ᐊᐸᔅᑕᓚᒡ 15 - Chishemanituu Utayimuwin: Kaa Uskaach Testament

Jerusalemihch kaa nishtuwiinaanuuhch

¹ Pasch maak naapeuch anite Judea aschiihch chii uhtuhteuch anite Antiochihch kaa piihchetwaau kaa ati chischinuhamuwaatwaau aniyuuh kaa taapwehtamiitwaau anit kaa ihtaayich, e itaatwaau, “Namui chika chii pimaachihunaawaau paatishkaan chischinuwaachishukuyekwe wesh ekun e itashtech anite Moses uwiishuwewinihch.”

² Paul ekw maak Barnabas chii nishkuushtuweuch kaye suuhk chii wii waapahtiyeuch taapwe e wanipayiyich aniyuu e itweyich. Ekw kaa wiyeyihtaakanuyich Paul ekw maak Barnabas ekw maak pasch anit Antiochihch kaa uhchiitwaau chechii ituhtetwaau anite Jerusalemihch chechii nituu kakwechimaatwaau aniyuu apastalh kaye aniyuu kaa niikaanishkamiitwaauh ayimiheukamikuyuu taan e iteyihtamihiikuyich aniyuu kaa ishi chiskutamaachaanuyich.

³ Ekw kaa ituhtetwaau anite kaa itishahukutwaau aniyuu umaamuuayimihaau. Phoenicia kaye Samaria chii shaapuweshkamuch e waawiihtamuwaatwaau aniyuu umaamuuayimihaau anite kaa ihtaayich e taapweyimaayich Jesus aniyuu ekaa Jewa kaa itiskaanesitwaau. Naashch taapwe chii miyeyihtamiyuu aniyuuh wiichishaanimaauh iskutak piyehtamiyich uyuu.

⁴ Iskutak maak tekushihkwaau anite Jerusalemihch, naasch chii piisaatakuuch aniyuu apastalh kaye aniyuu kaa niikaanishkamiitwaau ayimiheukamikuyuu, kaye aniyuu kutak umaamuuayimihaau, ekw kaa waawiihtamuwaatwaau taan kaa ishi ihtuutamaakutwaau Chishemanituu.

⁵ Mikw maak, pasch anichii Phariseech kaa taapwehtahkwaau, iskutak piyehtawaatwaau Paul e wiihtamiyich e taapwehtamiitwaauh aniyuu ekaa Jewa kaa itiskaanesiitwaauh, chii uhchi pisikuuch e itwetwaau, “Iteyihtaakuniyuu kiipaa anichii kaa taapwehtahkwaau ekaa Jewa kaa itiskaanesitwaau chechii chischinuwaachishwaakanuutwaau kaye wiyawaau kaye chipaa itaakanuuch chechii nanihiihtamuwaatwaau Moses uwiishuwewiniyuu.”

⁶ Ekw anichii apastalach kaye anichii kaa niikaanishkahkwaau ayimiheukamikuyuu chii nishtuwiyuuch e ayimitutahkwaau uyuu kaa ishi kakwechischeyimunaanuyich.

⁷ Chineush maak chii ayimitutamuch uyuu ekw Peter kaa uhchi pisikuut e itwet, “Niichishaanitikw, chichischisinaawaau Chishemanituu e chii wiyaapamit chechii waawiihtamuukwaau miywaachimuwiniyuu anichii ekaa Jewa kaa itiskaanesitwaau, chechii uhchi pehtahkwaau ekw maak chechii taapwehtahkwaau.

⁸ Chishemanituu maak chischeyimeu misiwe aweyuu taan nihaau e iteyihtaakusiyich. Chii nuukuhtaau e nituweyimaat aniyuu ekaa Jewa kaa itiskaanesiitwaauh chechii taapweyimikut muyaam aniyuu Jewa kaa ishi taapwehtamiitwaauh wesh chii miyeu Kaa payehchisiyich Ahchaahkwa muyaam chiyaanuu kaa ishi miitahkw.

⁹ Eukw uyuu kaa ishi waapahtiiwet ekaa aahchiiuh iteyimaat aweyuuh. Chii payehchiheu e wepeyihtamuwaat umachihtwaawiniyuu iskutak kaa taapweyimikut.

¹⁰ Muyaam e wii kakwechihekw Chishemanituu ekun e ihtiyekw. Chitaayimihaawaauch aniyuu e siihchimekuch uchii kaa taapweyimaatwaau Jesus ekaa Jewa kaa itiskaanesitwaau chechii ihtuutahkwaau Moses uwiishuwewiniyuu waawaach aanische chiwaahkumaakanuuch ekaa uhchii ihtuutahkwaau kaye maak chiyaanuu ekaa mechim chii ihtuutamuhkw.

¹¹ Chitaapwehtenaanuu e pimaachihiitahkw Utipeyihchikeu Jesus ushaweyihchichewinihch uhchi. Ekun maak mwehch kaye uchii iinuuch ekaa Jewa kaa itiskaanesitwaau kaa ishi kanawaapamikutwaau iskutak che pimaachihiikutwaau Utipeyihchikeu.”

