ᐊᐸᔅᑕᓚᒡ 14 - Chishemanituu Utayimuwin: Kaa Uskaach Testament

Paul ekw maak Barnabas kaa ituhtetwaau anite Iconiumihch

¹ Iskutak kaa takushihkwaau anite Iconiumihch, Paul ekw maak Barnabas chii piihcheuch anite ayimiheukamikuhch, ekw maak aniyuu kaa ishpish chii suuhchihtaakusitwaau e kacheskwetwaau mihchetu Jewa iinuuh kaye aniyuu ekaa Jewa kaa itiskaanesiitwaauh ekut kaa uhchi taapweyimaayich Jesus.

² Ekw anichii Jewa iinuuch ekaa kaa taapwehtahkwaau, chii ihtuutaweuch aniyuu ekaa Jewa kaa itiskaanesiitwaauh chechii machipayihkahtuwaayich aniyuu wiichishaanimaauh.

³ Chineush maak chii ihtaauch anit anichii apastalach. Chii aayimuumeuch maak Utipeyihchikeu ekaa mitun kushtaachitwaau. Ekw maak kaa miikutwaau suuhkaatisiiwiniyuu maamishkaach waapahtiiwewinh chechii waapahtiiwetwaau kaye chechii ihtuutahkwaau e maamishkaateyihtaakuniyikwaauh chekwaayuuh, anit e uhchi nuukuhtaakanuyich e taapwetwaau aniyuu kaa ishi waawiihtahkwaau e chishewaatutaatahkw Utipeyihchikeu.

⁴ Ekw maak iinuuch anit ihtaawinihch kaa ihtaatwaau chii pahkaanihiituuch, pasch chii taapwehtaweuch aniyuu Paul ekw maak Barnabas, ekw kutakach aniyuuh Jewa iinuuh kaa taapwehtawaatwaau.

⁵ Ekw anichii ekaa Jewa kaa itiskaanesitwaau ekw maak anichii Jewa iinuuch kaye aniyuu kaa niikaanishkaakutwaau chii kakweteyimeuch chechii nanehkaachihaatwaau aniyuu Paul ekw maak Barnabas kaye chechii nipahaatwaau e paahpimusinaatahwaatwaau.

⁶ Iskutak maak Paul ekw maak Barnabas piyehtahkwaau uyuu, anite Lystra ekw maak Derbe kaa ishinihkaateyikwaauh ihtaawinh chii ishi ushimuuch. Anite Lycaonia aschiihch chii ihtakuniyuu uyuu ihtaawinh. Anite kaye waaskaa aniyuu aschiiyuu ekute kaa papaaituhtetwaau.

⁷ Ekut anite kaa waawiihtahkwaau uyuu miywaachimuwiniyuu.

Lystra ekw maak Derbe kaa ishinihkaatekwaauh ihtaawinh kaa ituhtetwaau Barnabas ekw maak Paul

⁸ Anite maak Lystra chii ihtaau peyakw naapeu e chii maaskaniyikwaauh usit ekaa uhchi nihtaautet ekun maak shaash kaa ishinaakusikupane kaa pimaatisiit.

⁹ Mekwaach maak anit e apit an naapeu chii nituhtaweu aniyuu Paul e ayimiyich. Iskutak maak Paul kaa chischeyihtahk e taapwehtamiyich aniyuu naapeu chechii miinuwaachihaakanuyich, kuiskw chii kanawaapameu

¹⁰ ekw kaa itaat e chishewet, “Pisikuuh, tashukaapuu maak.” Chii uhchi pisikushipahtaau an naapeu, kaa ati papaamuhtet.

¹¹ Iskutak kaa waapahtahkwaau anichii iinuuch taan kaa ihtuutamiyich Paul, chii tepweuch Lycaonia ayimuwiniyuu e ishi ayimitwaau, “Manituuch kuutihtikunuuch mwehch naapeuch e ishinaakusitwaau.”

¹² Aniyuu Barnabas eukw uu Zeus chii iteyimeuch. Ekw aniyuu Paul Hermes chii iteyimeuch. Wesh aniyuu Paul muush wiya e chii ayimiyich eukw uyuu Hermes wehchi iteyimaatwaau. Wesh eukw kaa ishi taapwehtahkwaau e ihtiyich Hermes kaa ishinihkaasuyich umanituumiwaau.

¹³ Chii ihtaau maak ayimiheuchimaau e atushkuwaat aniyuu Zeus kaa ishinihkaasuyich. An maak ayimiheukamikw anite kaa chii maamihchimaakanuut uu Zeus wiiwiitamihch anit an ihtaawin chii ihtakun. An maak ayimiheuchimaau chiwii piihtakaheu mistusa kaye waapikun anite e ishkwaahtemuuniyich aniyuu ihtaawiniyuu chechii machishtawehamaanuyich. Chii wii ihtuutam uyuu kaye aniyuuh iinuuh chii wii ihtuutamiyuuh e chii wii machishtawehamuwaatwaau aniyuu apastalh.

¹⁴ Iskutak Paul ekw maak Barnabas kaa chischeyimaatwaau aniyuu iinuu manituuhkaan e wii itaapachihiikutwaau chii piikupitamuch uchekwaanimuwaauh e nuukuhtaatwaau ekaa naheyihtahkwaau aniyuu waa ihtiyich, ekw kaa ispahiitutwaau anite aniyuu iinuu e ihtaayich ekw kaa itaatwaau e chishewetwaau,

¹⁵ “Naapeutikw ekaawii ihtuutamukw uu, naapeuch wesin kaye niyaan muyaam chiyawaau e iteyihtaakusiyekw ekun e iteyihtaakusiyaahch. Chiwii wiihtamaatinaan miywaachimuwin chechii uhchi puunihekuch e ayimiheshtawekuch anichii nitamukw manituuhkaanich. Miiskuch anite Chishemanituu kaa pimaatisiit e ihtaat chechii ishi ayimihaayekw, an kaa ushihtaat kihchikiishikuyuu, aschiiyuu, chihchikamiyuu kaye misiwe chekwaayuu kaa ishi pimaatisiimakaniyich anite.

