ᐊᐸᔅᑕᓚᒡ 6 - Chishemanituu Utayimuwin: Kaa Uskaach Testament

Niishwaashch naapeuch kaa wiyeyimaakanuutwaau chechii wiichihiiwetwaau ayimiheukamikuhch

¹ Iskutak maak etituu e ati mihchetitwaau iinuuch e taapweyimaatwaau Jesus, anichii Jewa iinuuch Greek kaa ishi ayimitwaau chii machipayikahtaweuch aniyuu Jewa iinuu Hebrew kaa ishi ayimiyich e chii itwetwaau aniyuu kaa paahpeyakuyich iskweu anit e ihtaatwaau ekaa uhchi ishpish ashamaakanuyich miichimiyuu aniyuu kaa chii maatinamuwaakanuyich iskweu kaa peyakuyich eshikum chiishikaau.

² Ekw maak anichii niishushaap apastalach chii wiishaameuch misiwe aniyuu aweyuu kaa taapweyimaayich Jesus, ekw kaa itaatwaau, “Namui kuiskunaakun ekaa ayaashpishiyaahch chechii kacheskweyaahch Chishemanituu utayimuwin niyaan e naanaakachihtaayaach chechii miyu ashamaakanuutwaau anichii iskweuch kaa peyakutwaau.

³ Chiyawaau niichishaanaanich, wiyaapamaahkuch niishwaashch naapeuch anit e tashiyekw anichii e miywaachimaakanuutwaau aniyuu uhchi e kuiskutaatisiitwaau kaye naashch e kachehtaaweyihtahkwaau kaye maak e saakaschineshkaakutwaau Kaa payehchisiyich Ahchaahkwa. Eukunich uchii che miihkwaau uyuu aapatisuwiniyuu e naanaakatuweyimaatwaau kaa paahpeyakuyich iskweu.

⁴ Ekw maak niyaan che ishpishiyaahch chechii ayimihchikeyaahch kaye e kacheskweyaahch.”

⁵ Misiwe maak chii naheyihtamuch anit e tashitwaau aniyuu kaa itweyich aniyuu apastalh. Ekw kaa wiyaapamaatwaau Stephen. Stephen maak utaapwehtamuwin naashch chii suuhcheyihtaakuniyuu, kaye chii saakaschineshkaakuu Kaa payehchisiyich Ahchaahkwa. Kaye Philip chii wiyaapameuch kaye Prochorus, kaye Nicanor, kaye Timon, kaye Parmenas, ekw maak Nicolaus. Uu Nicolaus anite Antioch chii uhchiyuu wiya, aat maak ekaa Jewa uhchi itiskaanesit yaapach maak chii taapwehtam taan e ishi taapwehtamiyich Jewa iinuuh.

⁶ Ekw maak anichii kaa taapwehtahkwaau kaa ituhtahaatwaau aniyuuh kaa wiyaapamaatwaau naapeu anite aniyuuh apastalh e ihtaayich. Ekw maak anichii apastalach kaa saaminaatwaau kaye kaa ayimiheshtamuwaatwaau aniyuu naapeuh.

⁷ Chishemanituu maak utayimuwin chii mishihtepayiniyuu. Wetaach mihchetu iinuuch anit Jerusalemihch kaa ihtaatwaau chii taapwehtamuch, kaye mihchetu ayimiheuchimaauch chii taapwehtamuch kaye chii nanihiihtamuch miywaachimuwiniyuu.

Stephen kaa maakunaakanuut

⁸ Stephen maak an awen kaa saachischineshkaakut Chishemanituu ushaweyihchichewiniyuu kaye usuuhkaatisiiwiniyuu chii iteyihtaakusuu, chii ihtuutam maak nanaahkuu maamishkaach chekwaayuuh kaye nanaahkuu chii ishi maamishkaach waapahtiiweu anit iinuu e ihtaayich.

⁹ Chii ihtaauch naapeuch ekaa uhchi naheyimaatwaau Stephen, anichii anite kaa chii ishi naachayimihaatwaau aniyuu Jewa ayimiheukamikuyuu kaa aapihkunaakanuutwaau naapeuch, kaa ishinihkaateyich. Nanaahkuu ihtaawinihch chii uhchiyuuch Cyrene ekw maak Alexandria kaa ishinihkaateyikwaauh. Kutakach maak anite Cilicia ekw maak Asia aschiihch chii uhchiyuuch. Eukun maak uyuuh naapeu kaa machipayikahtaakut Stephen.

¹⁰ Namui maak uhchii nishkuushihiikuu uyuuh Stephen wesh Kaa payehchisiyich Ahchaahkwa chii miikuu kachehtaaweyihtamuwiniyuu chechii kaschihut e ayimit.

¹¹ Ekw maak chiimuut kaa aapachihaatwaau naapeuh chechii nanatayaachimaayich Stephen e itwetwaau, “Nichii pehtawaanaan Stephen e papaashtaamaat Moses ekw maak Chishemanituuh.”

¹² Uyuu maak e chii ihtitwaau chii ihtuutaweuch aniyuu kaa niikaanapiitwaauh kaye kaa chiskutamaacheyitwaauh wiishuwewiniyuu kaye iinuuh chechii chishuwaahiikutwaau aniyuu Stephen. Anichii maak kaa niikaanapitwaau chii itashuweuch chechii maakunaakanuyich Stephen kaye chechii ituhtahaakanuyich anite e nishtuwiyich aniyuuh kaa maamuupishtamiyich wiyaaskunichewiniyuu.

¹³ Kaye chii wiishaameuch naapeuh chechii nitawiin itaachimaayich Stephen anit e nishtuwiinaanuyich. Chii itweyuuh maak, “Uu naapeu, namui chipihtuweu e mamaayeyihtahk uyuu maauch kaa payehkaniyich kaye aniyuu wiishuwewiniyuu Chishemanituu kaa miyaayich aniyaanaa Moses.

¹⁴ Wesh nichii pehtawaanaan e itwet, uyuuh Jesus, Nazareth kaa uhchiyich che wanaachihtaayich uyuu Jewa ayimiheukamikuyuu, kaye maak che kwestinahk aniyuuh Jewa iinuu ihtuwinh aniyaanaa Moses kaa itashuwekupane che ihtuutaakanuyikwaauh.” Eukw uyuu kaa itaachimutwaau anichii naapeuch.

¹⁵ Misiwe maak anichii anit kaa maamuupishtahkwaau wiyaaskunichewiniyuu naashch chii kanuwaapameuch Stephen e waapahtamuwaatwaau utaashtamuhkuyuu mwehch enchil utaashtamuhkw e ishinaakuniyich.