¹² Misiwe maak awen anit kaa ihtaat namui uhchi chistuu mikw chii nituhtaweuch Paul ekw maak Barnabas e wiihtamiyich taan kaa ishi maamishkaach waapahtiiweyich Chishemanituuh waapahtiiwewinh, kaye maak taan kaa ishi ihtuutamiyich e maamishkaateyihtaakuniyikwaauh chekwaayuuh wiyawaau uhchi anite iinuu ekaa Jewa kaa itiskaanesiitwaauh e ihtaayich.

¹³ Iskutak maak kaa chiishi tipaachimuyich, ekw James kaa pisikuut e itwet, “Nituhtamukw maa, niichishaanitikw,

¹⁴ Simon Peter chichii wiihtamaakunuu taan kaa ihtit Chishemanituu niishtam kaa waapahtiiwet ekaa mikw Jewa iinuuh uhchi wiyaapamaat, kutak aweyuu kaye chii wiyaapameu chechii utiiniimit.

¹⁵ Aniyuu taan kaa itwet Simon, ekun mwehch kaa itwetwaau aniyehkaanaanich uchischiwehiichesuuch. Chii itashtaauch Chishemanituu utayimuwinihch Utipeyihchikeu e chii itweyikupanenh,

¹⁶ paatimaa miin nika takushin ekw che uhpakaapuuhiikwaau anichii iinuuch anite Chisheuchimaau David e ihtaayich kaa uhchiskaanesitwaau anichii e chii pahchishinitwaau.

¹⁷ Eukw maak uyuu che uhchi naanituweyimaatwaau Utipeyihchikeu kaye misiwe anichii kutakach iinuuch, anichii ekaa Jewa kaa itiskaanesitwaau kaa wiyaapamakwaau che utiiniimiyaan,

¹⁸ eukw uyuu kaa itwet Utipeyihchikeu an weskach kaa chischeyihtaakuhtaat uyuu e chii ishi wiyeyihtahk.”

¹⁹ Ekw James kaa itaat miin aniyuu iinuu, “Nititeyihten niya anichii ekaa Jewa kaa itiskaanesitwaau kaa taapweyimaatwaau Chishemanituu, namui chipaa uhchi aayihkamihaakanuuch chechii ishi pimaatisiitwaau aniyuu taan e ishi pimaatisiyich Jewa iinuuh.

²⁰ Chipaa masinahamuwaanuuch uchii e wiihtamuuhkwaau uyuu chechii ishi naanaakatuweyihtahkwaau. Ekaa chechii muwaatwaau awesiisa e chii machishtawehamuwaakanuyich manituuhkaan, kaye awesiisa e chii chiputaamaapahkaataakanuyich maak kaye mihkuyuu chechii miichitwaau kaye maak ekaa wiinisuwinich chechii ishi pimaatisiitwaau.

²¹ Wesh eukw uu shaash weskach kaa ishi pechi kacheskwaanuuhch anite misiwe Jewa ayimiheukamikuhch eshikum ayimiheuchiishikaau ishpin kaa miikuyihkw Moses uwiishuwewin.”

Kaa masinahamuwaakanuutwaau anichii ekaa Jewa kaa itiskaanesitwaau kaa taapweyimaatwaau Jesus

²² Ekw anichii apastalach kaye anichii kaa niikaanishkuwaatwaau umaamuuayimihaauh ekw maak misiwe anichii umaamuuayimihaauch chii naheyihtamihiikuuch taan kaa itweyich James ekw kaa wiyeyimaatwaau niishu naapeuh chechii wiichewaayich Paul ekw maak Barnabas e nituwaapamaayich aniyuu kaa taapwehtamiitwaauh anite Antiochihch kaa ihtaayich. Eukw maak uchii anite kaa itishahwaakanuutwaau, Judas, an Barsabbas kaye kaa chii ishinihkaataakanuut, ekw maak Silas. Chii wiichihiiweuch e niikaanishkuwaakanuyich wiichishaanimaauh uchii naapeuch.

²³ Masinahiikaniyuu chii miyaakanuuch che ituhtataatwaau anite Antiochihch anite umaamuuayimihaau e ihtaayich. Chii itashteyuu maak anit, “Niyaan apastalach, kaye niyaan kaa niikaanishkamaahch ayimiheukamikw, chimasinahamaatinaan chiyawaau niichishaanaanich chiyawaau kaa taapwehtamekw ekaa Jewa kaa itiskaanesiyekw, chiyawaau kaa wiichiyekw anite Antiochihch, Syriahch, ekw maak Ciliciahch.

²⁴ Nichischeyimaanaanich pasch naapeuch utah e uhchiyaahch e uhchiitwaau e chii nituwaapamitaakuch kaye e chii chiskutamaataakuch chekwaayuu chechii uhchi aayimeyihtamekw. Namui maak niyaan nuuhchi itashumaanaanich aniyuu kaa ihtitwaau.

