ᐊᐸᔅᑕᓚᒡ 13 - Chishemanituu Utayimuwin: Kaa Uskaach Testament

Barnabas ekw maak Saul kaa chihchitishahwaakanuutwaau chechii atushkuwaatwaau Chishemanituu

¹ Anit maak Antiochihch kaa ihtaatwaau umaamuuayimihaauch chii ihtaauch anit uchischiwehiichesuuch kaye kaa chiskutamaachetwaau. Eukw uchii, Barnabas ekw maak Simeon kaa wiipiset kaa ishinihkaataakanuut ekw maak Lucius, Cyrene kaa uhchiit, kaye Manaen an kaa asich nihtaauchinaakanuut Chisheuchimaau Herod kaa nihtaauchinaakanuyich ekw maak Saul.

² Mekwaach maak anit ekaa miichisutwaau mikw e maamuu ayimiheshtawaatwaau Chishemanituu, ekut kaa ayimihiikutwaau Kaa payehchisiyich Ahchaahkwa e itikutwaau, “Pechi tipaanihaahkuch Barnabas ekw maak Saul wesh nichii wiyeyimaauch chechii ihtuutamuutwaau aapatisuwiniyuu.”

³ Iskutak maak kaa chiishihtaatwaau aniyuu e ihtitwaau ekaa miichisutwaau kaye mikw e ayimihaatwaau, ekw kaa saaminaatwaau e ayimiheshtamuwaatwaau aniyuu Barnabas ekw maak Saul, ekw kaa chihchitishahwaatwaau.

Cyprus kaa ishinihkaateyich ihtaawiniyuu kaa ituhtetwaau Barnabas ekw maak Paul

⁴ Kaa payehchisiit Ahchaahkw maak e chii chihchitishahukutwaau Barnabas ekw maak Saul anite ihtaawiniyuu Seleucia kaa ishinihkaateyich ekute anite kaa uhchi puusitwaau anite ministikuhch Cyprus kaa ishinihkaateyich ekute kaa isichimetwaau.

⁵ Iskutak maak mesikaatwaau anit ihtaawinihch Salamis kaa ishinihkaateyich, chii waawiihtamuch Chishemanituu utayimuwiniyuu anite Jewa iinuuh utayimiheukamikuwiihch. Chii wiicheukuuch maak John Mark chechii wiichihiikutwaau.

⁶ Iskutak kaa chiishi kacheskwetwaau anit ministikuhch ekw anite aniyuu ihtaawiniyuu Paphos kaa e ishinihkaateyich kaa ituhtetwaau. Ekut maak anit kaa nachihaatwaau e maamaahtaawaatisiyich Jewa naapeu Bar Jesus e ishinihkaasuyich, chii machi uchischiwehiichesuuyuu maak uyuu naapeu.

⁷ Kaye maak uu Bar Jesus chii uwiichewaakanuu aniyuu Chisheuchimaau anit aniyuu ministikuyuu kaa ihtaayich, Sergius Paulus kaa ishinihkaasuyich, e chii mista iipwaahkaayich. An maak Chisheuchimaau chii wiishaameu Barnabas ekw maak Saul e wii pehtahk Chishemanituu utayimuwiniyuu.

⁸ Mikw maak uu kaa maamaahtaawaatisiit Bar Jesus kaa ishinihkaasut, Elymas chii ishinihkaatikuu aniyuu Greek kaa ishi ayimiitwaau, chiwii chipihchiheu Barnabas ekw maak Saul chechii wiihtamuwaayich aniyuu Chisheuchimaau miywaachimuwiniyuu, wesh namui uhchi nituweyimeu chechii taapweyimaayich Utipeyihchikeu Jesus.

⁹ Ekw maak Saul, an Paul kaa ishinihkaataakanuut e saakaschineshkaakut Kaa payehchisiyich Ahchaahkwa, chii kanawaapameu aniyuu kaa maamaahtaawaatisiyich naapeu,

¹⁰ ekw kaa itaat, “Muyaam machimanituu utawaashiim e iteyihtaakusiyin, e uhkaataman misiwe kuiskutaatisiiwin. Ekun ekw ishpish wiyeshihiiwe kaye puunii ekw e wii wanaachihtaawat aniyuu taan e ishi nituweyihtahk Chishemanituu chechii itaatisiinaanuyich.

