ᐊᐸᔅᑕᓚᒡ 20 - Chishemanituu Utayimuwin: Kaa Uskaach Testament

Paul miin kaa ituhtet Macedonia ekw maak Achaia aschiihch

¹ Iskutak maak kaa ati chipihtewetaakanuyich taan kaa itewetaakanuyich kaye kaa chiiweyich aniyuu iinuu Paul chii wiishaameu aniyuu aweyuuh kaa taapweyimaayich Jesus. Ekw kaa siihchimaat suuhk che wii yaaichikaapuyich taan e ishi taapwehtamiyich. Iskutak maak kaa waachiyemaat ekw kaa chistuhtet Macedonia kaa ishinihkaateyich aschiiyuu e ituhtet.

² Aniyuu maak e ati pimuhtet anite aniyuu aschiiyuu Macedonia kaa ishinihkaateyich chii ati waapameu aniyuu aweyuuh kaa taapwehtamiitwaau nanaahkuu ihtaawinihch kaa ati aihtaayich anite itehche. Eukw uyuu miin kaa siihchimaat chechii yaaichikaapuyich aniyuu taan e ishi taapwehtamiyich kaye e ishi pimaatisiyich. Chek anite Achaia kaa ishinihkaateyich aschiiyuu kaa ati aihtaat.

³ Nishtu piisim maak chii ihtaau anit. Iskutak maak ayeskuwiit che isichimet anite Syriahch, aniyuu unuuh Jewa kaa itiskaanesiyich anit kaa ihtaayich chii wii nipahiikuu, ekw kaa wiyeyihtahk kaau anite Macedoniahch che ituhtet.

⁴ Chii mihchetiyuu maak aniyuu kaa wiicheukut. Sopater chii ishinihkaasuyuuh aniyuu peyakw. Pyrrhus chii ishinihkaasuyuuh uhtaawii uu Sopater. Berea kaa ishinihkaateyich ihtaawiniyuu ekute kaa uhchiitwaau. Ekw miin niishu aweyuu anite Thessalonicahch e uhchiyich chii wiicheukuu Paul, eukun Aristarchus ekw maak Secundus. Ekw miin anite Derbe kaa ishinihkaateyich ihtaawiniyuu chii peyakushiyuu anit e uhchiyich e wiicheukut, eukw uyuuh Gaius. Timothy kaye chii wiicheukuu. Ekw niishu miin aweyuu anite Asia kaa ishinihkaateyich aschiiyuu e uhchiyich chii wiicheukuu, eukw uyuuh Tychicus ekw maak Trophimus.

⁵ Chii niikaanihteuch uchii naapeuch ekw anite Troas kaa ishinihkaatech ihtaawin ekute kaa ashuwaapamiyimihtwaau.

⁶ Anite maak Philippihch ekut kaa uhchi puusiyaahch wii niyaan iskutak an kaa chiishikaach kaa chii muwaakanuut aaihkunaau ekaa uhpisut. Niyaayinuu chiishikaau maak ishpish ekw kaa utihtahuuchihtwaau anite Troas. Ekut kaa ihtaayaahch peyakw tuushteu.

Paul maahchishtai kaa nituwaapamaat kaa taapwehtamiitwaau anite Troas kaa ihtaayich

⁷ An maak miyaachishtaichishkaanuuhch e ati utaakushiyich nichii nishtuwiinaan chechii maamuu miichisuyaahch. Paul maak chii ayimiheu aniyuu aweyuu kaa pechi nishtuwiyich. Wiipach chii wii chistuhteu aniyuu che waapaniyich, ekw maak chineush kaa ati ayimit. Piihiim chii aapihtaatipiskaayuu eshkw e ayimit.

⁸ Anite maak an kaa nishtuwiyaahch ishpimiihtakuhch chii mihchen waashtenamaakan.

⁹ Chii ihtaau maak anit uschiniichuu Eutychus e ishinihkaasut. Anite waasenihtaakaniyuu e ihtakuniyich anit maak e kaahtipaasiyich ekut kaa apit. Chii aapihiikuteyuu maak aniyuu waasenihtaakaniyuu. Aniyuu maak e ishpish chineush ayimiyich Paul chek chii nuuhtehkusuu an naapesh ekw kaa wiiwiipayit aniyuu waasenihtaakaniyuu. Chihchiwe maak chii ishpaanaayuu anite kaa uhchi aamipayit. Iskutak netawaahaakanuut, shaash namui uhchi pimaatisiyuu.

