ᐊᐸᔅᑕᓚᒡ 28 - Chishemanituu Utayimuwin: Kaa Uskaach Testament

Malta kaa ihtaayaahch

¹ Iskutak misiwe kaa kapaayaahch, ekw kaa uhchi chischeyihtamaahch Malta kaa ishinihkaatech ministikw e ihtaayaahch.

² Anichii maak iinuuch anit kaa ihtaatwaau, naashch nichii miyutuutaakunaanich. Chii chihtauhtaaniyuu mwehch, ekw kaa wii tahkaayaahch, kaa kutausiyamihtwaau anit.

³ Paul maak chii maamuushtinam mistikuh kaa machishtawehahk. Kaa uhchi muuschiyich chinepukw anit aniyuu mistikuh e itashteyikwaauh, aniyuu kiipaa e muushihtaayich e chishiteyich, ekw kaa chikamuyich Paul utihchiihch, namui maak uhchi pachishtamikuu aniyuu chinepukw.

⁴ Ekw anichii iinuuch iskutak wiyaapamaatwaau aniyuu chinepukw e chikamuyich anit Paul utihchiyich kaa ititutwaau, “Chii nipahiiweche aahchin uu naapeu, ekw maak aat e chii ushimut anite chihchikamiihch uhchi, yaapach utihtahukuu chechii waweshihaakanuut. Eukw aniyuu wehchi maakumikut aniyuu chinepukw.”

⁵ Ekw Paul mikw chiyaam kaa machishtawepinaat aniyuu chinepukw anit ishkutehch ekaa mitun wiyesh uhchi ihtuutaakut.

⁶ Ekw anichii iinuuch chii naanaakachiheuch chechii paachipayiyich aniyuu Paul maak chechii nipiyich. Namui maak mitun uhchi wiyesh ihtiyuuh. Iskutak maak wiyaapamaatwaau ekaa mitun wiyesh ihtiyich ekw kaa itwetwaau, “Cheshtinaash Chishemanituuwiiche uu naapeu.”

⁷ Namui waahyuu anit aniyuu kaa ihtaatwaau chii ihtakun nihtaauchihchikan aschii. Publius chii ishinihkaasuu an kaa uchimaaut anit aniyuu ministikuyuu. Eukw maak uu kaa tipiyeusiit aniyuu nihtaauchihchikan aschiiyuu. Naashch nichii miyutuutaakunaan uu naapeu. Nishtu chiishikaau nichii ishpish ihtaawaanaan anite e ihtaat.

⁸ Uu maak Publius uhtaawii chii aahkusiyuu, e chishiteunikusiyich kaye e suuhkwaayich e miisiyich. Ekw Paul kaa piihchewat anite unipeukamikuwiihch, kaa saaminaat e ayimiheshtamuwaat, kaa miinuwaachihaat.

⁹ Iskutak maak uyuu kaa ispayiyich, ekw misiwe anichii kaa aahkusitwaau anit ministikuhch kaa ihtaatwaau chii takushinuuch kaye wiyawaau, kaye maak wiyawaau chii miinuwaatisiyuuch.

¹⁰ Mihchetu chekwaayuuh nichii miikunaanich. Iskutak maak miin e puusiwachiht, chii puusihtaauch nanaahkuu chekwaayuu che ishi nituweyihtamuchiht.

Romehch kaa misakaayaahch

¹¹ Nishtu piisim maak ishpish ekw miin kutach chiimaan kaa chihtaashiyaahch Alexandriahch e uhchiimakahch. Chii ihtakun taan kaa ishinihkaatech an chiimaan, “Kaa niishitwaau manituuhkaanich” chii ishinihkaateu. Ekut anit ministikuhch kaa ihtakuniyikupane iskan pipun.

¹² Anite maak Syracuse kaa ishinihkaatech ihtaawin ekute kaa mishikaayaahch. Nishtu chiishikaau nichii ihtaanaan anit.

¹³ Ekw miin anit kaa uhchi puusiyaahch, Rhegium kaa ishinihkaatech ihtaawin ekute kaa misakaayaahch. Miin maak wiyaapahch shaawinihch chii uhchiiweu. Ekw miin ane e ati chiishikaach Puteoli kaa ishinihkaatech ihtaawin eukun an kaa utihtahamaahch.

¹⁴ Ekut uu kaa waapamachihtwaau wiichishaanimaauch. Ekw kaa wiishaamiyamihtwaau peyakw tuushteu chechii ihtaawachiht anit e ihtaatwaau. Ekw miin Rome kaa utihtahamaahch.

¹⁵ Ekw anichii wiichishaanimaauch anite Romehch kaa ihtaatwaau kaa pehtahkwaau e chii misakaawachiht. Pasch waahyuushiish chii uhtuhteuch anite aniyuu Appius kaa ishinihkaatech kaa chii maauchihiitunaanuyich ekw maak pasch anite Kaa Nishtihkwaau Minihkweukamikw kaa ishinihkaateyich ihtaawiniyuu chii uhtuhteuch e wii pechi nachishkuuyimihtwaau. Iskutak maak Paul wiyaapamaat aniyuu, chii nanaaskumeu Chishemanituu, wesh naashch chii uhpinikuu aniyuu e waapamaat.

Paul kaa kacheskwet Romehch

¹⁶ Kaa misakaayaahch anite Romehch, Paul chii pachishtinaakanuu tipaan anite waaskaahiikaniyuu chechii wiichit. Ekw mikw yaapach shimaakanisha chii ihtaayuuh e naanaakachihiikut.

