ᐊᐸᔅᑕᓚᒡ 24 - Chishemanituu Utayimuwin: Kaa Uskaach Testament

Jewa iinuuch kaa nituweyimaatwaau Chisheuchimaau Felix chechii wiyaaskunaayich Paul

¹ Niyaayin chiishikaau maak ishpish ekw an chisheayimiheuchimaau Ananias kaa ishinihkaasut chii takushinuu anit Caesareahch. Chii wiicheukuu pasch aniyuu kaa niikaanishkawaayich Jewa iinuuh kaye aniyuu wiyaaskunichesuu Tertullus kaa ishinihkaasuyich. Ekw kaa nituwaapamaatwaau aniyuu chisheuchimaau Felix e waawiihtamuwaatwaau taan kaa iteyimaatwaau Paul e ishi wanituutamiyich.

² Ekw Paul kaa wiishaamaakanuut chechii piihchet. Iskutak maak kaa piihchet ekw Tertullus kaa chihchi waawiihtahk taan kaa ishi ataameyimaakanuyich aniyuu Paul. Chii iteu aniyuu Chisheuchimaau Felix, “Chiya, Chisheuchimaau, naashch kaa kaschihuyin e niikaanishkaacheyin, chineush namui uhchi ihtakun chechii mamachipayinaanuuhch ute chiyaanuu itehche e ihtaayihkw, muush chii chiyaameyihtaakun. Kaye nanaahkuu chekwaayuu chichii aahchihtaan chechii uhchi miyupayinaanuuhch.

³ Misiwe maak taanite e ati aihtaayaahch taapwe chiniskumitinaan taan kaa ishi ihtuutaman kaa ishpish uchimaawiyin ute e ihtaayaahch.

⁴ Ekw maak ekaa naashch chechii utamihiitaahch, chichii wii ishi kakwechimitin an kiipaa e ishi miyuhtwaayin chechii nituhtawiyin taan che itweyaan. Namui chineush chika uhchi ayimihiitin.

⁵ Nichischeyimaanaan uu naapeu, Paul e machipayihtaasut. Ihtakuniyuu taan e ihtit ati wehchi ihtuutawaat uyuu Jewa kaa itiskaanesiyich iinuuh misiwe utah aschiihch kaa aihtaayich chechii mamachipayihtaasuyich. Wiichihiiweu kaye e niikaanishkuwaakanuyich aniyuu Nazarene kaa ishinihkaataakanuyich naashch nitamukw kaa ishi kataapwehtamiitwaau.

⁶ Waawaach chii wii maayeyihtam Jewa chisheayimiheukamikuyuu, ekw mikw ekut kaa maakunachiht. Anite maak niyaan niwiyaaskunichewinaahch ekute kaa wii ishi wiyaaskunachiht.

⁷ Mikw maak an nitupayuuchimaau Lysias kaa ishinihkaasut kaa takushihk, namui naashch uhchi manaatisiyuu e miskamikuyaahch uyuu naapeu.

⁸ Ekw kaa itikuyaahch wii mamishimekwe Paul, ekut utah nipaa takushinaan chii e ihtaaut, chiya chechii wiyaaskunat. Ekw maak chiya wechiihch chechii nituu chischeyimat taan e ihtit. Kakwechimate maak Paul, chiya niyaanitam chika chii nituu chischeyihtamuwaan uyuu taan e ishi mamishimaakanuut.” Eukw uyuu kaa itaat Tertullus aniyuu chisheuchimaau Felix.

⁹ Ekw anichii Jewa iinuuch anichii aniyuu Tertullus kaa wiichewaatwaau kaye wiyawaau ekun kaa itwetwaau taapwe Paul e chii wanituutamiyich.

Paul kaa wiihtamuwaat aniyuu Chisheuchimaau Felix ekaa uhchi wanituutahk

¹⁰ Ekw an chisheuchimaau kaa miyaat aniyuu Paul chechii ayimiyich, ekw Paul kaa itwet, “Chichischeyimitinaan shaash mihchetu pipun wiyaaskunichesuu e chii itapiyin ute itehche uchii Jewa iinuuch e ihtaatwaau. Nimiyeyihten maak e nihiipayihch kuiskw chechii ishi aayimuutamaataan kaye niya uu taan waa ishi wawiyaaskunikuyaan.

¹¹ Namui uste niishushaap chiishikaau kaa ihtaayaan anite Jerusalemihch e chii nituu ayimihaayaan. Chiya niyaanitam chika chii nituu chischeyihten e taapweyaan uu kaa ititaan.

¹² Uchii maak kaa ihtakuniyich taan waa ishi pechi mamachisinihuutwaau namui nuuhchi waapamikuch chechii machipayihkahtaamach aweyuu anite Jewa chisheayimiheukamikuhch. Namui kaye nuuhchi waapamikuch chechii ihtuutaamach aweyuu chechii mamachipayihtaasuyich anite nanaahkuu Jewa ayimiheukamikuhch maak aahchiiuh anit Jerusalemihch.

¹³ Kaye maak namui nihaau chika chii waapahtiikuch taapwe e taapwetwaau aniyuu taan e ishi pechi ataameyimitwaau.

¹⁴ Maau mikw cheshtinaash kuiskw chechii ishi wiihtamaataan. Ekute e ishi wiichihiiweyaan kaye niya anichii kaa pimuhtetwaau aniyuu meskanaayuu Chishemanituu kaa itweyich che ishi pimuhtaanuyich chechii uhchi pimaachihunaanuyich. Eukw uyuu nitamukw e ishi kataapwehtaakanuuhch kaa ishinihkaatahkwaau wiyawaau uchii Jewa iinuuch. An Chishemanituu aniyehkaanaanich aanische niwaahkuumaakanaanich kaa nuuchiishtuwaatwaau eukun an e nuuchiishtuuk kaye niya. Niya maak wii nitaapwehten misiwe chekwaan taan e ishi wiihtaakuhch anite Moses uwiishuwewinihch kaye misiwe taan e itashtech anite anichii uchischiwehiichesuuch umasinahiikaniwaahch.

