ᐊᐸᔅᑕᓚᒡ 9 - Chishemanituu Utayimuwin: Kaa Uskaach Testament

Saul kaa chihchi taapweyimaat Jesus

¹ Saul maak wii eshkw ekun kaa ihtit e papaasechihaat aniyuu aweyuuh Utipeyihchikeu Jesus kaa taapweyimaayich e itaat che nipahaakanuyich. Chii nituwaapameu maak chisheayimiheuchimaauh,

² kaa nitutamuwaat chechii miikut masinahiikaniyuu chechii waapahtiyaat aniyuu kaa niikaanishkuwaayich Jewa ayimiheuchimaau anit Damascus kaa ihtaayich e wiihtaakuniyich anit e miyaakanuut chechii maakunaat iskweu kaye naapeu kaa taapweyimaayich Jesus, kaye kaau chechii chiiwehtahaat anite Jerusalemihch.

³ Chii ituhteu maak anite Damascus, iskutak maak e ati peshuwaapahtahk, chiihtihtawii chii uhchi mista waashteyuu anit waaskaa e ihtaat kihchikiishikuhch e uhchi waashteyich.

⁴ Chii pahchishinuu aschiihch, ekw kaa pehtawaat aweyuu e itikut, “Saul, Saul, chekwaan wehchi nanehkaachihiyin.”

⁵ Ekw Saul kaa itwet, “Awen chiya kaa pechi ayimihiyin.” Ekw kaa itikut aniyuu aweyuu, “Eukw niya Jesus, an kaa nanehkaachihiit.

⁶ Pisikuuh, che ituhteyin anite ihtaawinihch ekute che wiihtamaakuyin taan che ihtiyin.”

⁷ Anichii maak naapeuch kaa wiichewaatwaau Saul chii chipihchikaapuuch ekaa mitun chistutwaau. Chii pehtaweuch aniyuu aweyuu mikw namui uhchi waapameuch.

⁸ Ekw Saul kaa pisikuut, iskutak maak kaa tuuhkaapit, namui uhchii waapahtam. Ekw anichii naapeuch kaa sichinischehtahaatwaau e ituhtahaatwaau anite Damascusihch.

⁹ Nishtu chiishikaau maak namui uhchii waapahtam, aniyuu maak ishpish namui uhchi miichisuu kaye namui uhchi minihkweu.

¹⁰ Anite maak Damascus chii ihtaau naapeu e taapweyimaat Jesus, Ananias chii ishinihkaasuu. Chii waapahtiyaakanuu waapahtiiwewiniyuu, ekut maak kaa ayimihiikut Utipeyihchikeu e itikut, “Ananias.” Ekw kaa itaat, “Chekwaan Utipeyihchikeu.”

¹¹ Ekw kaa itikut Utipeyihchikeu, “Pisikuuh, che ituhteyin nete meskanuu kaa kuiskumuhch kaa ishinihkaatech. Ekut anit Judas uwaaskaahiikanimihch che kakwechihcheyimuyin e ihtaakwe naapeu Saul e ishinihkaasut anite Tarsus e uhchiit. Eukuu Saul mekwaach ayimihaau.

¹² Chii ishinam kaye e pechi piihcheyich naapeu Ananias e ishinihkaasuyich, e saaminikut miin kaau chechii waapahtahk.”

¹³ Ekw Ananias kaa nishkweushihaat Utipeyihchikeuh e itaat, “Utipeyihchikeu, mihchetu iinuuch nichii wiihtamaakuch uyuu naapeu taan e ishpish nanehkaachihaat aniyuuh kaa taapwehtamitwaau anite Jerusalemihch kaa ihtaayitwaauh.

¹⁴ Kaye maak chii pechi ituhteu Saul ute Damascus, e chii miikut kaa niikaanapiitwaau ayimiheuchimaauh chechii maakunaat misiwe aniyuu aweyuu kaa taapweyimikuwat.”

¹⁵ Ekw Ananias kaa itikut Utipeyihchikeu, “Ituhte yaapach, wesh nichii wiyeyimaau Saul chechii pechi atushkuut, kaye chechii pechi chischeyihtaakuhiit anite Jewa iinuuh e ihtaayich kaye maak anite ekaa Jewa itiskaanesiyich iinuuh, kaye maak chisheuchimaauh e ihtaayich.

¹⁶ Wesh niya nika waapahtiyaau taan che ishi nanehkaateyimut niya uhchi,” chii itikuu Utipeyihchikeu Ananias.

