ᐊᐸᔅᑕᓚᒡ 27 - Chishemanituu Utayimuwin: Kaa Uskaach Testament

Paul chii isichimeu anite Romehch

¹ Iskutak maak kaa wiyeyihtaakanuuhch Italy che isichimeyaahch, peyakw shimaakanishuuchimaau Julius e ishinihkaasut chii itashumaakanuu chechii naanaakachihaat aniyuu Paul ekw maak aniyuu kutak aweyuu kaa maakunaakanuyich. Uu maak Julius mitaahtumitanuu chii tashiyuuh shimaakanisha e niikaanishkuwaat Rome e ishi masinaasuyich.

² Ekw kaa puusiyaahch chiimaan anite Adramyttium e uhchipayihch. Shaash chii ayeskuuhtaakanuu anite Asia aschiihch chechii ispayihch ekute maak kaa ishi chihtaashiyaahch. Aristarchus maak e ishinihkaasut naapeu anite Macedonia aschiihch aniyuu ihtaawiniyuu Thessalonica kaa ishinihkaateyich e chii uhchiit eukw uu kaye kaa wiich puusiimikuyaahch.

³ An maak wiyaapahch Sidonihch nichii mishakaanaan. Chii miyutuutaweu maak aniyuu Paul an shimaakanishuuchimaau Julius. Chii pachishtineu chechii nituwaapamaayich uwiichewaakaniyuu, kaye chechii miyaakanuyich taan e ishi nituweyihtamiyich chekwaayuu.

⁴ Anit maak Sidonihch ekut miin kaa uhchi puusiyaahch. Ekw maak an e chii nakaayaasiyaahch ekw anite e tipinawaach an ministikw Cyprus kaa ishinihkaatech ekute kaa itaashtimitisuyaahch.

⁵ Ekw anite kaa ishi aashuuhamaahch an chihchikamii chishtauch aniyuuh aschii Cilicia ekw maak Pamphylia kaa ishinihkaatekwaauh, ekw an Myra kaa ishinihkaatech ihtaawin anite Lycia aschiihch kaa ihtakuhch ekut kaa mishakaayaahch.

⁶ Utah maak uyuu ihtaawiniyuu ekut kaa miskahk an shimaakanishuuchimaau chiimaaniyuu anite Alexandria e uhchiimakaniyich, anite Italy e ispayiyich, ekut maak an kaa puusihiikuyaahch.

⁷ Mihchetu chiishikaau maak pehkaach mikw nichii pimaashtimitisunaan, nichii aayimihunaan e wii mishakaayaahch anite an Cnidus kaa ishinihkaatech ihtaawin, ekute nihaau kaa uhtihch. Ekw maak an anite e uhtihch, aahchiiuh kaa itaashtimitisuyaahch. Anite e tipinawaach an ministikw Crete kaa ishinihkaatech ekute kaa itaashiyaahch, kaa ati yaaihimaahch an kaa machishtaweyaapiskaach Salmone kaa ishinihkaatech.

⁸ Yaapach nichii aayimihunaan aat mikw e yaayewehamaahch. Wanaaus yaapach nichii mishakaanaan anite an e miywaach e akuhtataakanuuhkwaau chiimaan kaa ishinihkaatech, namui waahyuu anit an utenaau Lasea kaa ishinihkaatech.

⁹ Mihchetu chiishikaau nichii ihtaanaan anit kaa ishpish chii machichiishikaach. Chek kaa utihchipayihch anit e kushtaatikuhch chechii puusinaanuuhch, shaash e takwaatihch. Ekw Paul kaa yaakwaamimaat aniyuu anit chiimaanihch kaa ihtaayich. Chii itweu,

¹⁰ “Niwaapahten taan che ishi kushtaatikuhch miin chechii puusiihkw. Chika chii wanihtaanaanuu chekwaayuuh kaye uu chiimaan. Mechim kaye chika chii wanaatisiinaanuu.”

