ᐊᐸᔅᑕᓚᒡ 21 - Chishemanituu Utayimuwin: Kaa Uskaach Testament

Paul kaa ituhtet Jerusalemihch

¹ Iskutak maak kaa waachiyemachihtwaau, ekw miin kaa chihtaashiyaahch chiimaan anit uhchi, ekw anite Cos kaa ishinihkaatech ihtaawin kaa itaashiyaahch, chek kaa ati utihtahamaahch. Miin maak wiyaapahch ekw anite Rhodesihch kaa mishakaayaahch, ekw anit uhchi anite Patara kaa itaashtimitisuyaahch.

² Anit maak an Patara kaa ishinihkaatech ihtaawin ekut kaa ihtakuhch chiimaan anite Phoenicia kaa ishinihkaatech aschii che wii itaashtataakanuuhch. Kaa puusiyaahch an chiimaan. Ekw miin kaa chihtaashiyaahch.

³ Iskutak maak wiyaapahtamaahch an ministikw Cyprus kaa ishinihkaatech shaawinihch itehche nichii ishi miyaauhenaan ekw kuiskw anite Syria aschiihch ekute kaa itaashtimitisuyaahch. An maak ihtaawin Tyre kaa ishinihkaatech anite Syria aschiihch kaa ihtakuhch ekut kaa naatakahaamaahch ekut kaye kaa akwaanaasunaanuuhch.

⁴ Ekw kaa nituwaapamachihtwaau anichii kaa taapweyimaatwaau Jesus anit kaa ihtaatwaau. Peyakw tuushteu maak nichii ihtaawaanaan anit e ihtaatwaau. Anichii maak kaa taapwehtahkwaau Kaa payehchisiyich Ahchaahkwa chii ihtuutaakuuch chechii ayaakwaamimaatwaau Paul ekaa chechii ituhteyich anite Jerusalemihch.

⁵ Mikw maak iskutak wetihchipayihch che chistuhteyaahch, mikw nichii ishi chistuhtenaan. Misiwe maak anichii kaa taapwehtahkwaau kaye wiichiskwewaau kaye utawaashiimuwaau nichii wiicheukunaanich e naasipewachiht. Ekw misiwe kaa niipiskuupiyaahch anit yaayeu e ayimihaayaahch.

⁶ Iskutak maak kaa waachiyemituyaahch, ekw kaa puusiyaahch niyaan an chiimaan, ekw kaa chiiwetwaau wiyawaau.

⁷ Anit maak an Tyre kaa ishinihkaatech uhchi ekw Ptolemais kaa ishinihkaatech ihtaawin kaa kapaayaahch, kaa ati nituwaapamachihtwaau anichii wiichishaanimaauch. Peyakw chiishikaau nichii ihtaawaanaan anit e ihtaatwaau.

⁸ Ekw maak wiyaapahch ekw kaa chistuhteyaahch anite an ihtaawin Caesarea kaa ishinihkaatech kaa ituhteyaahch. Philip maak e ishinihkaasut naapeu anit e ihtaat eukw uu wiichihch kaa ihtaawachiht. Kaa kacheskwet chii itaapatisuu uu Philip kaye eukw uu peyakw anichii niishwaashch kaa tashitwaau kaa wiyaapamaakanuutwaau chechii naatamaachetwaau anite ayimiheukamikuhch Jerusalemihch.

⁹ Chii newiyuuh utaanisa eshkw ekaa niipuyich kaye maak chii uchischiwehiicheyuu.

¹⁰ Weipishchiish maak kaa ihtaayaahch anit, ekw kaa takushinit naapeu kaa uchischiwehiichesuut. Agabus chii ishinihkaasuu. Judea aschiihch chii uhtuhteu.

¹¹ Ekw kaa pechi nituwaapamiyimiht uu naapeu, kaa utinamuwaat Paul upahkuhtehuniyuu, kaa maahkupitahk usith kaye utihchiih ekw kaa itwet, “Maau e itwet Kaa payehchisiit Ahchaahkw, Ekun che itaapahkaatikut aniyuu Jewa iinuu Jerusalemihch kaa ihtaayich an awen tepiyeusiit uyuu pahkuhtehun. Chika ishi pachischishuwaatikuu kaye uyuu iinuuh anite ekaa Jewa kaa itiskaanesiyich e ihtaayich.” Eukw uyuu kaa ishi wiihtahk an Agabus.