¹¹ Chiwiihtamaatin anuhchiish nuwach chika waaweshihiikw Utipeyihchikeu, weipishchiish maak namui chika uhchi waapamaau piisim,” chii iteu Saul aniyuu kaa maamaahtaawaatisiyich naapeu. Tiiwehch maak chii muushihtaau e piichishepayiyich kaye e uhchi tipischipayiyich e iteyihtahk an naapeu ekw namui uhchi waapahtam, ekw kaa naanitumiskunaat aweyuu chechii papaatahkunischehtahiikut.

¹² Iskutak maak wiyaapahtahk an chisheuchimaau uyuu e ispayiyich chii taapweyimeu Utipeyihchikeu kaye naashch taapwe chii miskaateyihtamihiikuu kaa ishi pehtahk e chiskutamaachaanuyich e aayimuumaakanuyich Utipeyihchikeu.

Antiochihch kaa ituhtetwaau Barnabas ekw maak Paul

¹³ Ekw Paul aniyuu maak uwiichewaakanh ekut anit Paphos kaa uhchi puusitwaau, ekw anite Perga kaa isichimetwaau anite Pamphylia aschiihch kaa ihtakuhch ihtaawin. Ekut anit Pergahch kaa uhchiskatikutwaau John Mark ekw anite Jerusalemihch kaau kaa ishi chiiweyich.

¹⁴ Ekw miin Antiochihch kaa ituhtetwaau anite Pisidia aschiihch kaa ihtakuhch ihtaawin. Kaa Jewa ayimiheuchiishikaayich maak chii piihcheuch anite Jewa ayimiheukamikuhch, ekw kaa apitwaau anite.

¹⁵ Chii ihtaau anite awen ayimiheukamikuhch e ayimihtuwaat aniyuu iinuu ayimihewin wiishuwewinh, kaye aniyehkaanaan uchischiwehiichesuuh kaa ishi masinahamiikupanenh. Ekw maak anichii kaa niikaanishkahkwaau aniyuu ayimiheukamikuyuu kaa kakwechimaatwaau Paul ekw maak aniyuu wiichishaanimaauh chechii ayimihaayich aniyuu iinuu chechii suuhchikaapuyich.

¹⁶ Ekw maak Paul kaa uhpakaapuut, kaa uhpinischeyit e nituweyimaat aniyuu iinuu ekaa chechii chistuyich, kaa itwet, “Niichishaanitikw, taapishkun chiyawaau Jewa kaye chiyawaau ekaa Jewa kaa itiskaanesiyekw kaa nuuchiishtuwekw Chishemanituu, nituhtuukw.

¹⁷ An Chishemanituu, Jewa iinuuch kaa taapweyimaatwaau chii wiyeyimeu weskach chiwaahkumaakanuuh chechii utiiniimit. Chii ihtuutaweu chechii ati mihchetiyich mekwaach anit Egypt aschiihch kaa ihtaayich. Ekw maak e ishpish suuhcheyihtaakusiyich Chishemanituu chii wiiwiihtahiikuuch anit aschiihch uhchi.

¹⁸ Nemitanuu pipun maak chii ishpish siipiiwesiistuweu aniyuu Jewa iinuuh mekwaach anite pakwaatiskamikaahch kaa ihtaayich aat ekaa uhchi nanihiihtaakut.

¹⁹ Chishemanituu maak chii miyeu aniyuu Jewa iinuu aniyuu aschiiyuu Canaan kaa ishinihkaateyich chechii tipiyeusiyich iskutak kaa itashuwet chechii wanaachihaakanuyich aniyuu niishwaashch kaa itiskaanesiyich iinuuh anit kaa ihtaayich.