¹⁷ Nishtu chiishikaau maak ishpish ekw kaa wiishaamaat Paul aniyuu Jewa iinuuh kaa niikaanishkuwaayich. Iskutak maak neshtuwiyich chii itweu, “Niichishaanitikw, nichii maakunikuun anite Jerusalemihch ekw anite Rome iinuuch e ihtaatwaau kaa ishi pachishtinikuyaan chechii ishi maamaahchikunikuyaan. Eukw uu kaa ihtuutaakuyaan aat ekaa uhchi machituutuukwaau chitiiniiminuuch kaye ekaa uhchi wanituutamaan aniyuuh ihtuwinh aanische chiwaahkumaakanuuch kaa miitahkwaau.

¹⁸ Chii wii nituu chischeyihtamuch maak anichii Rome iinuuch taan kaa ishi wanihpisuuch. Namui maak chekwaayuu uhchi miskamuch chechii ishi wanihpisuuch. Shaash maak nichii wii pachishtinikuch wesh namui uhchi miskamuch taan kaa ishi wanituutamuch.

¹⁹ Ekw mikw anichii Jewa iinuuch namui uhchi naheyihtamuch, ekw nitawaach kaa itweyaan chechii waapamak maauch niikaan chisheuchimaau Caesar kaa ishinihkaataakanuut, wiya chechii uhchishkuukaapuushtawak. Namayeu kiipaa wii e chii iteyihtamaan wiyesh chechii ishi mamishimakwaau nitiiniimach.

²⁰ Eukw uu wehchii wiishaamitakuch. Chichii wii wiihtamaatinaawaau chekwaan wehchi maakunikuyaan, eukw uu e atushkuuk Christ aniyuu Israel iinuuch kaa aspeyimutuwaatwaau.”

²¹ Ekw kaa itikut, “Namui kiipaa wii niyaan nuuhchi miskenaan chechii masinahamaakuyaahch anite Judea uhchi, chechii aayimuumikuyin anit. Kaye anichii chiichishaanuuch anite kaa uhtuhtetwaau namui wiyesh kuuhchi itaachimikuch maak chechii maayaachimiskwaau.

²² Mikw maak chiwii chischeyimitinaan taan e iteyihtamihiikuyin chiiya, wesh mihchetu awenichii mishihte uu aschii namui miyusinahamuch uyuu kaa ishi taapwehtamuwekw.”

²³ Ekw anichii Jewa iinuuch kaa wiishtuwaatwaau aniyuu Paul anit e chiishikaayich chechii nishtuwiitwaau chechii nituhtawaatwaau taan che itweyich. Wetihchipayiyich maak aniyuu e chiishikaayich anit kaa niskumutwaau chechii nishtuwiitwaau mihchetu awenichii chii takushinuuch anit Paul e ihtaayich. E chechishepaayaayich piihiim e ati tipiskaayich, Paul chii waawiihtamuweu aniyuu Jewa iinuuh taan e iteyihtaakuniyich Chishemanituu uchisheuchimaawiniyuu. Kaye chii kacheschimeu e wii siihchimaat chechii taapwehtamiyich Jesus e aawiyich Christ an kaa aayimuumaakanuut anite Moses uwiishuwewinihch kaye aniyehkaanaan uchischiwehiichesuuh umasinahiikaniihch.

²⁴ Pasch maak chii taapwehtaakuu, kutak namui uhchi taapwehtamiyuu.

²⁵ Chii machipayihkahtaatuyuu chek uyuu ekaa kaa taapwehtamiitwaau, ekw kaa ati chistuhteyich iskutak uyuu kaa itwet Paul, “Taapwe muyaam chii ishi wiihtamukupane Kaa payehchisiit Ahchaahkw taan kaa itaat chitiiniimuwaau aniyuuh uchischiwehiichesuu Isaiah e chii aapachihaat chechii ishi wiihtamuwaayich,

²⁶ itweu Chishemanituu, ‘Iishich anichii iinuuch, muush chika pehtenaawaau mikw namui chika uhchi nisituhtenaawaau kaye aat aitaapiyekwe namui chika uhchi nisituunenaawaau.

²⁷ Wesin uchii iinuuch naashch taapwe siipihtamuch, namui wii taapwehtamuch, muyaam e chipunahkwaau uhtaukaawaauh kaye uschiishikuwaau ekun e ishinaakusitwaau. Ekaa maak uyuu ihtitwaau chipaa waapahtamuch kaye chipaa pehtamuch kaye chipaa nisituhtamuch aniyuu taan e ishi nituweyimakwaau. Nipaa pechi nituwaapamikuch maak ekw maak nipaa pimaachihaauch.’ ”

²⁸ Ekw Paul kaa itwet, “Che wii chischeyihtamekw maak Chishemanituu e itishahukuyaahch chechii waawiihtamaahch chechii pimaachihaakanuutwaau kaye anichii ekaa Jewa kaa itiskaanesitwaau awenichii. Chika nituhtamuch maak uchii wii.”

²⁹ Iskutak maak Paul kaa itwet uyuu, chii wiiwiyuuch anichii Jewa iinuuch e machipayihkahtaatutwaau.

³⁰ Niishu pipun maak chii ihtaau Paul anit aniyuu waaskaahiikaniyuu. Wiya chii pimipayihiisuu shuuliyaayuu. Chii miyeyihtam e chiiutamaakanuut.

³¹ Chii aayimuutamuweu maak Chishemanituu uchisheuchimaawiniyuu, kaye chii chiskutamaacheu Utipeyihchikeu Jesus Christ e aayimuumaat. Chii suuhchiteheu maak mitun kaye namui uhchi chistahamuwaakanuu uyuu e ihtit.