ᐊᐸᔅᑕᓚᒡ 19 - Chishemanituu Utayimuwin: Kaa Uskaach Testament

Paul Ephesus kaa ihtaat

¹ Mekwaach maak Apollos anite Corinth kaa ihtaat, Paul chii papaaituhteu anite aniyuu aschiiyuu ekw chek kaa utahtahk Ephesus. Ekut kaa nachishkawaat pasch aniyuu aweyuuh kaa taapweyimaayich Jesus.

² Kaa kakwechimaat, “Chichii miikunaawaau aa Kaa payehchisiit Ahchaahkw iskutak kaa ati taapwehtamekw.” Ekw kaa itikut, “Namui nuuhchi pehtenaan e ihtaat Kaa payehchisiit Ahchaahkw.”

³ Ekw Paul kaa itaat, “Chekw siikahaahtaachewin maak kaa ishi siikahaahtaakuyekw.” Kaa itikut, “John kaa ishi siikahaahtaachet nichii ishi siikahaahtaakunaan.”

⁴ Ekw Paul kaa itaat, “John chii siikahaahtuweu aniyuu aweyuu kaa wii kweskaatisiyich kaye maak chii Itekupane aniyuu iinuu kaa siikahaahtuwaat, che takushiniyich kutak aweyuu. Eukw maak an yaakw chipaa taapweyimaawaau. Ekun uyuu Jesus John kaa aayimuumaakupane.”

⁵ Iskutak maak anichii iinuuch kaa ayimihiikutwaau Paul piyehtahkwaau uyuu, chii siikahaahtuwaakanuuch Utipeyihchikeu Jesus utishinihkaasuwiniihch ishi.

⁶ Ekw Paul kaa saaminaat, kaa piihchishkaakutwaau Kaa payehchisiyich Ahchaahkwa, kaye chii kweschayimuuch, kaye maak chii ayimistamuweuch Chishemanituu.

⁷ Wiyesh maak niishushaap chii tashuuch maamuu anichii naapeuch kaa saaminaakanuutwaau.

⁸ Nishtu piisim maak chii ihtaau Paul anit Ephesus kaye muush chii piihcheu anite Jewa ayimiheukamikuhch, e ayimihaat aniyuu iinuu ekaa mitun kushtaachit, naashch e siihchimaat chechii taapwehtaakut aniyuu kaa itaatutahk Chishemanituu uchisheuchimaawiniyuu.

⁹ Mikw maak pasch anichii kaa nituhtahkwaau naashch chii siipihtamuch, namui uhchi wii taapwehtamuch, kaye naashch chii maayeyimeuch Paul aniyuu e ishi tipaachimaayich Jesus anit e mihchetinaanuyich. Ekw Paul kaa wiiwiit anit ayimiheukamikuhch kaye kaa wiicheukut aniyuu aweeyuuh kaa taapweyimaayich Jesus, ekw kaa ituhtetwaau anite Tyrannus kaa ishinihkaateyich miichiwaahpiyuu kaa chii nishtuwiinaanuyich ekut maak anit kaa ayimihaat aniyuu iinuu Jesus e aayimuumaat.

¹⁰ Niishu pipun maak ekun kaa ihtinaanuuhch uu, ekw maak mihchetu iinuuch anit Asia aschiihch taapishkun Jewa kaye ekaa Jewa kaa itiskaanesitwaau chii pehtamuch Utipeyihchikeu utayimuwiniyuu.

Taan kaa ispayiyich Sceva ukusisa

¹¹ Chishemanituu maak chii ihtuutaweu Paul chechii suuhchimaamishkaach ihtiyich.

¹² Waawaach utaapishkaakan kaye maak kutak uchekwaanim chii ituhtataakanuyuuh anite kaa aahkusiitwaau aweyuuh e ihtaayich, tiiwehch maak chii miinuwaatisiyuu iskutak tiyaahichinimiyich. Kaye anichii machiahchaahkuch chii wiiwiyuuch anit aniyuu kaa piihchishkuwaatwaau aweyuu.

¹³ Pasch maak Jewa iinuuch kaa chii wiiwiitishihwaatwaau machiahchaahkwa chii papaamuhteuch e kuchihtaatwaau chechii wiiwiitishihwaatwaau machiahchaahkwa Utipeyihchikeu Jesus utishinihkaasuwiniyuu uhchi. Chii iteuch aniyuuh machiahchaahkwa, “Jesus, aniyuu Paul kaa aayimuumaat e kacheskwet, eukun an utishinihkaasuwin uhchi chititashumitinaawaau chechii pechi wiiwiyekw.”

¹⁴ Ekw maak chii ihtaau peyakw kaa niikaanapit ayimiheuchimaau Sceva e ishinihkaasut, niishwaashch e chii tashiyich ukusisa, eukun maak kaa ihtiyich kaye aniyuu ukusisa.