²⁰ Newaau mitaahtumitanuu miin niyaayinumitanuu pipun maak chii ishpish ihtaauch anit.” “Ekw Chishemanituu kaa wiyeyimaayich aweyuuh che niikaanishkaakutwaau kaye chechii wiyaaskunikutwaau. Chek maak kaa ihtaat uchischiwehiichesuu Samuel.

²¹ Ekw chek uchii iinuuch kaa itaatwaau Samuel e nituweyimaatwaau aweyuu che uchisheuchimaamitwaau. Ekw maak Chishemanituu kaa wiyeyimaat Saul chechii uchisheuchimaamitwaau. Saul maak uhtaawii Kish chii ishinihkaasuyuuh, anite Benjamin e ihtaayich chii uhchiskaanesiyuu. Iskutak maak nemitanuu pipun kaa ishpish chisheuchimaaut,

²² ekw David kaa miiskuchishkuwaat Saul, David kaa chisheuchimaauhiikut Chishemanituu. Chii iteu maak Chishemanituu, David, Jesse ukusisa, eukw meyeyimak naapeu e iteyihtaakusit e ihtuutahk misiwe taan e ishi nituweyimak chechii ihtuutahk.

²³ Chishemanituu maak kaye chii itweu che pechi itishahwaat aweyuu David e ihtaayich e uhchiyich chechii pimaachihaat Israel iinuuh eukw maak uyuu Jesus, aniyuu kaa itwet cheshtinaash che pechi itishahwaat.

²⁴ Eshkw ekaa uhchi chihchipayihtaat Jesus e kacheskwet, John chii kacheschimeu mihchetu Israel iinuuh e itaat, Kweskaatisiikw che nakatamekw chimachaatisiiwinawaauh, kaye maak che siikahaahtaakuyekw.

²⁵ Iskutak maak chekaat kaa chiishihtaat John misiwe taan kaa ishi nituweyimikut Chishemanituu che ihtit, chii itekupane aniyuu iinuu, ‘Awen e iteyimiyekw niya. Namayeu niya Christ an kaa ashuwaapamekw. Shaash wiipach chika takushinuu, namui waawaach nitepicheyihtaakusin niya chechii aapahkunamuch umaschisinh.’ Eukw uyuu kaa itwekupane aniyaa John siikahaahtaacheu.”

²⁶ “Niichishaanitikw, chiyawaau maak kaa uhchiskaanesiyekw Abraham e ihtaat kaye chiyawaau ekaa Jewa kaa itiskaanesiyekw kaa nuuchiishtuwekw Chishemanituu, chichii wiihtamaakunaanuu taanite chechii uhchi pimaachihuyihkw.

²⁷ Wesh anichii iinuuch anite Jerusalemihch kaa ihtaatwaau kaye aniyuu kaa niikaanishkaakutwaau namui uhchi chischeyimeuch Jesus eukw aniyuu upimaachihiiweu, kaye namui uhchi nisituhtamuwaakupanenich taan kaa ishi masinahamiyich aniyehkaanaan uchischiwehiichesuuh taan kaa ishi aayimuumaayich aniyuu Christ. Aat maak eshikum e Jewa ayimiheuchiishikaayich e chii ayimihtuwaakanuutwaau. Mikw maak iskutak anichii Jewa iinuuch kaa nituweyimaatwaau Jesus chechii nipahaakanuyich, ekw kaa tipipayihch taan kaa itasinahiikanuuhch che ispayihch.

²⁸ Ekw anichii iinuuch kaa itaatwaau aniyuu Pilate chechii nipahaakanuyich Jesus, chii chischeyihtamuch maak ekaa uhchi machituutamiyich mikw maak yaapach chii iteuch che nipahaakanuyich.

²⁹ Weskach chii masinahiikanuu anite masinahiikanihch taan che ihtuutaakut iinuuh Christ, misiwe maak chii tipipayuu uyuu, Jesus chii nipahaakanuu ekw kaa niihtinaakanuut aashiteyaahtikuhch, ekw kaa chiskahaakanuut.

³⁰ Chishemanituu maak chii wanishkaaneu nipuwinihch uhchi.

