ᐊᐸᔅᑕᓚᒡ 25 - Chishemanituu Utayimuwin: Kaa Uskaach Testament

Paul kaa uhchishkuukaapuushtawaat Caesar

¹ Nishtu chiishikaau maak kaa ishpish chii takushihk Porcius Festus anite aniyuu aschiiyuu, chii nakatam Caesarea ekw anite Jerusalemihch kaa ituhtet.

² Ekut maak anit Jerusalemihch kaa pechi uhchishkuukaapuushtaakut aniyuuh kaa niikaanapiitwaau ayimiheuchimaauh ekw maak aniyuuh aweyuuh kaa niikaanishkuwaayich Jewa iinuuh e pechi mamishimaatwaau Paul.

³ Chii siihchimeuch Festus chechii niskumuyich chechii pechi ituhtahaakanuyich Paul anit Jerusalemihch. Wesh chiimuut chii wiyeyihtamuwaakupanenich chechii askamuwaatwaau Paul e wii nipahaatwaau anite Jerusalemihch pechi ituhtahaakanuyichen.

⁴ Ekw Festus kaa itaat, “Eshkw mekwaach chipahwaakanuu Paul anite Caesareahch. Shaash maak wiipach nika ituhten nete.

⁵ E ihtaawaakwenich maak anichii kaa niikaanishkaataakuch e ihtakuniyich taan waa ishi wiyaaskunaatwaau aniyuuh Paul nipaa pechi wiicheukuch anite Caesareahch e ituhteuch. Ekw maak taapwe kaa wanituutamiikwen, ekute nete ihtaayaahche nipaa wiihtamaakuch taan kaa ishi wanituutamiyich.”

⁶ Wiyesh maak yaanaaneu maak mitaahtu chiishikaau chii ishpish ihtaau miin Festus anit jerusalemihch. Ekw kaa ituhtet anite Caesareahch. Wiyaapaniyich maak, chii ati waweyapuu anite wiyaaskunicheukamikuhch iskutak misiwe kaa nishtawiyich aniyuu kaa wii wiyaaskunaayich Paul. Ekw kaa itashuwet Paul chechii pechi piihtakahaakanuyich.

⁷ Iskutak maak kaa piihtakahaakanuyich Paul, anichii Jewa iinuuch Jerusalemihch kaa uhtuhtetwaau chii ati waaskaakaapuushtaweuch. Ekw nanaahkuu chekwaayuu kaa ishi mamishimaatwaau. Namui mikw uhchii ihtuuch taapwe chechii cheshtinaateyihtaakutaatwaau aniyuu kaa ishi mamishimaatwaau.

⁸ Chek maak Paul kaa ayimishtamaasut. Chii itweu, “Namui nuuhchi wanituuten Jewa wiishuwewin. Namui kaye nuuhchi ihtin chechii maayeyihtamaan Jewa chisheayimiheukamikw maak chechii wanituutawak Rome chisheuchimaau.”

⁹ Ekw Festus kaa itaat aniyuu Paul, “Chipaa miyeyihten aa kaau nete Jerusalemihch chechii ituhtahiikuyin. Ekute nete yaakwaau chipaa chii nituu chischeyimitin uu taan e ishi mamishimikuyin.” Uyuu maak kaa itwet an chisheuchimaau mikw e wii nanihiiwehaat aniyuu Jewa iinuuh ekun wehchii itwet aniyuu.

¹⁰ Ekw Paul kaa itwet, “Utah uu kaa niipuuyaan Caesar uwiyaaskunicheukamikuhch ekut utah nipaa wiyaaskunikuun waa wiyaaskunikuwaane. Taapaa ihtakuniyuu taan kaa ishi waanituutuukwaau uchii Jewa iinuuch. Chiya naanitam chimiyuchischeyihtenaache uu.

¹¹ Taapwe maak e ihtakunikwe e chii wanituutamaan e iteyihtaakunikwe maak chechii nipahiikuyaan an uhchi, kiipaa pechishtinisuyaan chechii nipahiikuyaan. Mikw maak chiishpin ekaa tiyaapwewaakwenich uyuu taan e ishi mamishimitwaau uchii Jewa iinuuch namui iteyihtaakun wiyawaau e ihtaatwaau chechii ishi pachishtinikuuch. Caesar e ihtaat ekute e nituweyihtamaan chechii wiyaaskunikuyaan.”

¹² Festus maak, pitamaa chii ayimiheu aniyuu kaa wiitapimikut e chisheuchimaaut. Ekw kaa itaat aniyuu Paul, “Chichii nitaweyihten nete chihchiwe Chisheuchimaau e ihtaat chechii wiyaaskunikuyin. Ekute maak che itishahutaahch.”

Festus kaaaayimuutamuwaat Chisheuchimaau Agrippa aniyuu Paul

¹³ Paatimaa maak miin kutak chisheuchimaau Agrippa e ishinihkaasut ekw maak usiimh Bernice e ishinihkaasuyich chii pechi takushinuuch anite Caesareahch. Chii wii pechi nituu waachiyemeuch aniyuu chisheuchimaau Festus.

¹⁴ Chineushiish maak chipaa ihtaauch anit. Ekw Festus kaa aayimuutamuwaat chisheuchimaauh Agrippa taan kaa wii ihtuutawaakanuyich Paul. Chii itweu maak, “Eshkw aahchin ekut e ihtaat peyakw naapeu e chii chipahwaakanuut mekwaach Felix kaa chisheuchimaawiyich.

