ᐊᐸᔅᑕᓚᒡ 5 - Chishemanituu Utayimuwin: Kaa Uskaach Testament

Kaa aayimuumaakanuut taan kaa ispayit Ananias kaye aniyuu wiichiskweu

¹ Chii ihtaau maak naapeu Ananias e ishinihkaasut, wiichiskweu maak Sapphira chii ishinihkaasuyuuh. Chii ataaweu maak pasch aniyuu aschiiyuu taan kaa ishi tipiyeusiitwaau.

² Taapishkun chii niskumuuch chiimuut chechii kanuweyihtamaasutwaau pasch aniyuu shuuliyaayuu ekw kaa ituhtutawaatwaau aniyuu apastalh aniyuu taan kaa ishpish iskunahkwaau.

³ Ekw Peter kaa itaat, “Ananias, chekwaan wehchi pachishtinit machimanituu chechii piihchet chitehiihch, chechii ihtuutaask chechii nanatayimat Kaa payehchisiyich Ahchaahkw, chiimuut e kanuweyihtamaasuyin pasch an shuuliyaau taan kaa ishpish uchipitaman kaa ataaweyin an kaa ishi tipiyeusiyin.

⁴ Eshkw ekaa uhchi ataaweyin chitaschii chiya chichii tipiyeusiyin iskutak maak kaa ataaweyin chichii miikuun chechii wiyeyihtaman taan che ihtuutaman an shuuliyaau. Chekwaan kaa maamituneyihtaman wehchii wiyeyihtaman uu chechii ihtuutaman. Namui naapeu chinanatayimaau, Chishemanituu eukw nenatayimat.”

⁵ Iskutak maak piyehtahk Ananias uyuu e itaakanuut chii ati pahchishinuu kaa ati puunipimaatisiit. Misiwe maak anichii kaa pehtahkwaau chii sechisuuch.

⁶ Uschiniichuuch maak chii pechi piihcheuch, kaa wiiskweyechinamuwaatwaau aniyuu wiiyuuyuu, kaa wiiwiihtahaatwaau, kaa nituu nahiihkuwaatwaau.

⁷ Nishtu tipahiikan maak ishpish wiichiskweu kaa pechi piihcheyich, mikw namui uhchi chischeyihtamiyuu taan kaa ispayikupane.

⁸ Ekw Peter kaa itaat, “Pechi wiihtamuu, eukw aa uu misiwe kaa miikuyekw shuuliyaau chinaapem kaa ataaweyekw chitaschiiwaau.” Kaa itwet an iskweu, “Ehe, eukun an misiwe.”

⁹ Ekw Peter kaa ati itaat, “Chekwaan taapishkun chinaapem wehchi chii iteyihtamihiikuyekw chechii kakwechihiimekw Utipeyihchikeu Utahchaahkwa. Anichii naapeuch kaa nituu nahiihkuwaatwaau chinaapem shaash chii takushinuuch, nete ishkwaahtemihch niipuuch. Kaye maak chiya chika wiiwiihtahiikuch mwehch chinaapem kaa ishi wiiwiihtahaakanuut.”

¹⁰ Ekw an iskweu kaa pahchishihk anit uhchishkuu e ihtaayich, e nipit. Anichii maak uschiniichuuch chii pechi piihcheuch, kaa waapamaatwaau e nipiyich. Ekw kaa wiiwiihtahaatwaau, kaa nituu nahiihkuwaatwaau anite uhpime unaapemiyuu kaa chiskahaakanuyich.

¹¹ Misiwe maak anichii umaamuuayimihaauch kaye kutakach awenichii kaa pehtahkwaau uyuu e chii ispayich naashch taapwe chii sechisuuch.

Apastalach kaa miinuwaachihaatwaau mihchetu aweyuu

¹² Mihchetu maamishkaach waapahtiiwewinh chii waapahtiiweuch kaye chii ihtuutamuch e maamishkaateyihtaakuniyikwaauh chekwaayuuh anichii apastalach anit aniyuu iinuu e ihtaayich. Misiwe maak anichii muush kaa maamuuayimihaatwaau chii nishtuwiyuuch maan anite Solomon upwaahchim kaa ishinihkaateyich.

¹³ Kutakach maak awenichii chii sechisuuch chechii wiichewaatwaau mikw maak yaapach naashch chii chisteyimeuch.

¹⁴ Yaapach maak etituu chii ati mihchetuuch aniyuu kaa tashitwaau anit aniyuu e peyakuminehiitutwaau, taapishkun naapeuch kaye iskweuch chii ati taapweyimeuch Jesus.

¹⁵ Anichii maak iinuuch wiyaapamaatwaau aniyuu Apastalh e ishi maamishkaach ihtiyich chii ituhtaheuch aniyuu kaa aahkusiyich anite meskanaahch ashpishimuwinihch maak tehtayechinikanihch e pimishiniyich, e iteyihtahkwaau aat mikw taauhukutwaawenich Peter e takaashtesiniyich chika chii miinuwaatisiyuuch.