³¹ Mihchetu chiishikaau maak chii waapamikuu aniyuuh aweyuuh Galileehch kaa chii uhchi pechi wiicheukut Jerusalemihch iisku. Chii wiihtamuweyuu maak Israel iinuu miin e pimaatisiit.”

³² “Niyaan maak chipechi tipaachimushtaatinaan miywaachimuwin eukw uu shaash e tipipayiyich aniyuu Chishemanituu taan kaa itaat aniyehkaanaan chiwaahkumaakanuu cheshtinaash che ihtuutahk.

³³ Chii wanishkaaneu Jesus nipuwinihch uhchi. Eukw uyuu Chishemanituu weskach kaa itaakupane aniyaa chiwaahkumaakanuuh che ihtuutahk, ekw maak mekwaach chiyaanuu e pimaatisiihkw e tipipayihch. Wesh chii itashteu anite David unikamuwinihch niishu piskitisinahiikan, Chiya Nikus, anuhchiish kaa chiishikaach niya Chuuhtaawii.

³⁴ Chishemanituu chii iteu che wanishikaanaat nipuwinihch uhchi, ekaa wiiskaat miin che uhchi nipiyich. Itashteu anite Chishemanituu utayimuwinihch Chishemanituu e chii itwet, Taapwe chika miitin aniyuuh payehchi shaweyihchichewinh kaa taapweucheyihtaakuhkwaauh aniyuu kaa itak aniyaa David che miyak.

³⁵ Ekw maak itashteu kaye anite David unikamuwinihch, Namui chika uhchi pachishtinaau kaa payehchisiit chitaapachihaakan chechii nipit, kaye wiiyuu chechii nanaayuuniyich.

³⁶ Wesh David chii atushkuweu Chishemanituu kaye muush chii ihtuutamuweu Chishemanituu utiteyihtamuwiniyuu kaa ishpish pimaatisiit. Ekw kaa nipit, kaa chiskahaakanuut anite kaa chiskahaakanuyich aniyaanaa uwaahkumaakan, wiiyuu maak chii nanaayuupayiniyuu.

³⁷ Jesus maak wiya, aat e chii nipit chii wanishkaanikuu Chishemanituu nipuwinihch uhchi, namui maak miin uhchi nipuu, namui wiiskaat uhchi nanaayuupayiniyuu wiiyuu.

³⁸ Misiwe chiyawaau niichishaanitikw pechi nituhtuukw taan e ishi wiihtamaatakuch, chipaa chischeyihtenaawaau mikw Jesus uhchi ekut chechii uhchi wepeyihtamaakuyekw chimachihtwaawinawaau.

³⁹ Misiwe awen kaa taapweyimaat Jesus taapwe chii wepeyihtamuwaakanuu misiwe umachihtwaawinh, namui wii Moses utayimihewin wiishuwewiniyuuh chika chii kuiskunaakuhiikuu awen.

⁴⁰ Yaakwaamiikw maak ekaa chechii ispayiyekw taan kaa ishi masinahamuwaakupanenich aniyehkaanaanich uchischiwehiichesuuch taan kaa ishi masinahamuwaakupanenich che ispayiyich aweyuu, chii itasinahamuwaakupanenich,

⁴¹ Nituhtamukw maa, chiyawaau kanawaach kaa mamaayeyihcheyekw, maamishkaateyihtamukw kaye wanaatisiikw. Wesh chekwaan nika ihtuuten utah mekwaach eshkw e pimaatisiyekw an ekaa che uhchi taapwehtamihiikuyekw aat awen wii wiihtamaakuyekwe.” Eukw maak uyuu kaa ishi ayimihaat Paul aniyuu iinuuh.

⁴² Iskutak maak che wiiwiitwaau Paul ekw maak Barnabas anit ayimiheukamikuhch chii aayihkamihiikuuch aniyuu iinuuh miin chechii takushihkwaau iskutak Jewa ayimiheuchiishikaayiche etituu chechii chiskutamaakutwaau miywaachimuwiniyuu.

