ᐊᐸᔅᑕᓚᒡ 12 - Chishemanituu Utayimuwin: Kaa Uskaach Testament

Taanite kaa uhchi wiihkuchihut Peter anite chipahutuukamikuhch kaa ihtaat

¹ Ekut maak anit wiyesh Chisheuchimaau Herod kaa chihchi nanehkaachihaat pasch aniyuu umaamuuayimihaauh.

² John wiichishaaniyuuh James eukun aniyuu niishtam kaa itashuwaataat che nipahaakanuyich, shimaakanishuu muuhkumaaniyuu e aapataniyich.

³ Iskutak wiyaapahtahk e miyeyihtamiyich Jewa iinuuh uyuu kaa ihtit, ekw kaa itwet Peter kaye chechii maakunaakanuyich. Eukw maak uyuu mekwaach e chiishikaayich anichii Jewa iinuuch kaa makushetwaau, an makushaan kaa chii muwaakanuut aaihkunaau ekaa uhpisikanihkahtuwaakanuut.

⁴ Ekw Peter kaa maakunaakanuut kaa nituu chipahwaakanuut. Maamuu kutwaashaap chii tashiyuu shimaakanisha e naanaakachihiikut, e maamiiskuchishkaatuyitwaau. Neu chii tashiyuu peyakwaau e naanaakachihiikut. Herod maak chii iteyihtam chechii nishtuunaat aniyuu iinuu chiishkwaa makusheyichen. Ekut kaa iteyihtahk chechii wiyaaskunaat Peter anit aniyuu mekwaach.

⁵ Mekwaach maak Peter kaa ihtaat anite chipahutuukamikuhch aniyuu umaamuuayimihaauh suuhk chii ayimiheshtamaakuu.

⁶ Aniyuu maak maahchishtai tepiskaayich che ihtaat Peter anite chipahutuukamikuhch chistuuch niishu shimaakanisha e ihtaayich chii nipaau. Aniyuu maak waapaniyiche ekw chipaa wiyaaskunaakanuu. Niishwaapech maak upuuchishiyaapii chii maahkupitaakanuu. Kaye chii ihtaayuuh shimaakanisha e kanuushkuwaahtaweyich.

⁷ Chek sischikuuch kaa uhchi waashteyich anit Peter kaa chipahwaakanuut, aweyuu Utipeyihchikeu utenchilamiyuu wehchi niipuyich anit e ihtaat. Kaa yaayaahchipitikut e wii kushkunikut ekw kaa itikut, “Chiipiih wanishkaa.” Tiiwehch maak chii ayaapahkupaayuuh aniyuu upuuchishiyaapiih kaa maahkupitaakanuut Peter uhkunitihchiihch.

⁸ Ekw kaa itikut aniyuu enchil, “Waaspisuu, kaye maahkupit chimaschisinh.” Ekun kaa ihtit Peter ekw miin kaa itikut, “Pushtakuhpe, che pechi wiichewiyin.”

⁹ Peter maak chii nuushuushkuweu aniyuu enchil e ati wiiwiyich. Namui maak uhchi chischeyihtam taapwe e ispayikwe uyuu maak mikw e ishinamukwe.

¹⁰ Niishtam maak aniyuu shimaakanisha anite kaa ihtaayich chii ati miyaaskaweuch, miin aniyuu kutak, ekw chek kaa utihtaatwaau aniyuu piywaapiskw chishtuhkan anite e uhchi piihchaanuyich aniyuu ihtaawiniyuu. Sehchei maak chii aapahiipayuu an piywaapiskw chishtuhkan, ekw kaa ati wiiwiitwaau. Iskutak maak e ati pimuhtetwaau anite meskanaahch, sischikuuch chii nakatikuu aniyuu enchil.

¹¹ Iskutak maak Peter miyaamituneyihtahk uyuu kaa ispayit, ekw kaa itwet, “Nicheshtinaahun Utipeyihchikeu e chii pechi itishahwaat utenchilam che pechi wiihkuchihiyich, ekaa chechii pechi wiyesh ihtuutuut Herod kaye anichii Jewa iinuuch ekaa chechii ihtuutuutwaau taan kaa wii ihtuutuutwaau.”

¹² Iskutak maak chescheyihtahk Peter taan kaa ispayit, chii ituhteu anite Mary e ihtaayich, John Mark ukaawiyuuh. Mekwaach maak mihchetu aweyuuh chii nishtawiyuuh anit e ayimihaayich.

¹³ Ekw Peter kaa papaauhiichet aniyuu chishtuhkan, ekw an kuuhpaaneskweu Rhoda kaa nituu chischeyimaat aweyuu aniyuu kaa wii pechi piihcheyich.