¹² Iskutak maak piyehtamaahch aniyuu e itwet, niyaan kaye maak anichii kutakach anit kaa ihtaatwaau, nichii wii chistahamuwaanaan Paul chechii ituhtet Jerusalemihch.

¹³ Mikw maak nichii itikunaan, “Chekwaan wehchi maatuuyekw, nikushikutehen e maatuuyekw. Yaapach wesh nika ituhten anite Jerusalemihch. Shaash wesin nitayeskuwiin namui mikw chechii chipahukuyaan Utipeyihchikeu Jesus utishinihkaasuwin uhchi, nitayeskuwiin kaye che wii nipahiikuwaane wiya uhchi.” Eukw uyuu kaa itikuyaahch Paul.

¹⁴ Namui maak nuuhchii nakaanaanaan, ekw mikw kaa itachiht, “Ekute kiipaa puut che ishinaakuhch. Tepiyaahch Utipeyihchikeu utiteyihtamuwin ispayiyiche.”

¹⁵ Weipishchiish maak nichii ihtaanaan anit, ekw kaa ayeskuwiyaahch anite Jerusalemihch che ituhteyaahch.

¹⁶ Pasch maak anichii kaa taapweyimaatwaau Jesus anite Caesarea kaa uhchiitwaau nichii wiicheukunaanich, ekw kaa ituhtahiyimihtwaau anite naapeu Mnason e ishinihkaasuyich e ihtaayich. Ekut an nipaa ihtaawaanaan wiichihch. Anite Cyprus chii uhchiyuu uu Mnason. Shaash weskach chii taapweyimekupane wiya Jesus.

Paul kaa chiiutamaat James

¹⁷ Iskutak tekushiniyaahch anite Jerusalemihch, naashch chii miyeyihtamuch anichii wiichishaanimaauch iskutak wiyaapamiyimihtwaau.

¹⁸ Miin maak wiyaapahch nichii nituwaapamaanaan James misiwe anit e tashiyaahch. Paul kaye nichii wiicheukunaan. Misiwe anichii kaa niikaanishkuwaatwaau aniyuu kaa taapwehtamiyich anit Jerusalemihch kaa ihtaayich chii ihtaauch anit James e ihtaayich.

¹⁹ Paul maak chii ati waachiyemeu misiwe, ekw kaa ati waawiihtamuwaat misiwe aniyuu taan kaa ishi ihtuutamaakuyich Chishemanituu aniyuu ekaa Jewa kaa itiskaanesiitwaauh mekwaach kaa waawiihtahk miywaachimuwiniyuu anite e ihtaayitwaauh.

²⁰ Iskutak maak piyehtawaatwaau uchii taan e itaachimuyich Paul misiwe chii maamihchimeuch Chishemanituu. Chek maak e itaatwaau aniyuu Paul, “Niichishaanaan, chiwaapahten taan e ispihchetitwaau ekw Jewa iinuuch e taapweyimaatwaau Jesus utah Jerusalemihch, mihchetwaau chishemitaahtumitanuu e tashitwaau. Misiwe maak eshkw naashch naanaakatuweyihtamuweuch Moses uwiishuwewiniyuu.

²¹ Chii itaachimushtuwaakanuuch maak e chiskutamaamat aniyuu Jewa kaa wiichiyich anite ekaa Jewa kaa itiskaanesiyich e ihtaayich ekaa chechii aapateyihtamihiikuyich Moses uwiishuwewiniyuu, e itatwaau ekaa chechii chischinuwaachishwaatwaau utawaashiimuwaau kaye ekaa chechii aapateyihtahkwaau Jewa ihtuwinh.

²² Uchii maak Jewa iinuuch naashch kaa nanaakataweyihtamuwaatwaau Moses uwiishuwewiniyuu cheshtinaash kata pehtamuch e chii takushinuut. Taan che ihtiihkw maak. Chika wiihtamaatinaan taan kaa iteyihtamihiikuyaahch chipaa ihtinaanuu.