¹⁵ Nitaapwehten kaye niya kaau che wanishkaatwaau misiwe kaa nipitwaau, anichii kaa machituutahkwaau kaye anichii kaa miyutuutahkwaau. Eukw maak uyuu e ishi taapweyimak Chishemanituu che ihtuutahk muyaam kaye wiyawaau uchii Jewa iinuuch e ishi taapwehtahkwaau.

¹⁶ Suuhk maak nanaakataweyimisun ekaa chechii maayeyimak Chishemanituu kaye maak iinuuch chechii uhchi cheshtinaahuyaan kuiskw e ihtiyaan.”

¹⁷ “Mihchetu pipun namui nuuhchi ihtaan anite Jerusalemihch. Iskutak maak kaau kaa takushiniyaan anit, nichii petawaauch nitiiniimach pachishtinichewiniyuu e chii miyaakanuyich aniyuu kaa chistimaatisiitwaau, ekw maak eyuu nichii naachayimihaan chechii machishtawehamuuk Chishemanituu.

¹⁸ Ekut maak anit mekwaach kaa ihtaauch kaa waapamitwaau anichii Jewa iinuuch anite Asia aschiihch kaa uhchiitwaau. Shaash nichii ihtuutamuwaan taan kaa chii ihtinaanuuhch chechii payehchihiisunaanuuhch. An maak mekwaach namui uhchi mihchetuuch awenichii anit kaye namui chekwaan uhchi ishi machipayuu.

¹⁹ Mikw anichii Jewa iinuuch anite Asia aschiihch e uchiitwaau chii ihtaauch anit. Eukunich maak anichii chipaa ihtaauch utah e ihtaaut chechii wiihtahkwaau taan kaa ishi wanituutamuwaane.

²⁰ Uchii maak utah kaa ihtaatwaau kakwechimaahkuuch kaa miskamuwaakwenich e chii wanituutamuch mekwaach kaa wiyaskunitwaau anite Jewa kaa maamuupishtamiyich wiyaaskunichewiniyuu e ihtaayich.

²¹ Peyakw kiipaa chekwaayuu nichii itwewaan anit kaa uhchishkuukaapuushtuukwaau, maak eukw uyuu waa uhchi wiyaaskuniwaakwenich. Nichii chishewewaan e itweuch, e taapwehtamaan anichii kaa nipitwaau kaau che wanishkaatwaau. Ekun wehchi wiyaaskunikuyaan utah e ihtaayekw anuhchiish uu kaa chiishikaach.” Ekun kaa itaat Paul aniyuu chisheuchimaau Felix.

²² Chisheuchimaau Felix maak kaye wiya chii miyu chischeyihtam aniyuu meskanaayuu Chishemanituu kaa itweyich chechii ishi pimuhtaanuyich chechii uhchi pimaachihunaanuyich. Ekw kaa chipahahk aniyuu e ishi wiyaaskunikaanuyich ekw kaa itaat aniyuu Paul, “Iskutak chii takushihke an shimaakanisha kaa wiishuwaataat Lysias kaa ishinihkaasut ekw chihchiwe che wiyeyihtamaan taan che itashuwaatitaan.”

²³ Ekw kaa itaat aniyuu nitupayuuchimaauh aniyuu kaa naanaakachihaayich Paul yaakwaau yaapach chechii naanaakachihaakanuyich aniyuu Paul mikw ekaa tekash chechii mamechiminaakanuyich. Chii itashuweu kaye chechii pachishtinaakanuyich uwiichewaakaniyuu chechii wiichihiikuyich taan che ishi naanituweyihtamiikwen chekwaayuu.

Paul kaa ayimihaat aniyuu Chisheuchimaau Felix kaye aniyuu wiichiskweuyuu

²⁴ Namui maak chineush, ekw miin kaa takushihk an chisheuchimaau Felix, wiichiskweu Drusilla e pechi wiichewaat. Jewa chii itiskaanesiyuu aniyuu wiichiskweu. Ekw kaa wiishaamaat Felix aniyuu Paul, kaa nituhtuwaat e aayimuutamiyich e taapweyimaakanuyich Jesus Christ.

²⁵ Iskutak maak e ati aayimuutamiyich kuiskutaatisiiwiniyuu kaye che wii miyunaanaakataweyihtamihiikuyich aweyuu taan e ishi pimaatisiyich, kaye aniyuu eshkw che utihchipayiyich e chiishikaayich taanit Chishemanituuh misiwe aweyuu che wiyaaskunaayich, chii kushtaachuu Felix, ekw kaa itaat aniyuu Paul, “Ekute pitamaa. Shaash chika chii maachiin. Iskutak miin nihiipayaane ekw miin che wiishaamitaan.”

²⁶ Mikw maak chii ihtakuniyikupane taan kaa ishi pukuseyimut an chisheuchimaau Felix. Chii pukuseyimekupane Paul chechii miikut shuuliyaayuu ekw maak muush kaa wiishaamaat chechii ayimihiikut.

²⁷ Niishu pipunh maak ishpish ekw kutak aweyuu kaa miiskuchishkaakut an chisheuchimaau Felix. Porcius Festus chii ishinihkaasuyuuh aniyuu kaa miiskuchishkaakut. Ekw maak Felix mikw e wii nanihiiwehaat aniyuu Jewa iinuuh ekut anit chipahutuukamikuhch kaa nakataat aniyuuh Paul.