ᐊᐸᔅᑕᓚᒡ 4 - Chishemanituu Utayimuwin: Kaa Uskaach Testament

Peter kaye John kaa ayimihiikutwaau aniyuu kaa niikaanishkamiyich chisheayimiheukamikuyuu

¹ Eshkw maak mekwaach e ayimihaatwaau aniyuuh iinuuh Peter ekw maak John chii pechi naatikuuch ayimiheuchimaauh kaye aniyuu uchimaamuwaauh anichii shimaakanishach kaa naanaakachihtaatwaau chisheayimiheukamikuyuu, ekw maak aniyuuh Sadduceeh.

² Namui uhchi naheyihtamiyuu e chiskutamuwaatwaau aniyuu iinuu e itaatwaau kaau e chii wanishkaayich Jesus nipuwinihch uhchi kaye e itaatwaau che wanishkaayich aweyuu aat e chii nipiyich.

³ Shaash maak chii utaakushiyuu kaa maakunaakanuutwaau Peter ekw maak John. Chipahutuukamikuhch pitamaa kaa kanuweyimaakanuutwaau aniyuu tepiskaayich.

⁴ Yaapach maak mihchetu awenichii chii taapwehtamuweuch taan kaa ishi wiihtamiyich aniyuu apastalh. Wiyesh niyaayinwaau chishemitaahtumitanuu naapeuch chii tashiichenich e taapwehtahkwaau.

⁵ Wiyaapaniyich maak anichii Jewa iinuuch kaa niikaanapitwaau ekw maak anichii kaa chisheinuutwaau kaye kaa chiskutamaachetwaau wiishuwewiniyuu chii nishtuwiyuuch anite Jerusalemihch.

⁶ Kaa nachishkawaatwaau aniyuuh chisheayimiheuchimaau Annas kaa ishinihkaasuyich ekw maak aniyuuh uwaahkumaakaniyuuh. Ekut kaa ihtaayich kaye Caiaphas, John, ekw maak Alexander.

⁷ Chii peshuwaakanuuyuu maak aniyuu apastalh chechii uhchishkuukaapuushtaakutwaau ekw kaa itaatwaau, “Taanite wehchii ihtuutamekw uu. Taanite kaa uhchi ayaayekw suuhkaatisiiwin chechii ihtiyekw uu kaye awen kaa itashumitaakw uu chechii ihtiyekw.”

⁸ Peter maak e saakaschineshkaakut Kaa payehchisiyich Ahchaahkwa, chii nishkweushiheu e itaat, “Chiyawaau kaa niikaanishkawekuch iinuuch, kaye kaa chisheinuuyekw,

⁹ chipechi kakwechiminaan anuhchiish kaa chiishikaach chechii wiihtamaahch aniyuu taan kaa ishi miyutuutamuwaakanuut uu naapeu kaye chechii wiihtamaahch taanite wehchii miinuwaatisiit uu naapeu e chii maaschisit.

¹⁰ Misiwe chipaa chischeyihtenaawaau kaye misiwe Israel iinuuch chipaa chischeyihtamuch Jesus utishinihkaasuwiniyuu e chii miinuwaachihiikut uu naapeu. Eukw uu Jesus Christ Nazareth kaa uhchiit, an kaa chiistaaskuhwekw aashiteyaahtikuhch kaye aniyuu Chishemanituu miin kaau kaa wanishkaanaat nipuwinihch uhchi.

¹¹ Eukw uu Jesus Chishemanituu utayimuwinihch kaa aayimuumaakanuut kaa itashtech, Anichii kaa waaskaahiikanihchetwaau chii aatuweyimeuch aniyuu asinii maauch chihchiwe e miywaapatisiyich. Ekun maak mwehch kaa ishi aatuweyimikut iinuu Jesus aat maak wiya maauch e chisteyimikut Chishemanituu.

¹² Mikw Jesus e ihtaat uhchipayuu pimaachihiiwewin. Namui uhchi miyeu Chishemanituu kutak aweyuu utah aschiihch chechii pimaachihiiweyich, mikw Jesus.”