¹⁰ Iskutak maak muushihtaat Paul taan e ispayiyich chii niihtaahtawiyuu, ekw kaa uchihchiihkunipayihut uhpime e ihtaayich aniyuu naapesha kaye kaa ati waauchikwepitaat. Ekw kaa itwet, “Ekaawii aayimeyihtamukw, namui nipuu chii itweu.”

¹¹ Ekw miin ishpimiihtakuhch kaa ituhtet Paul, kaa pahkwenaat aniyuu aaihkunaau che kuuminiyuunaanuyich. Miin maak chii ati ayimiheu. Chek piyetaapaniyich eshkw e ayimit, ekw maak kaa chistuhtet.

¹² Ekw an naapesh kaa wiiwiipayit chii chiiwehtahaakanuu. Nuwach chii miyeyihtamuch anichii iinuuch e pimaatisiyich.

Paul anite Troasihch kaa uhchi chistuhtet anite Miletus kaa ituhtet

¹³ An maak wiyaapahch nichii niikaanaashinaan niyaan anite an Assos kaa ishinihkaatech ihtaawin. Ekut anit nipaa uhchi puusihaanaan Paul. Eukw uyuu kaa itashuwet wesh chii pimuhteu wiya anite ishi.

¹⁴ Iskutak maak kaa nachishkaakuyaahch anite Assos, nichii puusihaanaan ekw anite Mitylene kaa ishinihkaatech ihtaawin kaa itaashiyaahch.

¹⁵ Ekut miin kaa uhchi chihtaashiyaahch ekw an ministikw Chios kaa ishinihkaatech kaa ati yaaihamaahch miin wiyaapahch. Miin maak wiyaapahch ekw miin kutach ministikw Samos e ishinihkaatech kaa utihtahamaach. Miin wiyaapahch ekw anite an ihtaawin Miletus kaa ishinihkaatech ekute kaa misakaayaahch.

¹⁶ Paul maak chii wiyeyihtam ekaa chechii isichimet anite Ephesus, ekw kaa miyaauhamaahch an ihtaawin. Namui uhchi wii utamiiu, wesh chii wii utihtam Jerusalemihch eshkw ekaa Pentecost ishi chiishikaayich.

Paul maahchishtai kaa ayimihaat aniyuu kaa niikaanipiyich anite Ephesus

¹⁷ Paul maak anite Miletus chii uhchi masinahamuweu aniyuu kaa niikaanishkuwaayich umaamuuayimihaauh anite Ephesus kaa ihtaayich e wiishaamat.

¹⁸ Iskutak maak kaa takushiniyich ekw kaa ayimihaat. Chii iteu, “Chichischeyihtenaawaau taan kaa ishi pimaatisiyaan kaa ishpish aihtaayaan ute Asia aschiihch piihiim kaa chistuhteyaan.

¹⁹ E chii atushkuuk Utipeyihchikeu tipahteyimuwinihch ishi kaye aaskuu e chii ishinaakusiyaan e maatuuyaan. Chichischeyihtenaawaau kaye taan kaa ishi aayimihuyaan maan aniyuu kaa ishpish muush chii wii wiyesh ihtuutuutwaau anichii Jewa iinuuch.

²⁰ Kaye maak ekaa uhchi kaatwaatakuch chekwaan taan chechii ishi wiichihiikuyekw. Chichischeyihtenaawaau kaye taan kaa ishi chischinuhamaatakuch anite e nishtuwiinaanuuhch kaye anite chiichiwaawaahch,

²¹ e wiihtamuukwaau taapishkun Jewa kaye Greek kaa itiskaanesitwaau e nituweyihtaakusitwaau chechii kweskaatisiitwaau Chishemanituu e naataatwaau kaye chechii taapweyimaatwaau Chitipeyihchikeminuu Jesus Christ.

²² Nituhtamukw maak, anuhchiish naashch suuhchipayuu Kaa payehchisiit Ahchaahkw chechii nanihiihtuuk e itashumit Jerusalemihch chechii ituhteuch, nipaa ituhten maak anite anuhchiish. Namui nichischeyihten chekwaan che utihtahukuyaan anite ihtaayaane.

²³ Maau mikw chescheyihtamaan, Kaa payehchisiit Ahchaahkw niniikaan wiihtamaakw che kachipahukuch kaye nanaahkuu che ishi aayimihuch misiwe ihtaawinihch che ati ituhteuch.