¹⁶ Anite utaahch chii pachishtineu Chishemanituu misiwe e itiskaanesiyich aweyuu chechii ishi pimaatisiyich taan waa ishi pimaatisiyich kaye chechii ishi ayimihaayich taan waa ishi ayimihaayich.

¹⁷ Yaapach maak Chishemanituu muush chii chischeyihtamiheu iinuu taan e iteyihtaakusit aniyuu uhchi taan kaa ishi miyutuutahk, mwehch kaye chiyawaau chichii ihtuutamaakuwaau chechii chimuuniyich chechii uhchi nihtaauchiniyich miichimiyuu. Chichii miikuwaau miichimiyuu kaye chitihtuutaakuwaau chechii miyeyihtamekw.” Eukw uyuu kaa itaat Paul aniyuu iinuu e wii nikaahwaat aniyuu e wii nuuchiishtaakutwaau.

¹⁸ Aat maak uyuu e chii ishi wiihtamuwaakanuutwaau uchii iinuuch yaapach chii wii nipaheuch mistusa chechii machishtawehamuwaatwaau aniyuu apastalh. Chek maak kaa shaakuuchimikutwaau aniyuu apastalh ekaa chechii ihtuutahkwaau uyuu.

¹⁹ Pasch Jewa iinuuch chii uhtuhteuch anite Antiochihch an ihtaawin anite Pisidia aschiihch kaa ihtakuhch, kaye pasch anite Iconium chii uhtuhteuch, ekw kaa shaakuuchimaatwaau aniyuu iinuu chechii wiichihiikutwaau e wii nipahaatwaau Paul. Ekw kaa paahpimusinaatahwaatwaau ekw kaa wiiwiitaapaataatwaau anit aniyuu ihtaawiniyuu e chii iteyimaatwaau e nipiyich aniyuu Paul.

²⁰ Mikw maak iskutak anichii kaa taapweyimaatwaau Jesus kaa waaskaapuushtawaatwaau aniyuu Paul, chii wanishkaau ekw miin kaau kaa piihchet aniyuu ihtaawiniyuu. Miin maak aniyuu wiyaapaniyich Paul ekw maak Barnabas anite Derbehch chii ituhteuch.

Paul ekw maak Barnabas kaau kaa chiiwetwaau anite Antiochihch anite Syria aschiihch kaa ihtakuhch ihtaawin

²¹ Paul ekw maak Barnabas chii waawiihtamuch miywaachimuwiniyuu anite Derbe, mihchetu maak aweyuu chii taapweyimeyuu Jesus. Ekw miin kaau anite Lystra kaa ituhtetwaau, miin anite Iconiumihch, ekw miin anite Antiochihch.

²² Ekut anit kaa ayimihaatwaau aniyuu aweyuu kaa taapweyimaayich Jesus e siihchimaatwaau chechii memechiminimiyich utaapwehtamuwiniyuu. Chii iteuch kaye e nituweyihtaakuniyich awen chechii nachishkahk nanaahkuu chekwaayuuh e aayimaniyikwaau ekw maak chechii piihchet Chishemanituu uchisheuchimaawinihch.

²³ Ekw maak misiwe taanite kaa ati ihtaayich umaamuuayimihaauh Paul ekw maak Barnabas chii wiyeyimeuch aweyuu chechii niikaanishkuwaayich aniyuu umaamuuayimihaauh anit kaa ihtaayich. Iskutak maak kaa chiishihtaatwaau aniyuu ekaa miichisutwaau mikw e ayimihaatwaau ekw kaa ayimiheshtamuwaatwaau chechii aapachihiikutwaau Utipeyihchikeuh, aniyuuh kaa taapweyimaatwaau.

²⁴ Iskutak maak kaa shaapuweshkahkwaau aniyuu aschiiyuu Pisidia kaa ishinihkaateyich ekw anite Pamphylia kaa ishinihkaateyich aschiiyuu kaa piihchetwaau.

²⁵ Kaa waawiihtahkwaau Chishemanituu utayimuwiniyuu anite Pergahch. Ekw miin anite Attaliahch kaa ituhtetwaau.

²⁶ Ekut maak anit uhchi kaau kaa isichimetwaau anite Antiochihch, anit kaa uhchi chihchitishahwaakanuutwaau ekw maak kaa chiishihtaatwaau aniyuu aapatisuwiniyuu kaa itashumaakanuutwaau chechii ihtuutahkwaau. Eshkw maak ekaa uhchi chistuhtetwaau Antiochihch uhchi, chii ayimiheshtamaakuch iinuu chechii shaweyimikutwaau Chishemanituu mekwaach e aapatisiishtamuwaatwaau.

²⁷ Iskutak maak kaau mesikaatwaau anichii apastalach anite Antiochihch, chii nishtuuneuch aniyuu misiwe umaamuuayimihaauh e waawiihtamuwaatwaau taan kaa ihtuutamiyich Chishemanituu wiyawaau e chii aapachihiikutwaau. Ekw maak anichii iinuuch chii wiihtamaakuch aniyuu apastalh, aniyuu iinuuh ekaa Jewa kaa itiskaanesiitwaauh kaye wiyawaau e taapweyimaatwaau Jesus.

²⁸ Ekut maak utah kaa ihtaatwaau chineush Paul ekw maak Barnabas aniyuu kaa taapweyimaayich Jesus e ihtaayich.