¹⁷ Ananias maak chii ituhteu anite, kaa piihchet aniyuu waaskaahiikaniyuu anite kaa itishahwaakanuut. Iskutak maak wiyaapamaat aniyuu Saul, ekw kaa saaminaat e itaat, “Niichishaan Saul, Utipeyihchikeu Jesus nichii pechi itishahuukw, an kaa nachishkaask nete meskaanaahch mekwaach kaa pechi ituhteyin ute. Nichii pechi itishahuukw miin kaau chechii waapahtaman, kaye chechii saakaschineshkaask Kaa payehchisiyich Ahchaahkw.”

¹⁸ Tiiwehch maak mwehch names uhakai e ishinaakuniyikwaauh chekwaayuu chii uhchi paahpahchishtiniyuuh anit uhchi Saul uschiishikuhch, ekut maak miin kaau kaa uhchi waapahtahk. Chii pisikuu ekw kaa siikahaahtuwaakanuut.

¹⁹ Iskutak maak kaa chiishkwaa miichisut, ekw miin kaa ati maskuupimaatisiit. Weipishchiish chii wiichimeu Saul aniyuu chischinuhamuwaakanh anit Damascusihch kaa ihtaayitwaauh.

Saul kaa kacheskwet anite Damascus

²⁰ Tiiwehch maak chii ituhteu anite nanaahkuu Jewa ayimiheukamikuhch, e kacheskwet e itwet, “Jesus, eukw Chishemanituu Ukusisa.”

²¹ Anichii kaa pehtawaatwaau, chii maamishkaateyihtamihiikuuch uyuu e itweyich ekw kaa ititutwaau, “Namui aa eukw uu naapeu kaa wanaachihaat aniyuu kaa taapweyimaayich Jesus anite Jerusalemihch kaa ihtaayich. Namui aa eukw uu wehchi pechi takushinit e wii pechi nituwaapamaat aniyuu kaa taapweyimaayich Jesus, chechii maakunaat kaye chechii ituhtahaat anite kaa niikaanapiitwaau ayimiheuchimaauh e ihtaayich.”

²² Saul maak etituu chii cheshtinaashtaakuu aniyuu taan kaa ishi kacheskwet e aayimuumaat Jesus taapwe e aawiyich Christ aniyuu kaa wiyaapamaat Chishemanituu. Anichii maak Jewa iinuuch anit Damascus kaa ihtaatwaau chii wawaaneyihtamihiikuuch, namui mitun chekwaayuu uhchii ishi nishkweushiheuch.

²³ Iskutak maak mihchetu chiishikaau meyaaupayihkwaau ekw anichii Jewa iinuuch kaa nishtuwiitwaau, kaa wiyeyihtahkwaau che nipahaatwaau Saul.

²⁴ Mikw maak Saul chii chischeyihtamihaakanuu taan waa ihtuutawaakanuut. Eshikum chiishikaau kaye eshikum tipiskaau chii naanaakachihtaauch anite e uhchi piihchaanuuhch an ihtaawin, chechii nipahaatwaau iskutak takushiniyichen.

²⁵ Peyakwaau maak e tipiskaayich Saul uwiichewaakan chii wiichihiikuu chechii ushimut anit uhchi Damascusihch. E pakuneyaayich e yaaihtakaayich chii uhchi aashaapihchenaakanuu utipiiwatihch e piichishihk.

Saul kaau kaa ituhtet Jerusalemihch

²⁶ Saul maak kaau chii chiiweu anite Jerusalemihch. Ekw kaa wii papaawiichewaat aniyuu chischinuhamuwaakanh e nituweyimaat chechii taapwehtamiyich kaye wiya e taapweyimaayich Jesus. Mikw maak namui uhchi taapwehtamiyuu e taapweyimaayich Jesus, misiwe chii kushtikuu.

²⁷ Barnabas maak chii wiichiheu aniyuu Saul, kaa ituhtahaat anite aniyuu apastalh e ihtaayich. Kaa wiihtamuwaat taan kaa ishi nuukushiishtaakuyich Saul Utipeyihchikeu anite meskanaahch, kaye e chii ayimihiikuyich. Kaye chii wiihtamuweu taan kaa ishi kacheskweyich Saul anite Damascus Jesus e aayimuumaayich ekaa mitun uhchi kushtaachit.

²⁸ Ekut maak kaa ihtaat Saul anit aniyuu apastalh e ihtaayich. Misiwe kaa ituhtet anite Jerusalemihch e kacheskwet e aayimuumaat Utipeyihchikeu, ekaa kushtaachit.

²⁹ Chii ayimiheu kaye chii nanaaskuushiheu aniyuu Jewa iinuuh Greek kaa ishi ayimiitwaauh chechii taapweyimaayich Utipeyihchikeu Jesus mikw maak chii wii nipahiikuu.