¹⁵ Ekw mikw aniyuu machiahchaahkwa chii nishkuushihiikuuch e itikutwaau, “Nichischeyimaanaan awen Jesus kaye Paul. Chiyawaau maak namui chichischeyimitinaan. Chekwaan maak che uhchi nanihiihtaataahch.”

¹⁶ Ekw aniyuuh naapeu kaa piihchishkaakuyich machiahchaahkwa chii mistakusiihkaakuuch. Chii wiiwiitishimuuch anit waaskaahiikanihch e chii miswaakanihkaatikutwaau aniyuuh naapeu, e musheshkatepahiitutwaau e chii piikupitamiyich uchekwaanimuwaau.

¹⁷ Iskutak maak anichii Jewa iinuuch kaye anichii ekaa Jewa kaa itiskaanesitwaau anit Ephesus kaa ihtaatwaau kaa pehtahkwaau uyuu misiwe chii sechisuuch, ekw maak Utipeyihchikeu Jesus utishinihkaasuwin etituu kaa ati chisteyihtaakanuyich.

¹⁸ Mihchetu maak anichii kaa taapwehtahkwaau chii pechi wiihtamuch anit e mihchetinaanuyich taan kaa ishi machituutahkwaau kaye e miteutwaau.

¹⁹ Mihchetu maak anichii chii petaauch umiteusinahiikanawaau ekw kaa ishkwaasahkwaau anit e mihchetinaanuyich. Ekw kaa achihtahkwaau taan kaa itachihtaakuniiwaakupanenh aniyuuh masinahiikanh, niyaayinumitanuu chishemitaahtumitanuu maak chii ispihchetiyuu shuuliyaawaapiskwa.

²⁰ Uu maak e chii ispayihch chii ati mishihtepayuu miywaachimuwin, an maak e ishpish suuhchipayihch uu miywaachimuwin mihchetu awenichii chii ati taapwehtamuch.

Kaa machipayinaanuuhch anite Ephesus

²¹ Iskutak maak kaa chiishipayihkwaau uyuu chekwaayuu Paul chii iteyihtam kaau chechii ituhtet anite Macedonia kaye Achaia aschiihch ekw miin anite Jerusalemihch itehche chechii ituhtet. “Iskutak chii ituhteyaane anite Jerusalemihch, ekw Romehch nipaa ituhten” chii iteyihtam.

²² Ekw kaa niikaanitishihwaat niishu kaa atushkaakut Timothy kaye Erastus e ishinihkaasuyich anite Macedonia aschiihch chechii ituhteyich, ekw anit Asia weipishchiish kaa ihtaat wiya.

²³ Mekwaach maak anit Ephesus kaa ihtaat, anichii iinuuch chii chishuwaasuuch aniyuu e uskaayich e ishi chiskutamaacheyich Paul e itweyich Utipeyihchikeu Jesus eukw meskanuu chechii uhchi pimaachihunaanuuhch.

²⁴ Wesh chii ihtaau peyakw naapeu anit Ephesus, Demetrius e ishinihkaasut e ushihtaat e ayaapishaashiyikwaau chisheayimiheukamikusha e chischinuwaapahtahk aniyuu anite miyaamihchimaakanuyich aniyuu manituuhkaaniskweu Artemis kaa ishinihkaasuyich. Shuuliyaaunaapiskw chii aapachiheu uyuu e ushihtaat. Chii ataaweu maak aniyuuh. Chii wiichihiikuyuu maak aniyuu kaa wiichaapatisiimikut aniyuu taan kaa ishpish chii mista ushihtaatwaau shuuliyaayuu.

²⁵ Ekw kaa wiishaamaat aniyuu misiwe uyuu kaa itaapatisiyich wesh naashch chii chishuwaasuu ekw kaa itaat, “Chichischeyihtenaawaau e ushihtaayihkw shuuliyaau uu e itaapatisiihkw, kaye chichii pehtenaawaau taan kaa ihtit Paul kaye taan kaa itwet.

²⁶ Mihchetu chii ihtuutaweu iinuu chechii taapwehtamiyich taan e ishi chiskutamaachet ekaa chechii nuuchiishtamiyich chekwaayuu shuuliyaanaapiskuhch e chii uhchi ushihtaakanuyich. Mihchetu maak aweyuu chii taapwehtaakuu utah Ephesus kaa ihtaayich kaye misiwe anite Asia aschiihch kaa ihtaayich.