²⁴ Namui maak mitun wiyesh nititeyihtamihiikun nipimaatisiiwin tepiyaahch iskutak chiishipayihche nipimaatisiiwin utah aschiihch chii chiishitaayaane taan kaa itashumit Utipeyihchikeu Jesus che itaapatisuuch, eukw uyuu chechii waawiihtamuch miywaachimuwiniyuu. Utah maak miywaachimuwinihch ekut e aayimuuteyich Chishemanituu ushaweyihchichewin.”

²⁵ “Nituhtamukw maa, nichischeyihten eukw uu anuhchiish maahchishtai che waapamiyekw chiyawaau uu kaa chii waawiihtamaatakuch Chishemanituu uchisheuchimaawin ute itehche kaa ihtaayekw.

²⁶ Eukw maak uu wehchi kuiskw wiihtamaatakuch uu anuhchiish kaa chiishikaach namui niya nika uhchi ataameyihtaakusin nishuunaatisiite awen utah e tashiyekw.

²⁷ Wesh namui mitun nuuhchi nakaawiin kuiskw chechii ishi wiihtamaatakuch taan e ishi nituweyimitaakw Chishemanituu chechii ihtiyekw, namui mitun chekwaan kuuhchi kaatwaatinaawaau.

²⁸ Suuhk maak naanaakatuweyimisukw kaye suuhk wii miyu kanuweyimaahkuch aniyuuh Kaa payehchisiit Ahchaahkw kaa miitaakw chechii naanaakachihiimekw. Yaakwaau ishi kanuweyimaahkuch umaamuuayimihaauch, wesh Chishemanituu wiya chii tipahahweu uyuuh iskutak Ukusisa kaa pachishtinaat chechii nipahaakanuyich.

²⁹ Nichischeyihten wesh iskutak chii chistuhteyaane, che utihtitaakuch awenichii ekaa kuiskw ishi chiskutamaachetwaau naashch ekaa nanihekaatisiitwaau muyaam mahiihkanich e iteyihtaakusitwaau, chika wii wanaachihtaauch chitaapwehtamuwinuwaayuu.

³⁰ Ehe, waawaach kaye anit niyaanitam e ihtaayekw chika uhchi wiikaapuuch awenichii e kakweschipayihtaatwaau taapwewiniyuu kaye e wii iichepitaatwaau aweyuu kaa taapweyimaayich Jesus wiyawaau chechii nuushuushkaakutwaau.

³¹ Yaakwaamiikw maak, muush chischisikw nishtu pipun utaahch ishi ekaa uhchi puuniyaan muush e chii yaakwaamimitakuch, kaye e chii maatuuyaan kaa ishpish suuhk chii wii wiichihiitakuch.”

³² “Ekw maak anuhchiish chit ishi pachishtishuwaatitinaawaau Chishemanituu ishi e ihtaat che miyu kanuweyimitaakw kaye utayimuwin che shaweyimikuwekw. Ushaweyihchichewinihch ekw maak utayimuwinihch ekut che uhchi miyu nihtaauchiyekw kaye ekut che uhchi ayaayekw aniyuu taan kaa wii ishi miyaat Chishemanituu aniyuu aweyuu kaa wiyeyimaat che utiiniimit.

³³ Chichischeyihtenaawaau ekaa wiiskaat uhchi mushtenamuuk awen ushuuliyaam maak uchekwaanim.

³⁴ Chichischeyihtenaawaau kaye niya tipiiwe e chii ayaapatisiyaan chechii uhchi wauhchistamaasuyaan taan e ishi nituweyihtamaan chechii pimaachihuyaan kaye taan e ishi nituweyihtahkwaau anichii kaa wiicheutwaau.

³⁵ An maak misiwe kaa ati aihtiyaan kaye kaa ishpish chii mistaapatisiyaan muush chichii wii waapahtiitinaawaau taan chipaa wii ishi wiichihaanuuch anichii kaa chistimaatisiitwaau kaye chechii chischisiihkw taan kaa itwet chitipeyihchikeminuu, etituu an awen kaa miiwet chekwaayuu shaweyihtaakusuu ishpishaat an awen kaa miyaakanuut chekwaayuu.”

³⁶ Iskutak maak kaa chiishi ayimihaat Paul aniyuu kaa niikaanishkuwaayich kaa taapwehtamiyich anite Ephesus kaa ihtaayich ekw misiwe kaa niipiskuupitwaau e ayimihaatwaau.

³⁷ Misiwe maak chii maatuuyuu kaye chii waauchikwepitikuu

³⁸ naashch e macheyihtamiyich. Aniyuu maak e chii itaat ekaa miin che uhchi waapamikut eukw uyuu maauch kaa maakuhiikuyich. Ekw kaa ati wiicheukut anite chiimaanihch e ituhtet.