ᐊᐸᔅᑕᓚᒡ 26 - Chishemanituu Utayimuwin: Kaa Uskaach Testament

Paul kaa ayimishtamaasut uhchishkuu Chisheuchimaau Agrippa e ihtaayich

¹ Ekw chisheuchimaau Agrippa kaa itaat aniyuu Paul, “Ekw pechishtinikuyin chechii ayimishtamaasuyin.” Ekw Paul kaa suwanischeyit iskutak che ayimishtamaasut.

² Kaa itaat aniyuu chisheuchimaau Agrippa, “Chisheuchimaau Agrippa, nishaweyihtaakusin nititeyihten e nihiipayihch utah e ihtaayin chechii ayimishtamaasuyaan misiwe uyuu kaa itwetwaau uchii Jewa iinuuch e chii ihtuuch.

³ An naashch e miyu chischeyihtaman Jewa ihtuwinh kaye aniyuu chekwaayuuh wehchi machipayitwaau maan Jewa iinuuch ekun wehchi naashch miyeyihtamaan utah e ihtaayin chechii ayimishtamaasuyaan. Chipukuseyimitin maak yaakwaau chechii nituhtawiyin kaye che wii siipiiwesiistawiyin taan che ishi ayimiyaan.”

⁴ “Misiwe uchii Jewa iinuuch chischeyihtamuch taan kaa ishi pechi pimaatisiyuuch anite tipiiwe kaa uhchiyaan iskunaak kaa pechi awaashiiuyaan kaye maak chischeyihtaakun taan kaa itaatisiyaan anite jerusalemihch kaa ihtaayaan.

⁵ Muush chii pechi chischeyihtamuch uchii Jewa iinuuch, Pharisee e aawiyaan kaye naashch suuhk e chii iteyihtamuch Pharisee e ihtaauch. Chipaa chii wiihtamuch kaye wii wiihtahkwaau uyuu. Anichii maak Phariseech eukunich anichii maauch yaakwaau e ishi naanaakachihtaatwaau uyuu Jewa wiishuwewiniyuu.

⁶ Anuhchiish maak uu kaa niipuuyaan utah, niwiyaaskunikuun mikw an e ashuwaapahtamaan kaye e taapwehtamaan taapwe che ispayiyich aniyuu taan kaa itaakupane Chishemanituu aniyehkaanaan weskach niwaahkuumaakanaan cheshtinaash che ihtuutamuwaakupane.

⁷ Misiwe maak kaye wiyawaau anichii Jewa iinuuch aniyuuh kaa niishushaapuyich Jacob ukusiyuu e ihtaayich kaa uhchiitwaau eukw uyuu e ashuwaapahtahkwaau. Eukw uyuu e ishi pukuseyimutwaau e ayimihaatwaau Chishemanituu e chiishikaayich kaye e tipiskaayich. Chisheuchimaau Agrippa, eukw maak uyuu e ishi taapwehtamuch wehchi wii wiyaaskunitwaau uchii Jewa iinuuch.

⁸ Ekw kaa itaat Paul aniyuu Jewa iinuuh, chiyawaau iinuuch Jewa kaa itiskaanesiyekw, chekwaan wehchi ekaa chii taapwehtamekw Chishemanituu e wanishkaanaat aweyuu nipuwinihch uhchi.”

⁹ “Anite utaahch kaye niya kwaast nichii iteyihtamihiikuun chechii wanaachihtaayaan an miywaachimuwin Jesus Nazareth kaa uhchiit kaa aayimuumaakanuut.

¹⁰ Eukuu kaa ihtiyaan anite Jerusalemihch. Anichii kaa niikaanapitwaau ayimiheuchimaauch nichii miikuch chechii maakunamach aniyuu aweyuuh kaa taapwehtamiitwaauh kaye chechii chipahwaakanuyich. Iskutak maak e itashuwaataakanuutwaau anichii kaa taapwehtahkwaau chechii nipahaakanuutwaau ekun kaa ishi niskumuyaan kaye niya.