¹³ Anichii maak kaa nishtuwiitwaau chii miskaateyihtamuweuch taan kaa ishi ayimiyich kaye aniyuu e ishpish suuhchiteheyich Peter ekw maak John e chischeyimaatwaau ekaa uhchi chiskutamuwaakanuyich. Ekut maak kaa uhchi chischeyihtahkwaau Jesus e chii wiichewaakaniyich.

¹⁴ Mikw maak namui wiyesh uhchii iteuch chechii nishkuushihaatwaau, wesh chii waapameuch aniyuu naapeuh kaa miinuwaachihaakanuyich e wiichikaapuushtawaayich Peter ekw maak John.

¹⁵ Ekw maak kaa itaatwaau aniyuu Peter ekw maak John chechii wiiwiyich anit aniyuu e maamuupitwaau ekw wiyawaau kaa ayimihiitutwaau.

¹⁶ Ekw kaa itwetwaau, “Taan che ihtuutuuhkwaau ekw uchii naapeuch. Misiwe awen utah Jerusalemihch chischeyihtam e chii miinuwaachihaakanuut an naapeu wiyawaau uhchi. Namui chika chii aanuwehtenaanuu.

¹⁷ Ekw maak chipihchihtaataau ekaa etituu chechii mishihtepayihch anite iinuuch e ihtaatwaau aniyuu e ishi aayimuumaakanuut Jesus. Chistahamuwaataauch uchii naapeuch ekaa miin wiiskaat chechii aayimuumaatwaau Jesus.”

¹⁸ Miin kaau kaa wiishaamaatwaau Peter ekw maak John anite e nishtuwiitwaau ekw kaa itashuwaataatwaau ekaa mitun chechii aayimuumaatwaau Jesus kaye ekaa chechii chiskutamaachetwaau utishinihkaasuwiniyuu e aapachihtaawaatwaau.

¹⁹ Peter ekw maak John kaa nishkweushihaatwaau e itaatwaau, “Wiyeyihtamukw maa, taaniyuu aniyuu e kuiskunaakuniyich e ishinahk Chishemanituu. Chiyawaau aa chechii pisichihiitaahch maak Chishemanituu chechii pisichihiichiht.

²⁰ Wesh taapaa nika chii puuniinaan e waawiihtamaahch taan kaa ishi waapahtamaahch kaye taan kaa ishi pehtamaahch.”

²¹ Ekw maak anichii anit kaa nishtuwiitwaau, kaa itaatwaau che waweshihaatwaau ekaa che puuniikwen e aayimuumaayich Jesus ekw maak kaa pachishtinaatwaau. Namui uhchii miskamuch chekwaayuu chechii uhchi waweshihaatwaau wesh misiwe anichii iinuuch chii maamihchimeuch Chishemanituu aniyuu uhchi taan kaa ispayiyich. Namui uhchii waweshiheuch wesh chii kushteuch aniyuu iinuuh anit kaa ihtaayitwaauh.

²² An maak naapeu kaa miskaach miinuwaachihaakanuut, uste nemitanuu chii tahtupuneshuu.

Taan kaa ishi ayimihaatwaau anichii kaa taapwehtahkwaau

²³ Iskutak maak kaa pachishtinaakanuutwaau Peter ekw maak John, kaau chii nituwaapameuch uwiichewaakanawaau ekw kaa wiihtamuwaatwaau taan kaa itikutwaau aniyuu kaa niikaanapiitwaau ayimiheuchimaauh kaye aniyuu kaa niikaanishkuwaayich iinuuh.

²⁴ Iskutak kaa wiihtamuwaatwaau aniyuuh uwiichewaakanawaau ekw maamuu kaa ayimihaatwaau Chishemanituu. Eukw uyuu kaa ishi ayimihaatwaau, “Maauch kaa ispeyihtaakusiyin Utipeyihchikeu, chii kaa ushihtaayin kihchikiishikw kaye aschii kaye chihchikamii, misiwe maak chekwaayuu taan e ishi ihtakuhkwaauh anit.

