ᐊᐸᔅᑕᓚᒡ 11 - Chishemanituu Utayimuwin: Kaa Uskaach Testament

Peter kaa wiihtamuwaat aniyuu kaa taapwehtamiyich anite Jerusalemihch kaa ihtaayich taan kaa ispayiyich

¹ Anichii apastalach ekw maak anichii wiichishaanimaauch anite Judea kaa ishinihkaatech aschiiyuu kaa ihtaatwaau chii pehtamuch aniyuu iinuu ekaa Jewa kaa itiskaanesiitwaauh e taapwehtamiyich Chishemanituu utayimuwiniyuu.

² Iskutak maak Peter kaa takushihk anite Jerusalemihch, chii ayimihiikuu aniyuuh kaa chischinuwaachishwaakanuyitwaau kaa taapwehtamiyich ekaa naheyihtamiyich uyuu taan kaa ihtit.

³ Kaa itaatwaau aniyuu Peter, “Chichii ituhten anite anichii iinuuch e ihtaatwaau ekaa Jewa kaa itiskaanesitwaau, waawaach kaye chichii wiichimiichisuumaauch,” chii iteuch.

⁴ Ekw Peter kaa wiihtamuwaat misiwe taan nihaau kaa pechi ispayiyich e itaat,

⁵ “Mekwaach kaa ayimihaayaan anite Joppahch, nichii waapahtiikuun waapahtiiwewin. Nichii waapahten chekwaan e pechi ashiimakahch kihchikiishikuhch uhchi, muyaam ashpimiichisuyaan e ishinaakuhch. Ekw kaa pechi nakaapayihch nihaau anit uhchishkuu e ihtaayaan.

⁶ Iskutak maak peshuch kaa piihteyaapahtamaan nichii waapamaauch nanaahkuu e ishinaakusitwaau awesiisach kaye manichuushach kaye piyeshiishach e ihtaatwaau anit.

⁷ Ekw kaa pehtuuk awen e pechi ayimihiit e iishit, ‘Peter pisikuuh, nipahtaache ekw maak che miichiyin an kaa nipahtaayin,’ nichii itikw.

⁸ Nichii itwen maak, ‘Namui nika uhchi ihtuuten uu Utipeyihchikeu, namui wiiskaat nuuhchi miichin chekwaan e wiinaach e iteyihtaakuhch Jewa wiishuwewinihch kaa wiihtaakuhch ekaa wiiskaat chipaa uhchi miichinaanuu,’ nichii itaau.

⁹ Ekw miin kaa uhchi pehtaakuhch pehtaakusuwin kihchikiishikuhch uhchi e itwet awen, ‘Ekaawii itweh e wiinaach aniyuu Chishemanituu e chii itwet e payehkaniyich.’

¹⁰ Nishtwaau maak nichii ayimihiikuun, ekw miin kaau anite kihchikiishikuhch kaa ishi uchipayihtaakanuuhch an ashpimiichisuyaan.”

¹¹ “Mekwaach maak uu nishtu naapeuch mwehch chii takushinuuch anite Caesareahch e uhtuhtetwaau e chii pechi itishahwaakanuutwaau anit an waaskaahiikan kaa ihtaayaan.

¹² Kaa payehchisiit Ahchaahkw nichii itikw chechii wiicheumach uyuu naapeu kaye ekaa chechii nakaawiyaan chechii wiicheukwaau mikw aniyuu uhchi ekaa Jewa itiskaanesitwaau. Ekw maak kaa wiicheukwaau. Kaye maak kaye uchii kutwaashch kutakach chiichishaanuuch kaa taapwehtahkwaau Joppahch kaa uhchiitwaau nichii wiicheukuch anite Caesareahch e ituhteuch. Misiwe maak nichii piihchenaan anite Cornelius wiichihch.

¹³ Ekw maak Cornelius kaa wiihtamaakuyaahch e chii waapamaakupane enchil e niipuyich anite piihtakamihch wiichihch e itikut, ‘Itishahuu awen nete Joppahch che wiishaamaat aniyuu naapeuh Simon Peter kaa ishinihkaasuyich.

¹⁴ Uu maak naapeu Simon Peter chika waawiihtamaakw taanite chechii uhchi pimaachihuyin kaye misiwe anichii anit e peyakuteusiyin,’ ekun kaa itikuukupane Cornelius aniyuu enchil.

¹⁵ Iskutak maak kaa pehtamaan taan kaa itikuukupane Cornelius aniyuu enchil, ekw kaa chihchi ayimiyaan. Mekwaach maak e ayimiyaan Kaa payehchisiyich Ahchaahkw chii pechi aashiitutaakuuch mwehch chiyaanuu uskach kaa miikuyihkw Kaa payehchisiit Ahchaahkw.

¹⁶ Ekw kaa uhchi chischisiyaan uyuu kaa itwet Utipeyihchikeu, ‘John chichii siikahaahtaakuwaau nipiiyuu, mikw maak Chishemanituu chika siikahaahtaakuwaau Kaa payehchisiyich Ahchaahkwa,’ ekun kaa itwekupane Utipeyihchikeu.