¹¹ Ekw mikw an shimaakanishuuchimaau uste aniyuu chiimaan uchimaau ekw maak aniyuu kaa tipiyeusiyich aniyuu chiimaaniyuu chii nituhtaweu taan e itweyich, ekw namui uhchi yaapatihtuweu taan kaa itweyich Paul.

¹² Kaye maak anit aniyuu e akuhtaniyich chiimaaniyuu kaa ihtaatwaau, namui naashch uhchi miywaayuu e pipuniyich wii chechii akuhtaniyich chiimaaniyuu. Ekw maak eyuu chekaat misiwe anichii naapeuch chiwii puusuuch, anite e wii isichimetwaau Phoenix kaa ishinihkaateyich ihtaawiniyuu. Anite ministikw Crete kaa ishinihkaatech ekut kaa ihtakuhch uu ihtaawin. Chii miywaau anit e chiskashtaakanuuhkwaau chiimaanh e pipuhch. Uu maak ihtaawin iituu anite ishi shaawinuutaahch ekw maak chiiwetinihch chii ishi nuukun. Chii iteyihtamuch maak chechii utihtahahkwaau aniyuu ihtaawiniyuu Phoenix kaa ishinihkaateyich anit chechii pipunihtaatwaau.

Kaa mistayuutihch chihchikamiihch

¹³ Iskutak maak chehchiiwesich, anite shaawinihch e uhchiiwech, ekw kaa iteyihtahkwaau anichii naapeuch miin chechii chihtaashitwaau. Ekw kaa uchipitahkwaau aniyuu punasinaapaachikaniyaapiyuu ekw kaa ati yaaihahkwaau aniyuu ministikuyuu Crete kaa ishinihkaateyich.

¹⁴ Chek maak chii mista iipaachiiweu.

¹⁵ Nihaau maak nichii taauhukunaan uu e mistayuutihch ekw namui uhchi miyupayuu chechii nayimihiikanuuhch. Ekw nitawaach kaa puunihtaayaahch e wii nayimihamaahch, mikw kaa naamuunaasiyaahch.

¹⁶ Iskutak maak shaawinihch an ministikw Cauda kaa ishinihkaatech e ati ihtaayaahch ekut kaa tipinawaach. Ekw mikw kaa aayimihiikuyaahch e wii puustaayaahch an ut yaai anite an kaa mishaach chiimaan kaa chii akwaapihkaatech.

¹⁷ Iskutak maak kaa puustaatwaau aniyuu utiyuu anite chiimaanihch ekw anichii naapeuch misiwe anite kaa maahchikwaapihkaatahkwaau shiipaa aniyuu chiimaaniyuu ekaa chechii piikwaahaniyich. Iskutak maak miin e ati wiihamaahch chii kushpaneyihtamuch chechii taahchistiniyich aniyuu uchiimaanuwaau yaayeu anite aniyuu aschiiyuu Libya kaa ishinihkaateyich kaa pechi piisipaahkwaayich. Ekw kaa aasipitahkwaau aniyuu upimaashuwinawaau mikw chechii ati naamuunaasitwaau.

¹⁸ Miin maak wiyaapaniyich ekw kaa aamutewepinihkwaau aniyuuh chekwaayuuh kaa puustaatwaau kaa ishpish wesaa chii mistayuutiniyich.

¹⁹ Miin maak wiyaapaniyich ekw nitawaach misiwe chekwaayuuh e itaapataniyikwaau anit chiimaanihch kaa paahpakashtuwepinahkwaau.

²⁰ Chek mihchetu chiishikaau namui nuuhchi waapamaanaan piisim kaye achahkushach, pisikw e machichiishikaach kaye e mistayuutihch. Chek misiwe e tashiyaahch mitun tekash shaash nichii iteyihtenaan che wanaachihuyaahch.