²⁷ Uyuu maak e ishi chiskutamaachet, namui chika uhchi iteyihtamuch iinuuch e miywaayich chitaapatisuwinaanaayuu. Kaye maak namui chika uhchi nuuchiishtuwaakanuu an kaa chisteyihtaakusit manituuhkaaniskweu Artemis kaye chika wanichischisiitutuwaakanuu, an kaa chii nuuchiishtuwaakanuut utah Asia kaye misiwe e ispichiskamikaayich uyuu aschiiyuu.”

²⁸ Iskutak maak anichii iinuuch piyehtawaatwaau uyuu e itweyich chii chishuwaasuuch ekw kaa ishi tepwetwaau, “Chisteyihtaakusuu Artemis anite Ephesus kaa ihtaat.”

²⁹ Chek maak chii ati mihchetuuch anichii iinuuch e tepwetwaau. Chii niishuuch maak naapeuch, Gaius kaye Aristarchus e ishinihkaasutwaau anite Macedonia e chii uhchiitwaau, e chii wiichewaatwaau Paul. Eukw uyuu naapeuh kaa maakunaatwaau ekw kaa ishitaapaataatwaau anite iinuu kaa chii nishtuwiyich.

³⁰ Ekw Paul kaa wii ayimihaat aniyuu iinuu kaa chishuwaasiyich mikw maak aniyuu kaa taapweyimaayich Jesus namui uhchi pachishtinikuu chechii ituhtet anite.

³¹ Pasch kaye aniyuu kaa atushkuwaayich chisheuchimaau aniyuuh kaa wiichewaakanit chii masinahamaakuu e itikut ekaa chechii ituhtet anite aniyuu iinuu kaa chishuwaasiyich e ihtaayich.

³² Anichii maak iinuuch misiwe chii chishuwaasuuch, pasch chii aashihkweuch e aashitemitutwaau, mihchetu maak namui uhchi chischeyihtamuch chekwaayuu wehchi nishtuwiinaanuyich.

³³ Ekw pasch anichii Jewa iinuuch chii kuhkuneuch naapeu Alexander e ishinihkaasuyich anite niikaanaanihch ishi, e iteyimaakanuut wiya kaa ihtuutahk wehchi chishuwaasinaanuyich. Ekw kaa uhpinischeyit chechii chipihchiyich aniyuu iinuu e tepweyich, e wii wiihtamuwaat ekaa uhchi wiyesh ihtit wii.

³⁴ Iskutak maak anichii iinuuch chescheyimaatwaau Jewa e itiskaanesiyich aniyuu Alexander, misiwe maamuu chii tepweuch e itwetwaau, “Chisteyihtaakusuu Artemis anite Ephesus kaa ihtaat.” Niishu tipahiikan maak chii ishpish tepweuch.

³⁵ Chek maak an peyakw kaa niikaanishkaachet anit ihtaawinihch kaa chipihchihaat e tepweyich. Ekw kaa itaat, “Chiyawaau Ephesus kaa uhchiyekw, misiwe awen chischeyihtam ekut anit Ephesus e ihtakuhch an chisheayimiheukamikw anite kaa chii kanuweyimaakanuut an kaa chisteyihtaakusit Artemis kaye an kaa chisteyimaakanuut asinii chiishikuhch kaa uhchi pachishinit.

³⁶ Namui awen chika chii aanuwehtam uyuu. Puuniikw maak uu e ihtiyekw kaye yaakwaamiikw taan che ihtiyekw.

³⁷ Chichii peshuwaawaauch uchii naapeuch aat maak ekaa uhchi kachemutitwaau anit chisheayimiheukamikuhch kaye maak namui uhchi papaashtaameuch aniyuu Artemis.

³⁸ Ekw Demetrius kaye aniyuu kaa wiichaapatisiimaat wiyesh e iteyihtamuwaakwenich wiyaaskunicheukamikuhch chipaa ituhteuch. Wesh aapahiikanuu an wiyaaskunicheukamikw kaye ihtaauch anichii wiyaaskunichesuuch ekut maak anite chipaa nituu mamishimituuch.

³⁹ Ekw maak e ihtakunikwe miin chekwaan e wii itweyekw, nituu wiihtamukw iskutak anite Ephesus nishtuwiinaanuuhche. Wiyawaau chika wiyeyihtamuch taan che ihtitwaau.

⁴⁰ Kushpanaateyihtaakun chiyaanuu chechii ataameyihtaakusiihkw e machipayihtaasuyihkw uu anuhchiish kaa ihtinaanuuhch. Namui maak chekwaan ihtakun wehchi machipayinaanuuhch kaye namui chika chii wiihtenaanuu chekwaan wehchi ispayihch uu.”

⁴¹ Iskutak maak kaa itwet uyuu an kaa niikaanishkahk aniyuu ihtaawiniyuu, ekw kaa chipahahk aniyuu e nishtuwiinaanuyich.