemanituu chimachihtwaawinuuh.

¹⁴ Tekash maak chii kaasiisinaham Chishemanituu taan kaa ishi masinaateyich e chii ishi machituutamuwaauhkupane wiishuwewinh e chii piikunamuhkw. Anite utaahch chichii maahtakushkaakunaanuu uu e chii ishi machituutamuhkw, mikw maak Chishemanituu tekash chichii wepeyihtamaakunuu chimachihtwaawinuuh. Iskutak kaa nipistamaatahkw Christ muyaam e chiistaaskuhahk Christ utaashiteyaahtikumiihch ekun kaa ihtuutahk Chishemanituu chimachihtwaawinuuh.

¹⁵ Aniyuu aashiteyaahtikuhch kaa nipit Christ ekut tekash kaa tepihaat misiwe aniyuuh suuhcheyihtaakusuwiniyuu kaye tipeyihchichewiniyuu kaa ayaayich. Kaye misiwe aniyuuh ahchaahkuu suuhcheyihtaakusuwiniyuu kaa ayaayich kaye aniyuu kaa nishkuushtaakut. Misiwe aweyuuh chii waapahtiyeu mitun e tepihaat aniyuuh.

¹⁶ Ekaawii uhchi nituhtuu awen e wii wiihtamaask chekwaayuu chechii miichuut maak chekwaayuu chechii minihkweut e itwet eukw uyuu che naheyihtamihiikuyich Chishemanituu. Ekaawii uhchi nituhtawaahkuch awenichii e itwetwaau yaaitei chechii nanaakatuweyihtamuwekw aniyuu nanaahkuu e chiishikaakwaauh anit kaa chii makushaanuuhch, kaye anit eshikum piisimh kaa chii miywaataakanuuhch e uschisiit tipischipiisim. Ekaawii nituhtawaahkuch anichii memehch kaa itashumitaakuch e Jewa ayimiheuchiishikaayich.

¹⁷ Mwehch mikw e takaashtehtihch an taan eshkw che ispayihch anite niishtamihch ishinaakunh uyuuh. Shaash maak chii takushin an chihchiwe e iteyihtaakusit awen, eukw Jesus.

¹⁸ Ekaawii chika uhchi pachishtinaawaauch anichii awenichii ayaahch kaa ihtitwaau e tipihteyimisutwaau kaye enchilh kaa nuuchiishtuwaatwaau chechii pisiiwiitaakuch e wii ayaayekw chikaaniyuwinawaau. Euk uchii naashch taapwe piichishkweuhiikuuch taan e ishi waapahtahkwaau waapahtiiwewinh. Namui maak aapateyihtaakuniyuu aniyuu taan e ishi aayimuutahkwaau, wesh mikw e ishi maamituneyihtaakanuyich utah aschiihch ekun pishikw e ishi maamituneyihtahkwaau.

¹⁹ Namui ekw aapateyimeuch Christ, aniyuuh naakaanishkuwaayich misiwe umaamuuayimihaauh. Christ maskuheu umaamuuayimihaauh kaye maak aniyuu misiwe e aapachihaat chechii maamuu wiicheutuyich, wetaach ati mihchetiyuuh, Chishemanituuh e ihtuutaakuyich chechii ati mihchetiyich.

E wiich nipiimaakanuut Christ kaye e wiich pimaatisiimaakanuut

²⁰ Christ kaa nipit mwehch kaye chiyawaau e chii nipiyekw ishinaakun. Namui maak ekw chitipeyimikuwaauch anichii ahchaahkuch kaa waawiishuwetwaau taan che ishi pimaatisiinaanuyich utah aschiihch. Chekwaan maak wehchi ishi pimaatisiyekw mwehch eshkw e tipeyimikuyekw uu aschii.

²¹ Chekwaan wehchi naashch aapatihtamekw aschiiyuu wiishuwewinh aniyuuh kaa wiishumikuyekw chekw miichim ekaa chechii kuchishtamekw kaye chekw miichim ekaa mechim chechii taahtinamekw.

²² Chichii miikunaanuu miichim chechii miichinaanuuhch. Namui maak chineush miywaau miichim. Misiwe uyuuh chistahamaachewinh naapeu uyuu kaa ishi chistahamaachet kaye ekun e ishi chiskutamaachet.

²³ Mwehch chipaa kachehtaaweyihtaakunh ekun e iteyihtaakuhkwaauh uyuuh chiskutamaachewinh. Ekut anit waahtamaakuyihkw taan chipaa ihtinaanuu e nuuchiishtuuhkw awen. Kaye chiwiihtamaakunaanuu taan che ihtiihkw chechii iteyimikawiihkwaau awenich e tipihteyimisuyihkw. Kaye maak chiwiihtamaakunaanuu ekaa chechii manaachihtaayihkw chiiyuunuuh. Mikw maak namui mitun chiwiichihiikunaanuu uyuuh chiskutamaachewinh chechii nakaahukuyihkw e wii machituutamuhkw.