²³ Ihtuut maak uu che ititaahch. Newach naapeuch utah e ihtaatwaau e ihtakuniyich taan waa ishi cheshtinaash tipituutahkwaau peyakw aniyuu Jewa ayimihewin ihtuwiniyuu, taan e ishi nituweyihtaakuniyich anite Moses uwiishuwewiniihch chipaa ihtuutaakanuukupane.

²⁴ Wiicheuch maak uchii naapeuch anite Jewa chisheayimiheukamikuhch e nituu payehchihiisutwaau, che chiishiihkamut aniyuu chipaa ishpish chiishiihkaasuuch, ekw maak chipaa kaaschipaataakanuyuuh ustikwaaniwaauh. Ekw maak che waapahtiiweyin chipimaatisiiwinihch eshkw e chisteyihtamut Moses uwiishuwewin kaye che chischeyihtaakuhch e chii nanatayaachimunaanuuch an kaa itaachimikuyin ekaa aapateyihtamut Moses uwiishuwewin.

²⁵ Ekw anichii ekaa Jewa kaa itiskaanesitwaau kaa taapwehtahkwaau namui nituweyihtaakusuuch misiwe chechii ishi naanaakatuweyihtahkwaau taan e itashteyich Moses uwiishuwewiniyuu. Nichii masinahamuwaanaanich maak e wiihtamuwachihtwaau taan kaa ishi wiyeyihtamuwachiht chechii ishi naanaakachihtaatwaau, eukw aniyuu ekaa chechii miichitwaau chekwaayuu e iskupayiyich e chii machishtawehamuwaakanuyich manituuhkaan, kaye ekaa chechii miichitwaau mihkuyuu kaye ekaa chechii muwaatwaau awesiisa e chii chiputaamaapahkaataakanuyich kaye ekaa chechii pisikwaatisiitwaau.”

²⁶ Paul maak chii pishichihtam aniyuu kaa itashumaakanuut. Miin wiyaapaniyich chii wiicheweu aniyuu neu naapeuh chechii payehchihaakanuutwaau wesh eukw uyuu kaa ishi wiihtaakuniyich chechii ihtuutamuwaakupanenich anite Jewa ayimiheusinahiikanihch. Chii ituhteu kaye wiya Paul anite Jewa uchisheayimiheukamikuwiihch. Iskutak maak kaa chiish aihtitwaau taan aniyuuh kaa wii ihtitwaau ekw kaa wiihtamuwaat Paul aniyuu anite ayimiheukamikuhch kaa ayaapatisiyich taan tahtu chiishikaau yaakw chihchiwe chipaa chiishipayuu aniyuu kaa wii ishi naanaakataweyihtamihiikutwaau chechii ihtitwaau. Kaye maak ekut an chipaa ihtakuniyuu taan chipaa ishi machishtawehamaauch chekwaayuu misiwe anit e tashitwaau, Paul ekw maak aniyuu kaa pechi wiichewaat.

Paul kaa maakunaakanuut anite chisheayimiheukamikuhch

²⁷ Niishwaashch chiishikaau maak paatimaa Jewa kaa itiskaanesitwaau anite Asia e uhchiitwaau chii waapameuch Paul anite Jewa chisheayimiheukamikuhch. Ekw kaa ihtuutawaatwaau aniyuu iinuu chechii chishuwaasiistuwaayich aniyuu Paul, ekw kaa maakunaatwaau.

²⁸ Chii ishi tepweuch maak, “Chiyawaau naapeutikw Israel kaa uhchiyekw, pechi wiichihiinaan, eukw uu naapeu misiwe kaa aituhtet e chiskutamuwaat misiwe aweyuu ekaa chechii aapateyimaayich Israel iinuu, kaye Moses uwiishuwewiniyuu kaye maak uyuu Chisheayimiheukamikuyuu namui aapateyihtam. Waawaach kaye chii pechi piihtakaheu maaniteu ekaa Jewa itiskaanesiyich utah chisheayimiheukamikuhch aniyuu ekaa chipaa uhchi piihcheyuu utah. Uyeyuu maak kaa ihtit naashch maayeyihtam aniyuu anit maauch kaa payehkaniyich.”

²⁹ Eukw wehchii itwetwaau uyuu wesh chii waapameuch maaniteu ekaa Jewa itiskaanesiyich Trophimus e ishinihkaasuyich anite Ephesus e uhchiyich e wiichewaayich aniyuu Paul anite ihtaawinihch ekw kaa iteyimaatwaau aniyuu Paul e piihtakahaayich aniyuu maaniteu anite Chisheayimiheukamikuhch, ekaa maak uhchi piihtakahaayich.