³⁰ Iskutak maak anichii wiichishaanimaauch piyehtahkwaau uyuu, anite Caesarea kaa ishinihkaateyich ihtaawiniyuu chii ituhtaheuch aniyuu Saul, ekw anite Tarsus kaa ishinihkaateyich ihtaawiniyuu kaa itishahwaatwaau.

³¹ Anichii maak umaamuuayimihaauch misiwe anite aniyuuh aschiih kaa ihtaatwaau Judea kaye Galilee ekw maak Samaria kaa ishinihkaateyikwaauh, weipishchiish namui uhchi nanehkaachihaakanuuch. Chii chisteyimeuch Utipeyihchikeu uchii iinuuch kaye wetaach chii ati yaaichikaapuuch kaye wetaach chii ati mihchetuuch wesh Kaa payehchisiyich Ahchaahkwa chii wiichihiikuuch.

Peter kaa maamishkaach ihtit anite Lyddahch kaye Joppahch

³² Peter nanaahkuu ihtaawinihch chii papaaituhteu. Ekw maak peyakwaau e nituu chiiutamaat aniyuu kaa taapwehtamiitwaauh anite Lyddahch kaa ihtaayitwaauh,

³³ ekut kaa waapamaat naapeu Aeneas e ishinihkaasuyich, ekaa nisitusiyich, yaanaaneu pipun ekaa uhchi aamiyich unipewiniihch.

³⁴ Ekw Peter kaa itaat, “Aeneas, Jesus Christ chimiinuwaachihiikw, wanishkaa, che utinaman chitashpishimun.” Tiiwehch maak chii wanishkaau Aeneas.

³⁵ Misiwe maak iinuuh kaa tashiyich anit Lyddahch kaye Sharonihch chii waapamikuu e papaamuhtet, ekw maak kaa ati taapweyimaayich Utipeyihchikeuh.

Tabitha miin kaau kaa pimaatisiit

³⁶ Anite ihtaawinihch Joppa kaa ishinihkaatech chii ihtaau iskweu e taapweyimaat Jesus, Tabitha e chii ishinihkaasut, uu maak ishinihkaasuwin e itweshtamaataakanuuhch atihkw iinaanuu. Muush chii miyutuutamuweu aweyuu an iskweu kaye chii wiichiheu kaa chistimaatisiitwaau aweyuuh.

³⁷ Mekwaach maak Peter e ihtaat anit Lyddahch, chii mistaahkusuu an iskweu, chek maak chii nipuu. Wiiyuu maak chii chishtaapautaakanuuyuu, ekw ishpimiihtakuhch kaa ashtaakanuyich.

³⁸ Chii peshunaakun maak Joppa anite Lyddahch uhchi. Iskutak maak piyehtahkwaau anichii kaa taapweyimaatwaau Jesus e ihtaayich Peter anite Lyddahch, niishu naapeu chii itishahweuch anite chechii wiishaamaatwaau Peter tiiwehch chechii pechi takushiniyich.

³⁹ Peter kaa pisikuut, kaa wiichewaat aniyuu naapeuh. Iskutak maak tekushihkwaau nete, chii ituhtahaakanuu anite ishpimiihtakuhch anite e ihtakuniyich aniyuu miiyuuyuu. Chii ihtaauch anit iskweuch e peyakutwaau, chii maausikukaapuushtaweuch Peter e maatutwaau kaye e waapahtiyaatwaau pachuuyaanh kaye akuhpa e chii ushtamaakuwaakupanenich aniyaanaa iskweu Tabitha.

⁴⁰ Peter misiwe aweyuuh chii wiiwiitishiheu anit aniyuu nipeukamikuhch kaa ihtaayitwaauh, ekw kaa niipiskuupit e ayimihaat, ekw kaa kanawaahtahk aniyuu miiyuuyuu e itwet, “Tabitha, wanishkaa.” Chii aapaham maak uschiishikuh an iskweu, iskutak maak wiyaapamaat aniyuu Peter, chii uhchi asamitapuu.

⁴¹ Peter maak chii shuwanischeyishtuweu kaa wiichihaat e wanishkaanisuyich. Ekw kaa wiishaamaat aniyuu kaa peyakuyich iskweuh kaye misiwe aniyuu kaa taapwehtamiitwaauh aweeyuuh, kaa waapahtiyaat miin e pimaatisiyich aniyuu Tabitha.

⁴² Misiwe maak anit Joppahch chii mishihtepayuu tipaachimuwin uu kaa ispayihch. Mihchetu maak awenichii chii taapweyimeuch Utipeyihchikeu Jesus.

⁴³ Chineush maak chii ihtaau Peter anit Joppahch, aniyuu chii wiichimeu kaa chiishinicheyich Simon kaa ishinihkaasuyich.