¹¹ Mihchetwaau kaye niya nichii ihtuutawaauch chechii waweshihaakanuutwaau anite Jewa ayimiheukamikuhch, kaye nichii wii ihtuutuwaauch chechii paashtaamaatwaau Jesus. Naashch taapwe muush nichii chishuwaahiikuuch, waawaach anite maaniteu ihtaawinihch nichii ituhtewaan e nituu nanehkaachihiikwaau.”

Paul kaa wiihtahk taanite kaa uhchi taapwehtahk

¹² “Peyakwaau maak mekwaach miin uu e itaapatisiyaan, anite Damascus nichii itishahukuch anichii kaa niikaanapitwaau ayimiheuchimaauch.

¹³ Mekwaach meskanaahch e ihtaayaahch, wiyesh e aapihtaachiishikaach, nichii waapahten waashtewin kihchikiishikuhch uhchi waaskaa anit e ihtaayaan kaye waaskaa anichii naapeuch kaa wiicheukwaau e ihtaatwaau. Uste chii chiihkaayaashteu aat e ishpish chiihkaayaashtuwet piisim.

¹⁴ Misiwe maak nichii pahchishinaan, ekw kaa pehtawak awen Hebrew e ishi ayimit e pechi iishit, ‘Saul, Saul chekwaan wehchi nanehkaachihiyin. Chiya niyaanitam chitaahkuhiisun aat niya e wii pechi aahkuhiyin.’

¹⁵ Ekw kaa itweyaan, ‘Awen chiya, Utipeyihchikeu.’ Ekw kaa pechi iishit Utipeyihchikeu, ‘Eukw niya Jesus an awen kaa nanehkaachihiit.

¹⁶ Pisikuuh maak. Uu wechi nuukushiishtaatan chinituweyimitin chechii aapatisiishtamuyin. Chinituweyimitin chechii wiihtamuutwaau kutakach awenichii taan kaa ishi waapahtiitaan anuhchiish kaye taan che ishi waapahtiitaan anite niishtamihch.

¹⁷ Niya chika kanuweyimitin ihtaayine anite che itishahutaan Jewa iinuuch e ihtaatwaau kaye anite anichii ekaa Jewa kaa itiskaanesitwaau.

¹⁸ Chititishahutin anite e ihtaatwaau chechii nisituhtamihiitwaau taan e ishinaakuniyikwaauh upimaatisiiwinawaauh. Chischeyihtahkwaawenich maak ekw che nakatahkwaau wanitipiskusiiwiniyuu ekw waashtewiniyuu che naatahkwaau. Kaye maak che nakatamuwaatwaau machimanituu usuuhkaatisiiwiniyuu teyakuch Chishemanituuh usuuhkaatisiiwiniyuu chechii naatamuwaatwaau. Ekw maak taapweyimitwaawenich che wepeyihtamuwaakanuutwaau umachihtwaawinawaauh. Ekw maak che masinaasutwaau kaye wiyawaau anite mesinaasuyich Chishemanituu utiimiih aniyuuh kaa wiyaapamaat.’ ”

Paul kaa ati ayimutahk miywaachimuwin

¹⁹ “Ekw maak Chisheuchimaau Agrippa, nichii nanihiihten uu kaa itashumikuyaan kihchikiishikuhch uhchi.

²⁰ Anite maak Damascus niishtam, ekw maak anite Jerusalemihch, ekw miin misiwe anite ihtaawinh Judea aschiihch kaa ihtakuhkwaauh kaye maak anite anichii ekaa Jewa kaa itiskaanesitwaau e ihtaatwaau nichii papaakacheskwen e itakwaau awenichii chechii kweskaatisiitwaau kaye chechii taapweyimaatwaau Chishemanituu, kaye maak chechii ihtuutahkwaau chekwaayuu anit chechii uhchi nuukuniyich taapwe e kweskaatisiitwaau.