⁴³ Ekw maak mihchetu Jewa iinuuch kaye anichii ekaa Jewa kaa itiskaanesitwaau kaa ayimihewaatisiitwaau chii wiicheweuch aniyuu Paul ekw maak Barnabas. Ekw maak anichii apastalach kaa wiihtamuwaatwaau aniyuu iinuu e itaatwaau, Chishemanituu naashch taapwe chimiyutuutaakuwaau, suuhk kuiskw wii ishi pimaatisiikw chechii uhchi shaweyimitaakw Chishemanituu.

Jewa iinuuch kaa uhteyimaatwaau Paul ekw maak Barnabas

⁴⁴ Miin maak e Jewa ayimiheuchiishikaach, chekaat misiwe e tashitwaau awenichii anit ihtaawinihch kaa ihtaatwaau chii nishtuwiyuuch anit ayimiheukamikuhch e pechi nituhtahkwaau Chishemanituu utayimuwiniyuu.

⁴⁵ Iskutak maak anichii Jewa iinuuch wiyaapamaatwaau aniyuu mihchetu iinuu e wii nituhtamiyich, naashch chii uhteyihtamuch. Chiwii nishkuushtuweuch taan kaa itweyich Paul kaye chii maayeyimeuch.

⁴⁶ Mikw maak Paul ekw maak Barnabas aahch chii suuhcheyimuuch e itwetwaau, “Chishemanituu nichii nituweyimikunaan chiyawaau Jewa iinuuch niishtam chechii wiihtamaataahch utayimuwin. Mikw maak e aanuwehtamekw ekut wehchi nuukuhch ekaa tepicheyihtaakusiyekw chechii ayaayekw kaachiche pimaatisiiwin. Ekw maak che nakatitaahch, che nituu wiihtamuwachihtwaau Chishemanituu utayimuwiniyuu anichii ekaa Jewa kaa itiskaanesitwaau.

⁴⁷ Eukw uyuu Utipeyihchikeu kaa itashumiyimiht chechii ihtiyaahch kaa itwet, Chichii wiyaapamitin chechii waashtuweyin anite nanaahkuu e itiskaanesitwaau awenichii e ihtaatwaau, chechii uhchi chischeyihtahkwaau taanit e uhchi pimaachihiiwet Chishemanituu. Misiwe maak e ispichiskamikaach utah aschii chika pehtaakun.”

⁴⁸ Iskutak piyehtawaatwaau Paul aniyuu kaa itweyich anichii iinuuch ekaa Jewa kaa itiskaanesitwaau nuwach chii miyeyihtamuch kaye chii maamihchimeuch Chishemanituu aniyuu kaa ishi pachishtinamiyich utayimuwiniyuu. Ekw anichii iinuuch kaa wiyaapamikutwaau Chishemanituu chechii ayaatwaau kaachiche pimaatisiiwiniyuu chii chihchi taapweyimeuch Chishemanituu.

⁴⁹ Ekw maak wetaach mishihte kaa ati pehtaakuniyich Utipeyihchikeu utayimuwin.

⁵⁰ Mikw maak anichii Jewa iinuuch chii ihtuutaweuch aniyuu naapeu kaye iskweu naashch kaa chisteyimaakanuyitwaau anit ihtaawinihch chechii chishuwaasiistuwaayich aniyuu apastalh kaye chechii nanehkaachihaayich. Kaye maak chii wiiwiitishihuweuch aniyuu Paul ekw maak Barnabas anit aniyuu aschiiyuu.

⁵¹ Chii pahpuusiteshimuuch maak Paul ekw maak Barnabas. Eukw uyuu e waapahtiiwetwaau ekaa miin che uhchi piskaataatwaau aniyuu iinuu aniyuu ekaa uhchi wii taapwehtamiitwaau miywaachimuwiniyuu. Ekw anite Iconiumihch kaa ituhtetwaau.

⁵² Anichii maak kaa taapweyimaatwaau Jesus anite Antiochihch kaa ihtaatwaau naashch taapwe chii miyeyihtamuch kaye chii saakaschineshkaakuuch Kaa payehchisiyich Ahchaahkwa.