¹⁵ Iskutak maak kaa ituhteyaan Jerusalemihch anichii kaa niikaanapitwaau ayimiheuchimaauch ekw maak anichii Jewa iinuuh kaa niikaanishkuwaatwaau chii ihtakuniyuu nanaahkuu e ishi pechi mamishimaatwaau aniyuu Paul. Suuhk maak chii wii waauhtinamuch taanit chechii uhchi itashuwaatamach chechii waaweshihaakanuyich.

¹⁶ Ekw kaa itakwaau, namui ihtuuch Rome iinuuch chechii pachishtinaatwaau aweyuu mikw chechii ishi wiyaaskunaakanuyich eshkw ekaa mechim chii waapamaayich aniyuu kaa wii wiyaaskunikut kaye ekaa mechim chii naatamaasuut taan waa ishi wiyaaskunaakanuut anite wiyaaskunichesuu e ihtaayich.

¹⁷ Iskutak maak tekushihkwaau utah, tiiwehch nichii wii nanihiipayihtawaan chechii wiyaaskunaakanuyich Paul. An wiyaapahch nichii ituhten wiyaaskunicheukamikuhch. Iskutak maak kaa waweyapiyaan ekw kaa itashuweyaan chechii pechi piihtakahaakanuut an kaa wii wiyaaskunaakanuut, eukw uu Paul.

¹⁸ Ekw anichii kaa ihtakuniyich taan kaa wiishi ataameyimaatwaau Paul namui uhchi ishi ataameyimeuch aniyuu kaa iteyimakwaau che ishi ataameyimaatwaau.

¹⁹ Aniyuu taan e ishi taapwehtamiyich Paul ekun aniyuu kaa aayimuutahkwaau ekaa nihaau wiyawaau taan e ishi taapwehtahkwaau ishi waawiihtamiyich. Kaye maak e chii itweyich Paul Jesus e pimaatisiyich e chii maak nipiyich.

²⁰ Ekw maak niya ekaa kiipaa naashch chischeyihtamuch uyuu chekwaayuu kaa ayimitutahkwaau, nichii kakwechimaau Paul waa ituhtekwe Jerusalemihch chechii wiyaaskunaakanuut.

²¹ Chii nituweyihtam maak yaapach anit chipahutuukamikuhch chechii kanuweyimaakanuut pitamaa. Caesar chii nituweyimeu chechii wiyeyihtamiyich taan che ihtuutawaakanuut. Ekw maak kaa itashuweuch anite chipahutuukamikuhch pitamaa chechii kanuweyimaakanuut paatish chii itishahuke nete Caesar e ihtaayich.”

²² Ekw an chisheuchimaau Agrippa kaa itaat aniyuu Festus, “Niwii nituhtuwaau kaye niya uu naapeu.” Ekw Festus kaa itaat, “Ekute. Waapahche chika chii nituhtwaau taan che itwet.”

²³ Miin maak aniyuu wiyaapaniyich Agrippa ekw maak aniyuu wiichishaaniskwem Bernice chii takushinuuch anite che ayiminaanuyich. Chii pechi wiicheukuch nitupayuuchimaauh ekw maak aniyuu kaa niikaanishkuwaayich iinuu anit ihtaawinihch. Naashch chii miywaashpisuuch iskutak piyechi piihchetwaau kaye naashch yaakwaau chii ihtinaanuu an e pechi piihchaanuuhch e ishpish chisteyimaakanuutwaau anichii Agrippa ekw maak Bernice. Ekw chisheuchimaau Festus kaa itashuwet Paul chechii pechi piihtakahaakanuyich.

²⁴ Iskutak maak kaa pechi piihtakahaakanuyich ekw kaa ayimit Festus anite aniyuu kaa nishtuwiinaanuyich. Chii itweu maak, “Chisheuchimaau Agrippa kaye misiwe chiyawaau utah kaa ihtaayekw, chiwaapamaawaau uu naapeu kaa pechi piihtakahaakanuut. Eukw uyuu naapeu uchii Jewa iinuuch utah kaa ihtaatwaau kaye maak anite Jerusalemihch kaa ihtaatwaau kaa ihtakuniyich taan kaa ishi ataameyimaatwaau. Mitun chii ishi aasihkweuch ekaa mechim iteyihtaakusiyich chechii pimaatisiyich kaa ishpish chii machisinihwaatwaau.

²⁵ Namui maak niya wii nuuhchi miskamuwaan taan kaa ishi wanituutamiikwen chechii uhchi iteyihtaakuniyich chechii nipahaakanuyich. Ekw maak wiya uu naapeu chii nituweyihtam nete aniyuu chihchiwe chisheuchimaau Caesar e ihtaayich chechii wiyaaskunaakanuut. Ekw maak kaa wiyeyihtamuch nete e ihtaayich chechii itishahuuk.

²⁶ Ekw mikw namui nihaau nichischeyihtamuwaan taan che itashtaauch e masinahamaamach Caesar e tipaachimak. Eukw maak uu wehchii peshuuk utah e ihtaayin chii chisheuchimaau Agrippa kaye maak chiyawaau misiwe utah kaa ihtaayekw. Ekw maak iskutak chii miskamuwekwe taan kaa ishi machituutahk, ekw che chischeyihtamuch taan che itashtaauch masinahamaamichen Caesar.

²⁷ Wesh taan che ishinaakuhch itishahuke nete awen e chii maakunaakanuut ekaa maak mechim ihtakuniyiche taan chechii ishi masinahamuch e chii ishi machituutahk.”