³⁰ Mwehch maak misiwe awen anit jerusalemihch e waawaaneyihtahk chii iteyihtaakun. Nanaahkuu chii uhchipahiituuch awenichii. Ekw kaa maakunaakanuut Paul, kaa wiiwiitaapaataakanuut anit ayimiheukamikuhch. Tiiwehch maak chii ati chipahwaakanuuch anichii chisheayimiheukamikw chishtuhkanich.

³¹ Anichii maak iinuuch kaa maakunaatwaau Paul ekut kaa wii ati nipahaatwaau aniyuu Paul. Mekwaach maak e ishpishiihkawaatwaau aniyuu e wii nipahaatwaau, an Rome nitupayuuchimaau chii pehtam taan e ishi machipayinaanuyich anite Jerusalemihch.

³² Tiiwehch maak chii ituhtaheu shimaakanishuuchimaauh kaye shimaakanisha chechii nitawaahtaatwaau taan nihaau e ihtinaanuyich. Iskutak maak wiyaapamikutwaau aniyuu iinuu chii puuniyuuh e kusiihkuwaayich aniyuu Paul.

³³ Ekw an nitupayuuchimaau kaa nituwaapamaat aniyuu Paul ekw kaa maakunaat. Kaa itashuwet chechii maahchikwaapihkaataakanuyich, niishu puuchisiyaapiih e aapataniyikwaauh. Ekw kaa itwet, “Chekw naapeu uu, taan kaa ihtit.”

³⁴ Anichii maak iinuuch anit kaa ihtaatwaau chii nishkuushiheuch. Ekw mikw namui peyakunihch uhchi itweuch, kutakach aahchiiuh e itwetwaau taan e itweyich aniyuuh kutak. Ekw kiipaa namui nihaau uhchii nisituhtam an nitupayuuchimaau taan nihaau kaa ihtinaanuyich, ekw mikw kaa itashuwet chechii piihtakahaakanuyich Paul anite shimaakanishuukamikuhch.

³⁵ Anichii maak shimaakanishach iskutak che ati iskwaahtawiitwaau chechii piihtakahaatwaau Paul anite, nitawaach chek chii uhpineuch kaa ishpish wetaach chii ahkwaateyihtaakusiyich aniyuu iinuu.

³⁶ Anite utaahch chii pechi ihtaauch anichii iinuuch e tepwetwaau e itwetwaau, “Nipahaahkw an naapeu. Nipahaakw.”

Paul kaa wiihtahk ekaa wiyesh uhchi ihtit

³⁷ Mekwaach maak aniyuu e wii piihtakahaakanuut Paul anite chipahutuukamikuhch chii iteu aniyuu nitupayuuchimaau, “Chika chii ititin aa chekwaan.” Ekw kaa itikut, “Greek aa chit ishi ayimin.

³⁸ Namayeu aa chiya an naapeu Egypt kaa itiskaanesit kaa chihchipayihtaat e machipayihkahtawaakanuyich Chisheuchimaau kaye kaa niikaanishkuwaat neuwaau chishemitaahtumitanuu machi shimaakanisha, anite maak pakwaatiskamikaahch kaa ituhtahaat.”

³⁹ Ekw Paul kaa itaat, “Namayeu niya. Jewa nititiskaanesin niya wii, Cilicia kaa ishinihkaatech aschii nuuhchiin anite Tarsus kaa ishinihkaatech ihtaawin ekute mesinaasuyaan chihchiwe e uhchiyaan. Chihchiwe ihtaawin ishi kanawaapahtaakanuu Tarsus. Pechi mii maa chechii ayimihiikwaau uchii iinuuch.”

⁴⁰ Ekw kaa pachishtinikut aniyuu nitupayuuchimaau chechii ayimit. Ekw Paul kaa tahkuhchikaapuut anit iskwaahtawiinaanihch. Kaa uhpinischeyit e nituweyimaat aniyuu iinuu ekaa chechii chistuyich. Iskutak maak ekaa chestuyich, ekw kaa ayimihaat Hebrew e ishi ayimit.