²¹ Chek chineush namui uhchi miichisuuch anichii naapeuch. Ekw Paul kaa ayimihaat. Chii itweu maak, naapeutikw, “Ekush maak chii nituhtuuyekw kaa yaakwaamitakuch, ekush anite Crete chii ihtaawaauhkupane, ekw maak namui chipaa uhchi ishpish wanihtinh chekwaayuuh kaye namui chipaa uhchi piikwaahan uu chichiimaanuu.

²² Anuhchiish maak yaapach chiwii siihchimitinaawaau chechii suuhchiteheyekw, wesh mitun nichischeyihten ekaa waachipeyakw che wanaatisiihkw. Mikw uu chiimaan chika wanaatan.

²³ Wesh an Chishemanituu kaa tipeyimit an kaa nuuchiishtuuk, utenchilam nichii pechi nituwaapamikuyuu tepiskaayich.

²⁴ Ekw kaa iishit an enchil, ‘Paul, ekaawii kushtaach, wesh chika uhchishkuukaapuushtawaau Caesar anite Romehch kaa ihtaat chechii wiyaaskunisk. Ihtakuniyuu kaye taan e ishi miyutuutamaask Chishemanituu, misiwe chika pimaatisiyuuch anichii kaa wiicheutwaau.’ ”

²⁵ Ekw maak Paul kaa ati itaat aniyuu naapeu, “Suuhchitehekw maak, wesh mitun nitaapweyimaau Chishemanituu taapwe misiwe che ispayiyich taan kaa itikuuch che ispayiyich.

²⁶ Ekw mikw yaayeu anite ministikuhch chika ishi akwaayaahukunaanuu.”

²⁷ Iskutak maak niishu tuushteu kaa ishpish yuutihch, an maak tepiskaach, eshkw mikw nipapaamaastimikunaan an e mistayuutihch anite an chihchikamii Adria kaa ishinihkaatech. Wiyesh maak yaapihtaatipiskaayich anichii naapeuch anit chiimaanihch kaa aapatisitwaau chii muushihtaauch e peshuwaapahtamuwachiht aschiiyuu.

²⁸ Ekw kaa nituu chischeyihtahkwaau taan e ispihtaatimiyich anit. Apisiyuu chii aapachihtaauch aniyuu e ishi nituu chischeyihtahkwaau. E kusikuniyich chekwaayuu chii maahkupitamuch anite e waniskwaapekaniyich aniyuu apisiyuu, ekw kaa pakashtawehahkwaau. Chekwaayuu uu peyakwaau mitaahtumitanuu miin niishtunuu misit kaa ispihtaatimiyich. Weipishchiish maak, ekw miin kaa nituu chischeyihtahkwaau. Peyakushtemitanuu misit ekw chii ishpish chiishkaayiwaayuu.

²⁹ Aniyuu maak e kushpaneyihtahkwaau chechii pistaapischihtiniyich aniyuu chiimaaniyuu, neu aniyuuh punasinaapaachikanh chii pakashtawehamuch, chechii mamechimaahuteyich aniyuu chiimaaniyuu. Ekw kaa ayimihaatwaau wiipach chechii waapaniyich.

³⁰ Pasch maak anichii naapeuch anit chiimaanihch kaa aapatisitwaau chiimuut chiwii kapaauch aniyuu chiimaaniyuu. Ekw kaa paskaapihchesahkwaau aniyuu kaa apishaashiyich utiyuu anit chiimaanihch kaa ihtakuniyich. Muyaam maak mikw e wii pakashtawehahkwaau punasinaapaachikaniyuu anite niishtamuhtakuhch aniyuu chiimaaniyuu, ekun kaa ihtitwaau.

³¹ Ekw Paul kaa itaat aniyuu shimaakanishuuchimaau ekw maak aniyuu shimaakanisha, “Namui waachi peyakw chika uhchi pimaatisiinaawaau nakatamekwe uu chiimaan.”

³² Ekw maak anichii shimaakanishach nitawaach kaa paschisahkwaau aniyuuh apisa kaa uhchi maakupateyich aniyuu utiyuu, ekw kaa pachishtinahkwaau.