²¹ Eukw maak uyuu mekwaach kaa ihtuuch anichii Jewa iinuuch kaa pechi maakunitwaau mekwaach anite chisheayimiheukamikuhch e ihtaauch, ekw kaa wii pechi nipahiitwaau.

²² Mikw maak Chishemanituu muush nichii pechi wiichihiikw, eukw wechi niipuuyaan utah anuhchiish e waawiihtamuukwaau misiwe awenichii e taapweyaan misiwe taan e ishi waawiihtamaan. An maak e ishi waawiihtamaan ekun mwehch kaa ishi waawiihtamuwaakupanenich kaye wiyawaau aniyehkaanaanich uchischiwehiichesuuch kaye Moses.

²³ Uu kaa ishi aayimuutekupane eukw uu Christ kaa ishinihkaataakanuut cheshtinaash che nanehkaachihaakanuut, kaye wiya niishtam che wanishkaat nipuwinihch uhchi, chechii aayimuutamuwaat Jewa iinuuh kaye aniyuu ekaa Jewa kaa itiskaanesiyich waashtewinihch e ihtakuhch pimaachihiikusiiwin.”

²⁴ Mekwaach maak uyuu e ishi ayimit Paul, Festus chii aasihkwaatikuu e itikut, “Paul, chichiishkwen. An kaa ishpish mista chiskutamaakuyin chichiishkwehiikuun.”

²⁵ Ekw Paul kaa nishkweushihaat e itaat, “Namui nichiishkwen, Festus maauch kaa chisteyihtaakusiyin. Nitaapwen an kaa ishi wiihtamaan kaye maak kachehtaaweyihtamuwinihch uhchipayuu.

²⁶ Chisheuchimaau Agrippa, chika chii aayimuutamaatin uyuu chekwaayuu ekaa kushtaachiyaan wesh chichischeyihten shaash taan kaa ispayit Jesus. Namui chiimuut uhchi ispayuuh uyuuh chekwaayuuh, misiwe awen chischeyihtam taan kaa ispayit Jesus.

²⁷ Chisheuchimaau Agrippa, chitaapwehtamuwaan aa taan kaa ishi aayimuutahkwaau aniyehkaanaanich uchischiwehiichesuuch. Chichischeyimitin e taapwehtamut.”

²⁸ Ekw Agrippa kaa itaat aniyuu Paul, “Uu ishpish weipishchiish chititeyihten aa shaash chechii shaakuuchimiin chechii kweskaatisiyaan.”

²⁹ Ekw Paul kaa itaat, “Weipishchiish maak chineush che tashiihkaasuumaakanikwe, nipukuseyimaau Chishemanituu chechii ishinaakuhiitaakw kaye chiyawaau ekw maak anichii kutakach kaa nituhtahkwaau mwehch niya kaa ishinaakusiyaan chechii ishinaakusiyekw, shaash e chii kweskaatisiyaan. Namui kiipaa wii chechii mechimaapiskahukuyekw piywaapiskuyaapii mwehch niya e ishinaakusiyaan anuhchiish.”

³⁰ Ekw an chisheuchimaau, kaye an mista chisheuchimaau, Bernice maak, ekw maak aniyuu kaa wiitapamikutwaau chii pisikuuch.

³¹ Iskutak kaa wiiwiitwaau ekw kaa ititutwaau, “Namui chekwaayuu uhchi ihtuutam uu naapeu chechii uhchi maakunaakanuut maak chechii uhchi nipahaakanuut.”

³² Ekw Agrippa kaa itaat aniyuu Festus, “Mitun chipaa chii pachishtinaakanuu uu naapeu Paul ekaa uhchi itwekupane chechii itishahwaakanuut anite Caesar e ihtaayich chechii wiyaaskunaakanuut.”