²⁵ Eukw maak wehchii nishtuwiyaahch utah, nichii wiyeyihtenaan maak chechii itishahuchihtwaau awenichii anite e ihtaawekw. Kata pechi wiicheweuch Paul ekw maak Barnabas, aniyuuh niwiichewaakanaanh kaa saachihiimachiht.

²⁶ Uchii maak Paul ekw maak Barnabas, aat mihchetwaau e chii nanehkaachihaakanuutwaau kaye chekaat e chii nipahaakanuutwaau, namui yaapach uhchi puuniyuuch e atushkuwaatwaau Utipeyihchikeu Jesus Christ.

²⁷ Ekw maak Judas kaye Silas nichii wiyaapamaanaanich chechii wiihtamaatakuch taan nihaau e iteyihtamaahch an kaa ishi chiskutamaakuyekw. Ekun maak mwehch che ishi wiihtamaataakuch kaye wiyawaau taan e ishi masinahamaataahch utah.

²⁸ Taapishkun Kaa payehchisiit Ahchaahkw ekw maak niyaan nichii naheyihtenaan ekaa chechii aayimeyihtamihiitaahch mikw maak eukw uu netaweyimitaahch chechii kanuweyihtamekw.

²⁹ Ekaa chechii muwekw awesiis e chii machishtawehamuwaakanuut manituuhkaan, ekaa chechii miichiyekw mihkw kaye ekaa chechii muwekuch anichii awesiisach e chii chiputaamaapahkaataakanuutwaau kaye ekaa wiinisuwinich chechii ishi pimaatisiyekw. Chika miyupayinaawaau ihtuutamekwe uu kaa itashumitaahch. Chiwaachiyemitinaan maak misiwe e tashiyekw.”

³⁰ Iskutak kaa chihchitishahwaakanuutwaau anichii Paul, Barnabas, Judas ekw maak Silas, anite Antiochihch chii pechi ituhteuch. Ekw kaa nishtuunaatwaau aniyuu kaa taapwehtamiyich ekw kaa miyaatwaau aniyuu masinahiikaniyuu kaa masinahamuwaakanuyich.

³¹ Anichii maak iinuuch iskutak kaa ayimihtaatwaau aniyuu masinahiikaniyuu, misiwe chii miyeyihtamuuch kaye chii uhpinikuuch.

³² Judas ekw maak Silas e uchischiwehiichesuutwaau kaye wiyawaau, chineush chii ayimiheuch aniyuu wiichishaanimaauh, ekw maak etituu kaa ati suuhchikaapuyich.

³³ Mihchetu chiishikaau maak chii ihtaauch anit ekw kaa chiiwetwaau. Chii ayimiheshtamaakuuch aniyuu wiichishaanimaauh chechii miyu kanuweyimikutwaau Chishemanituuh.

³⁴ Silas maak chii wiyeyihtam ekut che ihtaat wiya.

³⁵ Paul ekw maak Barnabas ekut kaye wiyawaau kaa ihtaatwaau weipishchiish anit Antiochihch. Chii chiskutamaacheuch kaye chii kacheskweuch Utipeyihchikeu utayimuwiniyuu e aayimuutahkwaau. Mihchetu kaye kutak anit kaa ihtaayich ekun kaa ihtiyich.

Paul ekaa kaa naheyihtahk Barnabas kaa wii chistuhtahaayich John Mark

³⁶ Paatimaa maak Paul chii iteu aniyuu Barnabas, “Kaau maa ituhtetaau aniyuuh ihtaawin anite kaa waawiihtamuhkw miywaachimuwin che nitawaahiikwaau meyuupayiwaakwenich anichii chiichishaanuuch.”

³⁷ Ekw Barnabas kaa wii chistuhtahaat aniyuu John Mark.

³⁸ Mikw maak Paul namui uhchi wii chistuhtaheu wiya, wesh chii nakatikuuch John Mark anite Pamphyliahch kaa ihtaatwaau e chii nuuhtipuuniit eshkw ekaa uhchi chiishihtaatwaau utaapatisuwinawaau.

³⁹ Ekw kaa machipayitwaau Barnabas ekw maak Paul uyuu uhchi, ekw paapihkaan kaa ituhtetwaau. Barnabas chii chistuhtaheu aniyuu John Mark, anite Cyprus ekute kaa itaashitwaau chiimaaniyuu e aapachihtaatwaau.

⁴⁰ Ekw wiya Paul, aniyuu Silas chii chistuhtaheu. Ekw anichii wiichishaanimaauch anit Antiochihch kaa ihtaatwaau kaa ayimiheshtamuwaatwaau Utipeyihchikeu chechii kanuweyimikuyich.

⁴¹ Ekw anite Syriahch kaye Ciliciahch kaa ituhtet Paul, misiwe maak taanite kaa ati ayimihaat umaamuuayimihaauh misiwe chii wiichiheu chechii suuhchikaapuyich.