²⁵ Kaa payehchisiit Ahchaahkw chii aashuu wiihtamuweu David, chitaapachihaakanh aniyuu chii taan kaa wii itweut, chii itweu maak, Chekwaayuu wehchii chishuwaasitwaau iinuuch ekaa Jewa kaa itiskaanesitwaau. Chekwaayuu wehchi e iteyihtahkwaau awenichii chechii ihtuutahkwaau aniyuuh chekwaayuuh ekaa aapataniyikwaau.

²⁶ Uchimaauch utah aschiihch chii ayeskuwiyuuch che nishkuushtuwaatwaau Chishemanituu kaye aniyuu kaa wiyaapamaayich.

²⁷ Eukun maak taapwe e ispayihch anuhchiish wesh chisheuchimaau Herod, kaye an uchimaau Pontius Pilate, ekw maak anichii Jewa iinuuch, kaye maak anichii ekaa Jewa kaa itiskaanesitwaau nishtuwiyuuch e nishkuushtuwaatwaau Jesus, aniyuu kaa wiyaapamaat kaa payehchisiyich chitaapachihaakanh.

²⁸ Mikw maak uyuu taan kaa ishi ihtuutahkwaau, chiya shaash weskach chichii wiyeyihten che ispayihch, chiya maak chichii ihtuuten chechii tipipayihch.

²⁹ Utipeyihchikeu, kanawaapamach maa, taan e ishi naanituu kushtaachihiyiimihtwaau. Wiichihiinaan niyaan chitaapachihaakanich chechii suuhchikaapuuyaahch e waawiihtamaahch chimiywaachimuwin, chechii suuhchiteheyaahch.

³⁰ Wiichihiinaan maak chechii miinuwaachihiichihtwaau kaa aahkusitwaau, kaye kutak maamishkaach ihtuwin chechii ihtuutamaahch, Jesus an kaa payehchisiit chitaapachihaakan utishinihkaasuwin e aapachihtaawachiht.”

³¹ Iskutak maak kaa chiishi ayimihaatwaau, chii aayaahchipayuu aniyuu anit kaa nishtuwiitwaau. Misiwe maak chii saakaschineshkaakuuch Kaa payehchisiyich Ahchaahkwa, ekw maak kaa suuhcheyimutwaau kaye namui uhchi kushtaachuuch e waawiihtahkwaau Chishemanituu utayimuwiniyuu.

Kaa taapwehtahkwaau taan kaa ishi waawiichihiitutwaau

³² Ekw maak anichii kaa taapweyimaatwaau Jesus, chii peyakw mituneyihtamuch kaye peyakunihch chii ishi wiyeyihtamuch. Taan kaa ishi tipiyeusiit awen chekwaayuu namui uhchi iteyihtam mikw wiya e tipiyeusiit, misiwe aweyuu chii ishi maamuu aapachihtaayuu taan kaa ishi ayaat.

³³ Chii suuhchihtaakusuuch kaye chii mista miyuuhtaakusuuch anichii apastalach e waawiihtahkwaau Utipeyihchikeu Jesus kaau kaa wanishkaayich nipuwinihch uhchi, ekw maak Chishemanituu chii mista shaweyimikuuch misiwe e tashitwaau.

³⁴ Namui maak waachi peyakw anichii kaa taapweyimaatwaau Jesus uhchi manesiyuuch. Aaskuu awen chii ataaweu uwaaskaahiikanim maak utaschii. Chii petaauch maak aniyuu shuuliyaayuu kaa ishpish uhchisiitwaau.

³⁵ Ekw kaa miyaatwaau aniyuuh apastalh aniyuu shuuliyaayuu. Ekw kaa maatinamuwaatwaau aniyuu tahtu aweyuu kaa minesiyich.

³⁶ Ekun kaa ihtit Joseph, an Levi iinuu kaa itiskaanesit, Cyprus ministikuhch chii pimaatisiiche uu naapeu. Anichii maak apastalach Barnabas chii ishinihkaateuch uyuu Joseph. An maak ishinihkaasuwin kaa siihchimaat aweyuu chechii suuhchikaapuyich ishi itweshtamuwaataakanuu.

³⁷ Joseph maak chii ataaweu aschiiyuu e chii tipiyeusiit, kaa petaat misiwe aniyuu shuuliyaayuu, kaa miyaat aniyuu Apastalh.