¹⁶ Mista mihchetu maak iinuuch chii takushinuuch, anite nanaahkuu ihtaawinihch e uhtuhtetwaau anit waaskaa Jerusalemihch, e peshuwaatwaau aweyuu kaa aahkusiyich kaye aniyuu aweyuu kaa piihchishkaakuyich machiahchaahkwa. Misiwe maak chii miinuwaachihaakanuyuuh.

Apastalach kaa nanehkaachihaakanuutwaau

¹⁷ Ekw an chisheayimiheuchimaau, ekw maak misiwe aniyuuh kaa wiichihiikut aniyuu Sadducee kaa ishinihkaataakanuyitwaauh chii uhteyimeuch aniyuu apastalh ekw kaa naanituu miskahkwaau taanite chechii uhchi chipihchihaatwaau.

¹⁸ Chii maakuneuch ekw kaa piihtakahaatwaau anite chipahutuukamikuhch.

¹⁹ Mikw maak aniyuu e ati tipiskaayich, Utipeyihchikeu utenchilam chii aapuhweyuu chishtuhkan anit chipahutuukamikuhch, ekw kaa wiiwiihtahaat aniyuu apastalh kaa itaat,

²⁰ “Maachiikw nete nituu ituhtekw chisheayimiheukamikuhch, che waawiihtamuwekuch misiwe awenichii uyuu kaa uskaayich pimaatisiiwiniyuu.”

²¹ Anichii maak apastalach chii nihiihtaweuch uyuu kaa itikutwaau. Iskutak maak e ati petaapaniyich chii piihcheuch chisheayimiheukamikuhch, ekw kaa chihchi chiskutamaachetwaau. Ekw an chisheayimiheuchimaau kaye aniyuu kaa wiichihiikut chii wiishaameuch aniyuu Jewa iinuuh kaa niikaanishkuwaayitwaauh misiwe maamuu chechii nishtuwiitwaau. Ekw kaa itishahwaatwaau aweyuu anite chipahutuukamikuhch chechii peshuwaakanuyich aniyuu apastalh anit e ihtaatwaau.

²² Mikw maak iskutak tekushihkwaau anichii shimaakanishach anite chipahutuukamikuhch, namui uhchi miskaweuch aniyuu apastalh anite. Ekw kaau kaa chiiwetwaau anite kaa nishtuwiinaanuyich, kaa nituu wiihtahkwaau e itwetwaau,

²³ “Iskutak kaa takushiniyaahch nete chipahutuukamikuhch, misiwe tekash chii aataapishkahiikanuu, kaye anichii shimaakanishach kaa naanaakachihtaatwaau chii ihtaauch anit. Mikw maak iskutak kaa aapahuuchihtwaau anichii chishtuhkanihch, namui nuuhchi miskawaanaan awen chechii ihtaat anite piihtakamihch,” chii iteuch.

²⁴ Iskutak maak an kaa uchimaahkahtuwaat aniyuu shimaakanisha aniyuuh chisheayimiheukamikuyuu kaa naanaakachihtaayich, kaye maak anichii kaa niikaanapitwaau ayimiheuchimaauch piyehtahkwaau uyuu, chii miskaateyihtamihiikuuch taan kaa ispayiyich uyuuh apastalh.

²⁵ Ekw peyakw aweyuu kaa pechi nituwaapamikutwaau e itikutwaau, “Anichii naapeuch kaa maakunekuch, mekwaach chiskutamaacheuch anite chisheayimiheukamikuhch,” chii iteu.

²⁶ Ekw maak an shimaakanisha kaa uchimaahkahtuwaat, kaye aniyuu ushimaakanishiim kaa nituwaapamaatwaau aniyuu apastalh kaa peshuwaatwaau miin anite kaa nishtuwiinaanuyich. Chiyaam chii ituhtaheuch anite aniyuu apastalh wesh chii kushteuch aniyuu iinuu chechii nipahiikutwaau e pimushinaatahukutwaau.

²⁷ Chii peshuweuch aniyuu apastalh kaa uhchishkuukaapuuhaatwaau anit kaa apishtamiitwaauh wiyaaskunichewiniyuu e ihtaayich. Ekw an chisheayimiheuchimaau kaa itaat,

²⁸ “Chichii ititinaan yaaitei ekaa miin chechii chiskutamaacheyekw Jesus utishinihkaasuwin. Taan kaa ihtiyekw maak. Misiwe anit Jerusalemihch chichii ishi chiskutamaachenaawaau, kaye chiwii ihtuutuunaan niyaan chechii ataameyimikuyaahch Jesus kaa nipahaakanuut,” chii iteu.

²⁹ Peter kaye anichii kutakach apastalach chii nishkweushiheuch e itaatwaau, “Uste iteyihtaakun Chishemanituu chechii nanihiihtuwachiht ishpishaat kutak awen.