¹⁴ Iskutak nesituhtawaat Peter e ayimiyich, kaau chii chiiwepahtaau ekaa mechim aapahwaat aniyuu chishtuhkan chechii piihcheyich e ishpish miyeyihtahk. Ekw kaa nituu wiihtahk Peter e takushiniyich.

¹⁵ Chii itaakanuu maak, “Waaskameyihta maa.” Mikw maak naashch chii wii taapweu e itwet, Taapwe wesin Peter an kaa pechi niiput. Ekw kaa itaatwaau, “Cheshtinaash utenchilam aniyuuh.”

¹⁶ Yaapach maak chii papaauhiicheu Peter ishkwaahtemihch. Chek maak kaa aapahamuwaakanuut, iskutak maak wiyaapamaatwaau, naashch taapwe chii kushkupayuuch.

¹⁷ Chii waashtenamuweu aniyuuh iinuuh chechii puuniyich e ayimiyich. Ekw kaa wiihtamuwaat taanite kaa uhchi wiihkuchihiikut Utipeyihchikeu anite chipahutuukamikuhch uhchi. Ekw kaa itaat, “Wiihtamuwaahkuch James ekw maak anichii kutakach chiichishaanuuch taan kaa ispayaan,” chii iteu. Ekw kaa wiiwiit, aahchiiuh kaa nituu ituhtet.

¹⁸ Miin maak wiyaapaniyich, naashch taapwe chii kushkupayuuch kaye chii sechisuuch anichii shimaakanishach ekaa miskawaatwaau aniyuu Peter anite chipahutuukamikuhch.

¹⁹ Herod maak chii itashuweu chechii naanituweyimaakanuyich Peter, namui maak uhchi miskawaakanuyuuh. Ekw anichii shimaakanishach kaa naanaakachihaatwaau Peter chii kakwechimaakanuuch chechii wiihtahkwaau taan nihaau kaa ispayiyich, ekw Herod kaa itashuwaataat chechii nipahaakanuyich aniyuu shimaakanisha. Iskutak maak uyuu kaa ihtuutawaakanuyich, Herod chii nakatam Judea aschiiyuu, ekw anite Caesareahch kaa ituhtet. Ekute anite kaa wiichit.

Herod kaa nipit

²⁰ Herod maak naashch chii chishuwaahiikuu aniyuu iinuuh anite Tyrehch kaye Sidonihch kaa ihtaayich. Mekwaach maak anite Caesareahch kaa ihtaat chii takushiniyuu iinuu anite Tyre ekw maak Sidon e uhchiyich e chii pechi itishahwaakanuyikupanen chechii miyupayihtaayich taan kaa ishi machipayitwaau Herod ekw maak anichii iinuuch. Wesh ekute anite kaa chii uhtinihkwaau umiichimuwaau anichii iinuuch anite aniyuu aschiiyuu Herod kaa chisheuchimaaututamiyich. Wiya maak Herod chii pachishtishuwaatam aniyuu miichimiyuu. Chii ihtaayuuh maak chisheuchimaau Herod utaapachihaakan Blastus e ishinihkaasuyich, e naanaakatuweyihtamuwaat Herod uwaaskaahiikanimiyuu e itaapatisit. Eukw maak aniyuu kaa shaakuuchimaatwaau chechii wiichihiikutwaau, ekw maak yaakw kaa nituwaapamaatwaau Herod wesh namui uhchi nituweyimeuch chechii chishuwaasiistaakutwaau.

²¹ Ekw Herod kaa wiyeyihtahk aniyuu e chiishikaayich che nituhtuwaat aniyuu iinuuh. Aniyuu maak kaa chiishikaayich chii chisheuchimaawaaspisuu, ekw kaa apit anit chisheuchimaau tehtapuwinihch ekw kaa ayimihaat aniyuu iinuu.

²² Anichii maak iinuuch kaa pehtawaatwaau chii tepweuch e itwetwaau, “Namayeu naapeu uu kaa ayimit, muyaam awen e Chishemanituut ekun e itihtaakusit,” chii itweuch.

²³ Tiiwehch maak Utipeyihchikeu utenchilamiyuu chii ihtuutaakuu Herod chechii mistaahkusit, ekw manichuushiisha kaa ati muukuut mitun e chii ati nipahiikut, wesh taapaa uhchi wii chisteyihtaakuheu Chishemanituu.

²⁴ Wetaach maak mishihte chii waawiihtaakanuyuu Chishemanituu utayimuwin kaye wetaach chii ati mihchetuuch anichii kaa taapwehtahkwaau.

²⁵ Barnabas ekw maak Saul chii chiishihtaauch taan kaa wii ihtitwaau anite Jerusalemihch, ekw maak kaa chiiwetwaau anite Antiochihch. John Mark maak chii chistuhtaheuch.