³³ Shaash maak chekaat chii waapaniyuu. Ekw Paul kaa siihchimaat misiwe e tashiyich chechii miichisuyich, e itaat, “Shaash neushaap chiishikaau kaa ishpish ashuwaapahtamekw taan che iinikwe kaye kaa ishpish ekaa uhchi miichisuyekw.

³⁴ Chinituweyimitinaawaau maak ekw chechii miichisuyekw. Chinituweyihtaakusinaawaau chechii miichisuyekw chechii pimaatisiyekw. Taapaa waachipeyakw e tashiyekw chekwaan chika uhchi ispayinaawaau, namui waawaach peyakw ustikwaaniyaapii chika uhchi wanihtaau awen.”

³⁵ Iskutak maak kaa itwet uyuu Paul, ekw kaa utinaat palet, kaa nanaaskumaat Chishemanituu uhchishkuu misiwe aniyuu naapeuh e ihtaayich, kaa pahkwenaat aniyuu palet, ekw kaa muwaat.

³⁶ Ekw misiwe kaa ati suuhchistehetwaau anichii naapeuch kaye maak misiwe kaye wiyawaau chii ati miichisuuch.

³⁷ Maamuu maak niishwaa mitaahtumitanuu miin niishwaashumitanuu nikutwaashch nichii tashinaan anit chiimaanihch.

³⁸ Iskutak maak misiwe awen kaa tepimiichisut, ekw kaa pakashtawepinaakanuutwaau pahkweshikanich, etituu chechii yaahkahch an chiimaan.

Kaa piikwaahahch nituutinaan

³⁹ Iskutak maak wiyaapahch, anichii kaa aapatisitwaau anit chiimaanihch namui uhchi nisituunamuch taanit e ihtaayaahch. Ekw kaa waapahtahkwaau anit e pechi waasihaayich e yekaaushiyich, ekw kaa iteyihtahkwaau anit chechii ishi naatakahahkwaau.

⁴⁰ Ekw kiipaa kaa paschisahkwaau aniyuu punasinaapaachikaniyuu kaye kaa aapihkunahkwaau aniyuu kaa maahkupitahkwaau anit e uhchi miinuhiikanuyich aniyuu chiimaaniyuu. Ekw kaa uhpaaskuhahkwaau pimaashuwiniyuu anite niishtamuhtakuhch yaayeu chechii itaahukutwaau.

⁴¹ Ekw mikw an chiimaan anite niishtamuhtakuhch kaa sischikuhtihch e miitaakwe paakwaach ekw kaa chikamuhtihch anit, ekw kaa ati piikwaahahch anite utaahch wesaa e chii maamisichishtitwaau kiskanach.

⁴² Ekw anichii shimaakanishach misiwe kaa wii nipahaatwaau aniyuu naapeu kaa kanuweyimaatwaau kaa maakunaakanuyich, ekaa kiipaa nituweyimaatwaau chechii ushimuyich, wesh chipaa chii pakashtawekwaashkuhtiyuh anite nipiihch, ekw maak anite chechii ishi naatakahamiyich.

⁴³ An maak shimaakanishuuchimaau chii wii pimaachiheu Paul ekw kaa chistahamuwaat aniyuu shimaakanisha kaa wii nipahaayich aniyuu naapeu. Ekw kaa itashuwet aniyuu kaa nihtaauhamiyich niishtam chechii pakashtawekwaashkuhtiyich chechii naatakahamiyich.

⁴⁴ Kaye anichii kutakach ekun chipaa ihtuuch kaye wiyawaau e mamechimiitwaau napakaahtikw maak kutachiyuu chekwaayuu anit uhchi chiimaanihch e chii piikwaahaniyich. Ekw maak misiwe kaa tashiyaahch kaa miyupayaahch chechii kapaayaahch aschii chechii taahchishkamaahch.