ᐊᐸᔅᑕᓚᒡ 3 - Chishemanituu Utayimuwin: Kaa Uskaach Testament

Ekaa nihtaauhtet naapeu Kkaa miinuwaachihaakanuut

¹ Peyakwaau Peter ekw maak John chii ituhteuch anite chisheayimiheukamikuhch nishtu e ispayiyich e chiishkwaapihtaachiishikaayich, anit e utihchipayiyich kaa chii ayimihaanuyich.

² Naashch chii misichihtuu an chishtuhkan anit e uhchi piihtukaanuuhch an chisheayimiheukamikw kaa miywaashich ishkwaahtem chii ishinihkaataakanuu, ekut kaa apit naapeu ekaa uhchi nihtaauhtet. Meshikum chiishikaau e chii ituhtahaakanuut anite, chechii nitutamuwaat aweyuu shuuliyaayuu anite ayimiheukamikuhch e ituhteyich.

³ Iskutak maak an naapeu wiyaapamaat aniyuu Peter kaye John che ati piihcheyich aniyuu chisheayimiheukamikuyuu chii nituweyihtamuweu shuuliyaayuu.

⁴ Kuiskw maak chii kanawaapameuch aniyuu naapeu, ekw Peter kaa itaat, “Pechi kanawaapaminaan maa.”

⁵ Ekw kaa kanawaapamikutwaau aniyuu naapeuh, e pukuseyimikutwaau chekwaayuu chechii miyaatwaau.

⁶ Ekw Peter kaa itaat, “Namui mitun nitayaan shuuliyaau chechii miitaan, mikw maak chika wiichihiitin chechii miinuwaatisiyin. Utishinihkaasuwinihch uhchi Jesus Christ Nazareth kaa uhchiit, pisikuuh che pimuhteyin.”

⁷ Ekw Peter kaa utinamuwaat aniyuu unihiiwinitihchiyuu kaa wiichihaat e pisikuyich. Tiiwehch maak an naapeu, usit ekw maak uhkun chii uhchi saapiimikaniyuuh.

⁸ Chii pisikushipihtaau maak, kaa niiput, kaa ati papaamuhtet. Kaa wiichewaat aniyuuh Peter kaye John e piihcheyich anite chisheayimiheukamikuhch, e pimuhtet, e kwaashkwaashkuhtit, e maamihchimaat Chishemanituu.

⁹ Misiwe maak aweyuu anit kaa ihtaayich chii waapamikuu e pimuhtet kaye e maamihchimaat Chishemanituu.

¹⁰ Chii nisituunuweuch maak eukw aniyuu aawiyich naapeu kaa chii apiyich e pikushihtwaayich anite kaa miywaashiyich ishkwaahtem kaa ishinihkaateyich. Misiwe maak chii kushkupayuuch kaye chii miskaateyihtamuch taan kaa ispayiyich.

Taan kaa ishi wiihtahk Peter anite chisheayimiheukamikuhch

¹¹ An maak naapeu ekaa uhchii nihtaauhtet chii maamaahchikuneu aniyuu Peter ekw maak John, ekw misiwe awenichii kaa ispahtaatwaau anite e niipuyich anite Solomon upwaahchim kaa ishinihkaateyich, misiwe naashch chii kushkuwaapamuuch.

¹² Iskutak maak Peter wiyaapamaat aniyuuh iinuuh, chii iteu, “Chiyawaau Israelihch kaa uhchiyekw, chekwaan wehchi naashch kushkuwaapamuyekw uu, kaye chekwaan naashch wehch miskaashinuuyaahch. Chititeyihtenaawaau aa niyaan tipiiwe nimaskuusiiwinaahch maak nitayimihewaatisiiwinaahch wehchii pimuhtet uu naapeu.

¹³ Aniyuuh Chishemanituuh kaa atushkuwaatwaau aniyehkaanaanich, Abraham, Isaac kaye Jacob kaye utaahch kuuhtaawiinuuch chisteyihtaakuheu aniyuu utaapachihaakanh, eukw uyuuh Jesus. Chiyawaau maak chichii ihtuutuwaawaau chechii pachishtinaakanuut anite Rome Chisheuchimaau e ihtaayich. E chii aatuwaahekw uhchishkuu Pilate e ihtaayich, aat iskutak Pilate kaa wii pachishtinaat.