¹⁷ Cheshtinaash maak Chishemanituu chii miyeu aniyuu iinuuh ekaa Jewa kaa itiskaanesiyich aniyuuh kaa payehchisiyich ahchaahkwa mwehch chiyaanuu kaa ishi miikuyihkw iskutak kaa taapweyimahkw Utipeyihchikeu Jesus Christ. Awen maak niya chechii chipihchihiik Chishemanituu taan waa ihtit,” chii iteu Peter aniyuu iinuu.

¹⁸ Uyuu maak e pehtawaatwaau e ishi wiihtamiyich namui uhchii nishkuushtuweuch. Chii chishtaachimeuch Chishemanituu e itwetwaau, “Chishemanituu chii nihiipayihtaau aniyuu iinuu ekaa Jewa kaa itiskaanesiitwaauh chechii kweskaatisiyich kaye chechii pimaachihuyich.”

Kaa taapwehtahkwaau anite Antiochihch kaa ihtaatwaau

¹⁹ Iskutak maak kaa nipahaakanuut Stephen, chii nanehkaachihaakanuuch anichii kaa taapwehtahkwaau, misiwe maak nanaahkuu chii itishimuuch. Pasch maak waahyuu chii ituhteuch muyaam anite aschiihch Phoenicia kaye Cyprus kaa ishinihkaateyikwaauh ekw maak anite ihtaawinihch Antioch, mikw maak aniyuu Jewa iinuuh chii waawiihtamuweuch miywaachimuwiniyuu.

²⁰ Mikw maak pasch anichii kaa taapwehtahkwaau anite Cyprus, kaye maak Cyrene kaa uhchiitwaau chii ituhteuch anite Antiochihch ekw kaa wiihtamuwaatwaau aniyuu Greek iinuu miywaachimuwiniyuu Jesus e tipeyihchicheyich.

²¹ Chii miyaakanuuch maak Utipeyihchikeu usuuhkaatisiiwiniyuu, mihchetu maak awenichii chii taapweyimeuch kaye chii nuushuushkuweuch Utipeyihchikeu.

²² Iskutak anichii umaamuuayimihaauch anite Jerusalemihch kaa ihtaatwaau kaa pehtahkwaau uyuu e ispayiyich chii itishahuweuch Barnabas anite Antiochihch.

²³ Iskutak maak tekushihk Barnabas anite, wiyaapahtamuwaat maak Chishemanituu taan e ishi shaweyimaayich aniyuu iinuu, chii miyeyihtam. Chii siihchimeu maak chechii yaaichikaapuyich kaye suuhk muush che wii nanihiiwehaayich Utipeyihchikeu.

²⁴ Wesh uu naapeu Barnabas naashch chii kuiskutaatisiyuu, kaye chii saakaschineshkaakuu Kaa payehchisiyich Ahchaahkwa, kaye chii suuhcheyihtaakuniyuu utaapwehtamuwin. Ekw maak etituu mihchetu iinuuch kaa taapweyimaatwaau Utipeyihchikeu Jesus.

²⁵ Ekw Barnabas kaa ituhtet anite Tarsus chechii nituu naanituweyimaat Saul.

²⁶ Iskutak maak meskawaat, chii peshuweu anite Antiochihch. Taapishkun maak e niishitwaau mitun peyakw pipun muush chii nishtuuneuch aniyuu umaamuuayimihaauh chechii maamuu ayimihaatwaau kaye mihchetu aniyuu chii chiskutamuweuch. Ekut maak anit Antiochihch maauch niishtam Christianich kaa ishinihkaataakanuutwaau anichii kaa taapweyimaatwaau Jesus.

²⁷ Mekwaach maak uyuu kaa ihtitwaau Barnabas kaye Saul anite Antiochihch, pasch anichii uchischiwehiichesuuch chii ituhteuch anite Antiochihch, Jerusalemihch e uhtuhtetwaau.

²⁸ Peyakw maak an Agabus e ishinihkaasut, chii pisikuu e miikut Kaa payehchisiyich Ahchaahkwa chechii ishi niikaan wiihtahk che pimipayiyich e kauhkataanuyich misiwe e ispichiskamikaayich aschiiyuu. Ekun maak taapwe kaa ispayiyich mekwaach Claudius kaa chisheuchimaawiyich.

²⁹ Ekw anichii chischinuhamuwaakanich misiwe paahpeyakw e tashitwaau kaa wiyeyihtahkwaau suuhk che wiichihaatwaau taan e ishi nituweyihtamiyich aniyuu wiichishaanawaau anite Judea aschiihch kaa ihtaayich.

³⁰ Ekun maak kaa ihtitwaau. Chii itishahuweuch Barnabas kaye Saul chechii ituhtataayich aniyuu shuuliyaayuu anite Jerusalemihch chechii miyaayich aniyuuh kaa niikaanishkamiitwaau ayimiheukamikuyuu.