³⁰ Aniyuuh Chishemanituuh kaa atushkuwaatwaau aniyehkaanaanich aanische kuuhtaawiinuuch, eukw uu kaa wanishkaanaat Jesus an kaa nipahekw aashiteyaahtikuhch.

³¹ Chishemanituu maak chii chisteyihtaakuheu Jesus unihiiwinihch itehche e chii apihaat, chechii uchimaawiyich kaye chechii pimaachihiiweyich, kaye chechii ihtuutawaat Israel iinuuh chechii kweskaatisiyich kaye chechii wepeyihtamuwaakanuyich umachihtwaawiniyuuh.

³² Niyaan maak nitipaatuutenaan wesh nichii waapahtenaan uyuu kaa ispayihkwaau, ekw maak Kaa payehchisiyich Ahchaahkw aniyuu Chishemanituu kaa miyaat aweyuu kaa nanihiihtaakut kaye wiya wiihtamaacheu e taapwemakaniyich aniyuu kaa ispayiyich.”

³³ Iskutak maak piyehtahkwaau uyuu anichii kaa nishtuwiitwaau an kaa niikaaniit chisheayimiheuchimaau kaye aniyuu kaa wiichihiikut chii mista chishuwaasuuch, ekw kaa kakweteyihtahkwaau chechii itwetwaau chechii nipahaakanuyich uyuu apastalh.

³⁴ Chii ihtaau peyakw Pharisee, e asitapit anit e apishtaakanuyich wiyaaskunichewiniyuu, Gamaliel e ishinihkaasut. Uu naapeu e chiskutamaachet ayimihewin wiishuwewiniyuu chii itaapatisuu, naashch maak chii chisteyimaakanuu. Chii uhpakaapuu anit aniyuu e nishtuwiinaanuyich, kaa itashuwaataat aniyuu apastalh chechii wiiwiyich pitamaa.

³⁵ Ekw Gamaliel kaa itaat aniyuu kaa nishtuwiitwaau, “Chiyawaau naapeutikw utah Israel kaa ihtaayekw, yaakwaamiikw taan waa ihtuutawekuch uchii naapeuch.

³⁶ Chichischisiitutawaawaau aa weskach naapeu Theudas kaa ishinihkaasut kaa takushinit e itwet naashch e chisteyihtaakusit, wiyesh maak newaau mitaahtumitanuu naapeu chii nuushunehukuu. Mikw maak chii nipahaakanuu, misiwe maak aniyuu kaa nuushuushkaakut paahpiiwe chii ihtaayuuh ekw maak aniyuu kaa ihtit namui shaash aapateyihtaakanuuyuu.

³⁷ Paatimaa maak Judas, an Galilee kaa uhchiit, chii takushin mekwaach kaa achimaakanuyich iinuu. Kaye wiya maak chii mihchetiyuu aweyuu kaa nuushuushkaakut, mikw maak kaye wiya chii nipahaakanuu kaye chii ascheyaamuhchaanuyuu aniyuu kaa nuushuushkaakut.

³⁸ Uu maak chiwii wiihtamaatinaawaau, ekaawii wiyesh ihtuutuwaahkuch uchii naapeuch apastalach kaa ishinihkaataakanuutwaau, wesh uchiskutamaachewinawaau kaye utaihtuwinawaau wiyawaau e ihtaatwaau wehchiimakaniikwe namui chineush chika uhchi aapateyihtaakanuuyuu.

³⁹ Mikw maak Chishemanituu e ihtaayich wehchipayiyikwe namui chika chii ashpashihaawaauch wesh muyaam wiya Chishemanituu e nishkuushtuwekw ekun chii ishinaakusiyekw.” Ekun kaa itwet Gamaliel.

⁴⁰ Anichii maak naapeuch kaa nishtuwiitwaau chii pishichiheuch aniyuu Gamaliel uyuu kaa itweyich. Ekw kaa wiishaamaatwaau aniyuu apastalh, ekw kaa itwetwaau chechii papasistehwaakanuyich, kaye chii itashumeuch ekaa miin wiiskaat chechii waawiihtahkwaau Jesus utishinihkaasuwiniyuu, ekw kaa pachishtinaatwaau.

⁴¹ Anichii maak apastalach chii chistuhteuch anit kaa nishtuwiyiich aniyuu kaa maamuupishtamiyich wiyaaskunichewiniyuu e sichiyesitwaau e chii tepicheyimikutwaau Chishemanituu chechii nanehkaateyimutwaau Jesus utishinihkaasuwiniyuu uhchi.

⁴² Ekw maak eshikum chiishikaau anite chisheayimiheukamikuhch kaye anite aweyuuh wiichiihch, yaapach chii chiskutamaacheuch kaye chii kacheskweuch Jesus Christ e aayimuumaatwaau, aniyuu Chishemanituu kaa pechi itishahwaayich.