¹⁴ Yaapach chiyawaau chichii aatuweyimaawaau an kaa payehchisiit kaye kaa kuiskutaatisiit kaye e chii itweyekw kaa nipahiiwet naapeu teyakuch chechii pachishtinamaakuyekw.

¹⁵ Kaye chichii ihtuutawaawaau Jesus chechii nipahaakanuut an kaa miyaat aweyuu pimaatisiiwiniyuu. Mikw maak Chishemanituu chii ihtuutaweu miin kaau chechii pimaatisiyich. Wesh nichii waapamanaan miin kaau kaa wanishkaat Jesus. Nichischeyihtenaan maak e taapwemakahch uu.

¹⁶ Aniyuu e suuhcheyihtaakuniyich Jesus utishinihkaasuwin eukw uyuu wehchi miinuwaatisiit uu naapeu. Chichii chischeyimaawaau kaye chichii waapamaawaau taan kaa ishinaakusit. Chichii waapamaawaau maak anit uhchishkuu e ihtaayekw kaa minuwaachihaakanuut aniyuu e taapweyimaat Jesus uhchi.”

¹⁷ “Ekw maak niichishaanitikw, nichischeyihten chiyawaau ekw maak anichii kaa niikaanishkaataakuch ekaa uhchi chischeyihtamekw taan nihaau e ihtiyekw aniyuu kaa ihtuutawekw Jesus.

¹⁸ Chishemanituu chii miyeu aniyuuh uchischiwehiichesuuh chechii niikaan wiihtamiyich che wawiisacheyihtamiyich Christ aniyuuh kaa wiyaapamaat. Chishemanituu maak chii tipipayihtaau uyuu.

¹⁹ Kweskaatisiikw, mihchiiweyihtamukw taan kaa ishi machituutamekw. Naataahkw Chishemanituu chechii wepeyihtamaataakw chimachihtwaawinawaau. Ekw maak Utipeyihchikeu che ihtuutaataakw miin chechii suuhkamahchihuyekw chitahchaahkuwaahch.

²⁰ Kaye kata pechi itishahweu Jesus Christ, aniyuuh shaash kaa wiyaapamaat che itishahamaataakw.

²¹ Ekute maak anite kihchikiishikuhch che ihtaat paatish misiwe chekwaayuu uschihtaakanuyiche aniyuu taan kaa ishi niikaan wiihtahkwaau che ispayiyich aniyehkaanaanich weskach kaa payehchisiitwaau uchischiwehiichesuuch.

²² Wesh aniyaa Moses chii itweu weskach e aayimuumaat Jesus, Chishemanituu, chika aapachiheu aweyuu anite niikaanihch che chischiwehiicheyich, muyaam niya e ishi aapachihiit, e chischiwehiicheyaan. Anit chiyawaau e itiskaanesiyekw, ekut che uhchiyich. Chika nituhtawaawaau kaye chika nanihiihtuwaawaau taan che ititaakw.

²³ An maak awen ekaa che nituhtawaakwe uyuu che uchischiwehiichesuyich, chika iichenaakanuu anit uhchi Chishemanituu utiiniimiyuu e ihtaayich, ekw maak che wanaachihaakanuut. eukw uyuu kaa wiihtahk Peter e chii itweyikupanenh aniyaa Moses.” Ekw kaa ati itwet miin Peter,

²⁴ “Samuel ekw maak anichii kutakach uchischiwehiichesuuch chii niikaan wiihtamuch uyuu anuhchiish kaa chiishikaakwaauh taan ispayiyich.

²⁵ Chitaanische waahkumaawaauch aniyehkaanaanich uchischiwehiichesuuch, aniyuu maak niskumuwiniyuu taan kaa ishi miikutwaau Chishemanituu kaye chiyawaau chitasichisinaasunaawaau anit. Wesh Chishemanituu chii iteu aniyaanaah Abraham, Anite niishtaamihch chitawaashiimach nika uhchi uhtinaau peyakw awen anit uhchi chechii uhchi shaweyimakwaau misiwe awenichii utah aschiihch.

²⁶ Chii wiyaapameu maak Chishemanituu uyuuh utaapachihaakan chiyawaau maauch niishtam chechii itishahamaataakw. Chika shaweyimikuwaau e ihtuutaakuyekw misiwe e tashiyekw chechii nakatamekw chimachaatisiiwinawaauh.”